1. Aha do na patuduhon molo hita mangolu di “ari parpudi”?

MOLO tubu hamu dungkon taon 1914, lapatanna hamu mangolu saleleng ari parpudi ni portibi on. Sude hita nunga mambege angka na dipaboa Jesus na masa di tingkinta saonari. Umpamana, porang, haraparon, gempa, sahit, lam godang hajahaton, jala dianiaya angka naposo ni Jahowa. (Mat. 24:3, 7-9, 12; Luk. 21:10-12) Jala taida muse pangalaho ni angka halak hombar tu na didok apostel Paulus. (Ida kotak “ Pangalaho ni Halak Saonari.”) Ala Sitindangi Ni Jahowa hita, tangkas do taboto molo hita mangolu di “ari parpudi”.​—2 Tim. 3:1.

2. Sungkun-sungkun aha do na porlu taalusi?

² Nunga leleng salpu taon 1914, lapatanna hita saonari mangolu di ujung ni “ari parpudi”. Ala nunga jonok ajal ni hasiangan on, porlu do taalusi angka sungkun-sungkun na ringkot on: Aha do na laho masa di ujung ni “ari parpudi”? Jala aha do na dipangido Jahowa asa taulahon huhut paimahon angka na laho masa i?

3. Hombar tu surirang na didok di 1 Tessalonik 5:1-3, aha do boa-boa na laho didok angka bangso?

³ Jaha 1 Tessalonik 5:1-3. Di ayat on, didok si Paulus do taringot “ari ni Jahowa”. Laho dimulai ma i tingki diserang “Babel na Balga”, manang sude agama palsu di portibi on. Jala dipaujung ma i di porang Armagedon. (Pgk. 16:14, 16; 17:5) Alai andorang so ro “ari” i, didok angka bangso ma boa-boa “Dame do jala ndang adong be  sihabiaran!” Sipata, tingki laho padamehon piga-piga negara, dibahen angka pamarenta do boa-boa na sarupa. * Alai, imbar do i dohot boa-boa na mandok “dame do jala ndang adong be sihabiaran!” na dipaboa di Bibel. Boasa? Alana tingki masa i, ra dirimpu angka halak nunga marhasil pamarenta mambahen dame portibi on. Hape sasintongna, laho dimulai nama “hasusaan bolon”, dung i “tompu ma diripashon” nasida.​—Mat. 24:21.

4. (a) Aha do na so taboto dope taringot boa-boa “dame do jala ndang adong be sihabiaran”? (b) Aha do na taboto taringot boa-boa i?

⁴ Nunga taboto na laho adong boa-boa “dame do jala ndang adong be sihabiaran!” Alai, adong dope na so taboto taringot i. Umpamana, ndang taboto aha do na mambahen angka pamarenta mandok boa-boa i manang songon dia i dipasahat. Ra, olo do piga-piga hali i dipasahat manang holan sahali. Alai songon dia pe carana i dipasahat, taboto do: Ndang boi angka pamarenta mambahen dame portibi on. Alani i, unang ma olo hita dioto-otoi nasida. Gariada tingki dipasahat boa-boa i, ingkon jaga ma hita. Alana, i do tandana laho dimulai nama “ari ni Jahowa”!

5. Songon na dipaboa di 1 Tessalonik 5:4-6, aha do na ingkon taulahon asa rade hita tingki ro “ari ni Jahowa”?

⁵ Jaha 1 Tessalonik 5:4-6. Sipasingot sian si Paulus on paboahon songon dia carana asa rade hita tingki ro “ari ni Jahowa”. “Unang ma tarpodom hita songon na asing.” Ingkon “sai dungo ma hita” jala tongtong jaga. Umpamana, ingkon tongtong do hita netral, jala manat ma asa unang parsidohot tu politik ni portibi on. Alana molo dohot hita tusi, gabe bagian “sian portibi on” ma hita. (Joh. 15:19) Taboto do, holan Harajaon ni Debata do na boi parohon dame di portibi on.

6. Aha do na ingkon taulahon laho mangurupi angka halak, jala boasa?

⁶ Asing ni tongtong jaga, ingkon taurupi do angka halak asa mamboto taringot angka na laho masa di portibi on songon na didok di Bibel. Ingkon saonari do i taulahon, alana tingki dimulai hasusaan bolon, ndang adong be tingki di nasida laho manomba Jahowa. I do alana, mansai ringkot do marbarita saonari! *

7. Aha do na dipangido Jahowa asa taulahon?

⁷ Ndang leleng nai, ro nama “ari” ni Jahowa. Alani i, dipangido Jahowa do hita asa tongtong ringgas di ulaon  marbarita. Ingkon marsitutu do hita asa “mangulahon godang ulaon ni Tuhan i”. (1 Kor. 15:58) Jala nunga disurirangkon Jesus taringot i. Tingki dipaboa ibana angka na laho masa saleleng ari parpudi, didok do muse, “Alai jumolo do baritahononhon barita na uli i di sude bangso.” (Mrk. 13:4, 8, 10; Mat. 24:14) Rimangi ma: Tingki marbarita hamu, na dohot do hamu manggohi surirang ni Jesus i!

8. Aha do hasil na didapot sian ulaon marbarita?

⁸ Aha do hasil na didapot sian ulaon marbarita? Ganup taon, lam godang do halak na manangihon barita taringot Harajaon ni Debata. Umpamana, pingkirhon ma godang ni angka parbarita Harajaon na lam martamba di liat portibi on saleleng ari parpudi. Di taon 1914, adong 5.155 parbarita di 43 negara. Alai saonari, adong lobi sian 8,5 juta parbarita di 240 negara! Nang pe songon i, ndang sae dope ulaonta. Ingkon tongtong do hita paboahon, holan Harajaon ni Debata do na boi pasaehon sude hasusaan ni jolma.​—Ps. 145:11-13.

9. Boasa ingkon tongtong hita paboahon barita Harajaon?

⁹ Tongtong ma hita marbarita sahat tu na didok Jahowa nunga sae ulaon i. Sadia leleng nai do tingki na adong di angka halak laho mananda Debata Jahowa dohot Jesus Kristus? (Joh. 17:3) Ndang taboto. Alai taboto do, andorang so dimulai hasusaan bolon, adong dope tingki tu angka halak na “tama mandapot hangoluan saleleng ni lelengna” laho manjangkon barita na uli jala mamillit laho manomba Jahowa. (Ul. 13:48) Ala adong dope tingki, songon dia hita boi mangurupi nasida?

10. Aha do na diparade Jahowa laho mangurupi hita mangajarhon hasintongan?

¹⁰ Marhite organisasina, diparade Jahowa do sude na tahaporluhon laho mangajarhon hasintongan tu angka halak. Umpamana, dilatik do hita ganup minggu di parpunguan parsitongaan ni minggu. Di parpunguan i, diurupi do hita mamboto carana marbarita, manjumpangi muse, dohot manguluhon parsiajaran Bibel. Jala, diparade organisasi ni  Jahowa do Angka Alat Laho Mangajari. Marhite angka alat i, diurupi do hita laho . . .

• mamungka pangkataion,

• pasahathon barita marhite cara na menarik,

• mangurupi halak asa lomo rohana marsiajar Bibel,

• mangajarhon hasintongan tingki manguluhon parsiajaran Bibel, dohot

• manggokkon halak laho mangida jw.org manang ro tu Bale Harajaonta.

Tontu ndang sae holan tatanda angka alat i. Ingkon tapangke do i. * Umpamana, dung sae hamu mangkatai dohot sasahalak na olo manangihon, dilehon hamu ma risalah manang majalah tu ibana. Boi ma dijaha-jaha ibana i paima ro hamu muse. Martanggung jawab do hita sude asa tongtong ringgas marbarita ganup bulan.

11. Boasa dibahen Parsiajaran Bibel Online?

¹¹ Adong cara na asing na dibahen Jahowa laho mangurupi angka halak marsiajar taringot hasintongan, i ma Parsiajaran Bibel Online di jw.org^®. Boasa dibahen parsiajaran on? Alana ganup bulan, mansai godang do halak di liat portibi on na mangalului parsiajaran Bibel di Internet. Parsiajaran na adong di situs jw.org boi mangurupi angka halak marsiajar hasintongan na sian Bibel. Jala, ra adong do piga-piga halak na ditanda hamu na maila molo marsiajar Bibel dohot sasahalak. Molo songon i, patudu ma fitur on di jw.org manang kirim ma link manang alamat ni fitur on. * Boi ma ditogihon hamu nasida laho mangida fitur on di bahasa na diantusi nasida.

12. Aha do na boi diparsiajari sasahalak sian Parsiajaran Bibel Online?

¹² Parsiajaran Bibel Online mangulas taringot: “Bibel dohot Pangarangna,” “Tokoh Utama na Adong di Bibel,” dohot “Pangkirimon na Adong di Bibel.” Di parsiajaran on, dipaboa do:

• Songon dia Bibel boi mangurupi sasahalak

• Ise do Jahowa, Jesus, dohot suru-suruan

• Boasa ditompa Debata angka jolma

• Boasa adong hasusaan dohot hajahaton

Di parsiajaran on, diulas muse songon dia Jahowa laho . . .

• pasohon hasusaan dohot hamatean

• paheheon halak naung mate, jala

• manggantihon pamarentaon ni jolma na so denggan tu Harajaon ni Debata.

13. Boasa parsiajaran online ndang manggantihon parsiajaran Bibel? Patorang ma.

¹³ Parsiajaran online ndang manggantihon parsiajaran Bibel. Alana, dilehon Jesus do tu hita tugas laho mambahen sisean. Hirim do rohanta angka halak na marsiajar online i mangargai na diparsiajari nasida jala lomo rohana asa mamboto godang taringot Bibel. Ra, ujungna olo do nasida ditogihon marsiajar Bibel. Di ujung ni ganup parsiajaran, dijujui do nasida asa mangido sasahalak mangurupi nasida marsiajar Bibel. Di situs web jw.org, ganup ari, adong lobi sian 230 halak di liat portibi on na mangido asa diurupi marsiajar Bibel! Tangkas ma, ringkot do manguluhon parsiajaran Bibel!

14. Hombar tu parenta ni Jesus na didok di Mateus 28:19, 20, aha do na ingkon taulahon, jala boasa?

¹⁴ Jaha Mateus 28:19, 20. Diparentahon Jesus do, ‘bahen ma saluhut halak gabe siseanku.  . . . Ajari ma nasida mangulahon sude naung huparentahon’. Tingki hita manguluhon parsiajaran Bibel, na marsitutu do hita mangulahon parenta i. Porlu do taurupi angka halak mamboto ringkot ni manomba Jahowa jala unduk tu Harajaonna. Alani i, taurupi do nasida manjangkon hasintongan marhite mangulahon na diparsiajari, mangalehon diri tu Jahowa, jala tardidi. On ma carana asa boi nasida martahan sian ari ni Jahowa.​—1 Ptr. 3:21.

15. Aha do na so boi taulahon, jala boasa?

¹⁵ Songon naung taulas, nunga mansai jonok ajal ni hasiangan on. Alani i, unang ma tapasuda tingki mangurupi parsiajar Bibel na so olo mambahen hamubaon laho gabe naposo ni Jahowa. (1 Kor. 9:26) Saotik nai nama tingkinta! Godang nai dope angka halak na porlu mambege barita Harajaon andorang so ro ari i.

16. Hombar tu Pangungkapon 18:2, 4, 5, 8, aha do na ingkon taulahon? (Ida ma surat na di toru.)

¹⁶ Jaha Pangungkapon 18:2, 4, 5, 8. Sian angka ayat on, taboto ma adong do muse na dipangido Jahowa sian naposona. Ingkon dipastihon sude halak Kristen na sintong do asa unang dohot nasida tu angka ulaon ni Babel na Balga. Andorang so marsiajar taringot hasintongan, ra adong do parsiajar Bibel na gabe anggota ni sada agama palsu. Ra, parsidohot do ibana tu angka ulaon ni organisasi i. Manang jotjot do ibana mangalehon sumbangan tu angka ulaon i. Andorang so boi ibana gabe penyiar na so tardidi, ingkon ditadingkon ibana do sude ulaon ni agama palsu. Ingkon dibahen ibana do surat tu gareja manang tu organisasi na adong hubunganna tu Babel na Balga laho paboahon na so anggota ni nasida be ibana. *

17. Parkarejoan na songon dia na ingkon dipasiding halak Kristen, jala boasa?

¹⁷ Ingkon dipastihon sahalak Kristen na sintong do molo parkarejoanna ndang adong hubunganna tu Babel na Balga. (2 Kor. 6:14-17) Umpamana, ndang olo ibana karejo di gareja. Jala, ndang olo  ibana karejo di inganan na dipangke tu ulaon ni agama palsu. Molo pengusaha ibana, tontu ndang jaloonna karejo na adong hubunganna tu ulaon ni Babel na Balga. Boasa ingkon sampe songon i hita? Alana ndang olo hita dohot tu ulaon manang dosa ni organisasi agama na dihagigihon Jahowa.​—Jes. 52:11. *

18. Songon dia sahalak donganta mangihuthon prinsip ni Bibel di parkarejoanna?

¹⁸ Piga-piga taon naung salpu, sahalak kontraktor manawarhon karejo tu sahalak sintua na karejona martukang. Adong na ingkon ditungkangi ibana di sada gareja na adong di hutana. Diboto kontraktor i do molo donganta i ndang olo manjalo karejo di gareja. Alai, ndang adong dapot ni kontraktor i tukang na asing. Alai, tongtong do ndang olo donganta i manjalo karejo i ala mangihuthon prinsip ni Bibel. Saminggu dungkon i, dibahen ma di koran foto ni sahalak tukang mamasang salib di gareja i. Molo dijalo donganta i hian karejo i, tontu fotona do na adong di koran i. Pingkirhon ma molo masa i, tontu gabe roa do goar ni donganta i di adopan ni angka donganna sahaporseaon! Jala, pingkirhon ma muse songon dia pangkilalaan ni Jahowa.

19-20. (a) Aha do naung taparsiajari? (b) Aha do muse na laho taparsiajari?

¹⁹ Hombar tu surirang na adong di Bibel, satongkin nai laho adong ma boa-boa sian angka pamarenta na mandok “dame do jala ndang adong be sihabiaran”. Ala nunga dipaboa Jahowa, taboto do ndang boi angka bangso parohon dame na sasintongna. Aha ma na ingkon taulahon andorang so masa i? Dipangido Jahowa do hita asa tongtong ringgas marbarita jala marsitutu mambahen sisean. Asing ni i, ingkon tapasiding do sude agama palsu. Lapatanna, unang ma dohot hita gabe anggota ni agama palsu jala unang ma tajalo karejo na adong hubunganna tu Babel na Balga.

²⁰ Adong muse na laho masa di ujung ni “ari parpudi”. Jala adong muse na dipangido Jahowa na ingkon taulahon. Angka aha ma i, jala songon dia hita boi paradehon diri tu angka na laho masa di ari na naeng ro? Taulas ma i di parsiajaran na mangihut.