1. Aha do holong na umbalga? Jala aha do lapatan ni i? (Ida gombar di mula ni parsiajaran.)

SIAN Jahowa do Haroroan ni holong. (1 Joh. 4:7) Di Bibel, holong na umbalga i ma, holong na dipatudu ala mangihuthon prinsip na sintong. Di bahasa Junani, holong sisongon on digoari agape. Na didok dison, i ma pangkilalaan na mangonjar roha ni sasahalak, laho mangulahon na denggan tu na asing. Holong sisongon on ndang mangkaringkothon diri. Jala parohon las ni roha na sasintongna do i.

2, 3. Songon dia do Jahowa patuduhon holongNa tu jolma?

² Nunga dipatudu Jahowa holongNa tu jolma andorang so ditompa dope si Adam dohot si Hawa. Jumolo do ditompa Jahowa tano on. Uli do i dibahen asa boi jolma marlas ni roha disi. Ndang na tu Ibana sandiri umbahen na ditompa sudena i, alai tu hita do. Dung rade sudena i, ditompa Jahowa ma jolma jala dilehon ma pangkirimon mangolu salelengna di paradeiso di tano on.

 ³ Asing ni i, dipatudu Jahowa do muse holong na mansai balga tu jolma. Nang pe mangalo si Adam dohot si Hawa, alai pos do roha ni Jahowa, sai na adong do pinompar ni nasida na mangkaholongi Ibana. Alani i, disuru Jahowa ma AnakNa gabe tobusan na paluahon jolma. (1 Mus. 3:15; 1 Joh. 4:10) Tingki dihatahon Jahowa janji taringot tobusan, dos do i songon naung mangalehon tobusan i. Nang pe sasintongna, 4.000 taon nai do dilehon Jahowa AnakNa na sasada i gabe tobusan. (Joh. 3:16) Mauliate ma tadok tu Jahowa na patuduhon holong tu hita!

4. Boasa jolma na mardosa boi patuduhon holong?

⁴ Boi do jolma na mardosa patuduhon holong? Boi. Tumiru Debata do hita ditompa. Lapatanna, boi do hita maniru parange ni Debata. Tutu, ndang mura patuduhon holong, alai boi do hita mangulahon i. Dipatudu si Abel do holong tu Debata marhite mangalehon pelean na dumenggan. (1 Mus. 4:3, 4) Dipatudu si Noak do holong marhite mamaritahon parenta ni Debata saleleng martaontaon, nang pe ndang adong na manangihon. (2 Ptr. 2:5) Songon i nang si Abraham. Umbalga do holongna tu Jahowa sian tu manang aha pe. Rade do ibana mamelehon anak haholonganna, i ma si Isak. (Jak. 2:21) Songon nasida, lomo do rohanta patuduhon holong nang pe ndang mura.

5. Songon dia do hita boi patuduhon holong na sasintongna?

⁵ Dipaboa do di Bibel asa ”unang ma hatanta dohot dilanta mangkaholongi; naeng ma marhitehite pambahenan dohot hasintongan”. (1 Joh. 3:18) Na so boi do hita paboahon holongta marhite pangkataion? Boi do. (1 Tes. 4:18) Na didok dison, unang ma holan tadok, ”Holong do rohangku tu ho.” Alai tapatudu ma i marhite pambahenanta. Umpamana, molo adong donganta na mangkaporluhon sipanganon manang pangkean, ndang sae molo holan tadok hata laho patoguhon nasida. Ingkon taurupi do nasida. (Jak. 2:15, 16) Suang songon i ma, molo holong rohanta tu Jahowa, ndang sae molo holan martangiang hita asa lam godang parbarita. Ingkon ringgas do hita marbarita.​—Mat. 9:38.

6, 7. (a) Aha do lapatan ni holong na so marpangansi? (b) Paboa ma contoh ni holong na so sian ias ni roha.

⁶ Apostel Johannes paboahon, ”marhitehite pambahenan dohot hasintongan” ma hita patuduhon holong. Lapatanna, ”unang ma marpangansi” manang marpambuat holongta. (Rom 12:9; 2 Kor. 6:6) Adong do holong na dipatudu holan asa diida halak. Alai, songon i do holong na sasintongna? Sian ias ni rohana do i? Holong na sasintongna ndang dibahenbahen. Ndang marlapatan holong sisongon i.

 ⁷ Saonari, taparrohahon ma pigapiga contoh na patuduhon holong na so sian ias ni roha. Molo taparrohahon hata ni Sibolis tu si Hawa di porlak Eden, hira na holong do rohana tu nasida, alai gabus do i. (1 Mus. 3:4, 5) Tingki gabe raja si Daud, maraleale do ibana tu si Ahitopel. Alai, ala mangkaringkothon diri, diulahon si Ahitopel do na jahat tu ibana. On patuduhon ndang aleale na sasintongna si Ahitopel. (2 Sam. 15:31) Saonari, dipangke halak na murtad do ’hata na uli jala tabo di pinggol’ laho mamolamola angka dongan di huria. (Rom 16:17, 18) Songon na dihaholongi nasida do angka dongan, hape na marpambuat do holongna.

8. Aha do na ingkon tasungkun tu dirinta?

⁸ Jahat do halak molo ndang sian ias ni roha holongna. Alana dos do i songon panipu. Ra, boi do hita mangotootoi jolma, alai ndang boi taotootoi Jahowa. Jesus mandok, na laho diuhum do angka pangansi manang halak na munafik. (Mat. 24:51) Tontu ndang lomo rohanta gabe halak na munafik. Alani i, tasungkun ma dirinta, ’Sian ias ni roha do holongkon? Manang marpambuat do holongku? Jujur do ahu?’ Taulas ma sia cara laho patuduhon holong na sian ias ni roha.

9. Molo sian ias ni roha do holongta, aha do na ingkon taulahon?

⁹ Rade ma marhobas nang pe ndang diparrohahon halak. Tapatudu ma holong jala taulahon ma na denggan tu donganta, nang pe ndang adong halak na mangida jala mamboto i. (Jaha Mateus 6:1-4.) Unang ma songon si Ananias dohot si Sapira. Lomo do roha ni nasida asa diboto halak sadia godang silehonlehon ni nasida. Gabe margabus do nasida alani i. Ujungna, diuhum ma nasida. (Ul. 5:1-10) Molo holong rohanta tu angka dongan, taurupi ma nasida jala unang pola tapaboaboa tu na asing. Tatiru ma angka dongan na mangurupi Punguan na Mangaradoti Organisasi paradehon sipanganon partondion. Ndang dilului nasida hasangapon, jala ndang dipaboaboa nasida tu angka halak taringot aha na dibahen nasida.

10. Songon dia do hita mangargai angka dongan?

¹⁰ Argai ma angka dongan. (Jaha Rom 12:10.) Diargai Jesus do angka apostelna. Olo do Jesus mamburi patnasida. (Joh. 13:3-5, 12-15) Tingki i, ndang apala tangkas diantusi angka apostel i na binahen ni Jesus. Dung pe ro tondi parbadia tu nasida, diantusi nasida ma lapatan ni na binahen ni Jesus i. (Joh. 13:7) Hita pe taargai ma donganta. Marsitutu ma hita asa boi marserep ni roha jala marhobas songon Jesus. Unang ma didok rohanta, dumenggan hita sian na asing.  Ra ala umtimbo singkolanta, ala gumodang hepengta, manang ala dilehon tanggung jawab na sumurung tu hita. (Rom 12:3) Jala unang ma mangiburu hita tingki adong donganta na dipuji. Marlas ni roha ma hita dohot nasida, nang pe didok rohanta hita pe patut do dipuji.

11. Boasa ingkon sian ias ni roha hita mamuji?

¹¹ Sian ias ni roha ma hita mamuji. Boi do pujian patoguhon manang ”padengganhon” sasahalak. (Eps. 4:29) Alani i, denggan do molo tapuji sasahalak. Alai, unang ma tapuji sasahalak holan laho palashon rohana. Taingot ma ringkot do pasingothon donganta. (Poda 29:5) Molo tapuji donganta alai tapahatahata ibana di pudina, dos do i songon halak na munafik. Tatiru ma holong ni apostel Paulus. Di suratna, dipuji ibana do halak Kristen na di Korint, ala denggan parniulaon ni nasida. (1 Kor. 11:2) Alai dipasingot ibana do muse nasida jala tangkas do dipaboa ibana boasa ringkot nasida dipasingot.​—1 Kor. 11:20-22.

12. Songon dia do hita patuduhon holong na sian ias ni roha tingki manamue angka dongan?

¹² Ringgas ma manamue. Disuru Jahowa do hita asa burju tu angka donganta. (Jaha 1 Johannes 3:17.) Alai ingkon sian ias ni roha do hita mangulahon i. Tasungkun ma dirinta, ’Holan angka alealeku dohot dongan na diargai di huria do na hutogihon tu jabungku? Manang, halak na boi mambalos haburjuonku do na hutogihon? Manang, burju do ahu tu angka dongan na so hutanda dope jala na so boi mambalos haburjuonku?’ (Luk. 14:12-14) Asing ni i, rimangi ma situasi on. Songon dia do tingki adong donganta na sala mambahen haputusan, jala porlu taurupi? Manang songon dia do molo adong donganta na tatogihon tu jabunta, hape ndang diboto mandok mauliate? Marungutungut do hita? Didok Jahowa do tu hita, ”Ringkot ma rohamuna masitamuean; unang marungutungut!” (1 Ptr. 4:9) Parohon las ni roha do molo sian ias ni roha hita mangalehon tu donganta.​—Ul. 20:35.

13. (a) Di tingki sadihari do hita ingkon sabar? (b) Songon dia do carana mangurupi halak na gale?

¹³ Urupi ma dongan na gale. Adong do parenta ni Bibel na mandok, ”Anju hamu ma angka na gale, lambas ma rohamuna dompak saluhutna!” On boi patuduhon na tutu do holongta manang  na ndang. (1 Tes. 5:14) Pigapiga dongan na gale boi do gabe togu muse. Alai, adong do donganta na gale jala leleng asa boi togu muse. Di tingki sisongon i, ingkon sabar do hita mangurupi nasida, jala tahaholongi ma nasida. Carana? Pangke ma Bibel laho patoguhon nasida. Togihon ma nasida marbarita. Rade ma manangihon nasida. Unang ma tapaimbarimbar donganta na ”gogo” dohot na ”gale” di partondion. Alana, ganup jolma adong be do hagaleon dohot halobionna. Gariada apostel Paulus pe adong do hagaleonna. (2 Kor. 12:9, 10) Alani i, porlu do hita masiurupan jala masipatoguan.

14. Aha do na ingkon taulahon asa tongtong mardame dohot donganta?

¹⁴ Patudu ma roha dame. Ringkot do mardame dohot angka dongan di huria. Tingki adong na marsala tu hita, ingkon marsitutu do hita mardame dohot nasida. (Jaha Rom 12:17, 18.) Molo tabahen hansit roha ni sasahalak, mangangku sala ma hita. Alai unang ma tadok, ”Molo hansit do roham, sala ma ahu disi.” Dumenggan do molo tadok, ”Sala ma ahu da, gabe hansit roham hubahen.” Asing ni i, mansai ringkot do hadameon di rumah tangga. Sala do molo na mardongan saripe masihaholongan holan tingki diida halak, hape marbadai jala ”lalu tangan” di na buni.

15. Songon dia do hita patuduhon naung tasalpuhon hasalaan ni dongan?

¹⁵ Rade ma manalpuhon hasalaan. Molo adong na mambahen hansit rohanta, unang ma sai tapaingotingot be. Alai tasalpuhon ma i nang pe ndang mangangku sala ibana. Boi ma tasalpuhon hasalaan ni dongan molo ’[masiurupan] di bagasan roha na  holong! Ringgas  . . . mangaradoti hasadaon ni Tondi, pinadomu ni dame’. (Eps. 4:2, 3) Asa boi manalpuhon hasalaan ni dongan unang be sai tapingkiri pambahenan ni nasida tu hita. Alana, molo adong holong di hita, ’ndang tapaingotingot [be] hasalaan ni halak’. (1 Kor. 13:4, 5, Bibel siganup ari) Jala molo sai sogo rohanta mangida donganta, boi do gabe sega paralealeonta tu nasida dohot tu Jahowa. (Mat. 6:14, 15) Tatangiangkon ma halak na mambahen hansit rohanta. On patuduhon naung tasalpuhon do hasalaan ni nasida.​—Luk. 6:27, 28.

16. Songon dia do hita patuduhon holong tingki dilehon tanggung jawab tu hita?

¹⁶ Unang ma mangkaringkothon diri. Tingki dilehon tanggung jawab tu hita, patudu ma holong na sasintongna. ”Unang ma masiringkoti na di ibana, na di dongan i ma!” (1 Kor. 10:24) Umpamana, di kebaktian, jumolo do petugas tata tertib masuk tu gedung. Boi do pillitonna hundulan di ibana dohot di keluargana, di inganan na dihalomohon godang halak. Alai, godang do sian nasida na mamillit hundulan na so pola di halomohon halak. On patuduhon molo nasida ndang mangkaringkothon diri sandiri. Songon dia do hita boi maniru nasida?

17. Molo adong na mangulahon dosa na balga di huria, aha do na ingkon ulahononna?

¹⁷ Angkui ma dosamuna, unang be tabunihon. Pigapiga halak Kristen ndang olo mangangkui dosa na balga na diulahon nasida. Ra, ala maila manang ala ndang olo manusai pingkiran ni na asing. (Poda 28:13) Alai, ndang patuduhon holong molo tatabunihon dosanta. Boasa? Alana, boi do gabe ndang dilehon Jahowa be pasupasu dohot tondi parbadiaNa tu huria. Alani i, gabe ndang adong be hadameon di huria. (Eps. 4:30) Molo taulahon dosa na balga, tapaboa ma i tu angka sintua asa boi hita diurupi. Na patuduhon holong do molo taulahon i.​—Jak. 5:14, 15.

18. Sadia ringkot do patuduhon holong na sian ias ni roha?

¹⁸ Holong ma parange na umbalga. (1 Kor. 13:13) Boi do taboto sasahalak mangihuthon Jesus manang na ndang, maniru Jahowa manang na ndang, sian carana mangkaholongi. Ai Debata Parholong do Jahowa. (Eps. 5:1, 2) Si Paulus mandok, doshon na soada do ibana molo ndang adong holong di ibana. (1 Kor. 13:2) Alani i, ganup ma hita patuduhon holong, unang ma holan ’hata’ alai marhite ”pambahenan dohot hasintongan” ma.