DI MATEUS 13:24-26, Jesus mandok, ”Tudos do harajaon banua ginjang i tu sada halak na manaburhon boni na denggan tu haumana. Alai di na modom halak, ro ma musuna, manaburhon simaremeeme, tu holangholang ni eme i, laos laho sian i. Alai dung marbuhu tano jala martahi boltokon eme i, tanda ma dohot simaremeeme i.” Pigapiga panurat ndang porsea molo tudosan on tutu masa. Alai, hombar tu angka buku hukum ni halak Rom, tutu do masa na didok di tudosan on.

Sada kamus ni Bibel paboahon, di patik ni halak Rom, ulaon hajahaton do molo adong na manaburhon simaremeeme tu hauma ni na asing alani balas dendam. Ala adong patik on najolo, taboto ma na tutu do masa tudosan ni Jesus. Pakar hukum na margoar si Alastair Kerr mandok, taon 533 M, dipabinsar Kaisar Romawi Yustinianus ma Digest. On ma ringkasan patik ni halak Rom jala marisi hatorangan sian angka pakar hukum sian taon 100-250 M. Hombar tu Digest i, sahalak pakar na margoar si Ulpian paboahon taringot kasus di abad na paduahon. Adong na manaburhon simaremeeme tu hauma ni na asing, gabe ndang boi hauma i gotilon. Digest i paboahon, hak ni pangula na rugi, i ma mandapot hepeng ganti rugi sian halak na mambahen i.

On ma na masa tingki pamarentaon ni halak Rom, na patuduhon tutu do masa tudosan na dipaboa Jesus.