1, 2. (a) Aha do na didok pigapiga halak tingki diboto na adong organisasi ni Debata? (b) Aha do na laho taulas di artikel on?

PIGAPIGA halak mandok, ”Ndang porlu hita diatur organisasi. Asal ma maraleale tu Debata.” Tutu do i? Songon dia do na sasintongna?

² Di artikel on, taida ma songon dia Jahowa taratur mangulahon ulaonNa dohot mangatur angka naposoNa. Taulas ma muse aha na ingkon taulahon tingki dilehon organisasi ni Jahowa tudutudu. (1 Kor. 14:33, 40) Di abad na parjolo, naposo ni Jahowa mangihuthon tudutudu sian Hata ni Debata jala nasida boi marbarita na uli di godang inganan. Songon nasida, taihuthon do tudutudu sian Bibel saonari. Jala unduk do hita tu pengaturan na dilehon organisasi ni Debata. Ujungna, boi ma hita marbarita na uli di liat portibi on. Jala tongtong do tajaga huria asa ias, dame jala marsada.

3. Aha do na paposhon rohamu molo Jahowa i Debata na taratur?

³ Tingki taida angka tompaan ni Jahowa, tangkas  ma taboto Debata na taratur do Ibana. ”Marhitehite hapistaran do dipaojak Jahowa tano on, jala marhitehite hapantason angka langit i dipadiri.” (Poda 3:19) Godang do na so taboto taringot angka tompaan ni Jahowa. Sasintongna, ”holan husip dope na tabege” taringot tusi. (Job 26:14, Bibel siganup ari) Alai, taboto do taringot alam semesta na taratur ditompa Jahowa. (Ps. 8:4, 5) Taratur do parputar ni marjuta bintang di langit. Pingkirhon ma muse angka planet di tata surya na mangkaliangi mata ni ari. Sude on boi taratur ala Jahowa do na mangatur parputar ni sude planet dohot angka bintang. Tingki taboto songon dia huasoNa manompa langit dohot tano, gabe taronjar ma rohanta laho mamuji, manomba, jala marsihohot tu Ibana.—Ps. 136:1, 5-9.

4. Boasa angka ilmuwan ndang boi mangalusi godang sungkunsungkun na ringkot?

⁴ Godang do na diparsiajari angka ilmuwan taringot angka tompaan laho mambahen lam denggan ngolunta. Alai, ndang boi dope didapot nasida alus ni godang sungkunsungkun na ringkot di parngoluon. Umpamana, ndang boi dipatorang angka astronom songon dia mula ni alam semesta manang boasa jolma, binatang, dohot angka suansuanan ditompa. Ndang adong na boi patorangkon boasa lomo roha ni jolma mangolu salelengna. (Pjm. 3:11) Gabe maol sungkunsungkun i dialusi, ala pigapiga ilmuwan mandok ndang adong Debata jala mangajarhon evolusi. Alai, dipaboa Debata do alusna tu hita marhite BukuNa, i ma Bibel.

5. Songon dia do angka jolma mangihuthon hukum alam?

⁵ Dibahen Jahowa do godang hukum alam. Hukum on ndang hea muba. Ahli listrik, ahli pipa, ahli mesin, pilot, ahli bedah, dohot na asing mangihuthon hukum on asa boi mangulahon ulaonna. Umpamana, sarupa do sude parpeak ni jantung ni jolma. I do na mambahen diboto ahli bedah parpeak ni jantung ni angka pasienna. Sude do halak mamboto, molo manimbung hita sian inganan na timbo, tontu madabu do jala boi mate. Taihuthon do hukum alam, songon gravitasi, asa boi hita mangolu.

6. Sian dia do taboto na lomo roha ni Jahowa asa taratur naposoNa manomba Ibana?

⁶ Taratur do dibahen Jahowa alam semesta on. Tangkas ma, lomo do rohaNa asa taratur naposoNa manomba Ibana. Sasintongna, nunga diparade Jahowa Bibel, asa taboto cara manomba Ibana. Asa boi marlas ni roha, ingkon taihuthon do tudutudu sian Debata marhite Bibel dohot organisasiNa.

7. Aha do na boi taparsiajari sian cara ni Bibel disurat?

⁷ Bibel, i ma silehonlehon na mansai denggan sian Debata. Pigapiga pakar mandok, Bibel i holan buku ni halak Jahudi dohot halak Kristen na dibahen gabe sada. Alai, Debata do na manontuhon ise na manurat Bibel, andigan nasida manurat i, jala aha na laho disurat. Alani i ma, sude bagian ni buku  di Bibel mangurupi hita mangantusi sangkap ni Debata. Sian 1 Musa sahat tu Pangungkapon, dipaboa do adong ”pinompar” na laho mambahen tano on gabe paradeiso. Nunga taparsiajari, Jesus Kristus do ”pinompar” on, jala Harajaonna patuduhon Jahowa do na marhak mamarenta sude jolma.—Jaha 1 Musa 3:15; Mateus 6:10; Pangungkapon 11:15.

8. Songon dia do halak Israel denggan diatur?

⁸ Diihuthon halak Israel do Patik na dilehon Debata jala taratur do nasida. Umpamana, adong do diatur ”parompuan angka na marpungu di lambung pintu ni undungundung parluhutan i marhaladoi”. (2 Mus. 38:8) Halak Israel pe mangihuthon tudutudu songon dia asa taratur papindahon undungundung dohot tabernakel. Dung i, Raja Daud mangatur angka malim dohot halak Lepi mangulahon angka ulaon di bagas joro. (1 Kron. 23:1-6; 24:1-3) Ala unduk halak Israel tu Jahowa, dipasupasu ma nasida. Taratur do nasida, dame, jala marsada.—5 Mus. 11:26, 27; 28:1-14.

9. Songon dia do angka huria di abad na parjolo denggan diatur?

⁹ Angka huria di abad na parjolo pe denggan do diatur. Adong do punguan na mangaradoti, i ma punguan ni angka baoa na mangalehon tudutudu tu huria. Angka apostel hian do anggota ni punguan on. Alai di pudian ni ari, boi do sintua dohot tusi. (Ul. 6:1-6; 15:6) Diurupi Jahowa do punguan na mangaradoti organisasi dohot angka halak na mangurupi nasida tingki manongos surat na marisi poda dohot tudutudu tu huria. (1 Tim. 3:1-13; Tit. 1:5-9) Aha do laba na didapot huria molo diihuthon nasida tudutudu sian punguan na mangaradoti organisasi?

10. Aha do labana tingki huria di abad na parjolo mangihuthon tudutudu sian punguan na mangaradoti organisasi? (Ida gombar di mula ni parsiajaran.)

¹⁰ Jaha Ulaon ni Apostel 16:4, 5. Di abad na parjolo, pigapiga baoa ro tu huria laho paboahon ”patik na pinaputus ni angka apostel dohot sintua na di Jerusalem”, i ma sian punguan na mangaradoti organisasi. Diihuthon angka huria do tudutudu on, ”gabe lam togu ma haporseaon ni angka huria i, jala lam ganda toropnasida ganup ari”. Aha do na taparsiajari sian nasida asa boi taulahon di hurianta?

11. Aha do na ingkon diulahon sintua dohot parhobas tingki manjalo tudutudu sian organisasi ni Debata?

¹¹ Anggota Panitia Cabang, angka pengawas wilayah, dohot angka sintua porlu do mangihuthon tudutudu sian organisasi ni Debata. Sasintongna, Bibel paboahon, ingkon unduk do hita tu halak na manguluhon hita. (5 Mus. 30:16; Heb. 13:7, 17) Angka halak na marsihohot tu Jahowa, ndang olo mangalo jala ndang olo marungutungut alani tudutudu na dilehon tu nasida. Ndang olo hita songon si Diotrepes, na so unduk tu halak na manguluhon huria. (Jaha 3 Johannes 9, 10.) Asa tongtong dame jala marsada di huria, ingkon taihuthon do tudutudu na dilehon. Alani i, tasungkun ma dirinta,  ’Olo do ahu patoguhon dongan sahaporseaon asa marsihohot tu Jahowa? Pintor huihuthon do tudutudu na dilehon organisasi ni Debata?’

12. Songon dia do cara mamillit baoa na laho gabe sintua dohot parhobas?

¹² Na parpudi on, Punguan na Mangaradoti Organisasi mangganti cara mamillit baoa na laho gabe sintua dohot parhobas. ”Pertanyaan Pembaca” di Menara Pengawal 15 November 2014 patorangkon, tingki di abad na parjolo, disuru punguan na mangaradoti organisasi do pengawas wilayah mamillit baoa na laho gabe sintua dohot parhobas. Alani i, mulai bulan September 2014, pengawas wilayah nunga mangulahon on. Tingki dipaboa sintua tu pengawas wilayah taringot donganta baoa na tama gabe sintua manang parhobas, ingkon ditogihon pengawas wilayah do ibana mangkatai jala pengawas wilayah i manjumpangi keluargana. Umpamana, ingkon rap marbarita do ibana dohot donganta baoa i. (1 Tim. 3:4, 5) Dung i, dijumpangi pengawas wilayah ma angka sintua. Manat do nasida mamparrohahon ayat na paboahon parange na ingkon dipatudu sahalak sintua manang sahalak parhobas.—1 Tim. 3:1-10, 12, 13; 1 Ptr. 5:1-3.

13. Songon dia do hita patuduhon na taoloi tudutudu sian angka sintua?

¹³ Dilehon angka sintua do pengaturan sian Bibel, asa boi denggan jala dame huria. Ingkon taihuthon do tudutudu sian nasida, alana parohon laba do i tu hita. (1 Tim. 6:3) Di abad na parjolo, adong do ”na so maradat parangena”. Ndang olo nasida karejo, alai jotjot do diantoi nasida ulaon na so ulaonna. Dipasingot angka sintua do nasida asa marhamubaon. Dipaboa si Paulus do songon dia hita maradophon halak sisongon i. Didok ibana, ”Patanda hamu ma i; unang ma marparsaoran hamu dohot ibana.” Unang ma marsaor dohot nasida, alai ndang mambahen nasida gabe musu. (2 Tes. 3:11-15) Angka sintua saonari pe mangurupi donganta na so mangihuthon aturan ni Debata. Umpamana, na marhallet tu na so Sitindangi. (1 Kor. 7:39) Molo ndang marhamubaon ibana, boi do angka sintua mangalehon jamita na patorangkon songon dia parange sisongon i mambahen halak mangkatahon na so denggan taringot hurianta. Molo nunga dipasahat sintua jamita sisongon i di huria, songon dia do hamu maradophon i? Molo diboto hamu ise halakna, olo do hamu ndang marsaor dohot ibana? Molo diulahon hamu on, boi ma hamu mangurupi ibana mangantusi molo parangena i ndang dihalomohon Jahowa, jala ingkon marhamubaon do ibana. ^[1]—Ida catatan.

14. Songon dia do hita manjaga huria asa tongtong badia?

¹⁴ Dipaboa Bibel do aha na ingkon taulahon asa tongtong badia hurianta. Ingot ma na masa di Korint. Dihaholongi si Paulus do angka donganta disi. Godang do na diurupi ibana mananda hasintongan. (1 Kor. 1:1, 2) Alani i, rimangi ma songon dia pangkilalaanna tingki diida ibana adong donganta na mangulahon parmainanon jala angka dongan na asing paloashon ibana tongtong di huria! Dipaboa si Paulus ma tu angka sintua asa ”pasahaton ibana tu sibolis”. Ingkon dipabali angka sintua do halak na mardosa i sian huria. (1 Kor. 5:1, 5-7, 12) Saonari pe, ingkon dipabali angka sintua do sasahalak sian huria molo mangulahon dosa na balga jala ndang marhamubaon. Alani i, taoloi do prinsip ni Bibel tingki maradophon halak sisongon i? Molo taulahon i, nunga dohot hita manjaga huria asa tongtong badia. Jala, gabe taurupi ma halak na dipabali i mangantusi porlu do ibana marhamubaon jala mangido asa disalpuhon Jahowa hasalaanna.

15. Songon dia do hita manjaga huria asa tongtong dame?

¹⁵ Adong muse parsoalan na asing di Korint. Pigapiga halak mamboan dongan sahaporseaonna tu pengadilan. Didok si Paulus tu nasida, ”Boasa ndang dumenggan di hamu talu?” (1 Kor. 6:1-8, Bibel siganup ari) Saonari, adong do donganta na rap marbisnis, alai ala rugi na sada jala didok rohana na diotootoi dongan sahaporseaon i do ibana, gabe diboan ma donganna i tu pengadilan. Molo masa sisongon on, boi do gabe ndang denggan pandapot ni halak taringot Jahowa dohot naposoNa. On pe boi mambahen parsoalan di huria. Buku na sian Debata mangurupi hita asa tongtong mardame dohot angka donganta, nang pe rugi di parhepengon. ^[2] (Ida catatan.) Sasintongna, dipaboa Jesus do cara pasaehon parsoalan dohot parbadaan. (Jaha Mateus 5:23, 24; 18:15-17.) Molo taoloi tudutudu on, nunga dohot hita manjaga huria asa tongtong dame jala marsada.

16. Boasa naposo ni Debata marsada?

¹⁶ Buku na sian Jahowa paboahon, ”Ida ma, dengganna i dohot sonangnai, molo tung pungu sahundulan angka na marhahamaranggi!” (Ps. 133:1) Tingki unduk halak Israel tu Jahowa, taratur do nasida jala marsada. Nunga disurirangkon Debata, ”Pasadaonku ma nasida, songon birubiru di bagasan bara.” (Mik. 2:12)  Disurirangkon Debata do naposoNa mandapot hasintongan sian Bibel jala marsada manomba Ibana. Didok Ibana, ”Patongononku tu angka bangso dila na pita, asa saluhut nasida manjou goar ni Jahowa, asa dioloi nasida ibana marroha sisangunjur.” (Sep. 3:9) Mandok mauliate do hita ala marsada hita manomba Jahowa!

17. Aha do na ingkon diulahon angka sintua molo adong sasahalak di huria mangulahon dosa na balga?

¹⁷ Molo sasahalak mangulahon dosa na balga, ingkon hatop ma sintua mangurupi ibana marhamubaon. Diboto nasida, dihalomohon Jahowa do nasida manjaga huria sian pangkorhon na roa, asa badia huria i jala marsada. (Poda 15:3) Dihaholongi si Paulus do angka donganna di Korint jala rade do ibana mangurupi nasida, songon na tajaha di suratna na parjolo. Taboto, pintor hatop do sintua disi mangihuthon tudutudu ni si Paulus, alana dung pigapiga bulan, dipuji si Paulus do nasida di suratna na paduahon. Molo adong donganta ”tardapot mangulahon na sala”, ingkon lambok do sintua mangurupi ibana marhamubaon.—Gal. 6:1, Bibel siganup ari.

18. (a) Songon dia do tudutudu sian Hata ni Debata mangurupi huria di abad na parjolo? (b) Aha do na laho taulas di artikel na mangihut?

¹⁸ Tangkas ma, tingki halak Kristen di abad na parjolo mangihuthon tudutudu na adong di Buku na sian Debata, tongtong ma badia hurianasida, dame, jala marsada. (1 Kor. 1:10; Eps. 4:11-13; 1 Ptr. 3:8) Ujungna, boi ma nasida marbarita na uli ”tu saluhut na tinompa, na ditoru ni langit”. (Kol. 1:23) Saonari pe, naposo ni Jahowa marsada jala taratur. Dipasahat nasida do barita na uli di tano on. Artikel na mangihut patuduhon bukti na lomo do rohanasida pasangaphon Debata Jahowa jala unduk tu parentaNa na dipaboa di BukuNa, i ma Bibel.—Ps. 71:15, 16.