1, 2. (a) Aha do pangkirimon ni naposo ni Debata? (b) Aha do na boi mangurupi naposo ni Debata asa tongtong mangingot upa i? (Ida gombar di mula ni parsiajaran.)

MANGKIRIM do halak Kristen na miniahan asa mangolu di banua ginjang. Didok si Paulus do i ”upa hamonangan na sian panjouon ni Debata sian ginjang”. (Plp. 3:14) Di Harajaon ni Debata, rap mamarenta ma nasida dohot Jesus Kristus. Urupan ni nasida ma angka jolma asa malua sian dosa. (Pgk. 20:6) Las do rohanasida alani i! Alai, adong do muse pangkirimon tu birubiru na asing. Mangkirim do nasida laho mangolu di Paradeiso di tano on. On pe parohon las ni roha do!​—2 Ptr. 3:13.

² Diurupi si Paulus do halak Kristen na miniahan asa tongtong marsihohot jala mandapot upa i. Si Paulus mandok, ”Angka na di ginjang i ma parrohahon hamu.” (Kol. 3:2) Lapatanna, ingkon sai dipingkiri nasida do pangkirimon i. (Kol. 1:4, 5) Pingkiri ma taringot pasupasu ni Jahowa. On boi mangurupi naposo ni Debata asa tongtong  mangingot upa i. Ndang soal didia pe pangkirimon ni nasida, di banua ginjang manang di tano on.​—1 Kor. 9:24.

3. Aha do na dipaboa si Paulus tu angka dongan?

³ Dipaboa si Paulus do tu angka dongan taringot ambatambat na diadopi nasida laho mandapot upa i. Umpamana, ditongos ibana do surat tu angka dongan di Kolosse taringot halak Kristen palsu. Nasida mandok, ndang porlu marhaporseaon tu Jesus, jala ingkon Patik ni si Musa do taihuthon, asa boi mambahen las roha ni Debata. (Kol. 2:16-18) Asing ni i, dipaboa si Paulus do muse angka na boi mangambati hita saonari. Dipatorang do cara pasidingkon giotgiot ni daging, jala aha na ingkon taulahon tingki adong parsoalan dohot keluarganta manang angka dongan. Marlaba do sipasingot ni si Paulus on tu hita. Alani i, taulas ma pigapiga sipasingotna i.

4. Songon dia do giotgiot ni daging boi mangambati hita mandapot upa i?

⁴ Dung ditaringoti si Paulus taringot pangkirimon tu nasida, didok ma, ”Pamate hamu ma di bagasan dirimuna angka pangalaho portibi on, i ma [seks na so patut], haramunon, hisap ni daging, roha na jahat dohot hahisapon.” (Kol. 3:5, Bibel siganup ari) Boi do gabe sega paralealeonta tu Debata, molo ndang taorom dirinta. Laos gabe mago ma upa i. Hea do donganta baoa mangkilala songon i. Ditadingkon ibana ma huria alai mulak do muse. Ibana paboahon, tingki i, maol do ibana mangorom giotgiot ni dagingna. Dung diulahon ibana dosa na balga, baru pe manolsoli ibana.

5. Songon dia do cara pasidingkon angka na boi mambahen hita ndang mandapot upa sian Jahowa?

⁵ Pasiding ma angka na boi mambahen hita ndang mangoloi Jahowa. Umpamana, tingki marhamlet, sian mulana ma hatai taringot dia na boi diulahon dohot na so boi diulahon, songon marsihaolan, masiummaan, manang paduadua. (Poda 22:3) Asing ni i, marbisuk ma hamu tingki karejo tu luat na asing, manang karejo dohot na so dongan saripemuna. Aha do na boi diulahon hamu? (Poda 2:10-12, 16) Paboa ma na Sitindangi ni Jahowa do hamu. Pantun ma marpangalaho jala unang ma manggoda. Tingki lungun rohamuna, pintor pangido ma pangurupion sian Jahowa dohot angka dongan sahaporseaon. Alana, di tingki sisongon i gabe sihol do rohanta asa diparrohahon. Jala, olo ma hita mardongan dohot manang ise pe. Parohon jea do on! Pasiding ma angka na boi mangambati hamu mandapot upa sian Jahowa.​—Jaha Psalmen 34:19; Poda 13:20.

6. Aha do na ingkon taingot tingki laho mamillit sitontonon manang sijahaon?

⁶ Asa boi tapamate giotgiot ni daging na sala, tapasiding ma angka sijahaon dohot sitontonon na porno. Saonari, godang do sitontonon manang sijahaon na porno songon na masa di Sodom dohot Gumora. (Jud. 7) Angka halak na mambahen sitontonon manang sijahaon i patuduhon ndang pola sala mangida sisongon i. Unang ma sude tajaha jala tatonton angka na pinarade ni portibi on.  Pasiding ma sitontonon manang sijahaon na boi mangambati hita mandapot upa na sian Debata.​—Poda 4:23.

7. Aha do na boi masa di huria?

⁷ Las do rohanta rap dohot angka dongan di huria. Rap marsiajar Bibel, jala masipatoguan di parpunguan. On boi mangurupi hita asa tongtong mangingot upa i. Alai sipata, olo do ra marsalisi hita dohot angka dongan. Molo ndang pintor mardame, boi do gabe jut rohanta alani i.​—Jaha 1 Petrus 3:8, 9.

8, 9. (a) Parange aha do na mangurupi hita asa mandapot upa sian Debata? (b) Aha do na boi mangurupi hita mardame molo adong na mambahen hansit rohanta?

⁸ Unang ma alani jut ni rohanta, gabe ndang dapotta upa i. Dipaboa si Paulus do aha na porlu ulahonon ni halak Kristen. Ibana mandok, ’Hamu angka naung pinillit ni Debata, angka na badia jala hinaholongan, solukkon hamu ma parasirohaon situtu, haburjuon, haserepon, lambok dohot lambas ni roha. Masipauneunean jala masisesaan dosa ma hamu, jumpa marpangkurangi na sada dompak donganna; songon panesa ni [Jahowa] di hamu, songon i ma nang hamu. Alai di ginjang ni saluhutna i: I ma haholongon ni roha i; ai i do rahutrahut ni nasa harimpason.’​—Kol. 3:12-14.

⁹ Tingki adong na mambahen hansit rohanta, taingot ma, hita pe hea do mambahen hansit roha ni donganta. Olo do nasida manalpuhon hasalaanta. Mandok mauliate do hita alani holong dohot haburjuon ni nasida! (Jaha Parjamita 7:21, 22.) Dipasada Kristus do hita dohot angka dongan na manomba Jahowa. Alani i, mandok mauliate ma hita. (Kol. 3:15) Dos do Debata na tasomba, dos do barita na tapasahat, jala dos do hasusaan na taadopi. Molo tapatudu holong dohot haburjuon, jala olo hita manesa hasalaan ni angka dongan, gabe marsada ma huria. Jala, boi ma tongtong taingot upa na sian Debata.

10, 11. (a) Boasa roha mangiburu boi parohon jea? (b) Songon dia do carana asa unang mangiburu hita?

¹⁰ Molo adong roha mangiburu di hita, boi do gabe ndang dapotta upa sian Debata. Dipatorang do di Bibel, songon dia roha mangiburu boi parohon jea. Umpamana, gabe dibunu si Kain do anggina, i ma si Abel ala mangiburu. Gabe mangalo do Si Kora, si Datan, dohot si Abiram tu si Musa ala mangiburu. Jala, gabe naeng dipamate Raja Saul do si Daud ala mangiburu. Toho do na didok ni Bibel, ”Ai ia disi pangiburuon dohot hatongkaron, disi ma hagaoron dohot sandok ulaon hajahaton.”​—Jak. 3:16.

¹¹ Molo marsitutu hita patuduhon holong dohot haburjuon, ndang mura hita mangiburu. Bibel mandok, ”Na lambas do haholongon i jala [burju], ndang na mangiburu haholongon i.” (1 Kor. 13:4) Asa unang adong roha mangiburu di hita, tatiru ma cara ni Jahowa mangida naposoNa. Di Bibel, dipatudos do hita songon ruas ni sada pamatang. Alani i, ingkon songon i ma hita mangida angka dongan. Bibel paboahon, ”Jala ia sangap dibahen sada ruas, rap marlas ni roha ma  saluhut ruas i.” (1 Kor. 12:16-18, 26) Molo tabo pansarian ni donganta manang dapot tanggung jawab na sumurung ibana di huria, unang ma mangiburu hita tu ibana. Gariada, ingkon marlas ni roha do hita rap dohot ibana. Taingot ma si Jonatan anak ni Raja Saul. Nang pe ndang ibana na dipillit gabe raja, ndang mangiburu ibana tu si Daud. (1 Sam. 23:16-18) Gariada, dipatogu jala diurupi ibana do si Daud. Boi do tatiru haburjuon dohot holong ni si Jonatan?

12. Sipasingot aha do na boi mangurupi keluarganta asa mandapot upa sian Debata?

¹² Molo ganup anggota keluarga mangulahon poda na sian Bibel, martua ma keluarga, jala boi ma mandapot upa na sian Debata. Dilehon si Paulus do poda tu angka keluarga. Ibana mandok, ”Hamu angka inaina, tunduk ma hamu tu tungganedolimuna be, ai songon i do patut ulahononmuna songon halak Kristen hamu. Hamu angka amaama, haholongi hamu ma niolimuna be jala unang kasar pambahenanmuna tu nasida. Hamu angka dakdanak, tongtong ma oloi hamu natorasmuna songon halak Kristen hamu, ai i do na mambahen las roha ni Debata. Hamu angka natoras, unang ma hansit roha ni anakkonmuna bahen hamuna, asa unang gabe so parduli nasida.” (Kol. 3:18-21, Bibel siganup ari) Adong do labana molo taulahon on?

13. Songon dia do cara ni tungganeboru mangurupi tungganedolina asa manomba Jahowa?

¹³ Songon dia do molo ndang Sitindangi ni Jahowa tungganedolimuna, jala ndang burju ibana tu hamu? Gabe muruk do hamu jala marbadai dohot ibana?  Ingot ma, ndang na lam denggan situasina molo marbada hamu. Boi do ra dialo hamu ibana. Alai, molo sai dialo hamu ibana, gabe taronjar do annon rohana laho manomba Jahowa? Daong! Molo unduk hamu tu tungganedolimuna, gabe dame ma keluargamuna, jala on parohon sangap tu Jahowa. Olo do ra gabe taronjar roha ni tungganedolimuna laho manomba Jahowa. Boi ma hamu padua rap mandapot upa na sian Debata.​—Jaha 1 Petrus 3:1, 2.

14. Molo ndang unduk tungganeboru na so manomba Jahowa tu tungganedolina, aha do na boi ulahonon ni tungganedolina?

¹⁴ Molo ndang manomba Jahowa tungganeborumuna, jala ndang unduk tu hamu, aha do na boi ulahononmu? Molo disonggaki hamu ibana, gabe diargai do hamu? Tontu ndang. Dijujui Debata do hamu asa gabe tungganedoli na parholong, na maniru Jesus. (Eps. 5:23) Sai sabar jala parholong do Jesus tingki manguluhon huria. (Luk. 9:46-48) Molo ditiru hamu Jesus, olo do gabe taronjar roha ni tungganeborumuna laho manomba Jahowa.

15. Songon dia do sahalak tungganedoli patuduhon holongna tu tungganeboruna?

¹⁵ Didok Jahowa do tu angka tungganedoli, ’Hamu angka baoa, haholongi hamu ma tungganeborumuna be, jala unang ma tarrimas hamu tu nasida!’ (Kol. 3:19) Tangihon ma tungganeborumuna tingki mangkatai. Patudu ma na diargai hamu do pandapotna. (1 Ptr. 3:7) Nang pe ndang sai boi diulahon hamu pangidoanna, alai molo ditangihon hamu ibana, gabe boi ma hamu mambahen haputusan na dumenggan. (Poda 15:22) Tungganedoli na parholong, ndang holan manuntut  asa diargai. Alai, marsitutu do ibana asa diargai. Molo holong do tungganedoli tu tungganeboru dohot ianakhonna, gabe marlas ni roha ma nasida manomba Jahowa. Boi ma dapotnasida upa na dijanjihon Debata.

16, 17. Hamu angka na poso, songon dia do asa unang jut rohamuna tu natuatuamuna?

¹⁶ Hamu angka na poso, ra didok rohamuna do ndang diantusi natuatuamuna pangkilalaanmuna, jala pakarashu do nasida tu hamu. Gabe jut ma rohamuna. Ndang marlas ni roha be hamu manomba Jahowa. Alai, molo ditadingkon hamu Jahowa, idaonmuna ma ndang adong na mangkaholongi hamu dos songon natuatuamuna, dohot angka dongan di huria.

¹⁷ Pingkirhon ma: Molo ndang dipasingot natuatuam ho, boi do pos roham na diparrohahon nasida ho? (Heb. 12:8) Natuatuamuna pe jolma na mardosa do. Ra, cara ni nasida pasingothon ho mambahen jut roham. Alai unang ma holan i na diida ho. Pingkirhon ma boasa dipasingot ho. Unang ma pintor mangalusalusi, alai tangihon ma. Songon na didok di Bibel, ”Manang ise na marroha, markokang do hatahatana, jala parroha na hohom, i ma baoa apala na pantas.” (Poda 17:27) Marsitutu ma asa gabe halak na matoras. Dijalo halak na matoras do sipasingot ndang soal songon dia i dipasahat. (Poda 1:8) Unang ma lupa hamu, sada silehonlehon na mansai arga do molo sisomba Jahowa natuatuanta. Lomo do roha ni nasida mangurupi hamu mangolu salelenglelengna.

18. Boasa ingkon sai taingot upa na dilehon Debata?

¹⁸ Manang didia pe pangkirimonta, di banua ginjang manang di tano on, tongtong ma tapaima pangkirimon i. Sai na saut do i. Ala Sitompa saluhutna do na marjanji. Ibana mandok, ”Ai gok parbinotoan di Jahowa tano on sogot.” (Jes. 11:9) Satongkin nai, ajaran ni Debata ma ganup halak. Ndang marisuang molo tapaima pangkirimon on. Taingot ma, Jahowa do na marjanji tu hita. Alani i, tapasiding ma angka na boi mangambati hita mandapot upa i!