Sakeluarga do hita sude, rap pinoppar ni si Adam. Lomo do roha ni Sitoppa hita asa sude anggota keluarga rap makkaholongi jala mangargai. Alai saonari on, nga jarang be taida i jala dang lomo roha ni Sitoppa hita masa songon on.

“Ingkon haholonganmu donganmu jolma songon dirim.”​—3 MUSA 19:18.

“Tongtong ma haholongi musum.”​—MATEUS 5:44.

Dipaboa do di Kitab Suci songon dia do halak na parholong i, di 1 Korint 13:4-7:

“Sabar jala burju do holong i.”

Pikkirhon ma: Molo nga sala hamu, alai dang muruk donganmuna tu hamu, sai sabar do ibana jala burju tu hamu, boha do pakkilalaanmuna?

“Ndang marlate ni roha holong i.”

Pikkirhon ma: Molo adong na marlate ni roha manang curiga tu hamu, boha do pakkilalaanmuna?

“Ndang holan mangkaringkothon dirina sandiri holong i.”

Pikkirhon ma: Molo diargai halak pandapotmuna, jala dang holan hatana sibegeon, boha do pakkilalaanmuna?

“Ndang dipaingot-ingot holong i hasalaan ni halak.”

Pikkirhon ma: Molo olo do hita muba, disalpuhon Debata do hasalaatta. “Ndang tongtong Ibana manorui, jala ndang gotos rohana.” (Psalmen 103:9) Pasti las do rohatta molo disalpuhon halak hasalaatta, hape nga tabahen haccit rohana. Jadi hita pe, ikkon tasalpuhon do hasalaan ni halak nang pe dibahen haccit rohatta.​—Psalmen 86:5.

“Ndang las rohana tu ulaon na so sintong.”

Pikkirhon ma: Sogo do rohatta molo las roha ni halak tikki susa hita. Jadi, molo taida susa halak na jukkat tu hita, unang ma las rohatta.

Asa tadapot pahala, taulahon ma akka contoh nakkin lao makkaholongi sude halak. Dang soal sadia umurna, aha agamana, manang sian dia bangsona, tahaholongi ma nasida. Taparsiajari ma muse carana mangurupi halak.