Ahu tubu di Ciudad Mante, huta na uli di Tamaulipas, Meksiko. Somalna, burjuburju do halak disi. Alai, saonari mabiar do godang halak tu huta on ala lam godang pareman.

Opat do hami anak ni natuatuangku, ahu anak na paduahon. Tardidi ma ahu di gareja Katolik, jala hea do ahu gabe anggota kor di gareja. Naeng do ahu pasonangkon roha ni Debata, ala mabiar do ahu diuhum di api na roko.

Tingki marumur lima taon ahu, ditadingkon bapakku ma hami. On mambahen ahu gabe mandele. Ndang huboto boasa ditadingkon ibana hami, hape holong do rohanami tu ibana. Alani i, ingkon laho ma omakku karejo ganup ari asa boi hami mangan.

On ma na mambahen ahu putus singkola, jala mardongan ma ahu tu angka halak naung magodang. Diajari nasida ma ahu marhata kasar, marisap, manangko, dohot marbada. Asa boi hurajai na asing, huparsiajari ma martinju, margulat, markarate, dohot mamangke sinjata. Gabe pareman ma ahu. Jotjot do hami marsitembakan tingki marbada, pigapiga hali marmudari ma sude dagingku jala naeng mate di dalan. Jotjot do omakku tangis ala diida ahu songon i, jala diboan ma ahu tu rumah sakit!

Tingki marumur 16 taon ahu, donganku tingki gelleng na margoar si Jorge ro tu jabunami. Dipaboa ma, molo ibana sahalak Sitindangi Ni Jahowa jala lomo rohana paboahon barita na uli dohot haporseaonna na sian Bibel. Ndang hea dope hujaha i, las hian ma rohangku mamboto goar ni Debata dohot sangkapNa. Dung i, marsiajar Bibel ma hami dohot si Jorge.

Tarapul situtu ma rohangku dung huboto molo api na roko i ndang ajaran sian Bibel. (Psalmen 146:4; Parjamita 9:5) Huboto ma, Debata ndang parrimas. Alai, songon Ama parholong  do Ibana na mangkalomohon na dumenggan tu ianakhonna.

Saleleng marsiajar Bibel, huboto ma na ingkon ubaonku do pangalahongku na saleleng on. Porlu do ahu patuduhon serep ni roha jala ndang be mangulahon na jahat. Poda di 1 Korint 15:33 mangurupi ahu. Didok disi, ”Mago do adat na denggan anggo hinombar na roa.” Huboto ma, molo naeng ubaonku pangalahongku, ingkon mandao do ahu sian halak na marpangalaho na roa. Ujungna, hutadingkon ma angka donganku najolo i, mardongan ma ahu tu halak Kristen di huria na mangulahon Hata ni Debata.

Ayat na asing, i ma Rom 12:17-19, na mandok, ”Unang baloshon hamu na jat alo ni na jat; . . . Molo tarbahen, intap na tarpatupa hamu, tiop hamu ma dame maradophon halak saluhutna! . . . Unang hamu marlulu; ai tarsurat do: ’Di Ahu do pamaloson, Ahu pe mamaloshon, ninna Tuhan i.’ ” Pos rohangku, na laho ripashonon ni Jahowa do sude parjahat di tingkina. Dung i, ndang olo be ahu mangulahon na jahat.

Ndang tarlupahon ahu na hea masa tingki mulak tu jabu. Ro ma angka alongku najolo naeng mamungkuli ahu, dipungkul bos ni pareman i ma ahu sian pudi. Jala didok ma, ”Alo ma ahu!” Di tingki i, martangiang ma ahu tu Jahowa asa boi huorom diringku unang mangalo. Nang pe sasintongna naeng hualo, alai hutadingkon ma nasida. Marsogotna i, hujumpangi ma bos ni pareman i. Marrimas situtu do rohangku nian, alai martangiang do ahu tu Jahowa asa unang tarrimas. Songgot do rohangku tingki ro ibana jala didok ma, ”Sala ma ahu da. Sasintongna, naeng do rohangku gabe songon ho. Lomo do rohangku marsiajar Bibel.” Tuani ma ndang sanga ahu tarrimas. Mauliate ma hudok tu Jahowa, jala huurupi ma ibana marsiajar Bibel.

Ndang sadia leleng, ndang olo be keluargangku marsiajar Bibel. Alai, tongtong do ahu marsiajar, jala ndang adong na boi mangorai ahu. Huboto do, molo tongtong marsaor dohot angka naposo ni Debata, gabe songon keluarga ma nasida di ahu na boi mangubati rohangku. Lam maju ma ahu di partondion, jala tardidi gabe sahalak Sitindangi Ni Jahowa di taon 1991.

Halak na garang do ahu najolo, mangasangi jolma jala gabe pareman. Alai, gabe muba ma ahu dung marsiajar Bibel. Saonari, hupaboa ma barita sian Bibel taringot hadameon tu halak na olo manangihon. Hak na sumurung do di ahu gabe perintis sepenuh waktu sian 23 taon naung salpu.

Hea do ahu karejo di kantor cabang ni Sitindangi Ni Jahowa di Meksiko. Disi, pajumpang ma ahu dohot si Claudia, anak boru na ringgas, jala marhasohotan ma hami taon 1999. Mandok mauliate do ahu tu Jahowa, ala dilehon dongan saripe na marsihohot!

Diurupi hami ma halak na ngungu mananda Jahowa, di huria Bahasa Isyarat Meksiko. Dung i, ditugashon ma hami tu Belize laho mangurupi angka halak marsiajar Bibel. Nang pe maringanan di hutahuta hami, alai las do rohanami. Ndang tarlupahon hami pengalaman on.

Di pudian ni ari, marsiajar Bibel ma muse omakku jala tardidi. Abangku, tungganeboruna, ianakhonna dohot pigapiga donganku nunga gabe Sitindangi Ni Jahowa.

Alai, adong do pigapiga anggota keluarganami na mate ala sai mangulahon na jahat. Ra, molo ndang marhamubaon ahu, mate ma ahu songon nasida. Mandok mauliate do ahu tu Jahowa ala dipillit Ibana ahu gabe naposoNa jala boi marsaor tu naposoNa, na burju jala sabar mangurupi ahu asa mamangke prinsip ni Bibel di ngolungku.