Tikki susa hita, pos do rohatta urupan ni ale-aletta do hita. Alai adong do na mandok, dang diurupi Debata nasida tikki susa. Jadi dang dianggap nasida Debata songon ale-ale ni nasida. Hape nungnga godang dilehon Debata akka na denggan tu hita. Jala adong do na lao diulahon Ibana asa malua hita sian sude sitaononta. Aha ma i?

Dipaboa do di Bibel ise na mambahen gabe adong hajahaton di portibi on. Didok do, “Di bagasan huaso ni Sibolis do saluhut portibi on.” (1 Johannes 5:19) Jala didok Jesus do Sibolis i na “mangarajai portibi on”. (Johannes 12:31) Sibolis do na mambahen gabe gok hajahaton di portibi on. Aha ma na lao ulahonon ni Debata tu ibana?

Satokkin nai suruon ni Jahowa ma Jesus lao pamatehon “Sibolis na parohon hamatean i”. (Heber 2:14; 1 Johannes 3:8) Jala diboto Sibolis do na lao dipamate nama ibana jala “otik nama tikkina”. (Pangungkapon 12:12) Akka halak na jahat pe dohot do lao dipamate Debata.—Psalmen 37:9; Poda 2:22.

Dung diripasson Debata hajahaton sian tano on, pasautonna ma sangkapna tu jolma dohot tu tano on. Akka aha ma na lao tahilala?

Dame jala aman ma portibi on. “Molo halak na lambok roha, dilehon do tano on gabe parbagianan ni nasida. Marlas ni roha situtu ma nasida, ai dame do ngolu ni nasida.”—Psalmen 37:11.

Gok sipanganon. “Godang ma tubu sipanganon di ladang, haru di pussu ni dolok pe godang do tubu suan-suanan.”—Psalmen 72:16.

Jabu na denggan jala karejo na palasson roha. “Dibangun nasida ma jabu jala nasida ma na mangingani. Dibahen nasida ma ladang anggur jala nasida ma na mangallang parbuena. . . . Jala marlas ni roha situtu ma akka halak na hupillit i alani hasil ni ulaon ni nasida.”—Jesaya 65:21, 22.

Tarpaima-ima do hamu lao makkilala sisongon i? Satokkin nai songon i ma na lao tahilala ganup ari.

Sude do halak saonari boi marsahit jala mate. Alai satokkin nai dang songon i be na tahilala. Ala nungnga adong tobusan ni Jesus, bahenon ni Debata ma “asa unang mate ganup na patuduhon haporseaon tu ibana, alai asa mandapot hangoluan na saleleng ni lelengna”. (Johannes 3:16) Aha ma na lao masa?

Dang adong be sahit. “Dang adong nanggo sahalak pe na maringanan disi na mandok, ‘Marsahit do au’.”—Jesaya 33:24.

Dang adong be hamatean. “Boddutonna ma hamatean saleleng ni lelengna. Jala apusan ni Jahowa Tuan Natumimbul i ma ilu-ilu sian sude bohi.”—Jesaya 25:8.

Mangolu salelengna ma sude jolma. “Silehon-lehon ni Debata do hangoluan na saleleng ni lelengna marhite Kristus Jesus Tuanta.”—Rom 6:23.

Dipahehe ma akka halak naung mate. “Na lao dipahehe Debata do halak na burju dohot halak na jahat.” (Ulaon ni Apostel 24:15) Ala adong do tobusan umbahen na masa i tu nasida.

Songon dia do Debata pasautton i sude?

Pasauton ni Debata ma sakkapna tu jolma dohot tu tano on marhite sada harajaon di surgo. Jala Jesus ma Rajana. (Psalmen 110:1, 2) Harajaon on do na dipaboa Jesus tikki mangajari siseanna martangiang. Didok ibana do, “Ale Amanami na di banua ginjang, . . . sai ro ma Harajaonmu.”—Mateus 6:9, 10.

Molo nungnga mamaretta Harajaon ni Debata di tano on, dang adong be sitaonon. Dang adong pamarettaon na boi mambahen songon i! I do alana marsitutu do Jesus paboahon “barita na uli taringot tu Harajaon” i tikki di tano on. Jala dijujui ibana do akka siseanna asa dohot mangulahon i.—Mateus 4:23; 24:14.

Ala holong do roha ni Jahowa tu jolma, marjanji do Ibana lao mangalehon sude pasu-pasu i tu hita. Gabe taronjar do rohamuna lao takkas mananda Ibana jala jonok tu Ibana? Aha do manfaatna molo diulahon hamu songon i? Lao dipaboa ma i di artikel na mangihut.