SONGON naung dipaboa di artikel on, marragam do hasusaan na boi mambahen sasahalak mangkilala ndang boi martahan. Tingki mangadopi hasusaan hamu, ra didok rohamu ndang mararga be ngolumuna jala ndang adong na parduli tu hamu. Alai pos ma rohamuna, parduli do Debata tu hamu jala arga do hamu di Ibana.

Pos do roha ni panurat Psalmen 86 mandok tu Debata, “Di ari hagogotanki Ho do hujou, ai sai alusanmu do ahu.” (Psalmen 86:7) Ra sungkun-sungkun do rohamuna, ‘Songon dia do Debata mangalusi ahu “di ari hagogotanki?”’

Nang pe ndang pintor dipasiding Debata hasusaan na diadopi hamu, pos ma rohamuna, marhite Hatana, lehonon ni Debata do tu hamu dame ni roha. Didok di Bibel, “Unang ma holsohon hamu manang aha, alai pangido hamu ma saluhutna tu Debata marhite tangiang dohot elek-elek mardongan hamauliateon. . . . Lehonon ni Debata ma tu hamu hadameon na so boi diantusi jolma, na boi manjaga roha dohot pingkiranmuna.” (Pilippi 4:6, 7) Saonari, taulas ma piga-piga ayat ni Bibel na boi paposhon rohanta na tutu do parduli Debata tu hita.

“Ndang adong nanggo sada pe sian [amporik] na so diparrohahon Debata . . . Ummarga do hamu sian godang amporik.”​—Lukas 12:6, 7, surat na di toru.

RIMANGI MA: Ra di angka jolma, ndang arga amporik na gelleng, alai arga do i di Debata. Diparrohahon Debata do sude angka amporik jala arga do sude hangoluan di Ibana. Alai, jolma do na ummarga di Debata sian angka amporik i. Alana sian sude tompaan ni Debata di tano on, jolma do na ditompa ‘tumiru rupana’. Jala boi do jolma maniru jala patuduhon angka parange ni Debata.​—1 Musa 1:26, 27.

“Ale Jahowa, disulingkit jala ditanda Ho do ahu! . . . Gari sian na dao diantusi Ho do pingkiranku. . . . Uji ma ahu jala tanda angka pingkiranki.”​—Psalmen 139:1, 2, 23.

RIMANGI MA: Tangkas do ditanda Debata hamu, jala diboto do na di bagasan rohamuna. Nang pe ndang adong na mangantusi hasusaanmuna, alai parduli do Debata jala lomo do rohana mangurupi hamu. On mambahen hamu boi martahan.

“Tangihon ma tangiangku, ale Jahowa, bege ma joujoungku mangido pangurupion. . . . Tangihon ma ahu, molo joujou ahu, hatop ma alusi. . . . TangihononNa ma bangsoNa na hinalupahonNa i.”​—Psalmen 102:2, 3, 18, Bibel siganup ari.

RIMANGI MA: Sian mulai mardosa jolma, diparrohahon Jahowa do sude ilu-ilu ni nasida alani hasusaan. (Psalmen 56:9) Dohot ma i ilu-ilumuna. Ala arga do hamu di Debata, diingot Ibana do sude hasusaan dohot ilu-ilumuna.

“Unang ganggu hamu ai Ahu do Debatamuna. BahenonKu do hamu gogo jala urupanKu do hamu, . . . Ahu do Jahowa Debatam . . . mandok: ‘Unang mabiar hamu, urupanKu do hamu.’”​—Jesaya 41:10, 13, Bibel siganup ari.

RIMANGI MA: Rade do Jahowa mangurupi hamu. Molo mandele hamu, patoguonna do hamu.

“Songon on do balga ni holong ni roha ni Debata di portibi on, pola do Anakna na sasada i dilehon, asa unang mate ganup na patuduhon haporseaon tu ibana, alai asa mandapot hangoluan na saleleng ni lelengna.”​—Johannes 3:16.

RIMANGI MA: Mansai holong do roha ni Debata tu hamu umbahen dilehon Jesus gabe tobusan laho humongkop hamu. Tobusan on mangalehon pangkirimon tu hamu asa boi marlas ni roha jala mangolu salelengna. *