1. Aha do tona ni si Paulus tu angka dongan di Kolosse? (Ida gombar di mula ni parsiajaran.)

HIRAHIRA taon 60-61 M, dipenjara ma si Paulus di Rom. Ditongos ibana ma surat tu angka dongan di Kolosse. Disi, dipatorang ibana ma tu nasida porlu do ”habisuhon partondion” di nasida. Boasa? Asa boi ditiru nasida pamingkirion ni Jahowa. (Kol. 1:9) Didok disi, ”Hupaboa do on tu hamu, asa unang adong na paotootohon hamu marhite angka hata na denggan begeon. Parrohahon hamu ma asa unang adong na mamparhatoban hamu marhite hata sipaotooto na sian habisuhon ni jolma, na ro sian poda ni jolma marsundutsundut dohot sian angka tondi na mangarajai portibi on, angka na so sian Kristus.” (Kol. 2:4, 8, Bibel siganup ari) Dung i, dipatorang si Paulus ma angka pamingkirion na dihalomohon godang halak. Alani pamingkirion sisongon i, gabe didok roha ni angka halak ma ummalo nasida sian na asing. Jadi, ditongos si Paulus pe surat on, asa boi do angka dongan pasidingkon ulaon, dohot pingkiran na sala.​—Kol. 2:16, 17, 23.

2. Boasa ringkot taulas taringot pamingkirion ni halak na sala?

 ² Halak na mangihuthon pamingkirion ni portibi on, ndang mangihuthon poda ni Jahowa. Molo ndang manat, boi do i mambahen gale haporseaonta tu Debata. Jotjot do pamingkirion i taida di TV, di internet, di parkarejoan, manang di parsingkolaan. Songon dia do cara pasidingkon i? Di parsiajaran on, taulas ma lima pamingkirion ni angka halak na sala, jala taida ma cara pasidingkon i.

3. Aha do pandapot ni godangan halak? Jala boasa didok nasida songon i?

³ Di pigapiga negara, godang do halak na mandok, ”Boi do denggan ngolungku nang pe ndang marhaporseaon tu Debata.” Didok roha ni nasida ndang pola porlu taboto taringot Debata. Jala, holan lomo ni roha ni nasida ma na diulahon nasida. (Jaha Psalmen 14:1.) Asing ni i, adong do na mandok songon i asa songon na malo idaon. Didok nasida, ”Huboto do dia na denggan nang pe ndang marhaporseaon tu Debata.”

4. Aha do na boi tadok molo adong halak na mandok ndang adong na manompa hita?

⁴ Boi do dapot rohamuna molo adong na mandok, ”ndang adong Panompa”? Pigapiga halak mangalului alusna sian ilmu pengetahuan. Alai, gabe maol do dapot roha ni nasida. Sasintongna, mura do alus ni i. Rimangi ma, boi do jongjong sada jabu molo ndang adong na pajongjongkon? Ndang boi, ndang i? Jala, molo adong na sega di jabu i, ingkon adong do na paturehon. Songon dia molo jolma? Rimangi ma taringot pamatangta. Tingki tarseat tanganta saotik, boi do i malum sandiri. Alai molo jabu, ndang boi songon i. Haru jabu, ingkon adong na pajongjongkon, tarlumobi ma pamatangta. Jadi, ise do na manompa hita? Bibel mandok, ”Ganup bagas, adong do na paulihonsa; alai sipauli saluhutna, Debata do.”​—Heb. 3:4.

5. Tutu do boi denggan pangalahonta nang pe ndang marhaporseaon tu Debata?

⁵ Tutu do boi denggan pangalahonta nang pe ndang marhaporseaon tu Debata? Dipaboa do di Bibel, halak na so marhaporseaon tu Debata pe mangulahon na denggan do. (Rom 2:14, 15) Umpamana, adong do halak na burju marnatuatua nang pe ndang mangihuthon poda ni Jahowa. Alai sasintongna, molo ndang diihuthon ibana patik ni Debata boi do ibana gabe mangulahon hasalaan na balga. (Jes. 33:22) Godang do halak na pistar, na marhaposan tu Debata. Porsea do nasida, holan Debata do na boi pasaehon parsoalan di portibi on. (Jaha Jeremia 10:23.) Alani i, unang ma didok rohanta, boi do taboto dia na denggan nang pe ndang mangihuthon poda ni Debata.​—Ps. 146:3.

6. Songon dia do pandapot ni angka halak taringot na maragama?

⁶ Godang halak mandok, ”Boi do martua ngolu niba nang pe ndang maragama.” Didok rohanasida ndang adong lapatanna maragama. Godang do agama na mangajarhon taringot api na roko, na mamaksa halak mangalehon hepeng, manang na parsidohot tu politik. Jadi, ndang pola longang rohanta ala lam godang halak mandok, boi do denggan ngolunta nang pe ndang maragama! Ra nasida mandok, ”Porsea do ahu tu  Debata, alai ndang pola lomo rohangku maragama.”

7. Songon dia do agama na sintong mangurupi hita asa martua?

⁷ Boi do martua ngolunta nang pe ndang maragama? Boi do martua ngolunta molo ndang taihuthon agama na palsu. Alai ndang adong halak na martua molo ndang maraleale tu Jahowa, Debata na martua. (1 Tim. 1:11) Godang do na diulahon Jahowa laho mangurupi angka halak. Hita pe, angka naposoNa, lomo do rohanta mangurupi na asing. (Ul. 20:35) Umpamana, rimangi ma songon dia agama na sintong mangurupi angka keluarga asa martua. Diurupi do hita mangargai jala mangkaholongi dongan saripe, pagodanggodangkon ianakhon, jala mangkaholongi sude anggota keluarga. Panombaon na sintong mangurupi naposo ni Jahowa asa dame di huria jala marsihaholongan.​—Jaha Jesaya 65:13, 14.

8. Di Lukas 11:28, aha do na boi parohon las ni roha?

⁸ Boi do marlas ni roha ngolu ni sasahalak nang pe ndang manomba Debata? Aha do na mambahen sasahalak marlas ni roha? Adong do halak na marlas ni roha alani karejona, marolahraga, manang ala mangulahon ulaon na pasonang roha. Asing ni i, adong do halak na marlas ni roha ala mangurupi keluarga manang donganna. Tutu, boi do i parohon las ni roha. Alai, adong do na rumingkot sian i. Ditompa Debata do hita asa boi mananda jala manomba Ibana. Sumurung do hita sian pinahan. Ditompa Jahowa do hita asa dapotan las ni roha tingki mangulahon ulaon partondion. (Jaha Lukas 11:28.) Umpamana, las do rohanta tingki pajumpang dohot angka dongan na manomba Jahowa. (Ps. 133:1) Jala las do rohanta ala boi marpangalaho na ias, marpangkirimon, jala marsada dohot angka dongan di liat portibi on.

9. (a) Aha do pandapot ni angka halak taringot mangulahon seks? (b) Di Bibel, diorai do sasahalak mangulahon seks tu na so dongan saripena, boasa?

⁹ Didok godangan halak, ”Ndang sala mangulahon seks tu na so dongan saripe.” Didok nasida: ”Ndang pola boha i, unang pola patigorhu iba.” Alai, di Bibel, diorai do hita mangulahon i. * (Jaha 1 Tessalonik 4:3-8.) Marhak do Jahowa mangalehon uhum tu hita, ala Ibana do na manompa hita. Ibana mandok, holan na mardongan saripe do na boi mangulahon seks. Alani holongNa do umbahen na dilehon uhum i tu hita. Molo taihuthon patikNa, denggan ma ngolunta. Gabe dame jala masipasangapan do anggota keluarga molo mangihuthon patik ni Debata. Jala, lam masihaholongan ma nasida. Alai uhumon ni Debata do halak naung mamboto patikNa alai ndang diulahon.​—Heb. 13:4.

10. Songon dia do halak Kristen pasidingkon seks na so patut?

¹⁰ Dipaboa do di Bibel cara pasidingkon seks na so patut. Jesus mandok, ”Manang ise na mamereng boruboru huhut marsangkap na roa, nunga saut dilangkup i di bagasan rohana. Molo [tartuktuk alani] mata siamunmi ho, pulsikkon ma i jala  bolongkon!” (Mat. 5:28, 29) Alani i, tarajai ma simalolongta. Unang ma taida gombar manang video porno, jala unang ma tabege ende na rorang. Si Paulus mandok, ”Pamate hamu ma di bagasan dirimuna angka pangalaho portibi on, i ma parmainanon.” (Kol. 3:5, Bibel siganup ari) Jadi, tarajai ma pingkiran dohot pangkataionta.​—Eps. 5:3-5.

11. Aha do na boi mangelaela hita asa mandapot karejo na jago?

¹¹ Didok godangan halak, ”Molo jago karejonta, sonang ma ngolunta.” Dijujui angka halak do hita asa mangalehon sude tingki dohot gogonta tu parkarejoan. Tarlumobi molo karejo i boi mambahen hita gabe tarbarita, diparsangapi, jala mamora. Ala godang halak na mandok songon i, boi do gabe songon i pingkiranta.

12. Tutu do karejo na jago boi mambahen sonang ngolunta?

¹² Tutu do karejo na jago jala na parohon sangap, boi mambahen las rohanta? Ndang. Umpamana, lomo do roha ni Sibolis asa diparsangapi jala tarbarita. Dapotna do i. Alai, ndang marlas ni roha ibana, gariada tarrimas do. (Mat. 4:8, 9; Pgk. 12:12) Rimangi ma las ni roha na tadapot, ala mangurupi angka halak mananda Debata jala mamboto janjiNa. Ndang adong karejo na asing na boi parohon las ni roha sisongon i. Laho mandapot karejo na jago, boi do gabe masilatean halak, gabe garang, manang mangiburu tu donganna. Nang pe denggan karejo nasida, alai hira na so marlapatan do ngolu ni nasida. Di Bibel, didok do nasida songon ”manangkup alogo sambing.”​—Pjm. 4:4, Bibel siganup ari.

13. (a) Songon dia do pandapot na sintong taringot mansari? (b) Aha do na mambahen si Paulus mandapot las ni roha na sasintongna?

¹³ Porlu do hita mansari, jala ndang sala molo tapillit karejo na tahalomohon. Alai, unang ma gabe i na rumingkot di ngolunta. Songon na nidok ni Jesus, ”Ndang boi sintong oloan ni sahalak dua tuan; haholonganna do na sada alai gabe sogo ma rohana tu na sada nai; satia ma ibana tu na sada alai gabe so satia be ibana tu na sada nai. Ndang haoloan hamu Debata dohot hepeng.” (Mat. 6:24, Bibel siganup ari) Manomba Jahowa jala mangurupi halak marsiajar Bibel do na boi parohon las ni roha na sasintongna. I ma na dihilala si Paulus. Tingki poso, karejona do na rumingkot  di ngoluna. Alai, tingki diida ibana songon dia halak marhamubaon ala mambege hata ni Debata, dapotna ma las ni roha na sasintongna. (Jaha 1 Tessalonik 2:13, 19, 20.) Manomba Jahowa jala mangurupi halak marsiajar Bibel do ulaon na parohon las ni roha na sasintongna!

14. Boasa dihalomohon godang halak pandapot na mandok, boi do jolma mambahen portibi on lam denggan?

¹⁴ Adong do na mandok, ”Boi do jolma mambahen portibi on lam denggan.” Dihalomohon godang halak do pandapot i. Boasa? Alana, molo tutu i, ndang dihaporluhon jolma be panogunoguon ni Debata. Boi ma jolma mangulahon lomo ni rohana. Ra, hea do tabege halak mandok nunga moru be porang, parjahat, sahit, dohot hapogoson. Sada laporan mandok, ”Lam denggan pe portibi on, ala nunga marsitutu do angka jolma laho padengganhon portibi on.” Tutu do i? Tutu do naung diboto jolma cara laho padengganhon portibi on? Taulas ma aha na masa.

15. Aha do na patuduhon na lam tamba do hasusaan di portibi on?

¹⁵ Boi do jolma pasohon porang? Saleleng Porang Dunia na parjolo dohot na paduahon, lobi sian 60 juta ma halak na mate. Holan di taon 2015 pe nunga 12,4 juta halak na manadingkon jabuna alani porang manang  parbadaan. Molo dietong sude, gabe 65 juta halak ma na mangungsi. Songon dia do molo hajahaton? Di pigapiga inganan, hira na moru do hajahaton idaon. Alai, lam godang do hajahaton di internet, na mamungkuli keluarga, teroris, dohot korupsi. Songon dia molo sahit? Tutu, nunga dapot ni jolma ubat ni pigapiga sahit. Alai di taon 2013, sada laporan mandok, ganup taon, 9 juta ma halak na marumur hurang sian 60, mate alani sahit jantung, stroke, kangker, sahit paruparu, dohot sahit gula. Songon dia molo hapogoson? Bank Dunia paboahon, taon 1990 di Afrika, 280 juta do halak na pogos. Alai dung taon 2012, tamba ma gabe 330 juta halak.

16. (a) Boasa holan Harajaon ni Debata na tolap padengganhon portibi on? (b) Hombar tu buku Jesaya dohot Psalmen, aha do na laho ulahonon ni Harajaon i?

¹⁶ Ndang pola songgot rohanta disi. Alana, halak na mangkaringkothon diri do na mangatur politik dohot ekonomi saonari. Ndang tolap nasida pasohon porang, hajahaton, sahit, dohot hapogoson. Holan Harajaon ni Debata do na boi padengganhon portibi on. Pingkiri ma taringot aha na laho bahenon ni Jahowa. Marhite HarajaonNa salpu nama angka na mambahen halak marporang. Salpu nama korupsi, agama palsu, Sibolis, parange mangkaringkothon diri, dohot mangkaholongi negara. (Ps. 46:9, 10) SalpuhononNa ma hajahaton. Gariada, saonari pe diajari do angka halak asa masihaholongan. Ndang adong pamarentaon na tolap mangulahon on, asing ni Harajaon ni Debata. (Jes. 11:9) Salpuhonon ni Jahowa ma angka sahit. Boi ma sude jolma tongtong sehat. (Jes. 35:5, 6) SalpuhononNa ma hapogoson, boi ma hita marlas ni roha, jala maraleale tu Ibana. Ummarga do on sian hamoraon.​—Ps. 72:12, 13.

17. Songon dia do cara pasidingkon pamingkirion ni godangan halak na sala?

¹⁷ Molo adong hata ni halak na boi mambahen gale haporseaonta, talului ma poda ni Bibel. Sungkun ma angka dongan na togu paralealeonna tu Jahowa. Pingkiri ma boasa dihalomohon halak pamingkirion sisongon i, boasa i sala, jala songon dia pasidingkon i. Boi do tapasiding pamingkirion ni angka halak molo taulahon songon na didok si Paulus, ”Marbisuk ma hamu maradophon angka na so porsea . . . asa diboto hamu mangalehon alus na sintong tu ganup halak.”​—Kol. 4:5, 6, Bibel siganup ari.