BAYANGKON ma hamu manonton sada film taringot sahalak artis. Parende do ibana jala lomo rohamu mangida ibana. Di mula ni film i, diida hamu ma ibana marsiajar musik sian dakdanak jala torus marlatik. Dung i, diida hamu ma ibana konser, laho tu luar negeri jala gabe artis internasional. Di ujung ni film i, diida hamu ma ibana dung matua jala ujungna mate.

Kisah nyata do film on. Songon halak na di film i, angka parende, ilmuwan, atlet olahraga, manang aha pe karejona, sarupa do ujung ni ceritana. Godang prestasi na dapot ni nasida. Alai aut sugari ndang matua jala mate nasida, pasti godang dope prestasi na boi dapot ni nasida.

Lungun do rohanta mamboto i. Alai sude do hita ingkon mangadopi i. (Parjamita 9:5) Aha pe na taulahon, ujungna matua do hita jala mate. Alai ndang holan i. Olo do ra gabe jempek umurta ala kecelakaan manang ala marsahit. Songon na didok di Bibel, dos do hita songon timus “na tarida satongkin dung i mago”.​—Jakobus 4:14.

Ala boi do hita tompu mate, adong do halak na gabe marpingkir, “ba mangan minum ma hita, ai mate do hita marsogot”. (1 Korint 15:32) Songon i do pandapot ni godang halak, alana diboto nasida boi do hita tompu mate jala ndang adong pangkirimon di ari na naeng ro. Tingki adong sitaononmuna na borat, olo do ra gabe sungkun-sungkun rohamuna, ‘Holan songon on do parngoluon on?’ Molo songon i, didia do boi tadapot alusna?

Saonari godang halak porsea, boi do angka ilmuwan mangalului jalan keluarna. Menurut angka ilmuwan dohot dokter, sasintongna boi do gabe lam ganjang umur ni jolma. Jala marsitutu do nasida laho mambahen ganjang umur ni jolma. Alai aha pe na dibahen nasida, tongtong dope adong sungkun-sungkun: Boasa gabe matua hita jala mate? Boi do ditaluhon hamatean i? Di majalah on, taulas ma taringot i jala tadapot ma alus ni sungkun-sungkun: Holan songon on do parngoluon on?