1. Ala mardosa, aha do na boi ro tu pingkiranta?

SI PAULUS mandok, ”O’e, ahu jolma na dangol on!” (Rom 7:24) Saonari pe, godang do naposo ni Debata songon si Paulus, marmetmet ni roha jala marsak. Boasa? Ala jolma na mardosa do hita, jala jotjot mangulahon na sala. Songon i do pangkilalaan ni pigapiga donganta na hea mangulahon dosa na balga. Didok roha ni nasida, ndang na laho salpuhonon ni Jahowa be dosa ni nasida.

2. (a) Songon dia do Psalmen 34:22 paposhon roha ni naposo ni Debata asa unang sai manolsoli? (b) Aha do na laho taulas di parsiajaran on? (Ida kotak ” Dia do na Rumingkot, Parsiajaranna manang Tudosanna?”)

² Bibel mandok, ”Ditobus Jahowa do hosa ni angka naposoNa, jala ndang uhumonNa be halak na marhaposan tu Ibana.” (Ps. 34:22, [NW]) Alai, aha do lapatan ni marhaposan tu Jahowa? Aha do na ingkon taulahon asa marasi ni roha Jahowa tu hita? Jala aha do na ingkon taulahon asa disesa dosanta? Dapotta ma alusna, dung taulas taringot huta parlinggoman di Israel najolo. On dibahen,  tingki marlangku dope parjanjian Uhum, jala diganti ma i di ari Pentakoste taon 33 M. Sian Jahowa do Uhum i. Alani i, tingki dibahen Jahowa huta parlinggoman tu halak Israel, taboto ma songon dia pangkilalaanNa mangida dosa, pardosa, dohot halak na marhamubaon. Parjolo, taulas ma boasa adong huta parlinggoman di halak Israel.

3. Aha do na ingkon bahenon ni halak Israel tu halak na mambunu?

³ Asi do roha ni Jahowa mida halak na mate tarbunu. Molo adong halak Israel na mambunu, diloas do ’sisolhot ni na tarbunu’ i mambunu ibana. (4 Mus. 35:19) Alana, ingkon ngoluna sandiri do na gabe ganti ni na mate i. Ai diparentahon Jahowa do, ”Unang tung ramuni hamu tano na niingananmuna i.” Molo ndang pintor dipamate na mambunu i, gabe ramun ma Tano Na Dijanjihon i.​—4 Mus. 35:33, 34.

4. Songon dia do molo adong halak Israel na so sangaja mambahen sasahalak mate?

⁴ Alai boha do molo adong halak Israel na so sangaja mambahen sasahalak mate? Nang pe ndang disangaja, ingkon martanggung jawab do ibana. (1 Mus. 9:5) Alai, boi do ibana dapotan asi ni roha ni Jahowa. Ingkon lari ma ibana tu huta parlinggoman, asa unang dipamate sisolhot ni na tarbunu i ibana. Molo diloas do ibana tading di huta i, ndang adong be na boi mambunu ibana. Alai, ingkon disi ma ibana sahat tu na mate sintua ni malim.​—4 Mus. 35:15, 28.

5. Boasa huta parlinggoman boi mangurupi hita lam mananda Jahowa?

⁵ Jahowa do na marsuru nasida mambahen huta parlinggoman i, ndang jolma. Didok Jahowa ma tu si Josua, ”Paboa ma tu halak Israel songon on: Papulik hamu ma di hamu huta haporusan” manang huta parlinggoman. (Jos. 20:1, 2, 7, 8) Huta parlinggoman on mangurupi hita lam mananda  Jahowa. Umpamana, lam taantusi ma songon dia asi ni rohaNa tu hita. Jala, taboto ma songon dia hita mangalului parlinggoman sian Ibana.

6, 7. (a) Songon dia do angka sintua mangurupi halak na so sangaja mambahen sasahalak mate? (Ida gombar di mula ni parsiajaran.) (b) Boasa ingkon mangalualu halak na so sangaja mambunu i tu angka sintua?

⁶ Molo adong halak Israel na so sangaja mambahen sasahalak mate, ingkon lari do ibana tu huta parlinggoman. Jala ingkon ’mangalualu’ ibana tu angka sintua di harbangan ni huta i. Jangkonon ni angka sintua do ibana. (Jos. 20:4) Dung i, boanon ni angka sintua i ma ibana tu angka sintua ni huta i. (Jaha 4 Musa 35:24, 25.) Molo didok nasida, tutu na so sian sangkapna do ibana mambahen sasahalak mate, dipaulak ma ibana tu huta parlinggoman.

⁷ Boasa ingkon mangalualu na mambunu i tu angka sintua? Alana, ingkon jagaon ni angka sintua do asa badia bangso i. Jala ingkon urupan ni angka sintua do asa dapotan asi ni roha na mambunu i. Sahalak pakar Alkitab paboahon, molo ndang mangalualu na mambunu i tu angka sintua, boi do ibana dipamate. Jala ndang pola sala na pamatehon i. Ai ibana do na so mangulahon parenta ni Debata. Ingkon luluanna do pangurupion asa boi tongtong mangolu. Molo ndang laho ibana tu huta parlinggoman, marhak do sisolhot ni na tarbunu i mambunu ibana.

8, 9. Boasa sasahalak na mangulahon dosa na balga ingkon mangkatai tu angka sintua?

⁸ Saonari, molo adong dosa na balga na taulahon ingkon tajumpangi do angka sintua. Asa boi hita maraleale muse tu Jahowa. Boasa i ringkot? Na parjolo, ala i do na nidok ni Jahowa. Ingkon sintua do na mangurupi halak na mangulahon dosa na balga. (Jak. 5:14-16) Na paduahon, asa boi na mardosa i mulak tu Jahowa, jala ndang be mangulahon na sala. I do na tinuju ni angka sintua. (Gal. 6:1; Heb. 12:11) Na patoluhon, nunga dilehon tanggung jawab tu angka sintua jala dilatik do nasida laho mangurupi halak na marhamubaon asa unang sai marsak be alani hasalaan i. Didok Jahowa do angka sintua songon ”partabunian sian habahaba.” (Jes. 32:1, 2, Bibel siganup ari) On ma sada cara ni Jahowa patuduhon asi ni roha tu hita.

⁹ Godangan naposo ni Debata paboahon, lumbang do pangkilalaan molo dung mangkatai dohot angka sintua. Umpamana, songon donganta si Daniel. Hea do ibana mangulahon dosa na balga. Alai, saleleng marbulanbulan ndang dipaboa ibana dosana i tu angka sintua. Ibana mandok, ”Dung lam leleng, huhilala ndang na boi be ahu urupan ni angka sintua.” Alai, sai mabiar do ibana habotoan. Sai dipangido ibana do hasesaan ni dosa di mula ni tangiangna. Ujungna, mangkatai ma ibana dohot angka sintua. Ibana mandok, ”Mabiar do ahu nian mangkatai tu nasida. Alai dung hupaboa hasalaanki, hira na mago ma boban na mansai borat sian tanggurungku.” Boi ma muse  ibana maraleale tu Jahowa. Saonari, ias ma panggora ni rohana, jala nunga gabe parhobas be ibana di huria.

10. Asa disesa dosana, aha do na ingkon ulahonon ni halak so sangaja mambunu?

¹⁰ Asa disesa dosana, ingkon hatop do ibana lari tu huta haporusan manang huta parlinggoman na umjonok. (Jaha Josua 20:4.) Ingkon tongtong do ibana tading disi sahat tu na mate sintua ni malim. Jala, ingkon tadingkononna do karejona, dohot jabuna. Jala, ndang boi be ibana mardalani. * (4 Mus. 35:25) Alai, ndang marisuang i. Molo ditadingkon ibana huta parlinggoman, boi do ibana dipamate. Jala on patuduhon na so manolsoli do ibana di pambahenanna i.

11. Songon dia do halak Kristen na marhamubaon patuduhon hamauliateonna tu Debata?

¹¹ Ingkon marsitutu do halak na marhamubaon asa unang be mangulahon dosa. Pasiding ma angka na boi mangelaela. Molo taulahon i, disesa ma dosanta. Dipaboa apostel Paulus do songon dia halak Kristen di Korint patuduhon hamubaon. Didok, ”Marhite arsak ni rohamuna i; gabe marsitutu do hamu dibahen i jala olo patuduhon hatigoranmuna! Laos dihorhon i do di hamu habaranion, parbiaron, pangkilalaan, pasahathon diri dohot haradeon manguhum na sala.” (2 Kor. 7:10, 11, Bibel siganup ari) Ingkon marsitutu do hita pasidingkon dosa. On patuduhon na manolsoli do hita, jala ndang didok rohanta, sai marasi roha do Jahowa nang pe ndang marhamubaon hita.

12. Aha do na ingkon ulahonon ni halak Kristen asa tongtong mandapot asi ni roha ni Jahowa?

¹² Aha do na ingkon ulahonon ni halak Kristen asa tongtong mandapot asi ni roha ni Jahowa? Pasiding ma angka ulaon na tahalomohon najolo, na boi mambahen hita mardosa. (Mat. 18:8, 9) Umpamana, molo adong dongan na mangelaela hita mangulahon na sala, olo dope hita mardongan dohot ibana? Molo ndang boi taorom dirinta minum alkohol, olo do hita mandao sian angka na boi mangelaela? Molo ndang boi taorom giotgiot ni dagingta, olo do hita pasidingkon video, situs internet, manang na mambahen hita mamingkirhon angka na rorang? Molo ndang marsitutu hita, boi do gabe didok rohanta naung ditadingkon Jahowa hita. Alai, molo marsitutu hita tahilala ma ”denggan basa [ni Jahowa] salelenglelengna.” I ma na palashon roha.​—Jes. 54:7, 8.

13. Boasa halak na lari tu huta parlinggoman i boi tongtong dame, tarlinggomi, jala marlas ni roha?

¹³ Molo dung di huta parlinggoman halak na so sangaja mambunu, ndang adong be na boi pamatehon ibana. Songon na nidok ni Jahowa, ”angka huta i bahen haporusan” manang parlinggoman. (Jos. 20:2, 3) Di joloan ni ari ndang diuhumi be ibana alani hasalaan i. Jala, ndang diloas be sisolhot ni  na mate i masuk tu huta i laho mambunu ibana. Molo tongtong do ibana tading disi, tarlinggom ma ibana. Alai ndang songon na di penjara disi. Alana, boi do ibana karejo, mangurupi na asing, huhut manomba Jahowa. Boi do ibana marlas ni roha disi!

14. Boasa ndang porlu be hita marsak molo dung marhamubaon?

¹⁴ Alai, adong dope naposo ni Debata na tongtong marsak nang pe nunga marhamubaon. Didok rohanasida ndang na tutu naung disalpuhon Jahowa hasalaanna. Molo songon i pangkilalaanmuna, pos ma rohamuna nunga disalpuhon Jahowa be hasalaanmuna i. Unang pola marsak be hamu. Ingot ma na masa tu si Daniel na dipaboa di mula ni parsiajaran on. Dung dipasingot jala diurupi angka sintua ibana, gabe ias do panggora ni rohana. Didok ibana, ”Ndang sai marsak be ahu. Nunga salpu be sude. Songon na didok Jahowa, dao do dibolongkon hasalaanta. Molo talului, ndang dapotta be i.” Molo dung di huta parlinggoman halak na so sangaja mambunu i, ndang mabiar be ibana. Suang songon i ma, molo nunga disalpuhon Jahowa hasalaanta, unang ma mabiar na laho uhumon ni Jahowa hita muse di joloan ni ari.​—Jaha Psalmen 103:8-12.

15, 16. Songon dia do Jesus, na gabe Partobus jala Sintua ni Malim, paposhon rohanta tu asi ni roha ni Jahowa?

¹⁵ Saonari, gumodang do na boi  paposhon rohanta tu asi ni roha ni Jahowa. Gumodang sian halak Israel najolo. Dung didok si Paulus ”dangol” ni pangkilalaanna ala ndang boi mangulahon sude hata ni Jahowa, didok do muse, ”Mauliate ma hudok tu Debata marhitehite Jesus Kristus Tuhanta i.” (Rom 7:25) Aha do lapatan ni i? Hea do si Paulus mangulahon hasalaan, alai muba do ibana. Pos do rohana, marhite tobusan ni Jesus, nunga disalpuhon Jahowa be hasalaanna. Hita pe, taingot ma nunga ditobus Jesus be hita. Boi ma ias panggora ni rohanta jala dame ma pangkilalaanta. (Heb. 9:13, 14) Ala Sintua ni Malim do Jesus, ”tarbahen ibana do paluahon sandok angka na manjonohi Debata marhitehite ibana; ai na mangolu do ibana tongtong, laho mangondihon nasida.” (Heb. 7:24, 25) Najolo, diurupi sintua ni malim do halak Israel asa unang sai manolsoli be. Dipapos do roha ni nasida, na sesaon ni Jahowa do dosanasida. Alani i, ala Jesus do Sintua ni Malim di hita, pos ma rohanta ’dapot asi ni roha do hita bahen pangurupion, di tingki halehetanna’.​—Heb. 4:15, 16.

¹⁶ Marhaposan tu Jahowa lapatanna, marhaposan tu tobusan ni Jesus. Taingot ma ndang holan tu sada punguan marlangku tobusan i. Alai, tu hita sandiri pe marlangku do i. (Gal. 2:20, 21) Pos ma rohanta, marhite tobusan disesa Jahowa do dosanta. Gabe marpangkirimon ma hita laho mangolu salelenglelengna. Sada silehonlehon ni Jahowa do tobusan i tu hita sandiri!

17. Boasa ingkon talului parlinggoman sian Jahowa?

¹⁷ Huta parlinggoman on mangurupi hita mamboto asi ni roha ni Jahowa. Diurupi do hita mamboto badia do ngolu i. Jala on patuduhon songon dia angka sintua boi mangurupi hita, songon dia do halak na marsitutu marhamubaon, jala aha do na paposhon rohanta naung disesa Jahowa hasalaanta. Jadi, dilului hamu do parlinggoman sian Jahowa? Holan i do parlinggoman na parohon dame! (Ps. 91:1, 2) Di parsiajaran na mangihut, taida ma songon dia huta parlinggoman mangurupi hita, maniru hatigoran dohot asi ni roha ni Jahowa. Ibana do sitiruon na sun denggan.