1-2. (a) Satongkin nai, aha do na laho didok angka bangso? (b) Sungkun-sungkun aha do na laho dialusi?

BAYANGKON ma nunga didok angka bangso boa-boa “dame do jala ndang adong be sihabiaran”. Ra didok nasida nunga dame be portibi on. Jala lomo roha ni nasida asa porsea hita na marhasil do nasida pasaehon sude hasusaan na di portibi on. Alai ndang boi diambati nasida aha na laho masa dungkon i! Boasa? Hombar tu surirang ni Bibel, “tompu ma diripashon nasida. . . . Jala ndang tarpasiding ni nasida i”.​—1 Tes. 5:3.

² Adong sungkun-sungkun na ringkot na ingkon dialusi: Aha do na laho masa saleleng “hasusaan bolon”? Aha na dipangido Jahowa laho taulahon di tingki i? Jala songon dia hita paradehon diri sian saonari asa boi tongtong setia tingki masa hasusaan bolon i?​—Mat. 24:21.

3. Hombar tu Pangungkapon 17:5, 15-18, songon dia do cara ni Debata manghancurhon “Babel na Balga”?

³ Jaha Pangungkapon 17:5, 15-18. Laho dihancurhon do “Babel na Balga”! Songon naung dipaboa nangkin, ndang boi diambati angka bangso tingki masa i. Boasa? Alana “Debata do na mangonjar roha ni nasida laho mangulahon lomo ni rohana.” Aha do lomo ni roha ni Debata? Laho manghancurhon sude agama palsu, dohot ma i angka agama na mangangku Kristen. Dibahen Debata do lomo ni rohana tu roha ni “sampulu tanduk” sian “binatang buas na rara songon api”. Sampulu tanduk, manggombarhon angka pamarenta na gabe bagian  sian “binatang buas”, i ma Perserikatan Bangsa-Bangsa. (Pgk. 17:3, 11-13; 18:8) Tingki diserang pamarenta angka agama palsu, dimulai ma hasusaan bolon. Tompu do i masa jala balga do pengaruhna tu sude jolma di portibi on.

4. (a) Aha do na didok angka bangso tingki laho manghancurhon agama palsu? (b) Aha ma pengaruhna tu angka halak na hea gabe anggota ni agama palsu?

⁴ Ndang taboto aha do na mangonjar roha ni angka bangso laho manghancurhon Babel na Balga. Ra didok nasida do, angka agama i do na mangambati hadameon. Jala sai dohot do angka agama tu angka ulaon ni pamarenta. Manang, didok nunga mansai godang arta na dipapungu agama palsu. (Pgk. 18:3, 7) Tingki dihancurhon angka bangso agama palsu, lapatanna ndang angka halak na gabe anggota ni agama palsu i na dihancurhon. Alai, organisasi ni agama i do na dihancurhon. Dung dihancurhon sude organisasi i, diboto angka anggotana ma,ndang tutu hape na didok angka pamimpin ni agama ni nasida i. On mambahen gabe ndang porsea be nasida tu agama.

5. Aha do na dijanjihon Jahowa taringot hasusaan bolon, jala boasa?

⁵ Ndang dipaboa di Bibel sadia leleng tingkina Babel na Balga i dihancurhon. Alai taboto do, ndang leleng i masa. (Pgk. 18:10, 21) Alai songon janjina, “diorui Jahowa [do] angka ari” ni hasusaan i asa boi martahan “angka na tarpillit” dohot agama na sintong. (Mrk. 13:19, 20) Alai aha do na dipangido Jahowa laho taulahon sian dimulai hasusaan bolon sahat tu porang Armagedon?

6. Asing ni kaluar sian Babel na Balga, aha do muse na ingkon taulahon?

⁶ Songon naung taulas di minggu naung salpu, dipangido Jahowa do angka naposona asa kaluar sian Babel na Balga. Alai ndang sae holan i, ingkon tongtong do hita manomba Jahowa. Taulas ma dua cara songon dia laho mangulahon i.

7. (a) Songon dia do hita tongtong mangihuthon aturan ni Jahowa taringot pangalaho na denggan? (b) Boasa didok di Heber 10:24, 25 ingkon rap marpungu hita, jala boasa ringkot mangulahon i saonari?

 ⁷ Na parjolo, tongtong ma taihuthon aturan ni Jahowa taringot pangalaho na denggan. Ndang boi taihuthon pangalaho ni angka halak di portibi on. Umpamana, ingkon tahasogohon do angka ulaon seks na so patut, dohot ma i baoa na mangoli tu baoa, borua tu borua, dohot angka ulaon na hombar tusi. (Mat. 19:4, 5; Rom 1:26, 27) Na paduahon, ingkon tongtong do hita manomba Jahowa rap dohot angka dongan. Di Bale Harajaon, di jabu ni angka dongan, jala nang pe ingkon martabuni tongtong ma hita marpungu. Aha pe na masa, unang ma tatadingkon parpunguanta. Gariada, porlu do hita rap marpungu jala “lam marsitutu ma hita mangulahon i, ai nunga lam jonok ari i”.​—Jaha Heber 10:24, 25.

8. Aha do barita na ingkon tapasahat di ari na naeng ro?

⁸ Saleleng hasusaan bolon, laho muba do barita na tapasahat. Saonari, barita na uli taringot Harajaon do na tapasahat jala marsitutu do hita mambahen sisean. Alai di hasusaan bolon, ingkon tapasahat do barita panguhuman na dipatudos songon udan es. (Pgk. 16:21) Ra, ingkon tapasahat do barita na mandok laho hancur do portibi ni Sibolis on. Alai di tingkina, taboto ma aha do barita i jala songon dia hita pasahathon i. Laho tapangke do cara na sarupa songon naung tapangke lobi sian saratus taon di ulaon marbarita? Manang cara na asing do na laho tapangke? Ndang taboto. Manang aha pe carana, sada hak istimewa do di hita boi pasahathon barita panguhuman ni Jahowa!​—Hes. 2:3-5.

9. Aha do na laho diulahon angka bangso alani barita na tapasahat, alai aha do na boi paposhon rohanta?

⁹ Alani barita na tapasahat, gabe marsitutu do angka bangso mambahen hita asa unang be marbarita salelengna. Tingki masa i, ingkon porsea do hita tu Jahowa songon na taulahon saonari. Pos ma rohanta, dilehon Jahowa do gogo tu hita laho mangulahon lomo ni rohana.​—Mik. 3:8.

10. Songon na dipaboa di Lukas 21:25-28, songon dia pangkilalaan ni angka halak saleleng masa hasusaan bolon?

¹⁰ Jaha Lukas 21:25-28. Saleleng hasusaan bolon, tarsonggot ma angka halak ala masa na so hea tarpingkir ni nasida. Gabe “marsak situtu” ma nasida jala mabiar alana boi do gabe mate nasida di tingki i. (Sep. 1:14, 15) Di tingki i, lam susa ma parngoluon ni angka halak, dohot ma i angka naposo ni Jahowa. Ala ndang bagian sian portibi on hita, gabe taadopi do piga-piga hasusaan. Olo do ra, ndang tadapot angka na tahaporluhon.

11. (a) Boasa sude halak gabe mamparrohahon Sitindangi Ni Jahowa? (b) Boasa ndang mabiar hita saleleng hasusaan bolon?

¹¹ Di tingki i, gabe muruk ma angka halak na hea dohot tu organisasi ni agama naung dihancurhon i. Diida nasida ndang dihancurhon Sitindangi Ni Jahowa. Ra, dipatudu nasida do muruk ni roha ni nasida i di internet. Sogo do roha ni Sibolis dohot angka bangso ala holan organisasi ni Sitindangi Ni Jahowa do na tongtong adong di tano on. Marsitutu do nasida laho manghancurhon sude agama sian tano on. Alani i, gabe sude ma halak mamparrohahon hita. Tingki i, ro ma  Gog na sian tano Magog * na manggombarhon angka pamarenta. Marsada ma nasida laho menyerang naposo ni Jahowa. (Hes. 38:2, 14-16) Ra, olo do gabe holsoan hita saleleng hasusaan bolon ala ndang tangkas taboto aha na laho masa. Alai ingot ma, unang ma mabiar hita saleleng hasusaan bolon. Pos ma rohanta, sai lehonon ni Jahowa do tudu-tudu laho paluahon hita. (Ps. 34:20) Di tingki i, boi ma pos rohanta ala taboto nunga jonok haluaonta. *

12. Songon dia “naposo haposan jala na marbisuk” paradehon hita tu ari na naeng ro?

¹² Nunga diparade “naposo haposan jala na marbisuk” hita asa boi tongtong setia saleleng hasusaan bolon. (Mat. 24:45) Godang do na dibahen nasida laho mangurupi hita, umpamana, marhite acara kebaktian sian taon 2016-2018. Di acara kebaktian i, dijujui do hita asa tongtong patuduhon angka parange na boi mangurupi hita huhut paimahon ari ni Jahowa. Taulas ma angka parange i.

13. Songon dia hita boi patoguhon parale-aleonta tu Jahowa, jala boasa sian saonari i ingkon taulahon?

¹³ Setia: Tema ni acara kebaktian taon 2016, i ma “Tongtong ma Marsihohot tu Jahowa!” Di acara on dipaboa do tu hita, molo togu parale-aleonta tu Jahowa boi do hita tongtong setia tu Ibana. Dipaingot do hita asa pajonokkon diri tu Jahowa marhite ringgas martangiang dohot marsiajar Bibel. Molo taulahon i, boi ma taadopi angka ambat-ambat. Ala nunga jonok hasusaan bolon, lam godang ma ambat-ambat na mambahen hita ndang setia tu Debata dohot tu Harajaonna. Gabe direhei angka halak do hita. (2 Ptr. 3:3, 4) Tarlumobi ala tongtong do hita netral di portibi on. Alani i, sian saonari ingkon tapatogu do parale-aleonta tu Jahowa asa boi tongtong setia tingki hasusaan bolon.

14. (a) Aha do na muba sian angka donganta na mangaradoti organisasi? (b) Saleleng hasusaan bolon, boasa porlu hita setia?

¹⁴ Saleleng hasusaan bolon, adong ma na muba sian angka donganta na mangaradoti organisasi. Tingki i, sude halak Kristen na miniahan na adong dope di tano on nunga diboan tu surgo jala rap dohot Jesus laho marporang di Armagedon. (Mat. 24:31; Pgk. 2:26, 27) Lapatanna, dung dimulai hasusaan bolon, ndang rap be Punguan na Mangaradoti Organisasi dohot hita di tano on. Alai adong do angka donganta sian biru-biru na asing na togu parale-aleonna tu Debata na tongtong mangaradoti punguan bolon. Alani i, ingkon tongtong do hita setia marhite mangurupi jala mangihuthon tudu-tudu na dilehon Debata marhite nasida. Molo taulahon i, boi ma hita martahan!

15. Songon dia carana asa boi hita tongtong martahan, jala boasa ringkot i taulahon sian saonari?

¹⁵ Martahan: Tema ni acara kebaktian taon 2017, i ma “Jangan Menyerah!” Di  acara on, diurupi do hita asa boi tongtong martahan mangadopi hasusaan. Marsiajar do hita, manang aha pe situasina, boi do hita martahan molo marhaposan tu Jahowa. (Rom 12:12) Ingot ma janji ni Jesus na mandok, “Paluaonna do na manahan ro di ujungna.” (Mat. 24:13) Lapatanna, ingkon tongtong do hita setia manang aha pe hasusaan na taadopi. Molo boi hita martahan saonari, gabe lam togu ma haporseaonta andorang so dimulai hasusaan bolon.

16. Aha do na boi mambahen hita barani, jala songon dia hita boi tongtong barani sian saonari?

¹⁶ Barani: Tema ni acara kebaktian taon 2018, i ma “Barani ma Hamu!” Di acara on, dipaingot do hita, ndang alani gogonta sandiri umbahen boi hita barani. Asa boi martahan, ingkon marhaposan do hita tu Jahowa. Suang songon i ma, asa boi barani ingkon marhaposan do hita tu Jahowa. Songon dia carana? Marhite manjaha Bibel ganup ari jala mangarimangi songon dia Jahowa paluahon naposona di tingki najolo. (Ps. 68:21; 2 Ptr. 2:9) Ingkon barani do hita jala lam marhaposan tu Jahowa tarlumobi tingki ro serangan sian angka bangso saleleng hasusaan bolon. (Ps. 112:7, 8; Heb. 13:6) Molo sian saonari hita marhaposan tu Jahowa, boi ma lam barani hita tingki ro serangan sian Gog. *

17. Boasa ndang mabiar hita tu porang Armagedon? (Ida gombar sampul.)

¹⁷ Songon na taulas di parsiajaran naung salpu, godangan sian hita mangolu saleleng ari parpudi. Alai, hirim do rohanta asa boi martahan saleleng hasusaan bolon. Laho dipaujung do pamarentaon ni portibi on di porang Armagedon. Alai ndang porlu hita mabiar. Boasa? Ala Jahowa do na marporang. (Poda 1:33; Hes. 38:18-20; Sak. 14:3) Dung dilehon Jahowa parenta tu Jesus, laho ma ibana manguluhon tentarana na di surgo, i ma angka na miniahan naung dipahehe tu surgo dohot angka suru-suruan. Marporang ma nasida mangalo  Sibolis, suru-suruanna na jahat, dohot angka halak na mangalo Debata.​—Dan. 12:1; Pgk. 6:2; 17:14.

18. (a) Aha do na didok Jahowa? (b) Songon dia Pangungkapon 7:9, 13-17 boi paposhon rohanta taringot ari na naeng ro?

¹⁸ Nunga didok Jahowa, “Nasa sinjata na jinadihon mangalo ho, ndang manjadi.” (Jes. 54:17) “Punguan bolon” i ma angka naposo ni Jahowa na setia laho “malua sian hasusaan bolon”. Jala tongtong ma nasida manomba Jahowa. (Jaha Pangungkapon 7:9, 13-17.) Godang do bukti na dipaboa di Bibel na boi paposhon rohanta taringot ari na naeng ro! Taboto do, “dijaga Jahowa do angka na porsea”. (Ps. 31:24) Marlas ni roha do sude na mangkaholongi jala mamuji Jahowa ala nunga dipabadia goar ni Debata.​—Hes. 38:23.

19. Satongkin nai, aha do na laho tahilala?

¹⁹ Pingkirhon ma molo 2 Timoteus 3:2-5 paboahon taringot angka halak di tano na imbaru na malua sian pengaruh ni Sibolis. (Ida kotak “ Parange ni Angka Halak Haduan.”) Donganta si George Gangas, * na hea gabe anggota Punguan na Mangaradoti paboahon taringot i. Didok ibana, “Tontu mansai dame ma tano on tingki sude halak manomba Jahowa! Satongkin nai, dapotmuna ma hak istimewa laho mangolu di tano na imbaru. Mangolu ma hamu salelengna songon Jahowa.” Pangkirimon na mansai arga do on!