Dipatorang Jesus do songon dia boi taboto “nungnga jonok Harajaon ni Debata”. (Lukas 21:31) Nungnga disurirangkon ibana na lao masa ma porang, gempa, haraparon, dohot sahit di godang inganan. Jala nungnga taida i masa saonari.—Lukas 21:10-17.

Dipaboa do di Bibel taringot pangalaho ni jolma na roa na gabe tanda ni “ari parpudi”. Boi ma dijaha hamu i di 2 Timoteus 3:1-5. Tikki diida hamu pangalaho dohot parniulaon ni akka halak saonari, tottu setuju do hamu molo surirang na dipaboa di Bibel i nungnga masa saonari.

Aha do lapatanna? Satokkin nai, lao padengganon ni Harajaon ni Debata ma tano on. (Lukas 21:36) Di Bibel, dipaboa do akka janji ni Debata taringot tano on dohot akka halak na lao mangolu disi. Parrohahon ma piga-piga contohna.

“Dilehon do tu [Jesus] huaso, hasangapon, dohot harajaon, asa sude halak na sian akka bangso dohot bahasa marhobas tu ibana. Martahan do pamarettaonna saleleng ni lelengna jala dang boi digattihon. Harajaonna pe, dang boi dihancurhon.”—DANIEL 7:14.

Aha do lapatanna: Boi do hamu marlas ni roha di pamarettaon na dipajongjong Debata jala Anakna ma na gabe Raja.

“Dang adong nanggo sahalak pe na maringanan disi na mandok, ‘Marsahit do au.’” —JESAYA 33:24.

Aha do lapatanna: Dang lao marsahit be hamu manang gabe cacat. Boi ma hamu mangolu salelengna.

“Dipaujung Ibana do akka porang di saluhut tano on.”—PSALMEN 46:9.

Aha do lapatanna: Dang adong be hasusaan alani porang.

“Dang adong be akka parjahat. . . . Alai molo halak na lambok roha, dilehon do tano on gabe parbagianan ni nasida.”—PSALMEN 37:10, 11.

Aha do lapatanna: Dang adong be halak na jahat, holan akka halak na mangoloi Debata do na adong disi.

“Dibangun nasida ma jabu jala nasida ma na mangingani, dibahen nasida ma ladang anggur jala nasida ma na mangallang parbuena.”—JESAYA 65:21, 22.

Aha do lapatanna: Massai uli do tano on haduan. Lao dipasaut Debata ma sakkapna “di tano on” songon na jotjot tatangiakkon.—Mateus 6:10.