1. Sian dia do taboto Debata laho paluahon naposoNa sian Babel na Balga, jala sungkunsungkun aha do na laho taalusi?

ANDORANG so artikel on, nunga taparsiajari taringot halak Kristen na ditaban tu Babel na Balga. Alai, adong barita na uli na paboahon ndang salelengna nasida ditaban. Taboto taringot on, ala di Bibel, Debata mandok tu naposoNa asa ”laho” sian agama na so sintong. (Jaha Pangungkapon 18:4.) On patuduhon, dipalua ma halak Kristen sian Babel na Balga. Las do rohanta mamboto andigan nasida dipalua! Alai andorang so i, taalusi ma sungkunsungkun on: Aha do na laho diulahon Parsiajar Bibel taringot Babel na Balga andorang so taon 1914? Songon dia do angka donganta marhiras ni roha marbarita na uli tingki Porang Dunia I? Ala na dipasingot do naposo ni Debata umbahen na ditaban nasida tu Babel?

2. Aha do na laho diulahon Parsiajar Bibel andorang so Porang Dunia I?

² Leleng andorang so Porang Dunia I (1914-1918),  si Charles Taze Russell dohot Parsiajar Bibel na asing mamboto molo angka gareja ndang mangajarhon hasintongan sian Bibel. Ndang olo nasida dohot tu agama na so sintong. Taon 1879, Zion’s Watch Tower mandok, bagian sian Babel na Balga, i ma ganup gareja na mandok dirina oroan ni Kristus, alai tongtong rap saulaon dohot pamarenta. Nasida ma boruboru na so hasea na didok di Bibel.—Jaha Pangungkapon 17:1, 2

3. Aha do na diulahon Parsiajar Bibel na patuduhon ndang olo be nasida dohot tu agama na so sintong? (Ida gombar di mula ni parsiajaran.)

³ Diboto na marsihohot do, molo tongtong nasida dohot tu agama na so sintong, ndang olo Debata mamasumasu. Alani i, ditongos nasida ma surat tu gareja, na mandok ndang olo be nasida gabe anggota ni gareja i. Deba sian nasida manjahahon surat i di jolo ni sude anggota gareja. Molo ndang dipaloas manjahahon, ditongos nasida do surat i tu ganup anggota ni gareja. Tangkas do dipatudu Parsiajar Bibel, na so olo nasida dohot tu agama na so sintong! Dung pigapiga taon, dibunu do molo adong na mangulahon sisongon i. Alai taon 1870, pamarenta ndang sai rap saulaon be dohot gareja. Gabe boi ma halak mangkatahon taringot Bibel jala ndang diorai nang pe so satolop tu gareja.

4. Saleleng Porang Dunia I, songon dia do Parsiajar Bibel maradophon Babel na Balga? Patorang ma.

⁴ Diboto Parsiajar Bibel, ndang sae holan paboahon tu keluarga, tu dongan, dohot tu anggota ni gareja taringot na so olo be nasida dohot tu agama na so sintong. Lomo roha ni nasida asa diboto sude halak, Babel na Balga, i ma agama na so sintong! Alani i, bulan Desember 1917 sahat tu mula ni taon 1918, Parsiajar Bibel mangalehon 10.000.000 risalah na marisi artikel na marjudul ”Halelengse ni Babel”. Risalah i patuduhon hasintongan taringot angka gareja na mandok dirina Kristen. Tontu taboto do gabe muruk angka pemimpin ni gareja! Alai, marhiras ni roha do Parsiajar Bibel. Marsitutu do nasida marbarita jala unduk ”di Debata asa di jolma”. (Ul. 5:29) Aha do na boi taboto sian on? Taboto ma, saleleng Porang Dunia I, angka halak Kristen na marsihohot ndang ditaban; alai, dipalua do nasida sian agama na so sintong jala mangurupi na asing mangulahon na sarupa.

5. Boasa tadok angka donganta marhiras ni roha saleleng Porang Dunia I?

⁵ Najolo tadok do, ndang dihalomohon Debata naposoNa ala ndang  marhiras ni roha nasida marbarita saleleng Porang Dunia I. Alani i, gabe porsea ma hita na dipaloas Jahowa do Babel na Balga manaban nasida satongkin. Alai angka donganta na mangolu taon 1914 sahat tu taon 1918 mandok, marhiras ni roha do nasida marbarita na uli di tingki i. Pangantusion na dumenggan taringot na masa tu Parsiajar Bibel di tingki i, mangurupi hita mangantusi pigapiga na masa na disurat di Bibel.

6, 7. (a) Aha do ambatambat na diadopi Parsiajar Bibel saleleng Porang Dunia I? (b) Aha do na patuduhon hiras ni roha ni Parsiajar Bibel?

⁶ Sasintongna, saleleng Porang Dunia I, marhiras ni roha do Parsiajar Bibel marbarita. Alai adong do dua ambatambat. Na parjolo, Parsiajar Bibel marbarita ndang holan mamangke Bibel. Nasida pe mamangke angka buku dohot sijahaon na paboahon taringot hasintongan. Alani i, tingki pamarenta ndang paloashon buku The Finished Mystery disarhon di mula ni taon 1918, gabe maol ma angka donganta marbarita. Na paduahon, i ma taringot flu Spanyol. Sahit on mansai posi, boi bali, jala mambahen angka donganta maol marbarita. Nang pe songon i, sai marsitutu do Parsiajar Bibel marbarita na uli.

⁷ Taon 1914, Parsiajar Bibel patuduhon ”Drama-Foto Penciptaan”. Tingki i, ndang adong na hea mangida drama sisongon on, na dibahen sian slide gombar na bergerak jala marsoara. Drama on paboahon sejarah mulai ditompa si Adam sahat tu ujung ni pamarentaon ni Kristus. Tingki parjolo diputar taon 1914, adong 9.000.000 halak na ro mangida. Pingkirhon ma, gumodang  do i sian bilangan ni Sitindangi Ni Jahowa saonari! Laporan na asing mandok, taon 1916, adong lobi sian 809.000 halak na ro tu parpunguan di Amerika Serikat, jala taon 1918, adong 950.000 halak na ro. Tangkas ma, marhiras ni roha do Parsiajar Bibel!

8. Songon dia do angka donganta baoa patoguhon Parsiajar Bibel saleleng Porang Dunia I?

⁸ Saleleng Porang Dunia I, angka donganta baoa marhiras ni roha manguluhon ulaon paradehon sijahaon sian Bibel jala manjujui Parsiajar Bibel. On patoguhon Parsiajar Bibel tongtong marbarita. Si Richard H. Barber, na marhiras ni roha marbarita di tingki i, mandok, ”Marhasil do hami mampartahanhon pengawas wilayah dohot mampartahanhon asa adong The Watch Tower jala manongoshon i tu Kanada, inganan na so paloashon i disarhon.” Didok muse, ”Hak na sumurung do boi manalin buku The Finished Mystery na boi siat di sangku ni baju tu dongan naung ditangkup bukuna. Donganta si Rutherford mangido asa dibahen kebaktian di pigapiga kota di bagian barat Amerika Serikat, jala manuru angka parjamita asa patoguhon dongan sahaporseaon.”

9. (a) Boasa naposo ni Debata porlu dipasingot tingki taon 1914 sahat tu 1919? (b) Nang pe nasida porlu dipasingot, aha do na boi gabe mambahen hita sala marpangantusion?

⁹ Adong do na porlu diuba Parsiajar Bibel. Ndang pola tangkas dope diantusi nasida na didok Jahowa taringot unduk tu pamarenta. (Rom 13:1) I do alana, adong do nasida na so netral saleleng parporangan. Umpamana, tingki presiden Amerika Serikat manuru angka halak martangiang asa mardame tanggal 30 Mei 1918, The Watch Tower pe manjujui Parsiajar Bibel asa dohot martangiang. Adong do pigapiga donganta na mangalehon hepeng tu haporluon ni porang i. Adong muse do na gabe tentara jala marporang. Nang pe nasida porlu dipasingot, alai sala do hita molo tadok alani i nasida ditaban tu Babel na Balga. Sasintongna tingki Porang Dunia I, laho kaluar nama nasida sian agama na so sintong.—Jaha Lukas 12:47, 48.

10. Songon dia do Parsiajar Bibel mangargai hangoluan?

¹⁰ Tutu do, ndang pola tangkas diantusi Parsiajar Bibel songon dia gabe halak Kristen na netral. Alai, diboto nasida sala do molo mambunu halak na asing. Alani i, nang pe adong donganta na gabe tentara  jala mamboan senjata saleleng Porang Dunia I, ndang olo nasida mambunu manang ise. Na so olo mambunu musu, gabe disuru tu barisan parjolo asa mate tarbunu.

11. Songon dia do pangkilalaan ni pamarenta ala ndang olo Parsiajar Bibel dohot marporang?

¹¹ Mansai muruk situtu do Sibolis ala tongtong donganta marsihohot tu Debata. Ujungna, dibahen ibana ma ”uhum na so tigor”. (Ps. 94:20, Bibel siganup ari) Sahalak jenderal tentara ni Amerika Serikat na margoar si James Franklin Bell, paboahon tu donganta si Rutherford dohot si Van Amburgh, laho dibahen pamarenta ma uhum na baru na mandok asa dipamate sude halak na so olo dohot marporang. Na nidok ni ibana disi, i ma Parsiajar Bibel. Muruk situtu do jenderal i jala didok ibana tu donganta si Rutherford, ndang jadi uhum i dibahen ala ndang olo presiden ni Amerika Serikat mangulahon i. Dung i didok jenderal i ma, ”Alai, diboto hami do cara songon dia laho manguhum hamu. Paima hamu ma i!”

12, 13. (a) Boasa ualu donganta leleng dipenjarahon? (b) Dung dipenjarahon, tongtong do nasida marsihohot asa unduk tu Jahowa? Patorang ma.

¹² Ujungna, diboto pamarenta ma cara laho manguhum Parsiajar Bibel. Ditangkup ma donganta si Rutherford dohot si Van Amburgh, raphon onom donganta na mewakili Lembaga Menara Pengawal. Sahalak hakim na mangaluhon nasida mandok, umjahat do angka baoa on sian angka tentara ni Jerman. Didok ibana, mangalo do angka baoa on tu pamarenta, tu militer, tu gareja, jala ingkon uhumon do nasida. ^[1] (Ida catatan.) Alani i, ualu  halak Parsiajar Bibel leleng dipenjarahon di Atlanta Georgia. Alai dung sae porang, dipalua ma nasida jala ndang dialuhon be nasida.

¹³ Nang pe dipenjara, marsitutu do donganta na ualu i mangihuthon patik ni Debata. Sian dia taboto? Ditongos nasida ma surat tu presiden Amerika Serikat asa dipalua nasida. Di surat i, dipaboa do ajaran ni Bibel na mandok ndang boi hita mambunu. Diripashon Debata do halak na so olo unduk tu patikNa. Dipatorang nasida, on ma alana umbahen ndang olo nasida mambunu manang ise pe. Barani do nasida manongos surat tu presiden! Tangkas ma, sai marsitutu do angka donganta on unduk tu Jahowa.

14. Hombar tu Maleaki 3:1-3, patorang ma aha na masa taon 1914 sahat tu 1919.

¹⁴ Maleaki 3:1-3 patorangkon na masa tu Parsiajar Bibel taon 1914 sahat tu mula ni taon 1919. (Jaha.) Debata Jahowa dohot Jesus Kristus, ”suruan ni parpadanan”, ro mamareso ”halak Lepi”, na manggombarhon angka na miniahan. Dung dipareso Jahowa nasida jala dipabadia, rade ma nasida manjalo tugas na baru. Taon 1919, dipillit Jesus ma ”naposo haposan jala na marroha”, na disuru manjaga jala manogunogu sude naposo ni Debata. (Mat. 24:45) Ujungna, dipalua ma naposo ni Debata sian Babel na Balga. Dung i, lam godang ma diparsiajari nasida taringot sangkap ni Debata, jala lam togu ma holong ni nasida tu Debata Jahowa. Mandok mauliate do nasida ala dipasupasu Jahowa! ^[2]—Ida catatan.

15. Songon dia do hita patuduhon hamauliateon ala nunga dipalua sian Babel na Balga?

¹⁵ Mandok mauliate do hita ala nunga dipalua sian Babel na Balga. Ndang boi Sibolis mangaripashon panombaon na sintong. Ndang boi saut sangkapna! Alai, ingkon taingot do boasa Jahowa paluahon hita. Na tinujuNa, i ma asa mangolu sude halak. (2 Kor. 6:1) Saonari, tongtong dope agama na so sintong mangarajai jolma na serep marroha, alai ingkon taurupi do angka jolma! Taulahon ma sian nasa gogonta laho maniru angka donganta na paluahon angka jolma sian Babel na Balga!