Molo taboto songon dia sifat ni sasahalak, gabe lam tatanda ma ibana. Jala gabe lam kompak ma hita tu ibana. Suang songon i ma tu Debata. Molo taboto akka sifatna, gabe lam tatanda ma Ibana, jala gabe lam jonok ma hita tu Ibana. Adong opat sifat utama ni Debata, i ma huaso, bisuk, tigor, dohot holong.

“Ale Jahowa Tuan Natumimbul, marhite huasom na balga i dohot tanganmu na gogo i, ditoppa Ho do langit dohot tano on.”—JEREMIA 32:17.

Boi do taida huaso ni Debata sian akka toppaanna. Uppamana di tikki arian, tahilala do las ni ari. Alai sasittongna mohop hian do suhu ni inti mataniari, hira-hira 15 juta derajat Celcius (150.000 hali loppit sian mohop ni aek na gurgur). Jala sarupa do balga ni energi mataniari sadetik tu marratus juta energi bom nuklir.

Alai gelleng do mataniari molo dibandikkon tu martriliun bintang na asing. Akka ilmuwan mandok, bintang UY Scuti ma ra bintang na umbalga. Balga ni bintang on 1.700 hali loppit balga ni mataniari. Jadi molo dibahen bintang UY Scuti on tu posisi ni mataniari, sahat do balgana tu orbit ni planet Jupiter. Gabe boi taatusi hata ni si Jeremia na mandok, Jahowa do na manoppa langit, tano  on dohot sude na adong di alam semesta, alana massai balga do huasona.

Aha do manfaat ni huaso ni Debata tu hita? Ala ditoppa Debata mataniari dohot sude na adong di portibi on, gabe boi ma hita mangolu. Asing ni i, dipakke Debata do huasona lao mangurupi jolma. Uppamana dilehon Debata do huaso tu Jesus lao mambahen mukjizat. Didok di Bibel, “Na mapitung boi marnida, na pakpang boi mardalan, na marsahit kusta dipamalum, na nengel marbinege, na mate dipangolu.” (Mateus 11:5) Di tikkita saonari, dilehon Debata do “gogo tu na loja”. Jala didok Bibel do, “Halak na marhaposan tu Jahowa margogo do muse.” (Jesaya 40:29, 31) Boi do dilehon Debata ‘gogo lobi sian gogo ni sahalak jolma’ tu hita tikki mangadopi sitaonon. (2 Korint 4:7) Pasti lomo do rohatta jonok tu Debata na makkaholongi hita jala na rade mangurupi hita.

“Tung godang situtu do na binahenmu, ale Jahowa! Dibahen Ho do sudena i alani bisukmu.”—PSALMEN 104:24.

Lam godang na taparsiajari taringot toppaan ni Debata, lam godang ma na taboto taringot bisukna. Uppamana, adong sada kelompok ilmuwan na digoari biomimetik manang biomimikri. Diteliti jala ditiru nasida do bentuk ni akka toppaan lao mambahen akka barang. Misalna ditiru nasida do cara kerja mata ni jolma tikki naeng mambahen lensa ni kamera. Jala ditiru nasida do habong ni pidong tikki naeng mambahen bentuk ni pesawat.

Tarida do bisuk ni Jahowa sian perkembangan ni pese-pese di bortian ni omakna. Di mulana, holan sada sel do i. Di bagasan sel i adong instruksi genetik. Sian sada sel i berkembang ma i gabe godang sel na sarupa bentukna. Lam leleng, gabe marasing-asing do bentukna. Adong na gabe sel darah, sel saraf, dohot sel tulang. Dung i, terbentuk ma i gabe organ tubuh. Jala dung sia bulan nungnga gabe marmiliar godang ni sel i, jala nungnga gabe pese-pese. Pasti gabe setuju do hita tu hata ni Bibel na mandok, “Hupuji do Ho, ai longang do rohakku ala denggan do au dibahen Ho.”—Psalmen 139:14.

Aha do manfaat ni bisuk ni Debata tu hita? Diboto Debata do songon dia asa boi hita marlas ni roha. Ala marbisuk Debata, dilehon Ibana do poda na denggan marhite Bibel. Uppamana, didok do di Bibel, ‘Rade ma hamu manalpuhon hasalaan ni na asing.’ (Kolosse 3:13) Poda na denggan do i. Akka dokter pe mandok, molo olo hita manalpuhon hasalaan ni halak gabe tabo ma hita modom jala dang darah tinggion. Dang stres be hita manang gabe marsahit. Jadi dos do Debata songon sahalak dongan na bijak, na sai mangalehon poda na denggan tu hita. (2 Timoteus 3:16, 17) Lomo do rohamuna molo adong donganmuna na songon i?

“Dihaholongi Jahowa do akka ulaon na tigor.” —PSALMEN 37:28.

Sai tigor do sude na diulahon Debata. Didok do di Bibel, “Dang tarbahen ni Debata na sittong i mangulahon na jahat. Jala dang ulahonon ni Pargogo na So Hatudosan i na sala!” (Job 34:10) Tigor do carana manguhumi, songon na didok di buku Psalmen, “Tigor do Ho tikki mangadili akka bangso.” (Psalmen 67:4) Na di bagasan roha do na diida Jahowa, jadi dang boi Ibana dioto-otoi. Diboto Ibana do dia na sittong jala sai denggan do keputusan na dibahen Ibana. (1 Samuel 16:7) Dang lomo roha ni Jahowa mangida hajahaton na masa di portibi on. I do alana marjanji do Ibana, “Na lao salpu do akka parjahat sian tano on.”—Poda 2:22.

Alai dang songon sahalak hakim na kejam Debata, na lomo rohana mangalehon hukuman tu sasahalak. Olo do Ibana patuduhon asi ni roha. Bibel mandok, “Na burju jala parasi roha do Jahowa”. Dipatudu Debata do asi ni roha tu halak na jahat molo olo nasida muba. Songon i do cara na tigor lao manguhumi.—Psalmen 103:8; 2 Petrus 3:9.

Aha do manfaat ni hatigoran ni Debata tu hita? Apostel Petrus mandok, “Na so marimbar jolma di jolo ni Debata. Lomo do roha ni Debata mangida ganup halak na makkabiari Ibana jala na mangulahon na sittong.” (Ulaon ni Apostel 10:34, 35) Ala dang olo Debata paimbar-imbarhon halak, boi ma hita jonok tu Ibana jala gabe naposona. Dang gabe soal di Jahowa halak aha pe hita, sadia timbo pe sikkolatta, mamora manang pogos hita.

Lomo do roha ni Debata asa taattusi jala tadapot manfaat sian hatigoranna. Alani i, dilehon ma tu hita panggora ni roha. Di Bibel didok do panggora ni roha i patik ‘naung tarsurat di roha’, na boi  ‘mangurupi hita mamboto na sittong manang na sala’. (Rom 2:15) Aha ma manfaatna i tu hita? Molo talatik panggora ni rohatta, gabe dang olo be hita mangulahon na sala. Molo taulahon pe na sala, panggora ni roha i ma na paingotton hita asa olo hita muba. Jadi godang do manfaatna molo taattusi hatigoran ni Debata, jala gabe taronjar ma rohatta lao pajonokkon diri tu Ibana!

“Holong do Debata.”—1 JOHANNES 4:8.

Marhite huasona, boi do Debata mangulahon manang aha pe. Sai marbisuk do Ibana jala tigor do carana mangulahon manang aha pe. Nang pe songon i dang hea didok di Bibel huaso do Debata, bisuk do Debata, manang tigor do Debata. Alai didok Bibel holong do Debata. Boasa? Alana holong do na mangonjar rohana lao patuduhon sude sifatna i.

Sasittongna, dang hurangan manang aha Jahowa. Alai alani holongna, ditoppa Ibana ma akka suru-suruan di surgo dohot jolma di tano on, asa boi nasida marlas ni roha. Jala dibahen Debata do denggan tano on asa boi taingani. Dipatudu Ibana do holongna tu sude jolma, “dipabissar Ibana do mataniari tu akka parjahat dohot tu na burju. Jala diparo do udan tu halak na mangulahon na sittong dohot tu halak na mangulahon na jaha”.—Mateus 5:45.

Didok Bibel muse, “Parholong do Jahowa jala parasi roha.” (Jakobus 5:11) Dipatudu Ibana do holong ni roha tu akka halak na olo mananda Ibana jala na naeng marale-ale tu Ibana. Diparrohahon Debata do hita ganup marsada-sada. Didok di Bibel, “Diparrohahon do hamu.”—1 Petrus 5:7.

Aha do manfaat ni holong ni Debata tu hita? Las do rohatta tikki mangida bonom mataniari, mambege ekkel ni pese-pese, jala adong keluargatta na makkaholongi hita. Tutu, dang i na mambahen hita mangolu. Alai boi do gabe tamba las ni rohatta alani i sude.

Alani holong ni Debata, olo do Ibana manangihon hita tikki martangiang. Didok Bibel, “Unang ma holsohon hamu manang aha, alai pangido hamu ma saluhutna tu Debata marhite tangiang dohot elek-elek mardongan hamauliateon.” Dos do Ibana songon sahalak ama na parholong. Tikki adong sitaononta, lomo do rohana molo tapangido asa diurupi Ibana hita. Alana marjanji do Ibana lehononna do “hadameon na so boi diattusi jolma” tu hita.—Pilippi 4:6, 7.

Nungnga tabahas taringot sifat utama ni Debata. Marhuaso do Ibana, marbisuk, tigor, jala parholong. Pasti nungnga lam tatanda be Debata. Alai asa lam takkas tatanda Debata, tabahas akka naung diulahon Ibana dohot na lao bahenonna tu hita.