Boasa lomo roha ni halak mangolu salelengna? Didok di Bibel, nunga dilehon Debata roha mangolu salelengna tu bagasan rohanta. (Parjamita 3:11) Jala didok do muse, “holong do Debata”. (1 Johannes 4:8) Ala holong do roha ni Debata tu hita, tontu ndang lehononna roha mangolu salelengna molo ndang boi i dipasaut.

Ndang adong jolma na olo mate. Di Bibel, didok do hamatean i “musu”. (1 Korint 15:26) Adong do na mate poso, adong na mate dung matua. Alai sude do jolma ujungna gabe mate. Alani i, godang do na gabe holsoan jala mabiar mamingkirhon taringot i. Alai boi do salpu hamatean i?

Sasintongna, ndang hea lomo roha ni Debata asa mate jolma. Di buku 1 Musa, dipaboa do buktina molo Jahowa manompa jolma asa boi mangolu salelengna di tano on. Diparade Jahowa do angka na dihaporluhon jolma di tano on asa boi nasida mangolu jala marlas ni roha. Dung i, ditompa ibana ma si Adam, i ma jolma na parjolo. Jala dibahen ma ibana di sada inganan na uli, goarna Porlak Eden. Dung i, “ditilik Debata ma sude na tinompana i, jadi nunga denggan situtu”.​—1 Musa 1:26,31.

 Sempurna do si Adam ditompa Debata. (5 Musa 32:4) Istri ni si Adam, i ma si Hawa, sempurna do pingkiran dohot dagingna. Didok Jahowa do tu nasida, “Marpinompari ma hamu, asa sopar hamu, jala gohi hamu sandok tano on, jala patunduk hamu; jala raja i hamu dengke angka na di laut dohot pidong angka na martongatonga langit ro di sude binatang, angka na manjirir di atas tano on.”​—1 Musa 1:28.

Porlu do tingki asa boi nasida dohot pinomparna manggohi tano on. Ingkon marianakkon do si Hawa, jala ianakkonna i pe ingkon marianakkon do muse. Songon i ma torus sampe gok tano on songon na dihalomohon Debata. (Jesaya 45:18) Tontu, ndang masuk akal diparentahon Jahowa si Adam dohot si Hawa asa marpinompari, hape holan ianakkon dohot pahompuna do na sanga diida nasida.

Asing ni i, disuru Debata do asa dirajai jolma angka binatang. Disuru do si Adam manggoari angka binatang. Porlu do tingki mangulahon i. (1 Musa 2:19) Jala molo naeng mangarajai binatang, ingkon diparsiajari nasida do taringot binatang i jala songon dia cara mamiaro i. Tontu porlu do godang tingki laho mangulahon i.

Jadi, disuru Debata ma jolma manggohi tano on jala mangarajai angka binatang. On patuduhon ditompa Debata do jolma na parjolo i asa boi leleng mangolu. Jala sasintongna, leleng do si Adam mangolu.

Dipaboa di Bibel, hea do adong angka jolma na leleng mangolu. Didok, “Sia ratus tolupulu taon ma sandok umur ni si Adam mangolu.” Jala adong muse onom baoa na asing na umurna lobi sian 900 taon! Angka baoa i, i ma si Set, si Enos, si Kenan, si Jared, si Metusalah, dohot si Noak. Sude nasida mangolu andorang so ro dope Aek na Sumar. Jala, si Noak nunga marumur 600 taon andorang so ro dope Aek na Sumar. (1 Musa 5:5-27; 7:6; 9:29) Boasa boi nasida leleng mangolu?

Angka baoa on tubu ndang dao dope jarakna tu si Adam dohot si Hawa na hea sempurna. Ra, i do na mambahen gabe boi nasida leleng mangolu. Alai, boasa halak na sempurna boi leleng mangolu? Jala songon dia asa boi salpu hamatean? Asa tadapot alusna, ingkon jolo taboto do boasa jolma gabe matua jala mate.