1-2. (a) Aha do na mangurupi hita asa boi martahan ganup ari mangadopi sitaonon? (b) Aha do na laho taulas di parsiajaran on?

“TINGKI huingot muse sitaonon na hea huadopi, huboto ma ndang boi ahu martahan alani gogongku sandiri.” Hea do hamu mangkilala songon i? Godang do sian hita na hea mangkilala songon i. Ra, hea do hamu mangadopi sahit na posi manang mate halak na dihaholongi hamu. Tingki diingot hamu i muse, dihilala hamu ma na boi do hamu martahan ganup ari holan ala na diurupi Jahowa marhite tondi parbadiana na mangalehon ‘hagogoon na sumurung’.​—2 Kor. 4:7-9.

² Tahaporluhon do tondi parbadia laho pasidingkon pengaruh ni portibi na jahat on. (1 Joh. 5:19) Jala ingkon marsitutu do hita laho mangalo “suru-suruan na jahat”. (Eps. 6:12) Alani i, laho taulas ma dua cara songon dia tondi parbadia boi mangurupi hita mangadopi angka sitaonon i. Jala taulas ma muse aha na ingkon taulahon asa mandapot godang laba sian tondi parbadia.

3. Aha do sada cara ni Jahowa laho mangurupi hita marhite tondi parbadiana?

³ Sada cara tondi parbadia ni Jahowa mangurupi hita, i ma mangalehon gogo. Alani i, gabe boi ma tongtong taulahon tugasta nang pe mangadopi sitaonon. On ma na dihilala apostel Paulus. Boi do ibana mangulahon tugas na sian Jahowa nang pe mangadopi sitaonon ala mangasahon “huaso ni Kristus”. (2 Kor. 12:9) Saleleng pardalananna gabe misionaris na paduahalihon, marbarita do ibana huhut karejo. Tading di kota Korint do si Paulus di jabu ni si Akuila dohot si Priskila.  Ala boi do si Paulus mambahen tenda, rap do nasida karejo saleleng piga-piga ari. (Ul. 18:1-4) Dipargogoi tondi parbadia do si Paulus laho mangulahon karejona huhut marbarita na uli.

4. Hombar tu 2 Korint 12:7b-9, sitaonon aha do na diadopi si Paulus?

⁴ Jaha 2 Korint 12:7b-9. Hata ‘suga di bagasan daging’ na didok si Paulus di ayat on, i ma sitaonon na borat na diadopi ibana. Molo adong suga di bagasan dagingmuna, tontu mansai hansit do i dihilala hamu. Didok ibana do sitaonon i songon “suru-suruan ni Sibolis” na “sai mamungkuli” (“sai mamastapi”, surat na di toru) ibana. Ra, ndang Sibolis dohot suru-suruanna na langsung mambahen sitaonon ni si Paulus i. Alai tingki diboto nasida “suga” na diadopi si Paulus, ra dibahen nasida do i lam bagas masuk tu dagingna. Gabe lam hansit ma dihilala si Paulus. Aha do na diulahon si Paulus?

5. Songon dia do Jahowa mangalusi tangiang ni si Paulus?

⁵ Hea do dipangido si Paulus tu Jahowa asa dipamago “suga” i sian dagingna. Didok ibana, “Nunga tolu hali hupangido tu Tuhan [Jahowa] i asa dipamago i sian ahu.” Nang pe nunga didok si Paulus songon i, tongtong do adong suga i di dagingna. Na so dialusi Jahowa do tangiang ni si Paulus i? Tontu dialusi do. Tutu, ndang pintor dipamago Jahowa sitaononna i. Alai, dipargogoi Jahowa do si Paulus laho mangadopi i. Didok Jahowa, “Lam balga do huasongku alani hagaleonmi.” (2 Kor. 12:8, 9) Ala diurupi Debata, boi do si Paulus tongtong mangkilala hadameon dohot las ni roha!​—Plp. 4:4-7.

6. (a) Songon dia do Jahowa mangalusi tangiangta? (b) Sian angka ayat na adong di paragraf on, aha do janji na boi mampargogoi hamu?

⁶ Songon si Paulus, hea do hamu mangido tu Jahowa asa dipamago sitaononmuna? Ra, nunga jotjot ditangiangkon hamu i. Alai, ndang mago sitaonon i manang olo do gabe lam borat i dihilala hamu. Ra gabe didok rohamu ma, ndang lomo be roha ni Jahowa tu hamu. Molo songon i, ingot ma contoh ni si Paulus. Dialusi Jahowa do tangiangna. Suang songon i ma, dialusi Jahowa do tangiangmuna! Ra, ndang pintor dipamago Jahowa sitaonon i. Alai marhite tondi parbadia, dipargogoi Ibana do hamu laho mangadopi i. (Ps. 61:4, 5) Ra, songon naung “didabuhon” do hamu, alai ndang tadingkonon ni Jahowa hamu.​—2 Kor. 4:8, 9; Plp. 4:13.

7-8. (a) Songon dia do tondi parbadia dipatudos songon alogo? (b) Songon dia do si Petrus patorangkon cara ni tondi parbadia boi mangurupi hita?

⁷ Aha do muse laba na boi tadapot sian tondi parbadia? Boi do tapatudos tondi parbadia songon alogo. Ala adong alogo, boi do kapal layar sahat tu tujuanna nang pe adong haba-haba di laut i. Suang songon i ma, tondi parbadia boi do mangurupi hita mangadopi sitaonon na songon haba-haba jala tongtong setia sahat tu tano na imbaru.

⁸ Ala sijala dengke hian do si Petrus, jotjot do ibana marlayar. I do alana dipangke ibana tudosan i laho patorangkon cara ni tondi parbadia boi mangurupi hita. Didok ibana, “Ndang hea surirang ro sian lomo ni roha ni jolma. Alai sian Debata do ro na nidok ni nasida marhite panogu-noguon ni tondi parbadia.” Hata Junani na diterjemahon ‘ditogu-togu’ boi do lapatanna “diboan”.​—2 Ptr. 1:21.

9. Aha do na tinuju ni si Petrus tingki mandok hata “diboan”?

⁹ Aha do na tinuju ni si Petrus tingki mandok hata “diboan”? Hata Junani na sarupa dipangke si Lukas na manurat buku Ulaon ni  Apostel. Dipatorang ibana do taringot sada kapal na “diboan alogo”. (Ul. 27:15) Sahalak pakar Bibel mandok, tingki didok si Petrus na ‘ditogu-togu’ tondi parbadia do angka panurat ni Bibel, dipatudos ibana do i songon sasahalak na marlayar. Songon kapal layar na diboan alogo asa boi sahat tu tujuanna, songon i ma angka panurat ni Bibel. Ditogu-togu tondi parbadia do nasida laho mangulahon tugasna. Didok pakar Bibel i muse, dipatudos do angka panurat Bibel i songon kapal “naung dibungka layarna”. Dilehon Jahowa do “alogo” manang tondi parbadia tu nasida. Gabe boi ma angka panurat ni Bibel mangulahon tugasna mangihuthon panogu-noguon sian tondi parbadia i.

10-11. Aha do dua cara na ingkon taulahon asa ditogu-togu tondi parbadia? Paboa ma tudosan.

¹⁰ Saonari, ndang dipangke Jahowa be tondi parbadiana laho mangurupi sasahalak manurat Bibel. Alai, tongtong dope dipangke Jahowa tondi parbadiana laho manogu-nogu naposona. Asa taboto na ditogu-togu tondi parbadia hita, ingkon adong do na taulahon. Angka aha ma i?

¹¹ Pingkirhon ma contoh on. Asa boi kapal marlayar, adong dua na ingkon diulahon halak na marlayar. Na parjolo, ingkon diboan do kapal i tu inganan na adong alogo mangullus. Ndang boi kapal i marlayar molo holan so di pelabuhan. Na paduahon, ingkon dipanaek do layar ni kapal i jala dibungka asa boi diullus alogo. Suang songon i ma, ala diurupi tondi parbadia do umbahen na boi hita tongtong setia. Alai asa boi mandapot laba sian tondi parbadia, adong dua cara na ingkon taulahon. Na parjolo, ingkon taulahon do angka ulaon na mambahen hita diurupi tondi parbadia. Na paduahon, taulahon ma i sian nasa tolapta. (Ps. 119:32) Molo taulahon angka cara i, gabe dipargogoi tondi parbadia ma hita asa tongtong setia sahat tu tano na imbaru.

12. Aha do muse na laho taulas?

 ¹² Nunga taulas dua cara ni tondi parbadia mangurupi hita. Dipargogoi tondi parbadia do hita jala diurupi asa tongtong setia nang pe mangadopi sitaonon. Diurupi tondi parbadia do hita mangulahon tugas sian Jahowa, jala boi ma hita mandapot hangoluan na salelengna. Saonari, laho taulas opat cara na ingkon taulahon asa mandapot gumodang laba sian tondi parbadia.

13. Hombar tu 2 Timoteus 3:16, 17, songon dia do Hata ni Debata boi mangurupi hita, jala aha do na ingkon taulahon?

¹³ Na parjolo, parsiajari ma Bibel. (Jaha 2 Timoteus 3:16, 17.) Dipangke Debata do tondi parbadia laho pabotohon pingkiranna tu angka panurat ni Bibel. Alani i, tingki tajaha Bibel jala tarimangi, gabe tapamasuk ma pingkiran ni Debata tu pingkiran dohot rohanta. On boi mangurupi hita marhamubaon laho mambahen las roha ni Jahowa. (Heb. 4:12) Alai asa boi mandapot laba sian tondi parbadia, ingkon talehon do tingki laho marsiajar Bibel jala mangarimangi na tajaha. Dung i, tarida ma laba ni Hata ni Debata sian pangkataion dohot parniulaonta.

14. (a) Boasa boi tadok adong tondi parbadia ni Debata di parpunguanta? (b) Aha do na boi mangurupi hita asa mandapot godang laba sian tondi parbadia di parpunguan?

¹⁴ Na paduahon, rap marpungu dohot angka dongan. (Ps. 22:23) Adong do tondi parbadia ni Debata di parpunguan. (Pgk. 2:29) Boasa boi tadok songon i? Alana tingki rap marpungu hita dohot angka dongan, martangiang do hita laho mangido tondi parbadia. Taendehon do ende Harajaon na dienet sian Bibel, jala tatangihon do tudu-tudu sian Bibel na dipasahat angka donganta na dilantik marhite tondi parbadia. Angka donganta borua pe, diurupi tondi parbadia do tingki paradehon dohot pasahathon bagian ni nasida. Asa boi mandapot godang laba sian tondi parbadia, ingkon persiapan do hita jala ringgas ma mangalehon komentar di parpunguan. On mangurupi hita asa boi mandapot laba sian tondi parbadia di parpunguan. Dos do i songon kapal naung dibungka layarna.

15. Songon dia tondi parbadia boi mangurupi hita di ulaon marbarita?

¹⁵ Na patoluhon, marbarita na uli. Molo tapangke Bibel tingki marbarita dohot mangajari, na tapaloas do tondi parbadia laho mangurupi hita di ulaon marbarita. (Rom 15:18, 19) Alani i, asa boi mandapot godang laba sian tondi parbadia, ingkon ringgas do hamu marbarita jala jotjot mamangke Bibel. Sada cara asa boi lam denggan hamu di ulaon marbarita, i ma mamangke sitiruon mamungka pangkataion na adong di Hangoluan dohot Pangkobasion ni Halak Kristen.

16. Aha do cara asa boi pintor tadapot tondi parbadia?

¹⁶ Na paopathon, martangiang ma tu Jahowa. (Mat. 7:7-11; Luk. 11:13) Sada cara asa boi pintor tadapot tondi parbadia, i ma mangido tu Jahowa marhite tangiang. Ndang adong na boi mangambati tangiangta tu Jahowa manang mangambati hita mandapot tondi parbadiana. Nang pe di penjara, boi do tadapot tondi parbadia. Jala ndang boi diambati Sibolis i. (Jak. 1:17) Ingkon songon dia do caranta martangiang asa boi mandapot laba sian tondi parbadia? Laho mandapot alusna, taulas ma taringot tangiang marhite tudosan na holan dipaboa di Injil Lukas. *

17. Aha do parsiajaran na boi tadapot taringot martangiang sian tudosan ni Jesus na disurat di Lukas 11:5-9, 13?

¹⁷ Jaha Lukas 11:5-9, 13. Tudosan ni Jesus i patuduhon ingkon songon dia caranta martangiang asa mandapot tondi parbadia. Di tudosan i, dapot ni baoa i do aha na dihaporluhon ibana ala ‘sai dijugulhon ibana do mangido’. Ndang mabiar ibana laho mangido tu donganna i nang pe nunga tonga borngin. * Sian tudosan i, aha do na naeng diajarhon Jesus taringot martangiang? Didok ibana, “Sai pangido ma, ai na lehononna do i tu hamu. Sai lului ma, ai na dapotmuna do i. Sai tuktuhi ma, ai na bungkaonna do tu hamu.” Aha do parsiajaranna tu hita? Ingkon sai tajugulhon do martangiang mangido tondi parbadia.

18. Sian tudosan ni Jesus, boasa pos rohanta na lehonon ni Jahowa do tondi parbadiana?

¹⁸ Sian tudosan ni Jesus i, taboto do boasa dilehon Jahowa tondi parbadia. Di tudosan i, lomo do roha ni baoa i laho manarihon tamuna. Didok rohana, ingkon lehononna do sipanganon tu tamuna i nang pe ndang adong manang aha di ibana jala nunga tonga borngin. Didok Jesus, ala na sai dijugulhon baoa i do mangido roti sian tetanggana i umbahen na dilehon. Aha do na diajarhon Jesus? Molo jolma na so sempurna pe olo mangurupi tetanggana na marsitutu mangido asa diurupi, tarlumobi ma Debata na parasi roha. Tontu lehononna do tondi parbadiana tu halak na sai jugul mangido i! Alani i, pos ma rohanta alusan ni Jahowa do tangiangta tingki tapangido tondi parbadiana.​—Ps. 10:17; 66:19.

19. Boasa pos rohanta na boi do hita martahan?

¹⁹ Pos ma rohanta, boi do hita tongtong martahan nang pe Sibolis sai manusai hita. Boasa? Ala diurupi tondi parbadia do hita marhite dua cara. Na parjolo, dipargogoi do hita laho mangadopi angka sitaonon. Na paduahon, diurupi do hita asa tongtong setia sahat tu tano na imbaru. Alani i, marsitutu ma hita mandapot godang laba sian tondi parbadia!