”Adong ma habangsa sada di banua ginjang, jadi adong do na mangkunduli habangsa i. Ia na hundul i, songon mata intan Jaspis dohot Sardion do idaon rupana; dihaliangi halibutongan do habangsa i, na songon mata intan Samara rupana.”​—Pangungkapon 4:2, 3.

”Marsinondang humaliang songon rupa ni halibutongan na tarjadi di ombun jumpa ari haroro ni udan, songon i do rupa ni sondangna humaliang. I ma rupa ni sumansuman ni hamuliaon ni Jahowa.”​—Hesekiel 1:27, 28.

Parnidaan on dilehon tu apostel Johannes dohot tu panurirang Hesekiel, na manggombarhon hasangapon ni Jahowa, Debata Natumimbul, marhite tudosan na mura taantusi songon batu permata, halibutongan, dohot hasangapon ni habangsaNa. Parnidaan i paboahon tu hita, Jahowa i sada hadirion Natumimbul, na palashon roha, jala mambahen dame pangkilalaan.

Hombar do parnidaan taringot Debata tu na nidok ni panurat buku psalmen, ”Ai na timbul do Jahowa, jala tama situtu pujion, na songkal do Ibana mangatasi sude angka debata. Ai ajiajian do sude debata ni angka bangso, alai anggo Jahowa naung manjadihon angka langit. Hatongamon dohot hamuliaon di jolona, hagogoon dohot hinauli masa di bagasan habadiaonna i.”​—Psalmen 96:4-6.

Nang pe Sasada Jahowa Natumimbul, ditogihon Ibana do hita asa jonok tu Ibana marhite tangiang, jala dipapos do rohanta na tangihononNa do hita. (Psalmen 65:3) Ala mansai holong roha ni Debata tu hita, gabe disurat apostel Johannes ma, ”Haholongon do Debata.”​—1 Johannes 4:8.

”Gok Tondi Parbadia ma si Stepanus mamereng tu ginjang, jadi diida ma hasangapon ni Debata dohot Jesus jongjong di siamunna. Jadi didok ma: Ida ma, mungkap do langit i huida, jala Anak ni jolma i jongjong tungkan siamun ni Debata!”​—Ulaon ni Apostel 7:55, 56.

Andorang so diida si Stepanus parnidaan on, Jesus nunga dipamate ala didok pemimpin ni  halak Jahudi hata na so tutu taringot ibana. Parnidaan on patuduhon, Jesus nunga dipahehe jala marmulia. Apostel Paulus manurat, ”Na pinahehena i Ibana sian na mate jala pinahundulna i tu siamunna di bagasan banua ginjang i, tu ginjang ni nasa harajaon dohot huaso, nang hagogoon dohot hamuliaon, nang tu ginjang ni nasa goar na tarhatahon, ndada holan di hasiangan on, dohot do di na ro sogot.”​—Epesus 1:20, 21.

Asing ni patorangkon taringot hasangaponna, Bibel patuduhon Jesus maniru Jahowa na mamparrohahon sude jolma. Saleleng di tano on, dipamalum Jesus do angka sahit jala dipahehe angka naung mate. Marhite pelean tobusan na nilehonna, ibana patuduhon holongna tu Debata dohot tu sude jolma. (Epesus 2:4, 5) Dung hundul di siamun ni Debata, dipatudu Jesus ma huasona jala dilehon ma godang pasupasu tu sude jolma na unduk.

”Sai hupanotnoti do i paima dipajongjong angka habangsa, jala hundul . . . marriburibu angka na marsomba tu ibana, jala marloksaloksa tindang di jolona marhaladoi.”​—Daniel 7:9, 10.

Taringot parnidaan na di surgo, ndang holan sada surusuruan na diida si Daniel, alai mansai torop do. Tontu, mansai palongang roha do parnidaan i! Angka surusuruan, i ma tompaan ni Debata na marmulia, pistar, jala gogo. Adong do nasida na didok serapim dohot kerubim. Di Bibel, adong 250 hali didok taringot surusuruan.

Surusuruan on, ndang jolma na hea mangolu di tano on. Nunga leleng ditompa Debata angka surusuruan andorang so ditompa dope jolma. Tingki ditompa tano on, marsuraksurak jala marlas ni roha do angka surusuruan.​—Job 38:4-7.

Sada cara ni surusuruan marhobas tu Debata, i ma dohot tu ulaon na mansai ringkot di tano on saonari marhite pasahathon barita na uli taringot Harajaon ni Debata. (Mateus 24:14) On boi taboto sian parnidaan ni apostel Johannes na mandok, ”Huida ma surusuruan na asing habang martongatonga langit, na umpeop barita na uli sisalelenglelengna, sibaritahononna tu angka pangisi ni tano i, tu saluhut bangso dohot marga  dohot hata dohot houm.” (Pangungkapon 14:6) Nang pe ndang langsung surusuruan mangkatai tu jolma songon na hea masa najolo, alai ditogutogu nasida do halak na pasahathon barita na uli asa pajumpang tu halak na serep marroha.

”Dung i masa ma hamusuon di banua ginjang, martongtang ma Mikhael [Jesus Kristus] rap dohot angka surusuruanna dompak naga i. Marmusu ma nang naga i rap dohot angka surusuruanna. Alai ndang manahan nasida; ndang be dapot inganannasida di banua ginjang. Jadi dipabali ma naga na balga i, ulok na robi i, na margoar sibolis dohot setan, na paotootohon liat portibi on, dipabali ma ibana tu tano i, dipabali ma nang angka surusuruanna raphon ibana.”​—Pangungkapon 12:7-9.

Ndang sai dame situasi di surgo. Dung ditompa jolma na parjolo, lomo roha ni sada surusuruan asa disomba ibana. Mangalo ma ibana tu Jahowa, dung i gabe Sibolis, na lapatanna ”Pangalo”. Surusuruan na asing pe dohot do mangalo jala nasida gabe angka begu. Mansai jahat do nasida, mangalo tu Jahowa, jala mambahen angka jolma mangulahon na dihasogohon Jahowa.

Mansai jahat do Sibolis dohot angka beguna. Sasintongna, nasida do musu ni jolma jala mambahen godang hasusaan di tano on. Umpamana, dibunu Sibolis do godang pinahan dohot naposo ni si Job na marsihohot. Dung i, dibunu ibana muse sampulu ianakhon ni si Job marhite parohon ”halisungsung na marpiupiu”. Dung i muse, ”gabe hona puru godang ma si Jobi dibahen sian palak ni patna ro di pakpak uluna” dibahen Sibolis.​—Job 1:7-19; 2:7.

Satongkin nai, laho diripashon ma Sibolis. Dung didabu tu tano on, diboto ibana ”otik nama tingkina”. (Pangungkapon 12:12) Ndang saut sangkap ni Sibolis, jala barita na uli do on!

”Ditobus Ho do tu Debata jolma sian saluhut marga, hata, houm dohot bangso. Jala dijadihon Ho do nasida gabe harajaon hamalimon di Debatanta, asa manggomgomi nasida di atas tano i!”​—Pangungkapon 5:9, 10.

Dos songon Jesus na dipahehe sian tano on asa mangolu di surgo, adong do siseanna na mandapot upa na sarupa. Didok Jesus tu angka apostelna, ”Na laho do Ahu mangarade inganan di hamu. Jala, . . . sai mulak do Ahu mangalap hamu, asa rap hamu dohot Ahu!”​—Johannes 14:2, 3.

 Adong do tujuan ni angka halak na laho tu surgo. Rap dohot Jesus, mamarenta ma nasida di Harajaon ni Debata na laho mangarajai sude na di tano on jala mamasumasu nasida. On ma Harajaon na hea didok Jesus asa ditangiangkon angka siseanna, ”Ale Amanami na di banua ginjang! Sai pinarbadia ma Goarmu! Sai ro ma harajaonmu! Sai saut ma lomo ni roham di banua tonga on songon na di banua ginjang!”​—Mateus 6:9, 10.

”Hubege ma soara na gogo sian habangsa i, na mandok: On do joro ni Debata di tongatonga ni angka jolma, . . . jadi apusan ni Debata ma nasa iluilunasida sian matanasida: Ndang adong be hamatean nang arsak ni roha; nang angguhangguk, nang na hansit, ndang disi be; ai nunga salpu na parjolo i!”​—Pangungkapon 21:3, 4.

Parnidaan on patuduhon tingki Harajaon ni Debata na diparenta Jesus dohot angka na diboan tu surgo mangaripashon pamarentaon ni Sibolis. Dibahen ma tano on gabe paradeiso. Marhite pamarentaon on, ndang adong be hasusaan jala ndang adong be na marhabot ni roha. Ndang adong be hamatean.

Alai, songon dia do marmiliar halak naung mate na so dipahehe tu surgo? Di ari na naeng ro, dipahehe ma nasida jala mangkirim mangolu salelengna di Paradeiso di tano on.​—Lukas 23:43.