1. Aha do na dipaloas Jahowa laho taulahon?

DIPALOAS Jahowa do hita laho mambahen keputusan di ngolunta. Diajari Ibana do hita songon dia mambahen keputusan na denggan. Jala diurupi do hita asa marhasil tingki mambahen keputusan na mambahen las roha ni Jahowa. (Ps. 119:173) Molo taulahon aha naung taparsiajari di Bibel, gabe boi ma tabahen keputusan na denggan.​—Heb. 5:14.

2. Sipata, aha do na taadopi dung mambahen keputusan?

² Nang pe nunga tabahen keputusan na denggan, ra maol do tahilala mangulahon i. Pingkirhon ma piga-piga contoh on: Sahalak donganta baoa na poso mambahen keputusan laho manjaha sude isi ni Bibel. Diulahon ibana do i saleleng piga-piga minggu. Alai dungkon i, ndang diulahon be i. Sahalak donganta borua mambahen keputusan laho gabe perintis biasa, alai ndang marna saut i diulahon. Punguan ni angka sintua mambahen keputusan asa lam jotjot mangulahon kunjungan penggembalaan tu angka dongan di huria. Alai dung marbulan-bulan, ndang marna saut i diulahon. Imbar do situasi ni nasida, alai sarupa do na diadopi. Dibahen nasida do keputusan, alai ndang diulahon i. Angka halak Kristen di abad na parjolo na di huria Korint pe, hea do mangadopi ambat-ambat na sarupa. Taulas ma aha na boi taparsiajari sian nasida.

3. Aha do keputusan na dibahen halak Korint, alai aha do na masa?

³ Hira-hira taon 55 M, dibahen halak Korint do keputusan na ringkot. Diboto nasida do na susa parhepengon ni angka dongan di Jerusalem dohot di Judea. Jala nunga dipapungu angka huria na asing be hepeng laho mangurupi nasida. Ala burju do halak Korint, dibahen nasida ma keputusan laho mangurupi angka dongan disi. Alani i, disungkun nasida ma apostel  Paulus songon dia cara ni nasida laho mangurupi. Dilehon si Paulus ma tudu-tudu tu huria i, jala disuru ma si Titus laho papunguhon hepeng i. (1 Kor. 16:1; 2 Kor. 8:6) Alai dung piga-piga bulan, diboto si Paulus ma, ndang saut dilehon halak Korint sumbangan i. Ujungna, gabe ndang boi be diboan sumbangan i tu Jerusalem rap dohot sumbangan sian huria na asing.​—2 Kor. 9:4, 5.

4. Songon na dipaboa di 2 Korint 8:7, 10, 11, aha do na didok si Paulus tu halak Korint?

⁴ Dibahen halak Korint do keputusan na denggan, jala dipuji si Paulus do nasida alani haporseaon ni nasida na togu jala rade mangurupi. Alai dijujui si Paulus do nasida asa mangulahon keputusan naung binahen ni nasida i. (Jaha 2 Korint 8:7, 10, 11.) Sian contoh on gabe taboto ma, olo do maol dihilala angka halak Kristen na setia laho mangulahon keputusan na denggan.

5. Sungkun-sungkun aha do na laho taulas?

⁵ Songon halak Korint, olo do ra maol tahilala mangulahon keputusan naung tabahen. Boasa? Ala ndang sempurna, olo do ndang pintor taulahon ulaonta. Manang boi do masa hasusaan na so panagaman tu hita. (Pjm. 9:11; Rom 7:18) Aha do na ingkon taulahon molo taboto ingkon tapauba keputusan naung hea tabahen? Jala songon dia carana mangulahon keputusan naung tabahen?

6. Sipata, boasa ingkon tapauba keputusanta?

⁶ Adong do piga-piga keputusan na ringkot na so boi tapauba. Umpamana, ingkon tongtong do hita manomba Jahowa jala tongtong setia tu dongan saripenta. (Mat. 16:24; 19:6) Alai, olo do ra adong keputusan na ingkon tapauba. Boasa? Ala olo do muba situasi di ngolunta. Aha do na boi mangurupi hita laho mambahen keputusan na denggan?

7. Aha do na ingkon tatangiangkon, jala boasa?

⁷ Martangiang ma mangido bisuk. Disurat si Jakobus do, “Molo adong sian hamu na hurangan bisuk, tongtong ma i dipangido tu Debata jala lehononna do i tu ibana.” (Jak. 1:5) Sipata, “hurangan bisuk” do hita sude. Alani i, martangiang ma tu Jahowa asa diurupi hamu tingki mambahen keputusan dohot tingki manguba keputusanmuna i. Urupan ni Jahowa do hamu laho mambahen keputusan na denggan.

8. Andorang so mambahen sada keputusan, aha do na ingkon taulahon?

⁸ Bahen ma riset. Parsiajari ma Bibel, jaha ma publikasi na diparade organisasi ni Jahowa, jala paboa ma rencanamuna tu dongan na boi mangurupi hamu. (Poda 20:18) Ringkot do mambahen riset tingki naeng mambahen keputusan laho mangalului karejo na baru, pinda tu inganan na asing, manang tingki naeng mamillit keterampilan asa boi mandapot karejo na boi mangurupi hamu di ulaon marbarita.

9. Boasa ingkon jujur hita tu dirinta sandiri?

⁹ Pingkirhon ma boasa dibahen hamu keputusan i. Ringkot do di Jahowa aha na mangonjar rohanta mambahen sada keputusan. (Poda 16:2) Lomo rohana asa jujur hita di saluhutna. Alani i, tingki mambahen keputusan, ingkon jujur do hita tu dirinta sandiri dohot tu halak na asing taringot boasa tabahen keputusan i. Molo ndang jujur hita, gabe maol do taulahon keputusan na tabahen i. Umpamana, sahalak donganta baoa na poso mambahen keputusan gabe perintis biasa. Alai dung piga-piga leleng, maol do di ibana manggohi jam dinas, jala ndang marlas ni roha be ibana. Ujungna, ndang merintis be ibana. Ra, didok rohana laho mambahen las roha ni Jahowa do ibana umbahen merintis.  Hape sasintongna, naeng mambahen las roha ni natua-tuana manang halak na asing do.

10. Aha do na mangonjar roha ni sasahalak mambahen hamubaon?

¹⁰ Pingkirhon ma contoh na asing. Sahalak parsiajar Bibel mambahen keputusan asa unang marisap. Saleleng dua minggu, marsitutu do ibana asa unang marisap alai sipata marisap do muse ibana. Nang pe songon i, ujungna marhasil do ibana asa so marisap! Ala holongna tu Jahowa jala naeng mambahen las rohana, gabe boi ma parsiajar Bibel i pasidingkon hasomalanna i.​—Kol. 1:10; 3:23.

11. Boasa ingkon tangkas dibahen hamu rencanamuna?

¹¹ Bahen ma rencana. Molo tangkas dibahen hamu rencana, gabe lam mura ma hamu mangulahon keputusan i. Umpamana, dibahen hamu keputusan asa taratur manjaha Bibel. Alai molo ndang dibahen hamu jadwal, ra gabe maol do hamu mangulahon i. * Manang, dibahen angka sintua do keputusan asa taratur mambahen kunjungan penggembalaan. Alai dung piga-piga leleng, ndang diulahon nasida i. Asa boi marhasil, ingkon disungkun nasida do dirina: “Nga dibahen hami daftar ni angka dongan na boi mandapot laba sian kunjungannami? Nga ditontuhon hami tingki na pas laho manjumpangi nasida?”

12. Sipata, aha do na ingkon taulahon jala boasa?

¹² Ulahon ma sian nasa tolapmuna. Ndang boi sude tingki, hepeng dohot gogonta tapangke laho mangulahon sude na tahalomohon. Alani i, ingkon masuk akal do hamu, jala ulahon ma sian nasa tolapmuna. Sipata, olo do ra ingkon dipauba hamu keputusanmuna molo dihilala hamu ndang tolap hamu mangulahon i. (Pjm. 3:6) Ra, nunga dipareso hamu muse keputusanmuna i, nunga diuba na porlu, jala dihilala hamu tolap do hamu mangulahon i. Saonari, taulas ma lima cara na boi mangurupi hamu mangulahon keputusanmuna i.

13. Songon dia hamu boi mandapot gogo laho mangulahon keputusanmuna?

¹³ Martangiang ma mangido gogo. Boi do dibahen Debata hamu asa “margogo mangulahon” keputusanmuna. (Plp. 2:13) Alani i, martangiang ma tu Jahowa mangido tondi parbadiana asa dipargogoi hamu. Tongtong ma martangiang nang pe didok rohamu ndang dialusi dope tangiangmuna i. Didok Jesus, “Sai pangido ma, ai na lehononna do [tondi parbadia] tu hamu.”​—Luk. 11:9, 13.

14. Songon dia prinsip na disurat di Poda 21:5 boi mangurupi hamu mangulahon keputusanmuna?

¹⁴ Bahen ma rencana. (Jaha Poda 21:5.) Manang aha pe na laho ulahononmuna, ingkon jolo dibahen hamu do rencana. Dung i, ingkon diulahon hamu do rencana i. Suang songon i ma, tingki mambahen sada keputusan, bahen ma daftar tugas na ingkon diulahon hamu. Molo adong sada tugas na maol ulahononmu, ulahon ma i otik-otik asa ummura pasaeonmuna. Molo boi dipasae hamu deba sian i, gabe diboto hamu ma nunga lam marhasil hamu. Dijujui si Paulus do halak Korint asa papunguhon hepeng sasaotik “di ari na parjolo di ganup minggu” unang apala dipapungu sahali sude tingki ro ibana. (1 Kor. 16:2) Molo otik-otik diulahon hamu sada tugas na maol, on mangurupi asa unang paborathu dihilala hamu mangulahon i.

15. Aha do labana molo disurat hamu rencanamuna?

¹⁵ Molo disurat hamu rencanamuna, gabe lam mura ma hamu mangulahon i. (1 Kor. 14:40) Umpamana, ditugashon punguan ni angka sintua do sahalak sintua laho manurat keputusan na dibahen nasida. Dohot ma i,  ise na ditugashon mangulahon i jala andigan ingkon dipasae nasida tugas i. Molo dibahen angka sintua daftar sisongon i, gabe lam mura ma diulahon keputusan i. (1 Kor. 9:26) Boi do bahenonmu songon i di parngoluonmuna siganup ari. Umpamana, boi do dibahen hamu daftar ni angka na laho ulahononmuna ganup ari. Jala surat ma parjolo sahali tugas na rumingkot. Molo diulahon hamu i, gabe lam mura ma dipasae hamu tugas i. Jala gabe adong ma tingkimuna laho mangulahon na asing.

16. Aha do muse na ingkon diulahon hamu, jala songon dia Rom 12:11 boi mangurupi hamu?

¹⁶ Marsitutu ma mangulahon rencanamuna i. Ingkon ringgas do hamu mangulahon keputusan naung dibahen hamu. (Jaha Rom 12:11.) Dipaingot si Paulus do si Timoteus asa “marsitutu” mangalatik dirina asa gabe guru na lam denggan. Sipaingot sian si Paulus on, boi do mangurupi hita di sude ulaonta manomba Jahowa.​—1 Tim. 4:13, 16.

17. Songon dia Epesus 5:15, 16 boi mangurupi hamu mangulahon keputusanmuna?

¹⁷ Denggan ma pangke tingkimuna. (Jaha Epesus 5:15, 16.) Tontuhon ma tingki laho mangulahon keputusanmuna, jala unang ma pauba i. Molo dipaima-ima hamu situasi na sempurna, ndang marnasaut i. Alani i, pintor ulahon ma keputusanmuna i. (Pjm. 11:4) Manat ma hamu asa unang suda tingki dohot gogomuna laho mangulahon ulaon na so pola ringkot. (Plp. 1:10) Molo boi, atur ma tingki na denggan jala paboa tu halak na asing asa unang digugai hamu. Pamate ma HP jala unang ma mangida e-mail manang jejaring sosial di tingki i. *

18-19. Aha do na boi mangurupi hamu asa unang menyerah tingki mangulahon keputusanmuna?

¹⁸ Pingkirhon ma hasilna. Hasil ni keputusanmuna, dos do i songon inganan na laho dituju hamu tingki mardalani. Molo lomo rohamu asa sahat tu inganan i, tongtong do hamu laho nang pe adong ambat-ambat jala ingkon mambuat dalan na asing. Suang songon i ma, molo sai tapingkirhon hasil na denggan sian keputusanta, tontu ndang pintor menyerah hita nang pe adong ambat-ambat.​—Gal. 6:9.

¹⁹ Ndang sai mura mambahen keputusan na denggan. Jala godang do ambat-ambat laho mangulahon keputusanmuna i. Alai, boi do diurupi Jahowa hamu. Dilehon Jahowa do bisuk dohot gogo tu hamu asa boi mangulahon keputusanmuna i.