Didok Debata tu si Adam, “Ai sadari dipangan ho sian [hau i], sai na mate do ho.” (1 Musa 2:17) Tontu, ndang marlaba parenta i molo ujungna matua jala mate si Adam. Alai diboto ibana do, molo ndang dipangan ibana parbue ni hau i ndang mate ibana.

Sasintongna, ndang na ingkon diallang si Adam dohot si Hawa parbue ni hau i asa boi nasida tongtong mangolu. Alana, godang do parbue ni hau na asing na adong di porlak i. (1 Musa 2:9) Molo ndang diallang nasida parbue ni hau i, patuduhon na unduk do nasida tu tudu-tudu dohot tu Jahowa, i ma Silehon ngolu tu nasida.

Asa taantusi boasa mate si Adam dohot si Hawa, taulas ma taringot aha na dihatai Sibolis dohot si Hawa. Marhite ulok, dipaboa Sibolis do gabus na mansai jahat. Didok di Bibel, “Alai ulok do na umbisuk sian nasa na manggulmit di ladang, angka na jinadihon ni Debata Jahowa, jadi didok ma mandok boruboru i: Atehe tongon do didok Debata, na so jadi panganonmuna sian saluhut hau angka na di porlak on?”​—1 Musa 3:1.

Dialusi si Hawa ma, “Jadi do panganonnami sian parbue ni hau angka na di porlak on. Alai anggo sian parbue ni hau, na di parsitongaan ni porlak i didok Debata do: Unang pangan hamu sian i, jala unang jama hamu, asa unang mate hamu. Dung i ninna ulok i ma mandok boruboru i: Ndang na tutu hamu mate. Ai diboto Debata do, sadari dipangan hamu sian i, tonggor ma matamuna, gabe doshon Debata hamu umboto na denggan dohot na roa.” Sasintongna, Sibolis laho mandok na pargabus do Jahowa i, jala adong do angka na denggan na ditabunihon Jahowa sian nasida.​—1 Musa 3:2-5.

Gabe porsea ma si Hawa tu na binegena i. Sai dipanotnoti ibana ma hau i. Jala hira na denggan do idaon parbue ni hau i! Ujungna, dibuat ibana ma parbue ni hau i jala dipangan. Didok di Bibel, “Dilehon ma dohot tu sinondukna sian i, gabe dipangan.”​—1 Musa 3:6.

Mansai lungun do roha ni Jahowa tingki ndang dioloi nasida Ibana! Aha ma na diulahon Jahowa? Didok Ibana tu si Adam, “Ingkon . . . mulak ho gabe tano, pambuatanmu hian, ai tano do ho, jala tu tano do ho mulak sogot.” (1 Musa 3:17-19) Alani i, “sia ratus tolupulu taon ma sandok umur ni si Adam mangolu, dung i mate ma ibana”. (1 Musa 5:5) Ndang tu surgo laho si Adam manang tu inganan na asing. Sian tano do ibana ditompa Jahowa.  Alani i tingki mate, mulak ma muse ibana tu tano. Ndang adong be ibana.

Ala ndang mangoloi Jahowa, gabe ndang sempurna be si Adam dohot si Hawa jala ndang boi be nasida mangolu salelengna. Alai ndang holan tu nasida pengaruh ni dosana i. Sude pinompar ni nasida pe gabe dohot do mardosa. Rom 5:12 mandok, “Masuk do dosa i tu portibi on marhite sada jolma [si Adam]. Jala dosa i parohon hamatean. Ujungna rarat ma hamatean i tu sude jolma, ala nunga mardosa sude jolma.”

Bibel manggombarhon dosa dohot hamatean songon “angka pangkean arsak ni roha sian sude angka bangso”. (Jesaya 25:7, Bibel siganup ari) Angka pangkean arsak ni roha i, dipatudos do songon racun na so boi dipasiding. Tutu ma, “sude jolma mate alani si Adam”. (1 Korint 15:22) Alai tubu ma sungkun-sungkun songon na didok apostel Paulus, “Ise ma na paluahon ahu sian daging na parohon hamatean on?” Adong do na boi?​—Rom 7:24.