“Tingki martangiang, unang ma mulak-ulak mandok hata na sarupa.”​—Mateus 6:7.

Dang lomo roha ni Jahowa mambege tangiang na diapil manang tangiang na dijahahon sian bukku. Alai lomo do rohana mambege tangiang na dipasahat sian ias ni roha. Tottu dang lomo rohatta mambege donganta mandok hata na sarupa mulak-ulak ganup ari. Ikkon sian ias ni roha do na marale-ale makkatai. Suang songon i ma molo martangiang hita sian ias ni rohatta tu Jahowa, dos songon ale-aletta ma Ibana.

“Tingki dipangido hamu pe i tu Debata, ndang dapotmuna i. Ai sala do sangkap ni rohamuna.”​—Jakobus 4:3.

Taboto do dang olo Debata mangalusi tangiangta molo na so dihalomohon rohana na tapangido di tangiangta. Contohna, nungnga takkas dipaboa Debata dang lomo rohana mangida halak na hisap tu hepeng dohot halak na porsea tu nasib. Alani i, olo do Ibana manangihon tangiang ni sahalak parjuji na mangido asa monang? (Jesaya 65:11; Lukas 12:15) Tottu dang olo Debata mangalusi tangiang na songon i. Asa dialusi Debata tangiangta, ikkon tapastihon do na tapangido i mangihutton lomo ni rohana.

 “Manang ise na padao pinggolna unang tangitangionna uhum, tangiangna pe antong gabe biasbias do.”​—Poda 28:9.

Songon na disurat di Bibel, dang olo Debata mangalusi tangiang ni akka halak na mangalo patikna. (Jesaya 1:15, 16) Jala songon i dope Debata sahat tu saonari. (Maleaki 3:6) Asa ditangihon Debata tangiangta, ikkon taulahon do patikna di parngoluotta siganup ari. Boha molo hea najolo hita mangulahon na sala? Olo dope Jahowa mangalusi tangiangta? Molo olo hita muba jala mangulahon lomo ni rohana di parngoluotta, olo do Debata manalpuhon hasalaatta jala manangihon tangiangta.​—Ulaon ni Apostel 3:19.