1, 2. (a) Tantangan aha do na diadopi halak na ro sian negara na asing? (Ida gombar di mula ni parsiajaran.) (b) Sipasingot aha do na dilehon si Paulus, jala sungkunsungkun aha do na laho taulas?

LOBI sian 30 taon naung salpu, si Osei na so Sitindangi Ni Jahowa dope, manadingkon jabuna di Ghana jala tading di Eropa. ^[1] (Ida catatan.) Didok ibana, ”Huboto ma ndang adong na parduli tu ahu. Songgot do rohangku. Tingki di bandara, lungun hian rohangku ala ndang adong na parduli tu ahu. Tangis ma ahu.” Ala maol si Osei marsiajar bahasa na baru, leleng ma ibana mandapot karejo na denggan. Ala dao sian jabuna, masihol ma ibana tu keluargana jala lungunlungunan.

² Pingkirhon ma aha na dihalomohon hamu tingki mangadopi situasi na sarupa. Tontu, las do rohamu molo adong na manjangkon hamu tingki ro tu Bale Harajaon, na so mamparsoalhon sian dia haroromu. Didok di Bibel, ingkon dipatudu halak Kristen do haburjuon tu halak na so ditanda. (Heb. 13:2) Taulas ma sungkunsungkun na  mangihut: Songon dia do pangkilalaan ni Jahowa tu halak sisongon i? Porlu do tauba pamingkirionta maradophon nasida? Songon dia do hita mangurupi sasahalak sian negara na asing asa las rohana tingki ro tu hurianta?

3, 4. Songon na didok di 2 Musa 23:9, aha do na dihalomohon Jahowa bahenon ni halak Israel tu halak panompang, jala boasa?

³ Dung dipalua Jahowa naposoNa sian Mesir, dilehon do patik asa dipatudu nasida haburjuon tu halak na so ditanda (panompang) na rap dohot nasida. (2 Mus. 12:38, 49; 22:21) Ala ndang mura mangolu gabe halak panompang, diparrohahon Jahowa do nasida. Umpamana, tingki manabi, ingkon ditadingkon halak Israel do deba biur ni gandum tu nasida.—3 Mus. 19:9, 10.

⁴ Ndang sae holan burju tu halak panompang, alai ingkon diingot halak Israel do na hea nasida gabe halak panompang. (Jaha 2 Musa 23:9.) Andorang so diparhatoban di Mesir, sogo do roha ni halak Mesir tu bangso Israel ala ndang sabangso nasida. (1 Mus. 43:31; 46:34; 2 Mus. 1:11-14) Susa do dihilala halak Israel tingki gabe panompang. Alani i, lomo roha ni Jahowa asa diingot nasida i, jala burju tu halak panompang na rap dohot nasida.—3 Mus. 19:33, 34.

5. Songon Jahowa, aha do na mangurupi hita asa burju tu halak na so tatanda?

⁵ Ndang muba dope Jahowa. Tingki ro halak na so tatanda tu hurianta, taingot ma na dipatudu Jahowa do burju ni roha tu halak sisongon i. (5 Mus. 10:17-19; Mal. 3:5, 6) Pingkirhon ma taringot tantangan na diadopi nasida. Ra, ndang diantusi nasida dope bahasa na baru, jala olo do ndang denggan pambahenan ni halak tu nasida. Marsitutu ma hita mangurupi nasida jala burju ma tu nasida.—1 Ptr. 3:8.

6, 7. Aha do na patuduhon na lomo roha ni halak Kristen Jahudi di abad na parjolo marpamingkirion na denggan tu halak na so ditanda?

⁶ Marsitutu do halak Kristen di abad na parjolo pasidingkon pingkiran negatif na somal di halak Jahudi. Di ari Pentakoste taon 33, halak Kristen Jahudi di Jerusalem manamue jala patuduhon holong tu halak na baru ro sian luat na asing. (Ul. 2:5, 44-47) On patuduhon, diboto halak Kristen Jahudi do lapatan ni ”partamueon”, i ma patuduhon burju ni roha tu halak na so tinanda.

⁷ Alai, adong na masa di tingki i. Muruk do halak Jahudi na marhata Junani ala ndang denggan diparrohahon angka ina na mabalu. (Ul. 6:1) Laho pasaehon parsalisian i, dipillit angka apostel ma pitu baoa asa denggan diparrohahon angka ina na mabalu i.  Dipillit ma baoa sian halak Junani asa lam denggan dihilala angka ina na mabalu i.—Ul. 6:2-6.

8, 9. (a) Sungkunsungkun aha do na mangurupi hita molo marpingkiran na so denggan hita tu halak na so tatanda? (b) Aha do na ingkon tapasiding? (1 Petrus 1:22)

⁸ Mangkorhon do hasomalanta tu parniulaonta. (Rom 12:2) Olo do sipata hombar jabunta, dongan sakarejo, dongan sasingkola mangkatahon na so denggan taringot tu halak na ro sian suku, luat, marga na asing, manang na asing warna ni kulitna. Aha do pangkorhon ni hata sisongon i tu dirinta? Songon dia do bahenonta molo adong na mangarehei bangsonta manang hasomalanta?

⁹ Hea do apostel Petrus ndang porsea tu halak na so Jahudi. Alai, marsitutu do ibana pasidingkon pingkiran sisongon i. (Ul. 10:28, 34, 35; Gal. 2:11-14) Hita pe ingkon marsitutu do pasidingkon pingkiran sisongon i. (Jaha 1 Petrus 1:22.) Aha na boi mangurupi hita mangulahon i? Ingot ma, mardosa do hita sude, ndang soal sian dia haroronta jala sasintongna ndang tama hita ditobus. (Rom 3:9, 10, 21-24) Alani i, unang ma tadok dumenggan hita sian na asing! (1 Kor. 4:7) Tatiru ma si Paulus. Didok ibana tu halak Kristen, ”Ndang bangso na asing be hamu, ndang halak ruar,” alai nunga gabe ”anggota keluarga ni Debata” hamu. (Eps. 2:19, Bibel siganup ari) Ingkon marsitutu do hita pasidingkon pingkiran na so denggan taringot halak na so tatanda, asa boi tapaimbaru roha dohot pingkiranta.—Kol. 3:10, 11.

10, 11. Songon dia do si Boas maniru Jahowa maradophon halak na so ditanda?

¹⁰ Ditiru si Boas do cara ni Jahowa maradophon halak na so ditanda. Songon dia carana? Tingki laho si Boas mangida haumana tingki masa gotilon, diida ibana ma si Rut, sahalak borua panompang na ro sian Moab. Marsitutu do si Rut papunguhon biur ni gandum i. Di Patik ni si Musa, ndang sala si Rut papunguhon gandum na tartading. Alai, tingki dibege si Boas na dipangido si Rut asa dohot ibana papunguhon gandum i, las ma roha ni si Boas jala dipaloas do si Rut papunguhon i.—Jaha Rut 2:5-7, 15, 16.

¹¹ Na masa di pudian ni ari patuduhon na parduli do si Boas tu si Rut ala ibana sahalak panompang. Didok si Boas asa diihuthon si Rut angka boruboru panabi i sian pudi, jala unang diganggu angka baoa panabi i ibana. Dilehon si Boas do sipanganon dohot siinumon tu si Rut, songon na dilehon tu angka panabina i. Dipatudu si Boas do burju ni roha tu si Rut.—Rut 2:8-10, 13, 14.

12. Aha do pangkorhon ni burju ni roha na tapatudu tu halak na so tatanda?

¹² Dipatudu si Boas pe burju ni roha tu si Rut ndang ala na simatuana, si Naomi, alai ala nunga manomba Jahowa do si Rut jala marhaposan tu Ibana. Tingki patuduhon burju ni roha tu si Rut, Jahowa do na ditiru si Boas. (Rut 2:12, 20; Poda 19:17) Suang songon i, molo burju hita, boi ma taurupi  ”saluhut jolma” asa mamboto hasintongan jala mamboto na dihaholongi Jahowa do nasida.—1 Tim. 2:3, 4.

13, 14. (a) Boasa ingkon tajangkon halak na so tatanda na ro tu Bale Harajaon? (b) Aha do na mangurupi hita asa lomo rohanta mangkatai tu sasahalak na asing hasomalanna sian hita?

¹³ Patudu ma burju ni roha tu halak na so tatanda marhite manjangkon nasida di Bale Harajaon. Halak na baru ro sian negara na asing olo do maila laho marsaor. Ala asing hasomalan ni nasida, olo do maila nasida tu halak sian bangso na asing. Alani i, hita ma na parjolo manjangkon nasida jala patudu ma holong na sian roha. Molo adong JW Language di bahasamuna, boi do on mangurupi hamu mamboto cara laho manjangkon nasida mamangke bahasa ni nasida.—Jaha Pilippi 2:3, 4.

¹⁴ Ra, ndang pola lomo rohanta mangkatai tu halak na asing hasomalanna sian hita. Asa unang songon i, tapaboa ma tu nasida taringot dirinta. Botoonmu ma, ra adong do hasomalanmuna na dos tu nasida. Alai ingot ma, adong do keunggulan dohot hahurangan ni ganup hasomalan.

15. Aha do na boi mangurupi hita mangantusi pangkilalaan ni halak na ro sian negara na asing?

¹⁵ Laho mangurupi sasahalak marlas ni roha tingki marpungu, sungkun ma dirimu, ’Molo laho ahu tu negara na asing, aha do na huhalomohon bahenon ni halak tu ahu?’ (Mat. 7:12) Sabar ma maradophon halak na ro sian negara na asing. Tingki parjolo tatanda, maol do ra hita mangantusi  cara marpingkir manang pangkilalaan ni nasida. Alani i, unang ma tapaksa nasida mangihuthon parniulaon dohot hasomalanta, alai tajangkon ma nasida.—Jaha Rom 15:7.

16, 17. (a) Aha do na taulahon asa solhot tu dongan na sian hasomalan na asing? (b) Pangurupion aha do na boi talehon tu dongan na ro sian negara na asing di hurianta?

¹⁶ Molo talehon tingkinta mamparsiajari taringot negara dohot hasomalan ni halak na so tatanda, on mambahen hita mura mangantusi nasida. Tingki panombaon na sasaripe, talului ma songon dia hasomalan ni halak na so tatanda na ro tu ingananta. Asa lam solhot tu nasida, boi do tatamue nasida mangan di jabunta. Jahowa pe, nunga ”diungkap pintu ni haporseaon i nang di halak sipelebegu”. Tatiru ma Jahowa jala tatamue ma halak na so tatanda naung gabe ”donganta sahaporseaon”.—Ul. 14:27; Gal. 6:10; Job 31:32.

¹⁷ Molo talehon tingkinta tu dongan sian negara na asing, on mangurupi hita mangargai nasida na marsitutu mamparsiajari hasomalanta. Taurupi ma nasida mamparsiajari bahasanta. Boi do muse taurupi nasida asa mandapot inganan dohot  karejo na denggan. Pangurupion sisongon i mangkorhon na denggan tu angka donganta di huria.—Poda 3:27.

18. Saonari, ise do na boi ditiru donganta na ro sian negara na asing laho patuduhon pangargaion?

¹⁸ Lomo do roha ni halak sian negara na asing mamparsiajari hasomalan na baru. Dilehon si Rut do sitiruon na denggan. Parjolo, diargai ibana do hasomalan ni halak di ingananna tading tingki mangido ibana asa dohot papunguhon biur ni gandum. (Rut 2:7) Ndang adong di roha ni si Rut na marhak ibana papunguhon biur ni gandum jala ingkon mandapot pangurupion. Paduahon, didok si Rut do mauliate ala dipatudu nasida haburjuon tu ibana. (Rut 2:13) Molo denggan do donganta sian negara na asing patuduhon pangargaion, angka dongan di huria dohot halak na asing pe lam mangargai nasida.

19. Aha do alana umbahen na ingkon tajangkon halak na ro sian negara na asing?

¹⁹ Las do rohanta ala burju Jahowa jala lomo rohaNa asa sude halak mambege barita na uli. Ra, adong do na so boi marsiajar Bibel manang marpungu tingki di negarana. Alai, saonari ma tingkina pajumpang dohot hita. Taurupi ma nasida asa las rohanasida tading di ingananta. Nang pe ndang boi taurupi nasida marhite mangalehon hepeng dohot angka na asing, alai molo burju hita, na maniru Jahowa do hita mangkaholongi nasida. Boi ma hita gabe ”sitiru Debata”. Tabahen ma na dumenggan jala tajangkon ma halak na so tatanda na ro tu ingananta!—Eps. 5:1, 2.