Au tubu taon 1983. Tikki gelleng dope au, sehat do au. Alai dung marumur sappulu taon au, mulai ma huhilala haccit dagingku. Dua taon dukkon i, dang boi be hugerakkon dagingku. Sai berupaya do au menggerakkon patton hape dang boi be. Mulai sian i dang boi be au mardalan. Alani sahitton, dang boi be lam balga dagingku. Sappe saonari pe hira daging ni dakdanak do balga ni dagingku.

Dung marsahit au, dang hea be au kaluar sian jabu. Piga-piga bulan dukkon i, ro ma dua Sitindangi Ni Jahowa tu jabunami. Biasana molo adong ro halak tu jabunami, pittor martabuni do au. Alai di tikki i hupaloas do nasida makkatai tu au. Dihatai nasida ma taringot Paradeiso, gabe huingot ma naung hea hubege tikki marumur lima taon dope au. Di tikki i, adong do sahalak missionaris na margoar si Jethro na tinggal di Suriname, ro sahali sabulan tu hutanami lao marsiajar dohot bapakku. Na burjuan do si Jethro on tu au. Lomo do rohakku molo ro ibana. Asing ni i, oppungku pe najolo lao do tu parpunguan ni Sitindangi na dibahen di hutakku. Sipata, diboan oppung do au marpungu. Sada sian dua Sitindangi na ro tu jabukku nakkin margoar si Florence. Jadi tikki ditogihon ibana au marsiajar, pittor olo do au.

Ro ma muse si Florence dohot suamina si Justus, jala mulai ma hami marsiajar Bibel. Tikki diboto nasida dang boi au manjaha, diajari nasida do au. Gabe boi ma au manjaha. Alai di sada tikki dipaboa nasida ma tu au, pinda tugas nama nasida tu Suriname. Jadi dang adong be na boi mangurupi au marsiajar Bibel di Orealla. Alai dang hea dilupahon Jahowa au.

Dang leleng dukkon i, ro ma sahalak perintis na margoar si Floyd tu Orealla. Jala pajuppang ma ibana dohot au, tikki marbarita ibana sian jabu tu jabu. Tikki ditogihon ibana au marsiajar Bibel, gabe mekkel ma au. “Boasa mekkel ho?” didok ibana. Hupaboa ma tu ibana naung hea au marsiajar mamakke brosur Apa yang Allah Tuntut dari Kita? Jala nungnga mulai au marsiajar mamakke bukku Pengetahuan yang Membimbing kepada Kehidupan yang Abadi. * Hupatorang ma boasa dang marsiajar be au. Marsiajar ma au muse dohot si Floyd mamakke bukku Pengetahuan. Alai ujungna ibana pe ditugasson do tu luat na asing. Gabe dang adong be muse na mangajari au.

 Alai di taon 2004, adong ma dua perintis istimewa na margoar si Granville dohot si Joshua na ditugasson tu Orealla. Tikki marbarita nasida sian jabu tu jabu pajuppang ma hami. Ditogihon nasida ma au marsiajar, gabe mekkel ma au. Hupangido ma tu nasida asa marsiajar musena au mamakke bukku Pengetahuan, alai dimulai sian bagian awal. Naeng huida do, sarupa do nuaeng na diajarhon nasida songon naung hea diajarhon tu au. Dipaboa si Granville ma adong do parpunguan na lao dibahen di hutakku. Nang pe naung sappulu taon dang hea au kaluar sian jabukku, alai lomo do rohakku naeng ro tu parpunguan. Jadi ro ma si Granville mangalap au, dibahen ma au tu kursi roda jala didorong ibana ma au tu Bale Harajaon.

Dung i, dijujui si Granville ma au asa dohot tu Sekolah Pelayanan Teokratis. Didok ibana ma, “Nang pe cacat ho, alai boi do ho makkatai. Sada tikki annon, boi do ho pasahatton jamita. Pos ma roham.” Alani hatana i, gabe pos ma rohakku.

Mulai ma au marbarita dohot si Granville. Alai, godang do dalan di huta i na roa jala marbatu-batu. Gabe dang boi be hupakke kursi rodakku. Jadi hupangido ma tu si Granville asa dibahen au di beko jala disorong ma au. Gabe boi ma hami marbarita. Di bulan April taon 2005, tardidi ma au. Dang leleng dukkon i, dilatik akka dongan ma au mangurus lektur ni huria dohot bagian tata suara di Bale Harajaon.

Alai di taon 2007 marujung ngolu ma bapakku ala kecelakaan tikki markapal. Massai lungun do rohanami alani i. Martangiang ma si Granville rap dohot hami jala dilean ibana ma akka ayat sian Bibel na mangapuli rohanami. Dua taon dukkon i, songgot do rohanami tikki mambege nungnga marujung ngolu be si Granville alani kecelakaan tikki markapal.

Dang adong be sintua di hurianami na gelleng on, jala holan sada do parhobas. Massai lungun do rohakku di parmate ni si Granville, donganku na huhaholongi saleleng on. Sai diurupi ibana do au asa jonok tu Jahowa, jala sai dilehon do akka na porlu di au. Di minggu na parjolo dung mate ibana, mandapot tugas ma au manjaha Joujou Paboahon di parpunguan. Mulana boi dope hujaha dua paragraf, alai ujungna dang boi hutahan ilukku jala sai tangis ma au. Ikkon sappe turun ma au sian jolo alani i.

Gabe lam tarapul ma rohakku tikki ro akka dongan sian huria na asing lao mangurupi hami di Orealla. Jala ditugasson kantor cabang ma sahalak perintis istimewa na margoar si Kojo mangurupi hurianami. Massai las do rohakku ala marsiajar do omakku dohot adekku jala ujungna tardidi. Di bulan Maret taon 2015, dilantik ma au gabe parhobas. Dang leleng dukkon i, hupasahat ma jamitakku na parjolo. Di tikki i, tangis ma au huhut mekkel mangingot hata ni si Granville na mandok, “Boi do ho pasahatton jamita. Pos ma roham.”

Sian acara JW Broadcasting^®, huboto ma adong do akka donganta na asing na sarupa situasina songon au. Nang pe marsahit nasida, alai godang do na boi diulahon nasida jala las do rohana. Au pe, godang dope na boi huulahon. Lomo do rohakku mangalehon na undenggan tu Jahowa. Jadi mulai ma au merintis biasa. Jala songgot do rohakku ala dilantik do au gabe sintua di bulan September 2019 di huria na adong 40 penyiarna.

Mandok mauliate do au tu akka dongan naung mangurupi au saleleng on marsiajar Bibel, jala mangurupi au manomba Jahowa. Alai na urrikkot mandok mauliate do au tu Jahowa, ala dang hea dilupahon Ibana au.