Sahalak donganta borua na margoar si Sara * mandok, “Parila do au halakna, jala dang percaya diri. Jadi dang lomo rohakku tikki rap dohot halak na asal makkatai. Alai lomo do rohakku tikki rap dohot halak na lambok jala na serep rohana. Boi do hupaboa sude pakkilalaanku tu halak sisongon i, jala boi do huceritahon masalahku. Songon i do akka ale-alekku.”

Sian na didok si Sara i, gabe taboto ma molo lambok hita, lomo do roha ni halak mardongan tu hita. Jala molo lambok hita, gabe las ma roha ni Jahowa. Bibel mandok, “Patuduhon hamu ma . . . lambok ni roha.” (Kol. 3:12) Aha do lambok ni roha i? Songon dia Jesus patuduhon lambok ni roha? Jala boasa boi las rohatta molo lambok hita?

Lambok ni roha, i ma parange na dipatudu halak na marroha dame. Halak na lambok, burju do tikki maradoppon halak na asing. Jala toktong do sabar ibana nang pe adong na mambahen haccit rohana.

Di Bibel, hata Junani na diterjemahon gabe lambok ni roha boi do manggombarhon hoda naung dilatik. Toktong do gogo hoda i, alai ala nungnga dilatik, boi do dikendalihon ibana gogona. Songon i ma halak na lambok. Dang na berarti gale ibana. Gariada, margogo do halak na lambok. Boasa? Ala boi diorom ibana dirina asa toktong mardame dohot halak na asing.

Ra didok rohatta, ‘Dang boi lambok au.’ Memang, godang halak saonari parmuruk-muruk do jala dang sabar. Gabe maol do di hita patuduhon lambok ni roha. (Rom 7:19) Alani i, ikkon marsitutu do hita lao patuduhon lambok ni roha. Alai tondi parbadia ni Jahowa boi mangurupi hita mangulahon i. (Gal. 5:22, 23) Boasa ikkon marsitutu hita patuduhon lambok ni roha?

Molo lambok hita, lomo do roha ni halak mardongan tu hita. Songon si Sara naung dipaboa nakkin, lomo do rohatta mardongan tu halak na lambok. Jesus Kristus ma na gabe sitiruon taringot patuduhon haburjuon dohot lambok ni roha. (2 Kor. 10:1) Biasana, dang olo dakdanak jonok tu halak na so ditanda dope. Alai ala burju jala lambok Jesus, lomo do roha ni dakdanak jonok tu ibana, nang pe dang ditanda nasida Jesus.​—Mrk. 10:13-16.

Molo lambok hita, godang do labana tu hita dohot halak na asing. Boasa? Molo lambok hita,  dang gabe mura-mura hita muruk manang marsak. (Poda 16:32) Dang gabe haccit tabahen roha ni halak na asing, termasuk ma akka halak na tahaholongi. Asing ni i, ala dang tabahen haccit roha ni nasida, gabe dang manolsoli be hita di pudian ni ari.

Nang pe godang tanggung jawab dohot ulaon ni Jesus, alai toktong do ibana lambok tu sude halak. Godang do halak di tikki ni Jesus na marsak jala marmetmet ni roha. Porlu do nasida dipatogu. Alani i, las hian do roha ni nasida tikki didok Jesus tu nasida, “Ro ma hamu tu ahu . . . ai na lambok jala na serep roha do ahu.”​—Mat. 11:28, 29.

Songon dia asa boi hita lambok songon Jesus? Ikkon taparsiajari do Bibel asa taboto songon dia Jesus tikki maradoppon halak na asing, jala aha na diulahon ibana di situasi na maol. Dung i, tikki taadopi situasi na maol, marsitutu ma hita maniru Jesus asa toktong lambok. (1 Ptr. 2:21) Adong tolu na mangurupi Jesus asa boi patuduhon lambok ni roha.

Serep do roha ni Jesus. Didok Jesus, “Lambok jala na serep roha do ahu.” (Mat. 11:29) Di Bibel jotjot do rap ditaringoti dua parange on. Alana adong do hubungan ni lambok ni roha dohot serep ni roha. (Eps. 4:1-3) Boasa?

Molo serep rohatta, dang mura-mura hita muruk tikki adong na mandok na so denggan taringot hita. Aha do na diulahon Jesus tikki adong na mandok molo ibana “simongkus jala sisobur anggur”? Marhite parniulaonna, dipatudu Jesus dang tutu na didok nasida i. Lambok do Jesus mangalusi, “Tarida do bisuk sian parniulaonna.”​—Mat. 11:19.

Molo adong halak na mandok na so denggan tu hamu alani jenis kelaminmuna, suku manang latar belakangmuna, marsitutu ma hamu asa lambok mangalusi. Sahalak sintua di Afrika Selatan na margoar si Peter mandok, “Tikki jut rohakku dibahen alani hata ni sasahalak, husukkun ma dirikku, ‘Aha do na diulahon Jesus molo diadopi ibana songon on?’” Didok ibana muse, “Marsiajar do au asa unang mura-mura muruk.”

Diattusi Jesus do dang sempurna akka jolma. Lomo do roha ni akka sisean ni Jesus mangulahon na sittong. Alai ala dang sempurna, sipata gagal do nasida. Misalna, di borngin andorang so mate Jesus, tarpodom do si Petrus, si Jakobus dohot si Johannes. Hape dipangido Jesus do nasida asa toktong dungo. Alai diboto Jesus do boasa songon i nasida. Didok Jesus, “Rade do nian roha i, alai gale do ia daging.” (Mat. 26:40, 41) Ala diboto Jesus dang sempurna akka siseanna, gabe dang jut be rohana tu nasida.

On ma na ditiru sahalak donganta borua na margoar si Mandy. Najolo, lomo do rohana mangalului hasalaan ni halak. Alai saonari, marsitutu do ibana asa lambok songon Jesus. Didok ibana, “Sai huingot do, dang adong jolma na sempurna. Jadi, marsitutu do au mangida akka parange na denggan sian ganup halak.” Songon Jesus, molo boi taattusi situasi ni halak, gabe boi ma hita lambok tu nasida.

Pos do roha ni Jesus tu Jahowa. Tikki di tano on, jotjot do akka halak mambahen na so denggan tu ibana. Sogo do roha ni akka halak tu Jesus, jala disiksa do ibana. Nang pe songon i, toktong do lambok ibana, ala “dipasahat do dirina tu Debata na tigor manguhumi”. (1 Ptr. 2:23) Diboto Jesus do, urupan ni Jahowa do ibana asa toktong setia. Jala di tikkina, uhumon ni Jahowa ma akka halak na mambahen na so denggan tu ibana.

Molo adong halak mambahen na so denggan tu hita jala tabalos pambahenanna i, boi do gabe lam tamba parsoalan. Memang adong do alasanta muruk. Alai ala dang sempurna, olo do gabe dang boi takendalihon diritta. I do alana didok Bibel, “Halak na tarrimas ndang diulahon i na sintong di jolo ni Debata.”​—Jak. 1:20.

Sahalak donganta borua di Jerman na margoar si Cathy hea marpikkir songon on, “Ikkon membela diri do hita. Dang mungkin adong halak na olo membela hita.” Alai dung marsiajar si Cathy asa marhaposan tu Jahowa, gabe muba ma cara marpikkirna. Didok ibana, “Saonari dang pittor membela diri be au molo disalahon. Boi do au patuduhon lambok ni roha, ala huboto lao padengganon ni Jahowa do sude na masa di portibi on.” Molo hea  dibahen halak na so denggan tu hamu, pos ma rohamuna tu Jahowa songon Jesus. Gabe boi ma hamu toktong lambok.

Jesus mandok, “Marlas ni roha ma na lambok roha.” (Mat. 5:5) Jadi, ikkon lambok do hita asa boi marlas ni roha. Taulas ma laba na tadapot molo patuduhon lambok ni roha.

Molo lambok hita, gabe ummura hita mangadopi masalah di parsaripeon. Sahalak donganta bawa sian Australia na margoar si Robert mandok, “Tikki muruk au, gabe hudok ma hata na mambahen haccit roha ni istrikku. Hape dang songon i maksudhu. Alai dang boi be hutarik hata na hudokkon i. Gabe manolsoli ma au ala nungnga hubahen haccit rohana.”

“Sude do hita jotjot sala” tikki makkatai, jala hata na posi boi mambahen masalah di parsaripeon. (Jak. 3:2) Tikki masa i, tapatudu ma lambok ni roha. On mangurupi hita asa toktong sabar jala mamikkirhon hata na lao tadok.​—Poda 17:27.

Marsitutu do si Robert asa toktong sabar jala mangorom diri. Aha do hasilna? Didok ibana, “Saonari, molo dang sapandapot hami, marsitutu do au manangihon ibana. Lambok do au tikki makkatai, jala dang mura be au muruk. Gabe lam denggan ma parsaripeonnami.”

Molo lambok hita, gabe lam denggan ma hubunganta dohot halak na asing. Molo mura-mura haccit rohatta, gabe dang olo halak mardongan tu hita. Alai lambok ni roha mangurupi hita asa toktong mardame. (Eps. 4:2, 3) Si Cathy naung dipaboa nakkin mandok, “Ala lambok au, gabe mura ma au marsaor dohot halak na asing, termasuk ma dohot halak na so pola jonok tu au.”

Lambok ni roha boi mambahen dame rohatta. Didok Bibel, “habisuhon na sian ginjang” i boi mambahen lambok jala dame rohatta. (Jak. 3:13, 17) Molo lambok hita, gabe dame ma pakkilalaanta. (Poda 14:30) Sahalak donganta na margoar si Martin marsitutu do lao patuduhon lambok ni roha. Didok ibana, “Saonari dang olo be au mamaksahon pandapothu tu halak na asing. Gabe las ma rohakku jala dame pakkilalaanku.”

Memang dang mura asa toktong lambok. Sahalak donganta bawa mandok, “Sasittongna, sahat tu saonari pe, olo do sipata gabe muruk situtu au.” Alai, urupan ni Jahowa do hita asa toktong lambok. Alana Ibana do na mangido hita asa mangulahon i. (Jes. 41:10; 1 Tim. 6:11) Lao togu-toguanna do hita, jala “pargogoanna” do hita. (1 Ptr. 5:10) Ujungna, songon si Paulus, gabe boi ma tatiru “lambok ni roha dohot haburjuon ni Kristus”.​—2 Kor. 10:1.