DI PATIK ni si Musa, diloas do halak Jahudi marsumpa. Tingki marsumpa boi do didok nasida, ”Ahu marsumpa di bagasan goar ni Jahowa.” Alai, di tingki ni Jesus gabe somal do halak Jahudi marsumpa di sude hata nasida. Diulahon nasida pe songon i, asa dihaporseai halak do hata ni nasida. Alai dua hali ma nasida dipasingot Jesus asa unang pola marsumpa. Didok Jesus ma tu nasida, ”Olo, anggo olo; ndang, ia ndang!”​—Mat. 5:33-37; 23:16-22.

Sada kamus Teologia paboahon, boi do tangkas taida di buku Talmud, sadia jotjot halak Jahudi marsumpa. Dipatorang do muse di buku i dia sumpa na ingkon diulahon jala dia sumpa na boi diose.

Ndang holan Jesus na mamburai halak na marsumpa. Umpamana, sejarawan Jahudi, i ma si Flavius Josephus manurat taringot sekte ni halak Jahudi. Sekte i mandok, tumagon do halak na margabus sian halak na mangose sumpa. Molo ingkon marsumpa do sasahalak laho patuduhon na tutu hatana, i patuduhon na pargabus do ibana. Hirahira songon on ma na nidok ni buku apokrifa ni halak Jahudi di Ecclesiasticus (23:11), ”Na mangalaosi uhum do halak na marsumpa.” Diburai Jesus do halak na marsumpa di parsoalan na gelleng. Molo sai na sintong do na tahatahon, ndang porlu be hita marsumpa laho patuduhon na haposan do hatanta.