1. Boasa holan Jahowa na tama tasomba?

HOLAN Jahowa do na tama tasomba, ala Ibana do Sitompa hita. (Pgk. 4:11) Alai, adong ambat-ambat na taadopi. Nang pe tahaholongi jala tapasangap Jahowa, alai olo do adong angka na asing na mambahen hita gabe ndang manomba Jahowa songon na dihalomohon rohana. Porlu do taboto boasa boi songon i. Alai parjolo, taulas ma aha do lapatanna holan manomba Jahowa.

2. Hombar tu 2 Musa 34:14, aha do na ingkon taulahon molo holan Jahowa na tasomba?

² Didok di Bibel, holong na mansai bagas tu Jahowa do na mambahen hita holan manomba Ibana. Alani i, ndang tapaloas ise pe manang aha pe manggantihon Ibana di rohanta.​—Jaha 2 Musa 34:14.

3. Aha do alasanta mangkaholongi Jahowa?

³ Godang do alasanta mangkaholongi Jahowa. Angka aha ma i? Godang do naung taparsiajari taringot Ibana. Tahalomohon do angka parangena. Taboto do aha na dihalomohon dohot na so dihalomohon rohana, jala songon i do pangkilalaanta. Taboto do jala dohot do hita mangulahon aha sangkapna tu jolma. Jala las do rohanta ala boi gabe ale-alena. (Ps. 25:14) Sude na taparsiajari taringot Jahowa, boi mambahen hita lam jonok tu Ibana.​—Jak. 4:8.

4. (a) Aha do na dibahen Sibolis laho mambahen hita ndang holan mangkaholongi Jahowa? (b) Aha do na laho taulas di parsiajaran on?

⁴ Sibolis do na mangarajai portibi on, jala dibahen ibana do angka na adong di portibi on gabe na rumingkot di ngolunta. Jala mambahen hita maol pasidingkon giot-giot na sala. (Eps. 2:1-3; 1 Joh. 5:19) Lomo do rohana asa tahaholongi na asing, ndang holan Jahowa. Taulas ma  dua cara ni Sibolis mangulahon i. Na parjolo, dijujui ibana do hita asa mangkaholongi hepeng. Jala na paduahon, dijujui ibana do hita asa mamillit hiburan na so denggan.

5. Boasa ingkon manat hita asa unang tarela-ela laho mangkaholongi hepeng?

⁵ Sude do hita porlu sipanganon, pangkean, dohot inganan laho tading. Alai ingkon manat do hita asa unang tarela-ela laho mangkaholongi hepeng. Godang do jolma saonari gabe “holongan di hepeng” dohot angka barang na boi dituhor nasida. (2 Tim. 3:2) Diboto Jesus do, boi do tarela-ela angka siseanna asa mangkaholongi hepeng. Alani i didok ibana, “Ndang haoloan ni sahalak hatoban dua tuan. Ai gabe sogo do rohana tu na sada jala holong rohana tu na sada nai, manang pasangaponna do na sada jala leas rohana tu na sada nai. Ndang boi hamu gabe hatoban ni Debata dohot hatoban ni Hamoraon.” (Mat. 6:24) Boi do sasahalak na manomba Jahowa gabe mangoloi dua tuan molo dilehon ibana godang tingki dohot gogo laho mangalului hamoraon ni portibi on. Ujungna, ndang holan Jahowa be na disomba ibana.

6. Aha do na taparsiajari sian hata ni Jesus tu huria Laodikia?

⁶ Ginjang do roha ni angka halak di huria Laodikia na mangolu andorang so taon 100 M. Didok nasida, “Na mora do ahu, godang do artangku jala ndang porlu be di ahu manang aha.” Alai, di adopan ni Jahowa dohot Jesus, ‘na susa, na dangol, na pogos, na mapitung jala ndang marpangkean’ nasida. Dipasingot Jesus pe nasida, ndang ala na  mamora nasida. Alai, ala gabe holongan di hepeng do nasida umbahen na sega parale-aleonna tu Jahowa. (Pgk. 3:14-17) Molo taboto adong sangkap di rohanta laho mangalului hamoraon, pintor tapasiding ma i. (1 Tim. 6:7, 8) Molo ndang, olo do gabe tarbagi rohanta jala ndang lomo be roha ni Jahowa tu hita. Alana, dipangido Jahowa do asa holan Ibana na tasomba. (5 Mus. 4:24) Alani i, songon dia do hamoraon boi gabe na rumingkot di ngolunta?

7-9. Aha do na boi diparsiajari hamu sian pengalaman ni sahalak sintua na margoar si David?

⁷ Pingkirhon ma contoh sian si David, sahalak sintua na ringgas na tading di Amerika Serikat. Ala ringgas do ibana di parkarejoan, gabe naik pangkat ma ibana jala dapotna do penghargaan sian negara. Didok si David, “Di tingki i, hurimpu do pasu-pasu sian Jahowa i.” Alai tutu do i sian Jahowa?

⁸ Diboto si David ma, karejona i boi do gabe manegai parale-aleonna tu Jahowa. Didok ibana, “Tingki marpungu dohot marbarita ahu, sai hupingkiri do angka masalah na adong di parkarejoan. Godang do hepeng na hudapot, alai gabe jotjot do ahu stres, jala gabe adong ma masalah di parsaripeonnami.”

⁹ Diboto si David ma, ingkon dipillit ibana do aha na rumingkot di ngoluna. Didok ibana, “Ingkon barani do ahu mambahen keputusan.” Naeng dipauba si David ma jadwal karejona jala dipaboa ma i tu bosna. Aha ma hasilna? Dipakaluar ma ibana sian karejona! Dung i, aha ma na diulahon ibana? Didok si David, “Marsogotna i, huisi ma formulir asa gabe perintis ekstra tetap.” Jala karejo  ma ibana dohot istrina gabe cleaning service. Ndang sadia leleng, gabe perintis biasa ma ibana. Dungkon i, dohot ma istrina gabe perintis. Dipillit nasida do karejo na leas di adopan ni godang halak, alai ndang i na rumingkot di nasida. Nang pe ndang godang hepeng na didapot songon najolo, alai dapot ni nasida do angka na dihaporluhon ganup bulan. Marsitutu do nasida manjumolohon Harajaon ni Debata, jala dihilala nasida do na sai disarihon Jahowa nasida.​—Mat. 6:31-33.

10. Songon dia do hita manjaga rohanta?

¹⁰ Otik manang godang hepengta, ingkon tajaga do rohanta. Songon dia carana? Unang ma holongan di hepeng, jala unang ma gabe parkarejoan na rumingkot di ngolumuna sian manomba Jahowa. Sian dia boi diboto hamu na masa i tu hamu? Sungkun ma dirimuna: ‘Jotjot do hupingkirhon taringot parkarejoan tingki marpungu ahu manang marbarita? Sai marsak do ahu taringot parhepengon? Gabe susa do parsaripeonku alani hepeng? Asa boi mangalehon gumodang tingki tu Jahowa, olo do ahu mamillit karejo na leas di adopan ni godang halak?’ (1 Tim. 6:9-12) Tingki mamingkirhon angka sungkun-sungkun on ingot ma, holong do roha ni Jahowa tu hita. Jala marjanji do Ibana tu angka halak na setia, “Ndang tadingkononku ho jala ndang pasombuonku ho.” I do alana didok si Paulus, “Unang ma holongan di hepeng hamu.”​—Heb. 13:5, 6.

11. Aha do pengaruh ni hiburan tu sasahalak?

¹¹ Lomo do roha ni Jahowa asa marlas ni roha hita, jala boi do tadapot i sian hiburan. Gariada didok do di Bibel, “ndang adong hape na denggan di jolma i, dungkon ni na mangan ibana dohot na minum, jala dipasonang rohana mangihutihut ulaonna hian”. (Pjm. 2:24) Alai nang pe songon i, godang do hiburan di portibi on na boi mambahen pengaruh na so denggan tu hita. Boi do i mambahen roa pangalaho ni angka halak. Jala boi do i mambahen halak mangkaholongi aha na dihasogohon Debata.

12. Hombar tu 1 Korint 10:21, 22, boasa ingkon manat hita mamillit hiburan?

¹² Lomo do rohanta holan manomba Jahowa. Alani i, ndang boi hita mangan sian “meja ni Jahowa” dohot sian  “meja ni suru-suruan na jahat”. (Jaha 1 Korint 10:21, 22.) Molo rap mangan hita dohot sasahalak, on patuduhon na marale-ale do hita dohot ibana. Alani i, molo tapillit hiburan na patuduhon kekerasan, spiritisme, seks na so patut, manang giot-giot dohot pangalaho na roa, dos do i songon na rap mangan hita dohot musu ni Debata jala taallang aha na diparade nasida. Ujungna, boi do i manegai dirinta sandiri dohot parale-aleonta tu Jahowa.

13-14. Songon na didok di Jakobus 1:14, 15, boasa ingkon manat hita taringot mamillit hiburan? Bahen ma tudosan.

¹³ Boi do dipatudos hiburan songon sipanganon. Tingki mangan hita, boi do tapillit aha na laho taallang. Alai dung tabondut sipanganon i, ndang boi tatontuhon aha pengaruh ni sipanganon i tu dagingta. Sipanganon na denggan, boi mambahen hita sehat. Alai sipanganon na so denggan, boi mambahen hita marsahit. Ra, ndang pintor tahilala pengaruh ni sipanganon i tu dagingta, alai tarida do i dung piga-piga leleng.

¹⁴ Suang songon i ma, tingki mamillit hiburan boi do tapillit aha na laho tapamasuk tu pingkiranta. Alai dungkon i, adong do pengaruh ni hiburan na tapillit i tu pingkiran dohot rohanta. Hiburan na denggan boi mambahen hita marlas ni roha, alai hiburan na so denggan boi manegai dirinta. (Jaha Jakobus 1:14, 15.) Ra, ndang pintor tahilala pengaruh ni hiburan i tu dirinta, alai tarida do i dung piga-piga leleng. I do alana didok Bibel tu hita, “Unang ma hamu lilu, ndang boi gabusan Debata. Manang aha na disuan sasahalak, i do tapuonna. Manang ise na manuan hombar tu giot-giot ni dagingna na mardosa, tapuonna do hamatean sian dagingna na mardosa i.” (Gal. 6:7, 8) Alani i, mansai ringkot do di hita asa pasidingkon sude hiburan na patuduhon angka na dihasogohon Jahowa!​—Ps. 97:10.

15. Aha do silehon-lehon sian Jahowa na boi mambahen hita marlas ni roha?

¹⁵ Godang do naposo ni Jahowa na lomo rohana manonton JW Broadcasting^®, i ma stasiun TV na adong di Internet. Sahalak donganta borua na margoar si Marilyn mandok, “JW Broadcasting mangurupi ahu asa gabe halak na marlas ni roha, jala boi do hutonton sude na adong disi ala denggan do sude acarana. Tingki lungun manang metmet rohangku, boi do hutonton jamita na patoguhon manang Ibadah Pagi na adong disi. On mambahen ahu lam jonok tu Jahowa dohot tu organisasina. Acara JW Broadcasting mambahen muba ngolungku.” Dapotmuna do laba sian silehon-lehon ni Jahowa on? Adong do acara na baru ganup bulan di JW Broadcasting. Jala adong do audio, video, dohot ende na patoguhon na boi ditonton jala dibege hamu di tingki sadihari pe.

16-17. Boasa ingkon manat hita mangatur sadia godang tingki na tapangke tu hiburan, jala songon dia hita mangulahon i?

¹⁶ Asing ni manontuhon hiburan aha na tapillit, ingkon manat do hita mangatur sadia godang tingki na tapangke tu hiburan i. Molo ndang manat hita, boi do gabe gumodang tingki na tapangke tu hiburan sian ulaonta manomba Jahowa. Godang do na mangkilala maol mangatur sadia godang tingki na laho dipangke tu hiburan. Sahalak donganta borua na margoar si Abigail na marumur 18 taon mandok,  “Dung loja di bagasan sadari, tabo do huhilala manonton TV. Alai molo ndang manat ahu, boi do gabe marjam-jam suda tingkingku tusi.” Sahalak donganta baoa na margoar si Samuel mandok, “Jotjot do hutonton video na jempek di Internet. Mulana, holan sada video do na hutonton. Hape olo do gabe tolu manang opat jam suda tingkingku tusi.”

¹⁷ Songon dia do hamu boi mangatur sadia godang tingki na dipangke hamu tu hiburan? Parjolo sahali, pareso ma sadia godang tingki na dipangke hamu tu hiburan. Boi do dibahen hamu catatan saleleng saminggu. Surat ma di kalender sadia godang tingki na dipangke hamu laho manonton TV, marinternet, dohot mar-game di HPmuna. Molo dihilala hamu gabe gumodang tingkimuna suda tusi, bahen ma jadwal. Bahen ma rencana laho manjumolohon ulaon na rumingkot, dung pe i asa tu hiburan. Dung i, pangido ma tu Jahowa asa diurupi hamu mangulahon rencanamuna i. Molo diulahon hamu i, gabe adong ma tingki dohot gogomuna tu pelajaran pribadi, ibadat keluarga, parpunguan dohot ulaon marbarita. Jala gabe las ma rohamuna mamangke tingki tu hiburan ala nunga dijumolohon hamu Jahowa.

18-19. Songon dia hita patuduhon holan Jahowa do na tasomba?

¹⁸ Dung disurat si Petrus taringot ajal ni portibi ni Sibolis dohot tano na imbaru na naeng ro, didok ibana muse, “Angka dongan na hinaholongan, ala dipaima-ima hamu do angka i, marsitutu ma hamu asa didapot Ibana hamu ias, ndang marcacat, jala di bagasan dame.” (2 Ptr. 3:14) Molo unduk hita tu Debata, jala taulahon aha na dihalomohon rohana, on patuduhon holan Jahowa do na tasomba.

¹⁹ Marsitutu do Sibolis dohot portibi on mambahen hita asa mangkaringkothon na asing unang apala Jahowa. (Luk. 4:13) Alai, unang ma tapaloas ise pe manang aha pe manggantihon Jahowa di rohanta. Marsitutu ma hita holan manomba Jahowa, ala tama do Ibana manjalo i!