AHU tubu di Wichita, Kansas, AS, 10 Desember 1936. Ahu ma siangkangan sian opat tubu ni natuatuangku. Natuatuangku, si William dohot si Jean, Sitindangi na marsihohot. Hamba sidang do bapakku, saonari didok ma i koordinator punguan ni angka sintua. Omak marsiajar Bibel sian ompung borungku, i ma si Emma Wagner. Ompung borungku marbarita tu godang halak, dohot ma i si Gertrude Steele, misionaris di Puerto Riko. * Alani i, godang do sitiruon na boi hutiru.

Di ari Sabtu botari, tingki marumur lima taon ahu, rap do ahu dohot bapakku mangalehon Watchtower dohot Consolation (saonari didok Sadarlah!) tu halak na mamolus di dalan. Tingki i, masa ma Porang Dunia II di kota i. Alai, tongtong do netral bapakku. Ro ma dokter na mabuk huhut mandok parbiar do bapakku, jala didok marsidalian do bapakku asa unang marporang. Dipajonok dokter i ma bohina tu bapakku jala didok, ”Boasa ndang dipungkul ho ahu, parbiar!” Mabiar hian do ahu, alai hupuji do bapakku. Nang pe songon i, sai dilehon ibana do majalah tu halak na mamereng. Dung i, ro ma tentara jala didok  dokter i ma, ”Uhum jo si parbiar on!” Diboto tentara i do dokter i mabuk, gabe didok ma tu dokter i, ”Mulak ma, asa sadar ho!” Laho ma nasida. Las hian rohangku ala dilehon Jahowa habaranion tu bapakku. Adong dua tempat pangkasna di Wichita, jala dokter i ma sada pelangganna!

Tingki ualu taon ahu, digadis natuatuangku ma jabunami. Dibahen ma jabu na gelleng na boi dipapindapinda jala mambungka usaha. Pinda ma hami tu Kolorado, jonok ni Grand Junction, marbarita di luat na mangkaporluhon godang parbarita. Merintis ma natuatuangku, marladang dohot beternak. Ala pasupasu ni Jahowa dohot hiras ni rohanasida, adong ma sada huria disi. Tanggal 20 Juni 1948, tardidi ma ahu dibahen bapakku rap dohot angka parsiajar Bibel, songon si Billie Nichols dohot tungganeboruna. Gabe pengawas wilayah ma si Billie, suang songon i anakna dohot parumaenna.

Maraleale do hami tu donganta na ringgas marbarita, tarlumobi tu keluarga ni Steele, songon si Don dohot si Earlene, si Dave dohot si Julia, jala si Si dohot si Martha. Las do rohanami marsiajar Bibel dohot nasida, jala godang do pangkorhon ni i tu ahu. Nasida patuduhon, godang do las ni roha molo mangkaringkothon partondion.

Dung 19 taon ahu, ditogihon si Bud Hasty ma ahu merintis di selatan ni Amerika Serikat. Didok pengawas wilayah do asa pinda hami tu Ruston Louisiana, ala adong pigapiga Sitindangi na so aktif disi. Didok ibana asa diuluhon hami parpunguan ganup minggu nang pe ndang adong na ro. Didapot hami ma inganan parpunguan jala pintor dibahen hami parpunguan. Diulahon hami do ganup bagian di parpunguan, alai sipata holan hami na dua do na ro. Margantiganti ma hami na dua mangulahon i. Na sada manguluhon jala sada nai mangalusi sude sungkunsungkun. Molo adong pertunjukan, rap ma hami na dua mambahen i, ala ndang adong na ro! Ujungna, marpungu ma sahalak donganta naung matua. Ala nunga marpungu pigapiga parsiajar Bibel dohot dongan na so aktif, dibahen hami ma sada huria.

Sada tingki, pajumpang ma hami dohot pengurus ni Gareja Kristus. Disungkun ibana ma taringot ayat na so huantusi. Gabe ganggu ma rohangku jala lam hurimangi ma na huhaporseai. Saleleng saminggu, marsiajar ma ahu sahat tu tonga borngin asa dapothu alus ni sungkunsungkun i. Gabe togu ma paralealeonku tu Jahowa jala marhiras ni roha laho pajumpang tu pengurus na asing.

Disuru pengawas wilayah ma ahu tu El Dorado, Arkansas, laho mangurupi huria disi. Alai, jotjot do ahu mulak tu Kolorado manjumpangi panitia wajib militer. Sada tingki, rap sapardalanan ma ahu dohot pigapiga perintis, alai kecelakaan do hami di Texas, sega ma mobilnami. Dipaboa hami ma taringot i tu sahalak donganta. Ro ma ibana mangalap hami, diboan ma hami tu jabuna dohot tu parpunguan. Dibahen nasida ma boaboa taringot hami na marlanggar, gabe dilehon angka donganta ma hepeng tu hami. Digadis nasida ma mobilnami, argana 25 dolar AS.

Boi ma hami tu Wichita. Disi, adong alealenami na merintis, margoar si E. F. McCartney, na jotjot dijou hami si Doc. Adong anakna kembar, i ma si Frank  dohot si Francis. Alealengku do nasida. Digadis nasida ma mobilna tu ahu, argana 25 dolar AS, pas songon arga ni mobilhu naung digadis i. Huboto ma, dilehon Jahowa do na huhaporluhon ala huharingkothon partondion. Disi, dipatandahon ma ahu tu donganta borua, na margoar si Bethel Crane. Omakna margoar si Ruth, Sitindangi na marhiras ni roha di Wellington, Kansas, na merintis sahat tu umur 90 taon. Taon 1958, marhasohotan ma ahu dohot si Bethel. Merintis ma hami di El Dorado.

Las do rohanami maniru angka na denggan na diida hami. Alani i, lomo rohanami manjangkon gokkon sian organisasi ni Jahowa. Ditugashon ma hami gabe perintis istimewa di Walnut Ridge, Arkansas. Di taon 1962, digokkon ma hami tu Singkola Gilead kelas-37. Las rohanami mamboto, ala sakalas hami dohot si Don Steele. Dung wisuda, ditugashon ma hami tu Nairobi, Kenya. Lungun do rohanami manadingkon New York, alai mansai las do rohanami tingki sahat di Nairobi jala mangida angka donganta paimahon hami disi!

Hatop do boi diihuthon hami hasomalan di Kenya dohot marbarita disi. Si Chris dohot si Mary Kanaiya ma parsiajar Bibelnami na parjolo na gabe Sitindangi. Tongtong do nasida di dinas sepenuh waktu di Kenya. Dung i, ditugashon ma hami tu Kampala, Uganda. Hami ma misionaris na parjolo disi. Mansai las roha tingki disi, ala godang na olo marsiajar Bibel jala gabe Sitindangi. Dung tolu satonga taon di Afrika, mulak ma hami tu Amerika Serikat laho pagodanggodangkon ianakhonnami. Umbalga do lungun ni rohanami manadingkon Afrika sian tingki manadingkon New York. Dihaholongi hami do halak di Afrika jala masihol do hami laho tusi muse.

Pinda ma hami tu Kolorado bagian barat, inganan ni natuatuangku. Tubu ma borunami siangkangan, si Kimberly. Dung 17 bulan, tubu ma si Stephany. Mansai ringkot do tugasnami gabe natuatua. Marsitutu do hami mangajarhon hasintongan tu borunami. Lomo do rohanami maniru na denggan sian angka dongan. Diboto hami, mangkorhon do sitiruon na denggan tu ianakhonnami. Jala, ndang sae holan i asa tongtong nasida manomba Jahowa. Alai, abangku dohot itongku manadingkon hasintongan. Mangkirim do ahu asa ditiru nasida muse angka na denggan na dipatudu tu nasida.

Las do rohanami pagodanggodangkon borunami jala marsitutu do hami rap mangulahon sada ulaon. Ala maringanan di jonok ni Aspen, Kolorado, rap ma hami marsiajar marski huhut mangkatahatai tu borunami. Markemah ma hami jala las do roha mangkatahatai di jonok ni api unggun. Nang pe poso, olo do nasida manungkun, ”Aha do na laho huulahon dung magodang ahu?” jala ”Halak na songon dia do na hupillit gabe dongan saripengku?” Marsitutu do hami mangajari borunami asa mangkaholongi Jahowa. Dijujui hami do nasida asa dohot tu dinas sepenuh waktu jala marhasohotan holan tu baoa na martujuan na sarupa. Diurupi hami do nasida mangantusi, ndang denggan molo paposohu marhasohotan. Jotjot do didok hami, ”Unang ma hatop muli. Paima ma sampe marumur 23 hamu.”

Ditiru hami do natuatuanami jala marsitutu do hami asa rap marpungu dohot marbarita. Diatur hami do asa adong pigapiga donganta na dinas sepenuh waktu marborngin di jabunami. Jotjot do dipaboa hami taringot las ni rohanami tingki gabe misionaris. Mangkirim do hami boi muse tu Afrika. Lomo hian do roha ni borunami pinda tusi.

Dibahen hami do panombaon na sasaripe. Marlatik do hami taringot cara mangadopi angka situasi di singkola. Disuru hami ma nasida mangalusi sungkunsungkun. Las do rohanasida jala on paposhon rohanasida. Alai dung lam magodang, sipata marungutungut do nasida taringot panombaon na sasaripe. Gabe lungun hian rohangku. Hudok ma asa masuk nasida tu kamar jala unang pola marsiajar. Tarsonggot ma nasida jala tangis, dung i didok ma olo do nasida marsiajar. Huboto ma, ingkon diurupi hami do nasida marlas ni roha marsiajar taringot tu Jahowa. Ujungna, gabe las ma rohanasida jala jotjot dipaboa na di roha dohot pingkiran ni nasida. Hansit do dihilala hami tingki didok ndang satolop nasida tu ajaran ni Bibel. Alai, marsitutu do hami  mangantusi pangkilalaan ni nasida. Dung martungkar pingkiran, satolop ma nasida tu aturan ni Jahowa.

Ndang nihilala, hatop do salpu tingki. Nunga magodang be borunami. Alani pangurupion dohot tudutudu sian organisasi ni Debata, boi ma hami mangurupi nasida mangkaholongi Jahowa. Las do rohanami ala merintis borunami dung tamat singkola, jala diparsiajari nasida keterampilan na mangurupi nasida di parhepengon. Pinda ma nasida tu Cleveland, Tennessee, rap dohot dua donganta borua laho mangurupi huria disi. Masihol do hami tu nasida, alai las do rohanami ala dohot nasida tu dinas sepenuh waktu. Merintis ma hami muse. Ujungna, boi ma hami gabe pengawas wilayah pengganti jala mangurupi molo adong kebaktian.

Andorang so tu Tennessee, laho ma borunami tu kantor cabang di London, Inggris. Si Stephany na marumur 19 taon, pajumpang dohot anggota Betel, i ma si Paul Norton. Dung i, si Kimberly pajumpang dohot dongan ni si Paul, i ma si Brian Llewellyn. Dung marumur 23 taon, muli ma si Stephany tu si Paul. Dung marumur 25 taon, muli ma si Kimberly tu si Brian. Diihuthon nasida do hatanami na mandok asa paimahon sahat tu umur 23. Las situtu rohanami ala marbisuk nasida mamillit tungganedoli.

Dipaboa borunami, sitiruon sian hami dohot sian ompungna, mangurupi nasida manjumolohon Harajaon ni Debata nang pe susa di parhepengon. (Mat. 6:33) Bulan April 1998, digokkon ma si Paul dohot si Stephany tu Singkola Gilead kelas-105, jala ditugashon ma nasida tu Malawi, Afrika. Di tingki na sarupa, digokkon ma si Brian dohot si Kimberly tu Betel London, dung i ditugashon ma nasida tu Betel Malawi. Las situtu do rohanami, ala dilehon ianakhonnami diri nasida tu ulaon na dumenggan.

Bulan Januari 2001, ditelepon si Marais ma ahu, na mandok hata songon di mula ni pengalaman on. Ibana pengawas Layanan Penerjemahan, jala didok adong na porlu diparade laho mangalatik angka penerjemah asa lam mangantusi teks Inggris. Nang pe nunga marumur 64 taon ahu, lomo rohanasida mangalatik ahu gabe instruktur. Alani i, martangiang ma hami jala dipaboa hami tu omaknami taringot on. Nang pe nunga matua jala mangkaporluhon pangurupion, las do rohanasida molo laho hami. Hutelepon ma muse donganta i jala hudok, las hian rohangku manjalo tugas on.

Hona kanker ma omakku. Hudok do tu ibana asa hami dohot itongku, si Linda, mangurus ibana. Alai ndang olo omak jala didok, ”Lam marsahit do ahu molo ndang laho hamu.” Si Linda pe mandok songon i. Mandok mauliate do hami ala lomo rohanasida dijalo hami tugas na baru, jala mandok mauliate do hami ala rade donganta disi mangurupi. Sadari dung laho tu Pusat Pendidikan Menara Pengawal di Patterson, dipaboa si Linda ma nunga marujung ngolu omak. Ala sai didukung si Linda hami, tongtong ma ringgas hami mangulahon tugas na baru.

Las do rohanami mamboto molo penugasannami na parjolo, i ma tu kantor  cabang Malawi, inganan ni borunami dohot helanami. Las do roha boi rap muse dohot nasida. Dung i, laho ma hami tu Zimbabwe dohot Zambia. Dung tolu satonga taon mangalatik angka penerjemah, mulak ma hami tu Malawi laho manurathon pengalaman ni angka Sitindangi na dianiaya ala netral di politik. *

Taon 2005, mansai lungun do rohanami manadingkon Afrika muse. Mulak ma hami tu Basalt, Kolorado. Merintis ma hami muse. Taon 2006, pinda ma si Brian dohot si Kimberly tu jonok ni jabunami rap dohot dua boru ni nasida, i ma si Mackenzie dohot si Elizabeth. Tongtong dope si Paul dohot si Stephany di Malawi. Si Paul gabe Panitia Cabang disi. Saonari naeng 80 taon ma umurhu. Las do rohangku mangida baoa na poso na hea gabe donganku karejo, na martanggung jawab mangulahon ulaon na hea hukarejohon. Asa marlaba tu ianakhonnami dohot pahompunami, marsitutu do hami maniru angka na denggan sian angka dongan. On ma na mambahen hami marlas ni roha situtu.