Didok si Rose, ”Jotjot do ahu hansitan alani sahithon. Sarupa do sahithon songon sahit ni natuatuangku. Gabe susa do huhilala.” Didok muse, ”Sipata alani sahithon, gabe maol do hulehon sude roha dohot pingkiranku tingki marsiajar Bibel manang tingki mangulahon ulaon partondion. Gabe lungun rohangku.” Alai adong ayat na mangurupi ibana, i ma Mateus 19:26, ”Anggo Debata, saluhut do tarpatupasa.” Alani sahitna i, sipata maol do si Rose manjaha. Jadi, dibege ibana ma rekaman panjahaion Bibel dohot angka sijahaon na asing. * Didok ibana, ”Molo ndang adong rekaman i, huhilala ndang boi ahu tongtong jonok tu Debata.”

Lungun do roha ni si Rose ala ndang tolap be gogona mangulahon godang ulaon. Alai tarapul do rohana manjaha 2 Korint 8:12, ”Molo adong ringkot ni roha, halashononhon do na dapot, nda tung salpu sian na dapot.” Sian ayat on diboto si Rose, las do roha ni Debata ala marsitutu ibana mangulahon ulaon sian nasa gogona.

Si Sophia naung dipaboa di halaman ualu mandok, ”Lungun situtu do rohangku ala marujung  ngolu borungku na marumur 18 taon. Hudok ma di rohangku, ’Tumagon ma mate ahu.’ Tompu do muba sude.” Alai tarapul do rohana manjaha Psalmen 94:19, ”Di hinadeak ni holso ni rohangku di bagasan, sai dipasabam angka pangapoim do tondingku.” Didok ibana, ”Martangiang ma ahu tu Jahowa asa unang sai lungun rohangku.”

Asa unang sai lungun rohana, karejo ma ibana. Dipatudos ibana ma dirina songon kapur tulis. Nang pe nunga ponggol, alai boi dope dipangke. Suang songon i ma, nang pe marhabot ni roha, alai boi dope urupanna na asing. Didok ibana, ”Tingki mangajari parsiajar Bibelhu, hulehon do poda ni Bibel laho mangapuli nasida. Tingki huulahon i, dohot do ahu tarapul jala on ma cara ni Jahowa mangurupi ahu.” Disurat ibana ma goar ni angka halak di Bibel na hea marlungun ni roha. Didok ibana, ”Tingki huparsiajari taringot nasida, huboto ma tangiang do na mangurupi nasida. Jadi boi do hita sabar mangadopi sitaonon molo taparsiajari Bibel.”

Dung marsiajar Bibel, ndang lungun ni rohana i be na sai dipingkiri. Tarapul do rohana manjaha ayat di Ulaon ni Apostel 24:15, ”Mulak mangolu sogot angka na tigor dohot angka na geduk.” Pos do roha ni si Sophia na laho paheheon ni Jahowa boruna? Didok ibana, ”Pajumpang do muse ahu dohot borungku haduan. Songon naung marjanji ma hami laho pajumpang muse di tingki naung ditontuhon Bapakku, Jahowa. Huhilala, boi ma hami rap marmeam di taman jala las situtu rohangku.”