1-3. (a) Tingki sadihari do si Sakaria mulai manurirang, jala songon dia situasi ni bangso Israel? (b) Boasa dipangido Jahowa asa mulak naposoNa?

DI PARNIDAAN ni si Sakaria, adong ma sada gulungan na habang, sahalak borua di bagasan ampang manang karanjang, dohot dua borua na marhabong songon siboru tasik manang bangau. (Sak. 5:1, 7-9) Boasa dilehon Jahowa parnidaan i tu si Sakaria? Songon dia do situasi ni halak Israel di tingki i? Jala aha do pangkorhon ni parnidaan i tu hita?

² Hirahira 537 taon andorang so ro Kristus, marlas ni roha do bangso ni Jahowa. Alana dipalua do nasida dung ditaban saleleng 70 taon di Babel. Jala boi ma nasida mulak tu Jerusalem laho paulihon bagas joro, inganan panombaon tu Jahowa. Sataon dungkon i, dibahen ma pondasi ni joro. Marlas ni roha do nasida jala ”marsoara na  gogo situtu bangso i marolopolop pola tarbege soara i tu na dao”. (Esr. 3:10-13) Alai, lam leleng lam godang do paraloan tu nasida. Gabe mabiar jala marmetmet ni roha ma nasida. Dipaso ma ulaon paulihon joro i. Gabe jabu dohot hauma ni nasida ma na diramoti nasida. Nunga sampulu onom taon ndang sae dope joro i. Alani i, porlu do ingoton ni nasida muse boasa dipalua Jahowa nasida. Asa unang mangkaringkothon diri sandiri be nasida. Dipangido roha ni Jahowa do asa marsitutu jala barani bangso Israel manomba Ibana.

³ Taon 520 SM, disuru Jahowa ma si Sakaria paingothon bangso Israel, taringot boasa dipalua Jahowa nasida sian panabanan. Lapatan ni goar ni si Sakaria i ma, ”Diingot Jahowa do”. Nang pe lupa halak Israel songon dia Jahowa mangurupi nasida, alai diingot Jahowa do nasida. (Jaha Sakaria 1:3, 4.) Marjanji do Jahowa laho paulakkon panombaon na sintong. Dipaingot Jahowa do muse nasida, jangkononNa do panombaon ni nasida molo dilehon nasida na dumenggan. Taulas ma parnidaan ni si Sakaria na paonomhon dohot papituhon. Taparsiajari ma songon dia Jahowa mangurupi bangso Israel jala songon dia parnidaan on mangurupi hita saonari.

4. Aha do na diida si Sakaria di parnidaan na paonomhon? Jala boasa disurathon tona i di bagasan dohot di luar gulungan i? (Ida gombar 1 di mula ni parsiajaran.)

⁴ Bindu 5 buku Sakaria dipungka marhite parnidaan taringot sada gulungan na habang. (Jaha Sakaria 5:1, 2.) Sia meter ma ganjang ni gulungan i, jala opat satonga meter ma bolakna. Tarbungka do gulungan i, jala adong do tona disi. (Sak. 5:3) Tona on taringot panguhuman. Najolo, somal do halak manurathon tona holan di bagas ni gulungan surat. Alai ala ringkot ni tona on, disurathon ma i di bagas dohot di luar ni gulungan i. 

5, 6. Songon dia do pangkilalaan ni Jahowa mangida halak na manangko?

⁵ Jaha Sakaria 5:3, 4. Ingkon martanggung jawab do ganup halak di parniulaonna. Tarlumobi naposo ni Jahowa, ala Sitindangi Ni Jahowa do nasida. Holong ni nasida tu Ibana mambahen nasida ndang olo manangko. Alana boi gabe marlea goar ni Jahowa molo manangko nasida. (Poda 30:8, 9) Dirimpu pigapiga halak, ndang sala manangko molo adong na mansai ringkot. Alai manang aha pe alana, unang ma manangko hita. Molo manangko hita, patuduhon na rumingkot do di hita hisap ni rohanta sian Jahowa, goarNa dohot uhumNa.

⁶ Di Sakaria 5:3, 4 dipaboa, ro torutoru manang bura tu ”bagas ni halak panangko”, jala ’laos marborngin do i di tongatonga ni jabuna, jala siaphononna’. Aha do lapatan ni i? Lapatan na, boi do patuduhonon ni Jahowa jala uhumonNa naposoNa na mangulahon na sala. Nang pe sasahalak na manangko boi margabus tu polisi, bosna, sintua, manang natuatuana, alai ndang boi gabusanna Jahowa. Di ari na naeng ro, patuduhonon ni Debata do i. (Heb. 4:13) Las do rohanta ala boi rap dohot angka dongan na so margabus ”di na saluhut”!​—Heb. 13:18.

7. Songon dia do pasidingkon bura na disurat di gulungan i?

⁷ Ndang lomo roha ni Jahowa mangida panangko. Sada hasangapon do di hita mamboto jala mangoloi uhum ni Jahowa. Taboto ma dia na sintong jala dia na sala. Jala las do rohanta marpangalaho na denggan asa unang marlea goarNa. Molo taulahon on, malua ma hita sian panguhuman ni Jahowa.

8-10. (a) Aha do lapatan ni hata manolon? (b) Janji aha do na diose Raja Sedekia?

⁸ Gulungan na habang di parnidaan i, marisi hata sipasingot tu angka ”halak na manolon” di bagasan goar ni Debata alai margabus. (Sak. 5:4) Manolon lapatanna mamparhatutu sada hata, manang marsumpa laho mangulahon, manang ndang mangulahon sada ulaon.

⁹ Molo nunga marsumpa sasahalak di bagasan goar ni Jahowa ingkon ulahononna do i. Taparrohahon ma songon na masa tu si Sedekia, raja na parpudi di Jerusalem. Marsumpa do ibana di bagasan goar ni Jahowa, na laho unduk tu raja Babel. Alai diose ibana  do i. Alani i, didok Jahowa ma na laho ’mate do [si Sedekia] di tongatonga ni Babel, di inganan ni raja na pabangkit ibana gabe raja, nampuna sumpa na tinoisanna, jala nampuna padan na ni oseanna’.​—Hes. 17:16.

¹⁰ Ala di bagasan goar ni Debata do Raja Sedekia marsumpa, ingkon ulahononna do i. Alai diose ibana do janjina. (2 Kron. 36:13) Dipangido ibana do pangurupion sian halak Misir asa boi malua sian Babel. Hape halak Misir pe ndang boi mangurupi nasida.​—Hes. 17:11-15, 17, 18.

11, 12. (a) Aha do janji na rumingkot na hea tabahen? (b) Aha do pangkorhon ni janji na tabahen tu Jahowa di ngolunta?

¹¹ Aha do na boi taparsiajari sian na masa tu si Sedekia? Diparrohahon Jahowa do angka janji na tabahen. Asa las roha ni Jahowa, unang ma taose janjinta. (Ps. 76:12) Janji na rumingkot na hea tabahen, i ma janji tingki hita mangalehon diri tu Jahowa. Tingki i, marjanji do hita laho mangulahon lomo ni roha ni Jahowa manang aha pe na masa di ngolunta.

¹² Songon dia do hita mangulahon songon na tajanjihon tu Jahowa? Tapatudu ma na togu do paralealeonta tu Ibana, tatepati ma janjinta na balga nang na gelleng ”ganup ari”. (Ps. 61:9) Umpamana tingki adong donganmu sasingkola manang saparkarejoan mangelaela hamu laho marhamlet, aha do na laho ulahononmu? Ala mangoloi Jahowa, olo do hamu manundalhon i? (Poda 23:26) Manang, molo holan sahalakmuna do na manomba Jahowa di keluargamuna, dipangido hamu do pangurupion ni Jahowa asa tongtong mangulahon prinsip ni Bibel? Manang aha pe na masa tu hamu, olo do hamu ganup ari mandok mauliate tu Jahowa alani holong dohot panogunoguonNa? Diparade hamu do tingkimuna laho manjaha Bibel ganup ari? Sasintongna, tingki talehon dirinta tu Jahowa, nunga marjanji hita laho mangulahon sudena i. Molo taoloi ibana jala talehon na dumenggan tu Ibana, tarida ma na holong do rohanta tu Ibana, jala Ibana do nampunasa hita. Ingkon taulahon do sude na taparsiajari di saluhut parngoluonta. Molo marsihohot hita tu Jahowa, marjanji do Ibana laho mangalehon ngolu na dumenggan.​—5 Mus. 10:12, 13.

13. Aha do na boi taparsiajari sian parnidaan ni si Sakaria na paonomhon?

¹³ Sian parnidaan ni si Sakaria na paonomhon, taboto ma molo holong rohanta tu Jahowa, ndang olo hita manangko manang mangose janji. Jala sian i taboto ma muse, jotjot do halak Israel mangulahon na sala. Alai, ndang hea Jahowa mangose janjiNa tu nasida. Jala ndang hea ditadingkon Jahowa nasida. Alana, diboto Jahowa do susa ni parngoluan ni nasida, ala tading di humaliang ni musu. Sian on diajari Jahowa ma hita asa unang mangose janji. Pos ma rohanta, urupan ni Jahowa  do hita. Dilehon Jahowa do pangkirimon tu hita. Satongkin nai salpuhononNa ma hajahaton sian tano on. Tajaha ma i sian parnidaan ni si Sakaria na mangihut.

14, 15. (a) Aha do na niida ni si Sakaria di parnidaan na papituhon? (Ida gombar nomor 2 di mula ni parsiajaran.) (b) Ise do parompuan na di bagas karanjang i? Boasa ditutup surusuruan karanjang i?

¹⁴ Dung diida si Sakaria gulungan na habang i didok surusuruan ma tu ibana ”Ida ma”. Dung i, diida si Sakaria ma sada ”ampangna”. (Jaha Sakaria 5:5-8.) Karanjang i, ditutup mamangke tutup na sian timah manang simbora. Tingki dibungka karanjang i, diida si Sakaria ma ’sada parompuan hundul’ di bagasan. Surusuruan i mandok parompuan ”i ma Hajahaton”. Rimangi ma songon dia pangkilalaan ni si Sakaria tingki mangida parompuan i naeng kaluar! Alai, pintor hatop do surusuruan i mangonjar parompuan i asa unang kaluar. Dung i ditutup ma muse karanjang i. Aha do lapatan ni i?

¹⁵ On patuduhon ndang pasombuon ni Jahowa hajahaton di tongatonga ni naposoNa. Molo diida Jahowa adong na so denggan, pintor hatop do pasidingonNa i. (1 Kor. 5:13) Tangkas do i dipatudu surusuruan i, pintor hatop do ibana manutup karanjang i.

16. (a) Dihahua parompuan na dua i do karanjang i? (Ida gombar nomor 3 di mula ni parsiajaran.) (b) Tudia do i boanon ni nasida?

¹⁶ Dung i, diida si Sakaria ma muse dua parompuan na marhabong,  songon habong ni siboru tasik manang bangau. Mansai gogo do habongna i. (Jaha Sakaria 5:9-11.) Parompuan na nidok na dison, ndang dos songon parompuan na di karanjang i. Diboan parompuan na dua i ma karanjang na marisi ”Hajahaton” i habang. Tudia do i diboan? Tu ”tano Sinear” na di Babel. Boasa tusi diboan?

17, 18. (a) Boasa Babel gabe inganan na pas tu ”Hajahaton”? (b) Aha do na ingkon taulahon?

¹⁷ Boi do dapot roha ni halak israel di tingki i boasa Babel inganan na pas tu ”Hajahaton”. Alana, godang do hajahaton disi, ulaon na rorang, dohot panombaon na so sintong. Ganup ari, ingkon marsitutu do si Sakaria dohot halak Jahudi na asing asa unang tarelaela tu panombaon ni halak Babel. Jadi parnidaan on paposhon roha ni nasida, sai na jagaon ni Jahowa do asa tongtong ias panombaon tu Ibana.

¹⁸ Sian parnidaan on botoon ni halak Jahudi ma, nasida pe martanggung jawab do manjaga panombaon tu Jahowa tongtong ias. Ndang boi adong hajahaton di tongatonga ni naposo ni Debata. Saonari nunga di togutogu Jahowa be hita tu organisasiNa na ias. Tahilala do holong dohot parlinggomanNa. Alani i, ganup hita, martanggung jawab manjaga organisasi ni Jahowa asa tongtong ias. Tung na so jadi adong hajahaton di tongatonga ni naposo ni Jahowa.

19. Aha do pangkorhon ni parnidaan ni si Sakaria tu hita saonari?

¹⁹ Parnidaan ni Si Sakaria na paonomhon dohot na papituhon marisi hata sipasingot tu halak na mangulahon na roa. Ndang pasombuon ni Jahowa hajahaton salelengna. Alani i, ingkon tahasogohon do hajahaton. Dipapos do rohanta, molo marsitutu hita mambahen las roha ni Debata na parholong, ndang buraanNa hita. Gariada linggomanNa do hita jala pasupasuonNa. Maol do tongtong ias di portibi na jahat on alai pos ma rohanta, urupan ni Jahowa do hita jala boi do hita marhasil. Nunga lam jonok be haporsuhon bolon, boi do tongtong adong do panombaon na sintong? Aha do na boi paposhon rohanta, sai na linggoman ni Jahowa do OrganisasiNa? Taulas ma sungkunsungkun on di parsiajaran na mangihut.