BOI DO HAMU MANONTUHON NGOLUMUNA DI ARI NA NAENG RO? Piga-piga halak mandok, manang aha pe na taulahon, nunga ditontuhon Debata na laho masa di ngolunta. Molo ndang saut sangkap ni nasida, didok do, “Nga nasibhu songon on daba.”

Na asing gabe mandele ala lam godang hajahaton dohot hasusaan. Marsitutu do nasida mambahen situasi lam denggan, alai tong dope adong porang, hajahaton, sahit, dohot bencana alam. Didok nasida ma, “Boha ma bahenon, nga i na masa.”

Sipata adong do situasi na mambahen sundat rencana naung tabahen. (Parjamita 9:11) Alai didok di Bibel, na tapillit saonari boi mambahen hita mandapot hangoluan na salelengna manang na ndang. Rimangi ma hatorangan sian Bibel.

Si Musa do na manguluhon halak Israel kaluar sian Misir. Andorang so sahat di Tano Kanaan, didok ibana ma, “Naung hupapillithon tu hamu hangoluan dohot hamatean, pasupasu dohot torutoru; dibahen i pillit ma hangoluan i, asa mangolu ho dohot pinomparmu sogot. Asa haholonganmu Jahowa, Debatam, jala tangihononmu soarana jala marsilohot roham tu Ibana.”​—5 Musa 30:15, 19, 20.

“Naung hupapillithon tu hamu hangoluan dohot hamatean, pasupasu dohot torutoru; dibahen i pillit ma hangoluan i.”—5 Musa 30:19

Jadi dung kaluar halak Israel sian Misir, marjanji do Debata ndang na laho ditaban muse nasida. Dipasu-pasu ma nasida di Tano Kanaan. Alai, ingkon marsitutu do nasida asa boi sahat tu Tano Kanaan jala mandapot pasu-pasu. Alani i, ingkon dipillit do “hangoluan”. Lapatanna, ‘mangkaholongi Debata, manangihon Ibana, jala marsihohot tu Ibana’.

Suang songon i ma hita. Na tapillit saonari do na manontuhon ngolunta di ari na naeng ro. Molo tapillit mangkaholongi Debata, manangihon Ibana, jala marsihohot tu Ibana, i patuduhon na tapillit do hangoluan saleleng ni lelengna di paradeiso di tano on. Alai songon dia do mangulahon i sude?

Holong do na sai dipatudu Jahowa di sude ulaonNa. Didok apostel Johannes, ‘haholongon do Debata’. (1 Johannes 4:8) Tingki disungkun pe Jesus taringot parenta na umbalga, didok do, “Ingkon haholonganmu do Jahowa Debatam sian nasa roham, sian nasa ngolum dohot sian nasa pingkiranmu.” (Mateus 22:37) Holong tu Jahowa do na mambahen sasahalak marale-ale tu Jahowa, ndang ala mabiar manang tarpaksa. Alai boasa ma ingkon tahaholongi Ibana?

Holong ni Jahowa tu jolma boi dipatudos songon holong ni natua-tua tu ianakhonna. Ala dihaholongi natua-tuana ianakhonna, dilehon do poda dohot sipasingot. Boasa ma dibahen natua-tua songon i? Lomo do rohanasida asa dihaholongi ianakhonna nasida jala dioloi angka naung diajarhon tu ianakhonna. Alana, i do na mambahen ianakhonna marlas ni roha. Suang songon i ma Debata. Lomo do rohaNa asa tahaholongi jala taoloi sude na diajarhon tu hita.

Di bahasa asli na dipangke manurathon Bibel, hata “manangihon” boi lapatanna gabe “mangoloi”. I do umbahen sipata tadok tu dakdanak, “Tangihon bapakmu dohot omakmu da.” Alani i, manangihon Debata lapatanna marsiajar jala mangoloi na diajarhon tu hita. Songon dia do hita manangihon Debata? Marhite manjaha jala mangulahon na taparsiajari sian Bibel.​—1 Johannes 5:3.

Hea do didok Jesus taringot ringkot ni manangihon Debata. Didok ibana, “Ndang holan sian roti jolma mangolu, alai sian ganup hata na ro sian Jahowa.” (Mateus 4:4) Asa boi sehat, ingkon mangan do hita ganup ari. Suang songon i ma, ingkon sai taparsiajari do taringot Debata. Alana i do na mambahen hita boi mangolu salelengna. Raja Salomo mandok, “Ai tarbahen do marlinggomlinggom tu hapistaran, nang tu perak, alai hasurungan ni parbinotoan on do: Hapistaran i mangalehon ngolu tu tuan nampunasa.” (Parjamita 7:12) Jadi parbinotoan dohot bisuk sian Debata, mangurupi hita mamillit hangoluan na salelengna.

Ingot ma hata ni Jesus na mandok, “Sompit do harbangan jala sosak do dalan tu hangoluan, jala otik do halak na jumpangan i.” (Mateus 7:13, 14) Molo mardalan di dalan sisongon i, taihuthon do halak na mamboto dalan i asa boi sahat tu na tatuju. Alani i ma, asa boi sahat tu hangoluan na salelengna, ingkon tongtong do jonok tu Jahowa. (Psalmen 16:8) Aha do na ingkon taulahon?

Ganup ari, godang do na ingkon taulahon. Sipata ndang sanga hita mangarimangi na dipangido Debata asa taulahon. Bibel mandok, “Sai parrohahon hamu ma pangalahomuna. Unang ma hamu songon halak na so marbisuk, alai marbisuk ma hamu. Denggan ma pangke tingkimuna, ai mangolu di angka tingki na jahat do hita saonari on.” (Epesus 5:15, 16) Jadi asa tongtong jonok tu Jahowa, ingkon rumingkot do parale-aleonta tu Jahowa sian manang aha pe.​—Mateus 6:33.

Nang pe ndang boi tauba angka naung masa di tingki naung salpu, alai na tapillit saonari mangkorhon tu ngolunta di ari na naeng ro. Didok di Bibel, mansai holong do roha ni Debata Jahowa tu hita sude. Dipaboa do na dihalomohon rohaNa asa taulahon. Panurirang Mika mandok,

“Nunga dipabotohon ibana tu ho, ale jolma manang aha na denggan, jala manang aha na niluluan ni Jahowa sian ho, nda holan na mangulahon uhum dohot holong ni roha di habasaon, jala marpangalaho haserepon maradophon Debatam.”​—Mika 6:8.

Olo do hamu mangulahon na pinangido ni Debata? Molo diulahon hamu songon i, dapotmu ma hangoluan na salelengna. Jadi, hamu do na mamillit!