1, 2. Molo torus hita marsiajar, aha do na boi taboto? Paboa ma sada tudosan.

MOLO adong sasahalak mangalehon hadiah tu sahalak dakdanak. Disuru natua-tuana do dakdanak i asa “Mandok mauliate”. Olo do dakdanak i ala disuru natua-tuana. Alai dung lam magodang dakdanak i, diantusi ma boasa ingkon mandok mauliate tu halak na mambahen na denggan tu ibana. Boasa olo ibana mangulahon i? Ala nunga diajari ibana mulai sian dakdanak.

² Suang songon i ma na masa tu hita. Dung marsiajar Bibel hita, taparsiajari do boasa ringkot unduk tu uhum ni Jahowa. Molo torus hita marsiajar, gabe taboto ma pingkiran ni Jahowa, aha na dihalomohon Ibana dohot na so dihalomohon. Jala taboto ma muse songon dia cara ni Jahowa mangida sada situasi. Molo taihuthon do cara ni Jahowa tingki mambahen keputusan dohot tingki mangulahon sada ulaon, on patuduhon na tatiru do pingkiranna.

3. Boasa maol maniru pingkiran ni Jahowa?

³ Lomo do rohanta maniru pingkiran ni Jahowa. Alai olo do sipata maol mangulahon i, ala jolma na mardosa dope hita. Umpamana, maol do taantusi boasa imbar  cara ni Jahowa tu cara ni jolma tingki mangida ulaon na rorang, holongan di hepeng, ulaon marbarita, taringot mudar manang na asing. Alai songon dia carana asa boi maniru pingkiran ni Jahowa? Jala songon dia do on boi mangurupi hita asa mangulahon na denggan saonari dohot di ari na naeng ro?

4. Aha do lapatanna paubahon pingkiranta?

⁴ Jaha Rom 12:2. Dipaboa si Paulus do di ayat on, ringkot do asa tatiru pingkiran ni Jahowa. Didok ibana do muse, “Unang ma tiru hamu angka halak na di portibi on.” Songon naung taparsiajari di minggu naung salpu, ingkon tapasiding do pingkiran dohot pangalaho ni halak di portibi on. Didok si Paulus do muse ingkon tapauba do pingkiranta. Lapatanna, ingkon taparsiajari do Bibel asa taantusi pingkiran ni Jahowa. Dung i, tarimangi ma i jala marsitutu maniru pingkiran ni Debata.

5. Aha do imbarna manjaha dohot marsiajar?

⁵ Molo didok marsiajar, ndang sae holan manjaha sambing jala mangalusi sungkun-sungkun na adong di parsiajaran i. Alai ingkon tarimangi do na taparsiajari i. Tarimangi aha na dipaboa taringot Jahowa, aha do na diulahon Ibana, jala songon dia pingkiranna. Marsitutu ma hita mangantusi boasa disuru Jahowa hita mangulahon sada ulaon. Jala boasa ingkon tapasiding na so dihalomohon rohana. Tarimangi ma muse aha na ingkon tapauba di pangalaho dohot pingkiranta. Tontu, ndang sude boi tarimangi na taparsiajari i. Alai, ingkon gumodang do tingkinta mangarimangi sian manjaha.​—Ps. 119:97; 1 Tim. 4:15.

6. Aha do na taboto molo tarimangi Hata ni Debata?

⁶ Tingki mangarimangi Hata ni Debata, dapotta ma parsiajaran na mansai denggan. Gabe ‘taboto ma’ jala pos ma rohanta, na umbisuk do Jahowa sian pingkiranta sandiri. Boi ma taantusi sada situasi dos songon cara ni Jahowa mangida situasi i. Dung i, gabe rade ma hita mangulahon i jala olo ma hita paubahon pingkiranta. Lam leleng, gabe boi ma tatiru pingkiran ni Jahowa.

7, 8. (a) Songon dia do pingkiran ni Jahowa taringot hamoraon? (Ida gombar di mula ni parsiajaran.) (b) Molo tatiru cara ni Jahowa aha do na rumingkot di hita?

⁷ Aha na tapingkirhon, tarida do i sian parniulaonta. (Mrk. 7:21-23; Jak. 2:17) Asa mura taantusi, taulas ma sada contoh. Umpamana, taringot hatutubu ni Jesus. Sian contoh on, taboto ma songon dia pingkiran ni Jahowa taringot hamoraon. Ndang ala na mora si Josep dohot si Maria umbahen na dipillit Jahowa nasida gabe natua-tua ni Jesus. (3 Mus. 12:8; Luk. 2:24) Tingki tubu Jesus, dipeakhon si Maria ma ibana “tu bagasan panggagatan, ai ndang adong dapot ni nasida inganan laho marborngin”. (Luk. 2:7, surat na di toru.) Sasintongna boi do bahenon ni Jahowa asa tubu Jesus di inganan na sangap. Alai, ndang i na rumingkot di Ibana. Lomo rohana asa Jesus  dipagodang-godang di keluarga na mangkaringkothon parale-aleon tu Debata.

⁸ Sian on taantusi ma songon dia Jahowa mangida hamoraon. Adong do natua-tua na lomo rohana asa mamora ianakhonna, nang pe sasintongna boi do on manegai parale-aleon ni anakhonna i tu Debata. Alai di Jahowa, parale-aleon tu Ibana do na rumingkot. Jadi, ditiru hamu do pingkiran ni Jahowa? Songon dia do hamu patuduhon i?​—Jaha Heber 13:5.

9, 10. Ditiru hamu do pingkiran ni Jahowa? Songon dia ma caramuna patuduhon i?

⁹ Contoh na paduahon. Dosa na balga do di adopan ni Jahowa molo gabe tartuktuk dongan alani hita. Alana on boi mambahen donganta i gabe mardosa jala ndang manomba Jahowa be. Didok Jesus, “Manang ise na mambahen sahalak sian na metmet on gabe ndang porsea be tu ahu, tumagon ma digantungkon tu rungkungna batu gilingan na balga jala dilonongkon tu laut.” (Mrk. 9:42) Tangkas do dipaboa Jesus taringot i! Sarupa do pangkilalaan ni Jesus dohot Jahowa. Ndang lomo roha ni Jahowa mangida sasahalak na mambahen donganna gabe tartuktuk.​—Joh. 14:9.

¹⁰ Ditiru hamu do pingkiran ni Jahowa dohot Jesus? Songon dia do hamu patuduhon i? Umpamana, adong ma cara marpangkean dohot penampilan na tahalomohon. Alai ndang lomo roha ni angka dongan di huria tu cara marpangkean sisongon i. Ala boi do gabe marpingkiran na rorang nasida mangida penampilan sisongon i. Molo holong do rohamuna tu angka dongan, tongtong dope ulahononmuna songon i?​—1 Tim. 2:9, 10.

11, 12. Molo dung taboto aha na dihagigihon Jahowa, songon dia do carana asa boi hita mangalinggomi dirinta?

¹¹ Contoh na patoluhon, dihagigihon Jahowa do angka ulaon na so sintong. (Jes. 61:8) Diboto Jahowa do, ndang mura hita mangulahon on ala jolma na mardosa dope hita. Alai lomo do rohana asa tahagigihon na dihagigihon Jahowa. (Jaha Psalmen 97:10.) Molo tarimangi boasa dihagigihon Jahowa angka na so denggan, gabe boi ma tatiru pingkiranna. Jala ndang olo be hita mangulahon i.

¹² Molo dung taboto angka na dihagigihon Jahowa, gabe taantusi ma dia na sala. Nang pe ndang pola tangkas i disurat di Bibel. Umpamana sada sian ulaon na rorang, i ma lap dance * manang marjoget di abingan ni sasahalak. Nunga somal ulaon on di angka halak. Didok piga-piga halak do, ulaon on  ndang sarupa songon na mangulahon seks. Ala ndang sala didok roha ni nasida, gabe diulahon ma i. Alai songon dia do sasintongna pangkilalaan ni Jahowa mangida i? Ingot ma, dihagigihon Jahowa do sude angka ulaon na rorang. Alani i, tapadao ma dirinta sian angka ulaon na rorang. Carana, taorom ma dirinta jala tahagigihon ma angka na dihagigihon Jahowa.​—Rom 12:9.

13. Tingki marsiajar, boasa ingkon tarimangi songon dia Jahowa mangida sada situasi?

¹³ Tingki marsiajar, ingkon tarimangi do songon dia Jahowa mangida sada situasi. Alana on boi mangurupi hita tingki mambahen keputusan na denggan. Gabe rade ma hita mambahen keputusan di sude situasi. Jala taboto ma aha na laho taulahon. (Poda 22:3) Saonari, taulas ma piga-piga contoh na adong di Bibel taringot i.

14. Aha do na boi taparsiajari sian cara ni si Josep mangalusi istri ni si Potifar?

¹⁴ Tingki istri ni si Potipar manogihon si Josep asa rap modom dohot ibana, pintor lari do si Josep. Tontu nunga dirimangi si Josep hian songon dia pangkilalaan ni Jahowa taringot na mardongan saripe. (Jaha 1 Musa 39:8, 9.) Tangkas do i tarida sian alus ni si Josep tu istri ni si Potipar. Didok ibana, “Tung olo ma ahu mambahen jea na sai godang, asa mardosa ahu maradophon Debata?” Sian on taboto, na ditiru si Josep do pingkiran ni Jahowa. Songon dia molo hamu? Aha do na ingkon ulahononmuna molo adong dongan sakarejo na mangela-ela hamu? Manang, aha do na ingkon ulahononmuna molo adong na mangirim SMS manang gombar na porno? * Molo nunga taparsiajari songon dia cara ni Jahowa jala maniru pingkiranna, gabe boi ma hita marsihohot tu Ibana. Gabe taboto ma keputusan aha na ingkon tabahen.

15. Songon tolu baoa halak Heber, songon dia do hita asa tongtong setia tu Jahowa?

¹⁵ Taulas ma muse contoh na asing. Adong tolu baoa halak Heber, i ma si Sadrak, si Mesak, dohot si Abednego. Tingki disuru Raja Nebukadnesar nasida asa manomba patung na dibahen ibana sian mas, ndang olo nasida. Sian alus ni nasida tu si Nebukadnesar, taboto ma nunga dipingkirhon nasida hian aha na laho masa molo tongtong nasida setia tu Jahowa. (2 Mus. 20:4, 5; Dan. 3:4-6, 12, 16-18) Boha do molo hita saonari? Molo dipangido bosmuna sumbangan laho tu ari raya ni nasida, olo do hamu? Andorang so masa dope situasi sisongon i tu hita, rimangi hian ma songon dia cara ni Jahowa mangida situasi i. Tingki masa i tu hita, gabe mura ma hita mangalusi, songon tolu baoa halak Heber i.

16. Aha do na porlu taulahon asa taantusi pingkiran ni Jahowa tingki posa sahitta?

 ¹⁶ Molo tarimangi hian songon dia cara ni Jahowa mangida sada situasi, boi ma hita setia nang pe tingki posa sahitta. Tontu ndang olo hita transfusi darah dohot pamasukkon opat komponen darah tu pamatangta. (Ul. 15:28, 29) Alai adong do piga-piga perawatan medis na ingkon taparrohahon taringot mudar. Sude halak Kristen ingkon mambahen keputusan hombar tu prinsip ni Bibel. Tingki marsahit hita manang tingki diopname, ndang pintor boi hita mambahen keputusan na denggan. Alani i, tariset hian ma hatorangan taringot mudar. Jala isi hian ma Surat Kuasa Khusus Perawatan Kesehatan, asa taboto hatorangan na tahaporluhon. Jala paboa ma hatoranganna i tu dokterta. *

17-19. Sian saonari boasa ringkot mangarimangi cara ni Jahowa mangida sada situasi? Paboa ma sada contoh.

¹⁷ Contoh na parpudi. Rimangi ma alus ni Jesus tu si Petrus tingki didok ibana, “Asi ma roham tu dirim Tuan.” Tontu nunga dirimangi Jesus hian taringot aha na dipangido Jahowa asa diulahon. Nunga dirimangi hian surirang taringot songon dia ngoluna dohot hamateanna. Ala nunga diantusi ibana i, gabe boi ma ibana tongtong marsihohot tu Jahowa. Jala rade mangalehon dirina humongkop hita.​—Jaha Mateus 16:21-23.

¹⁸ Lomo do roha ni Debata asa marale-ale hita tu Ibana jala mambahen na dumenggan di ulaon marbarita. (Mat. 6:33; 28:19, 20; Jak. 4:8) Alai sipata, adong do piga-piga halak na mambahen metmet rohanta, songon na dibahen si Petrus tu Jesus. Umpamana, ditawarhon bosmuna hamu lembur asa lam godang gajimuna, hape gabe ndang adong  be tingkimuna marbarita dohot marpungu. Manang, molo singkola dope hamu, ditawarhon gurumuna asa pinda tu singkola na umjago alai gabe dao ma hamu sian natua-tuamuna. Andorang so dibahen hamu keputusan, martangiang do hamu? Dilului hamu do hatorangan sian publikasinta? Manang jolo disungkun hamu do pandapot ni keluarga dohot angka sintua? Denggan do molo diparsiajari hamu hian sian saonari, songon dia Jahowa mangida situasi i. Molo tung pe masa situasi na ummaol sian i, gabe mura ma hamu mangadopi i ala ditiru hamu pingkiran ni Jahowa. Nunga tangkas be diboto hamu na laho ulahononmuna. Alana nunga dibahen hamu keputusan na dumenggan asa tongtong manomba Jahowa.

¹⁹ Ra adong do situasi na asing na boi mambahen hita gabe ndang marsihohot be tu Jahowa. Tontu, ndang sai rade hita mangadopi sude situasi. Alai molo taparsiajari Bibel jala tabahen tingkinta laho mangarimangi pingkiran ni Jahowa, gabe lam mura ma hita mangingot aha na taparsiajari. Jala gabe boi ma taulahon na denggan di situasi na songon dia pe. Alani i, tingki marsiajar Bibel, tarimangi ma songon dia cara ni Jahowa mangadopi sada situasi. Tatiru ma carana i. Molo tarimangi i sude, boi ma diurupi hita asa mambahen keputusan na denggan saonari dohot di ari na naeng ro.

20, 21. (a) Boasa boi hita marlas ni roha di tano na imbaru? (b) Saonari, boasa boi hita marlas ni roha?

²⁰ Sude do hita paimahon tano na imbaru. Godangan sian hita mangkirim do asa boi mangolu di Paradeiso. Annon di pamarentaon ni Debata, ndang hilalaonta be hasusaan songon na tahilala di tingkinta saonari on. Jala bebas do hita mamillit lomo ni rohanta.

²¹ Bebas na didok dison, ndang na gabe so adong be aturan. Sude na lambok roha, ingkon tongtong do mambahen keputusan hombar tu uhum dohot pingkiran ni Jahowa. Parohon las ni roha do on dohot hadameon na manongtong. (Ps. 37:11) Huhut paimahon i, saonari pe tahilala do las ni roha ala nunga tatiru pingkiran ni Jahowa.