Paradeiso! Godang majalah liburan na manogihon hita asa laho tu inganan na uli songon ”paradeiso” asa tabo pangkilalaan jala ndang mamingkirhon angka hasusaan na tahilala. Alai sasintongna, dung mulak hita tu jabu tapingkiri do muse i.

Nang pe songon i, las do roha molo manaringoti paradeiso. Gabe taronjar do rohanta manungkun, ’Holan anganangan sambing do paradeiso i? Molo songon i, boasa las roha mamingkiri i? Jala, tutu do i boi masa?’

Saleleng marratus taon, godang do halak na lomo rohana manaringoti paradeiso. Godang do na pintor lomo rohana tingki dijaha di Bibel taringot tu ”sada porlak di Eden tartungkan habinsaran”. Boasa lomo roha ni halak tu porlak on? Dipaboa tu hita, ”Dipantubuhon Debata Jahowa ma sian tano i nasa hau, angka na denggan idaon, jala tabo panganon.” Inganan na uli jala parohon las ni roha do porlak i. Asing ni i, adong do muse disi ”hau hangoluan na di parsitongaan ni porlak i”.​—1 Musa 2:8, 9.

Dung i, dipaboa do di buku 1 Musa taringot tu opat sunge na mamolus sian porlak i. Dua sian sunge i, i ma na taboto saonari goarna Tigris (manang, Hidekel) dohot Euprat. (1 Musa 2:10-14) Sunge na dua i mamolus sahat tu teluk Persia manang saonari Irak, najolo wilayah ni Persia do i.

Alani i, godang do adat ni Persia najolo na marhaitan tu paradeiso di tano on. Sada karpet sian Persia di abad 16 na adong di Museum seni Philadelphia di Pennsylvania, AS, patuduhon gombar ni porlak na martembok na marisi angka hau dohot bunga. Hata Persia ni ”porlak na martembok” lapatanna ”paradeiso”, jala karpet i manggombarhon porlak Eden na mansai uli.

Sasintongna, nunga godang bahasa dohot bangso di liat portibi on na mancaritahon taringot tu paradeiso. Tingki marpindapinda jolma tu inganan na asing di portibi on, diboan nasida do carita na sintong taringot tu paradeiso i, alai dung marratus taon, gabe muba ma carita i hombar tu haporseaon manang turiturian di luat i. Saonari on, godang do halak molo mangida inganan na mansai uli, didok ma i paradeiso.

Pigapiga halak na hea mardalani mandok nunga dapotnasida inganan ni paradeiso naung mago i. Umpamana, si Charles Gordon, sahalak jendral tentara Inggris na ro tu Seychelles taon 1881. Longang do rohana mangida haulion ni Vallée de Mai, na saonari gabe situs Warisan Dunia jala didok ibana, i do porlak Eden. Di abad 15, si Christopher Columbus paboahon nunga dapotna inganan ni porlak Eden tingki sahat ibana di Hispaniola, na saonari gabe Republik Dominika dohot Haiti.

Sada buku sejarah modern na marjudul Mapping Paradise, marisi lobi sian 190 peta kuno na godang patuduhon si Adam dohot si Hawa di porlak Eden. Adong do muse peta na adong di salinan manuskrip Beatus of Liébana di abad 13. Di ginjangna adong sada kotak na gelleng na di tongatongana adong gombar paradeiso. Sian paradeiso i adong mamolus opat sunge, i ma ”Tigris”, ”Euprat”, ”Indus”, dohot ”Jordan”. Ganup sunge i mamolus tu opat sudut ni kotak i, i ma ra manggombarhon Hakristenon na sahat tu saluhut liat portibi on. On sude patuduhon, nang pe ndang adong na mamboto didia inganan ni Paradeiso i, tongtong do lomo roha ni angka halak manaringoti i.

 Si John Milton sahalak panurat puisi di abad 17, na manurat puisi Paradise Lost (Paradeiso na Mago), hombar tu hatorangan sian buku 1 Musa taringot tu si Adam na mardosa jala dipabali sian porlak Eden. Puisi i marisi janji taringot boi do jolma mangolu salelenglelengna, ala didok ibana, ”Dung i, laho gabe paradeiso ma saluhut tano on.” Dung i, disurat ma puisi na paduahon na marjudul Paradise Regained (Paradeiso na Dipauli).

Tangkas ma, sian najolo godang do na lomo rohana manaringoti paradeiso di tano on. Alai, boasa i gabe dihalupahon saonari? Alana, songon na didok di buku Mapping Paradise, ”angka teolog ndang be manaringoti taringot tu inganan ni paradeiso”.

Diajarhon do di gareja, surgo do na gabe pangkirimon ni angka halak, ndang paradeiso di tano on. Hape, Bibel mandok di Psalmen 37:29, ”Teanon ni angka partigor i do sogot tano i, jala tongtong do nasida maringanan disi.” Ala ndang adong be paradeiso saonari, aha do na boi paposhon rohanta na ingkon saut do janji on? *

Marjanji do Debata Jahowa laho paulihon Paradeiso naung mago. Songon dia carana? Ingot ma tangiang na diajarhon Jesus, ”Sai ro ma harajaonmu! Sai saut ma lomo ni roham di banua tonga on songon na di banua ginjang!” (Mateus 6:10) Harajaon i laho mamarenta di tano on marhite Jesus Kristus jala manggantihon harajaon na adong di tano on. (Daniel 2:44) Marhite Harajaon i, ”saut ma” sangkap ni Debata taringot tu paradeiso di tano on.

Marhite surirang, disurat si Jesaya do taringot tu Paradeiso na dijanjihon i, na so adong be hasusaan songon na tahilala saonari. (Jesaya 11:6-9; 35:5-7; 65:21-23) Dijujui hami do hamu asa manjaha angka ayat na sinurat ni si Jesaya i di Bibelmuna sandiri. Ayat i paposhon rohanta tu janji ni Debata taringot tu angka na mangoloi Ibana. Dung i, tahilala ma asi ni roha ni Debata, i ma hadameon di paradeiso, na mago dibahen si Adam.​—Pangungkapon 21:3.

Boasa boi pos rohanta na laho saut do Paradeiso di tano on, ndang holan nipi? Alana dipaboa Bibel do tu hita, ”Jahowa do nampuna angka langit ni langitan, alai anggo tano on nunga dilehon tu jolma manisia.” Pangkirimon taringot tu Paradeiso di tano on ”naung sian mula ni mulana i diparbagabaga Debata, na so margabus i.” (Psalmen 115:16; Titus 1:2) Pangkirimon na mansai denggan do i di Bibel—Paradeiso salelenglelengna!