1-3. (a) Aha do na ingkon tongtong taharingkothon? (b) Aha do tantangan na diadopi halak na marsiajar bahasa na baru, jala sungkunsungkun aha do na ro tu rohanta? (Ida gombar di mula ni parsiajaran.)

SAONARI, Sitindangi Ni Jahowa nunga manggohi surirang ni Bibel asa marbarita ”tu saluhut bangso dohot marga dohot hata dohot houm”. (Pgk. 14:6) Dohot do hamu marsiajar bahasa na asing? Adong do na gabe misionaris manang marbarita di inganan na mangkaporluhon pangurupion. Adong do muse na olo ro marpungu tu huria na mamangke bahasa na asing di inganannasida.

² Ingkon togu do naposo ni Debata di partondion jala on ma na diharingkothon nasida di keluarga. (Mat. 5:3) Saonari, ala godang ulaonta, olo do gabe maol hita mambahen parsiajaran Bibel sahalakta. Alai, asing do tantangan na diadopi halak na dohot di huria na marbahasa na asing.

³ Angka na dohot di huria na marbahasa na asing ingkon marsiajar bahasa na baru, alai ingkon tongtong do  nasida marsiajar asa bagas pangantusionna taringot tu Debata. (1 Kor. 2:10) Songon dia do nasida boi mangulahon i hape hurang diantusi nasida na dipaboa di parpunguan? Jala, boasa angka natuatua na dohot tu huria na marbahasa na asing ingkon denggan mangajarhon hasintongan tu ianakhonna?

4. Aha do na boi mambahen sega paralealeonta tu Jahowa? Bahen ma tudosan.

⁴ Molo ndang taantusi ajaran sian Bibel di bahasa na asing, on boi parohon jea taringot paralealeonta tu Jahowa. Tingki mulak si Nehemia tu Jerusalem, diida ibana angka dakdanak disi ndang boi marbahasa Heber. (Jaha Nehemia 13:23, 24.) Ala ndang boi diantusi dakdanak i Hata ni Debata, gabe ndang boi nasida solhot tu Jahowa. On mambahen nasida gale di partondion.—Neh. 8:2, 8.

5, 6. Aha do na diantusi natuatua na dohot di huria na marbahasa na asing, jala boasa boi songon i?

⁵ Pigapiga natuatua Kristen na mangurupi di huria na marbahasa na asing mangida ndang solhot paralealeon ni ianakhonna tu Jahowa jala gale di partondion. Ala ndang sude diantusi ianakhonna aha na didok di parpunguan, gabe maol ma nasida mangulahon i. Didok si Pedro na pinda sian Amerika Selatan tu Australia, ”Ingkon rade do roha dohot pingkiran tingki mangkatai taringot tu partondion.” ^[1] (Ida catatan.)—Luk. 24:32.

⁶ Tingki tajaha sijahaon na marbahasa na asing, ra ndang pola masuk tu rohanta songon tingki hita manjaha di bahasanta sandiri. Jala, ala maol mangkatai mamangke bahasa na asing, olo do gabe susa tahilala jala mangkorhon do on tu panombaonta tu Jahowa. Alani i, molo lomo rohanta dohot di huria na marbahasa na asing, ingkon tajaga do paralealeonta tu Jahowa.—Mat. 4:4.

7. Songon dia do halak Babel mamaksa si Daniel asa mangihuthon hasomalan dohot agamanasida?

⁷ Tingki ditaban si Daniel dohot angka donganna tu Babel, dipaksa halak Babel do nasida mangihuthon hasomalan dohot agama na disi. Aha do na diulahon halak Babel? Diajari nasida do ”hata ni halak Kasdim” tu si Daniel dohot angka donganna jala dilehon do tu nasida goar ni halak Babel. (Dan. 1:3-7) Goar na dilehon tu si Daniel, i ma si Beltsasar, dewa ni halak Babel na umgogo. Lomo roha ni Raja Nebukadnesar asa porsea si Daniel, umgogo do debata ni halak Babel sian Jahowa.—Dan. 4:5.

8. Songon dia do si Daniel tongtong manjaga paralealeonna tu Jahowa?

⁸ Di Babel, dilehon do sipanganon ni raja na tabo tu si Daniel. Alai, ibana ”nunga marsangkap hian di bagasan rohana” asa unang mangalo patik  ni Debata. (Dan. 1:8) Ala tongtong diparsiajari ibana buku na badia, na marbahasa Heber, tongtong ma togu paralealeonna tu Jahowa nang pe di inganan na asing. (Dan. 9:2) Sasintongna, hirahira 70 taon dung di Babel ibana, diboto halak do goarna di bahasa Heber, i ma si Daniel.—Dan. 5:13.

9. Songon dia do panurat ni Psalmen 119 maradophon Hata ni Debata?

⁹ Ingkon martahan do panurat ni Psalmen 119 tingki anggota pengadilan ni istana mangalo ibana. Alai, margogo do ibana alani Hata ni Debata jala on mangurupi ibana imbar sian na asing. (Ps. 119:23, 61) Diihuthon ibana do Hata ni Debata asa boi mangorom diri.—Jaha Psalmen 119:11, 46.

10, 11. (a) Aha do na tatuju tingki marsiajar Bibel? (b) Songon dia do asa boi hita marhasil? Bahen ma tudosan.

¹⁰ Nang pe godang ulaonta di huria dohot di parkarejoan, ingkon talehon do tingki laho marsiajar Bibel dohot panombaon na sasaripe. (Eps. 5:15, 16) Alai, ndang boi Bibel i holan tajaha sambing manang holan paradehon alus tu parpunguan. Ingkon taulahon do Hata ni Debata jala tapatogu haporseaonta.

¹¹ Asa boi marhasil, tingki marsiajar, unang ma holan na ringkot di halak na tapingkiri, alai pingkirhon ma na ringkot di hita. (Plp. 1:9, 10) Ra, tingki paradehon na porlu laho marbarita, marpungu, manang marjamita, olo do ra ndang taulahon i di ngolunta. Umpamana, sahalak pangalompa na malo, olo do holan mandai na nilompana andorang so dilehon tu na manuhor. Alai, ndang boi sehat ibana molo holan mandai na nilompana. Asa tongtong sehat, ingkon dilompa ibana do sipanganon di dirina sandiri. Suang songon i ma, molo lomo rohanta patoguhon paralealeon tu Jahowa, ingkon ringgas do hita marsiajar Bibel, ala on do na tahaporluhon.

12, 13. Boasa godang na mandok denggan do marsiajar Bibel di bahasanta sandiri?

¹² Angka halak na dohot di huria na marbahasa na asing mandapot laba ala marsiajar Bibel mamangke bahasana sandiri. (Ul. 2:8) Diboto angka misionaris do, asa boi tongtong togu di luat na marbahasa na asing, ndang sae holan manangihon na dipaboa di parpunguan.

¹³ Si Alain, na marsiajar bahasa Persia hirahira ualu taon mandok, ”Tingki paradehon na laho diulas di parpunguan na marbahasa Persia, holan bahasana i do na hupingkiri. Ala holan bahasa i na hupingkiri, ndang pola masuk tu rohangku angka hatorangan  na hujaha. Alani i, hulehon do tingki laho marsiajar Bibel dohot angka publikasi mamangke bahasangku sandiri.”

14. Aha do na ingkon diulahon natuatua, jala boasa?

¹⁴ Ingkon marsitutu do natuatua manuanhon hasintongan tu roha dohot pingkiran ni ianakhonna. Parrohahon ma si Serge dohot si Muriel, na dohot di huria na marbahasa na asing lobi sian tolu taon. Diparrohahon nasida, ianakhonna na marumur 17 taon ndang marlas ni roha tingki marbarita manang marpungu. Si Muriel mandok, ”Las do rohana marbarita mamangke bahasa Prancis, alai ndang lomo rohana marbarita mamangke bahasa na asing.” Si Serge mandok, ”Ala diboto hami situasi on mambahen anaknami maol maju di partondion, mulak ma hami muse tu hurianami na parjolo.”

15. (a) Aha do na mangurupi natuatua tingki mamillit laho pinda tu huria na asing? (b) Tudutudu aha do na disurat di 5 Musa 6:5-7 tu angka natuatua?

¹⁵ Aha do na mangurupi natuatua tingki mamillit laho pinda tu huria na mamangke bahasa na diantusi ianakhonna? Na parjolo, ingkon ditontuhon nasida do sadia godang tingki dohot gogo laho mangajari ianakhonna mangkaholongi Jahowa jala mangajari nasida marbahasa na asing. Na paduahon, ra ndang lomo roha ni  ianakhonna marbarita manang marpungu mamangke bahasa na asing. Alani i, olo do natuatua mamillit asa mulak muse tu huria na mamangke bahasa na diantusi ianakhonna. Dung i, molo nunga solhot paralealeon ni ianakhonna tu Jahowa, boi ma natuatua mamillit asa pinda muse tu huria na marbahasa na asing.—Jaha 5 Musa 6:5-7.

16, 17. Aha do na mangurupi pigapiga natuatua mangajari ianakhonna taringot tu Jahowa?

¹⁶ Nang pe di huria manang kelompok na marbahasa na asing, adong do natuatua na mandapot cara na denggan mangajari ianakhonna taringot tu Jahowa mamangke bahasa ni nasida. Adong tolu boru ni si Charles na marumur hirahira 9 sahat tu 13 taon. Nasida di kelompok na marbahasa Lingala. Didok ibana, ”Dibahen hami do parsiajaran Bibel, panombaon na sasaripe dohot ianakhonnami mamangke bahasanami. Alai, dibahen hami do pertunjukan dohot permainan marbahasa Lingala, asa boi diparsiajari nasida bahasa on tingki las rohanasida.”

¹⁷ Adong dua boru ni si Kevin na marumur lima dohot ualu taon. Marsitutu do ibana mangajari boruna, ala ndang pola diantusi boruna na dipaboa di huria ni nasida na mamangke bahasa na asing. Didok ibana, ”Dibahen hami ma parsiajaran Bibel tu  borunami mamangke bahasa Prancis, bahasa na somal dipangke hami. Dibahen hami do jadwal asa ro tu parpunguan bahasa Prancis sahali sabulan. Ro do hami tu kebaktian na mamangke bahasanami huhut marlibur.”

18. (a) Songon dia do Rom 15:1, 2 mangurupi hamu mamillit na denggan tingki mangurupi ianakhonmuna? (b) Aha do tudutudu na dilehon natuatua naung marhasil mangurupi ianakhonna? (Ida catatan.)

¹⁸ Ganup keluarga ingkon mamillit na dumenggan tu ianakhonna dohot paralealeonna tu Jahowa. ^[2] (Ida catatan.) (Gal. 6:5) Si Muriel mandok, nang pe lomo hian rohana dohot tungganedolina marpungu tu huria na marbahasa na asing, alai ndang olo nasida pinda asa boi togu holong ni ianakhon ni nasida tu Jahowa. (Jaha Rom 15:1, 2.) Saonari, diboto si Serge ma, nasida nunga mamillit na dumenggan. Didok ibana, ”Dung mulak muse hami tu huria na marbahasa Prancis, maju ma anaknami di partondion jala tardidi. Saonari, ibana nunga merintis biasa. Lomo do rohana laho tu kelompok na marbahasa na asing!”

19, 20. Songon dia do hita patuduhon holongta tu Hata ni Debata?

¹⁹ Dihaholongi Jahowa do sude jolma. Dilehon Ibana do Bibel na adong di bagasan marratus bahasa asa ”saluhut jolma” mangantusi hasintongan. (1 Tim. 2:4) Diboto Jahowa, boi do lam solhot paralealeonta tu Ibana molo tajaha Bibel mamangke bahasa na taantusi.

²⁰ Ingkon marsitutu do hita asa tongtong togu paralealeonta tu Jahowa. Alani i, ingkon ringgas do hita marsiajar Bibel mamangke bahasa na taantusi. Molo taulahon songon i, boi ma hita mangurupi keluarganta togu di partondion, jala tarida ma na holong do rohanta tu Hata ni Debata.—Ps. 119:11.