Godang do halak na marpikkir, molo timbo sikkolana jala godang hepengna, boi do i mambahen gabe denggan masa depanna. Jala porsea do nasida, molo nungnga kuliah boi do nasida gabe parkarejo na burju, gabe anggota keluarga na burju, jala gabe warga negara na burju. Jala didok roha ni nasida muse, boi do i mambahen nasida mandapot karejo na godang gajina. Jala molo godang hepengna, boi do i mambahen nasida bahagia.

Pikkirhon ma songon na didok si Zhang Chen na sian Cina. Didok ibana, “Najolo didok rohakku do, asa unang sai pogos hami ikkon kuliah do au. Alana molo kuliah au, boi ma dapottu karejo na godang gajina. Alana molo nga godang hepengku, boi ma bahagia ngolukku jala denggan masa depanku.”

Asa boi denggan masa depanna, godang do halak na lomo rohana kuliah di universitas na terkenal, jala adong do na sappe lao kuliah tu luar negeri. Sebelum COVID-19, lam godang do halak na lao kuliah tu luar negeri. Taon 2012, Organisasi Kerjasama dan Pembangunan Ekonomi paboahon, “Adong 52% halak na sian Asia lao marsikkola tu luar negeri.”

Godang do akka natua-tua na kerja keras asa boi gelleng ni nasida kuliah tu luar negeri. Si Qixiang na sian Taiwan mandok, “Dang na mora natua-tuakku. Alai dipasikkolahon do hami na opat gellengna di Amerika Serikat.” Alani i, sappe marutang ma natua-tua ni si Qixiang asa boi pasikkolahon gellengna. Songon i do tong na dihilala akka natua-tua na asing.

Adong do manfaatna marsikkola. Alai marsikkola pe sasahalak, dang selalu dapotna pas songon na diharappon ibana. Contohna, godang do halak na kerja keras saleleng martaon-taon jala gabe marutang-utang asa boi kuliah. Alai godang do na ujungna mandapot karejo dang sesuai tu na dihalamohon rohana. Didok si Rachel Mui di sada koran Singapura Business Times, “Godang do halak na tammat kuliah na gabe pengangguran.” Si Jianjie na tinggal di Taiwan jala nungnga mandapot gelar doktor mandok, “Godang do halak na terpaksa karejo na so sesuai tu jurusan ni nasida tikki kuliah.”

Memang, adong do akka halak na mandapot karejo na sesuai tu jurusanna. Alai tetap do ngolu ni nasida dang sesuai songon na diharappon nasida. Contohna, si Niran na sian Thailand, dung tammat sian Universitas di Eropa, dapotna do karejona sesuai tu jurusanna. Didok ibana, “Memang, dung tammat au kuliah, dapottu do karejo na godang gajina. Alai gabe ikkon torus do au karejo jala gabe suda do tikkiku holan na karejo jala loja do au. Di pudian ni ari, ikkon di PHK perusahaan tempattu karejo do godang karyawanna. Jala dohot ma au na di PHK. Gabe husadari ma, dang boi karejotta i na menjamin gabe denggan masa depanta.”

Nang pe adong halak na gabe mamora jala idaon songon na denggan ngoluna, alai adong do masalah ni nasida. Contohna, masalah di keluarga, kesehatan, jala khawatir taringot hepeng. Si Katsutoshi na sian Jepang mandok, “Godang do hepengku. Alai tong do dang bahagia ngolukku. Alana godang do halak na gabe cemburu mangida au jala berupaya mambahen na jahat tu au.” Si Lam, sahalak borua na tinggal di Vietnam mandok, “Godang do halak na berupaya asa mandapot karejo na denggan. Ala dirippu nasida, molo denggan karejona boi do i mambahen gabe denggan ngolu ni nasida. Alai nang pe songon i, jotjot do i mambahen nasida gabe khawatir, jala adong do na sappe marsahit dohot depresi.”

Songon si Franklin, godang do akka halak na gabe sadar, adong dope na uppetting sian mangalului hamoraon dohot sikkola na timbo. Daripada holan na mangalului arta, didok roha ni nasida tumagon do nasida gabe halak na burju jala mambahen na denggan tu halak na asing asa boi bahagia masa depan ni nasida. Alai tutu do molo gabe halak na burju gabe menjamin bahagia masa depanta? Di halaman selanjutna, dialusi ma sukkun-sukkun on.