Dilehon Jahowa do gogo tu akka parbarita on. Di taon i, martamba ma godang ni kolportir manang perintis, sian 225 gabe 350. Jala di tikki i ma parjolo sahali adong lobi sian 8.000 parbarita mangalehon laporan dinas ni nasida tu kantor pusat. Sian hasil ni ulaon ni nasida i tarida ma dipasu-pasu Jahowa do nasida.

Di tanggal 21 Maret 1920, dipaboa si Joseph F. Rutherford ma judul ni jamita na naeng dipasahat ibana di sada acara. Judul ni jamitana, i ma “Marjuta Halak na Mangolu Saonari Dang Makkilala Hamatean”. Di tikki i, si Rutherford do na manguluhon ulaon ni Parsiajar Bibel. Berupaya do Parsiajar Bibel mangundang akka halak asa ro tu acara i. Disewa nasida ma gedung na balga di kota New York. Jala dibagihon nasida ma hira-hira 320.000 undangan.

Songgot do roha ni Parsiajar Bibel mangida godang ni halak na ro tu acara i. Adong lobi sian 5.000 halak di gedung i, hape 7.000 halak nai dang boi masuk ala dang siat be. Majalah The Watch Tower mandok, “On ma acara na paling sukses na hea dibahen Parsiajar Bibel.”

Ditanda do Parsiajar Bibel ala kampanye paboahon “marjuta halak na mangolu saonari dang makkilala hamatean”. Di tikki i, dang takkas diattusi nasida dope, porlu do barita Harajaon i dipasahat tu godang halak di luat na asing. Alai luar biasa do semangat ni nasida. Si Ida Olmstead, na ro tu parpunguan mulai taon 1902 mandok, “Diboto hami do adong pasu-pasu na boi dihilala godang halak. Jadi las do rohanami paboahon barita i tu akka halak.”

Asa torus adong sijahaon na patoguhon haporseaon ni akka dongan, mulai ma akka donganta na di Betel mancetak sandiri akka sijahaon. Dituhor nasida ma akka alat lao mancetak, jala dipasang ma i di gedung na disewa nasida di 35 Myrtle Avenue, Brooklyn, New York. Dang dao gedung i sian jabu ni akka donganta na karejo di Betel.

Di bulan Januari 1920, mulai ma si Leo Pelle dohot si Walter Kessler karejo di Betel. Didok si Walter ma, “Tikki baru sahat hami, didok pengawas ni percetakan i ma tu hami, holan sada satonga jom do tikkinami karejo sahat tu jam makan siang. Disuru ma hami mangangkati kardus ni akka bukku sian lantai bawah tanah.”

 Marsogotna i dipaboa si Leo ma, “Dipaias hami ma tembok ni lantai sada ni gedung i. On do karejo na ukkotor na hea huulahon. Alai las do rohakku mangulahon i, ala karejo tu Jahowa do on.”

Piga-piga minggu dukkon i, dicetak akka donganta ma majalah The Watch Tower. Dicetak ma 60.000 majalah The Watch Tower 1 Februari 1920, di lantai dua ni gedung i. Alai di lantai bawah tanah, dibahen akka donganta do tong mesin cetak na digoari Battleship. Mulai 14 April 1920, dicetak ma majalah The Golden Age. Takkas ma, dipasu-pasu Jahowa do ulaon ni akka donganta i.

Sude do akka naposo ni Jahowa menikmati ulaon ni nasida di tikki i. Las do roha ni nasida ala boi rap karejo dohot dongan sahaporseaon. Alai ala masa situasi na maol mulai sian taon 1917 sahat tu 1919, adong do piga-piga Parsiajar Bibel na manadikkon organisasi. Aha do na boi mangurupi nasida?

Majalah The Watch Tower 1 April 1920, di artikel na marjudul “Let Us Dwell in Peace” paboahon tu nasida, “Pos do rohanami molo akka halak na unduk tu Jahowa, boi do mangalupahon hasalaan na dibahen nasida, jala marsada dohot naposo ni Debata lao mangulahon lomo ni rohana.”

Godang do akka dongan na mandok mauliate dung manjaha artikel on. Sapasang suami istri paboahon, “Husadari hami ma, nungnga sala hami saleleng on. Nungnga adong lobi sian sataon dang dohot hami marbarita. Mulai sian saonari ikkon semangat do hami marbarita.” Gabe diboto akka parbarita on ma godang nai dope na ikkon diulahon nasida.

Di tanggal 21 Juni 1920, dibahen Parsiajar Bibel ma kampanye lao mambagihon edisi khusus bukku The Finished Mystery *  na digoari “ZG”. Massai godang do bukku on disippan, ala di taon 1918 diorai do bukku on dibagihon.

Sude do parbarita boi dohot tu ulaon on, dang holan kolportir manang perintis. Didok si Edmund Hooper, “Las do roha ni akka naung tardidi di huria parsidohot tu ulaon on. On ma slogan ni nasida, ‘Mambagihon bukku ZG do na uppetting di hami.’” Dipaboa si Edmund Hooper ma, tikki kampanye i godang akka donganta na parjolo sahali marbarita sian jabu tu jabu. Didok ibana muse, “Dang hurippu hami massai balga do hape ulaon marbarita on.”

Tikki masa Perang Dunia I, maol do berkomunikasi dohot akka Parsiajar Bibel na tinggal di negara na asing. Alai lomo do roha ni si Rutherford patoguhon akka donganta on, jala mangatur ulaon marbarita disi. Jadi tanggal 12 Agustus 1920, lao ma ibana dohot opat donganta bawa na asing tu Inggris, Benua Eropa, dohot tu Timur Tengah.

Dung sahat si Rutherford di Inggris, dibahen akka Parsiajar Bibel ma tolu kebaktian dohot 12 parpunguan. Adong ma hira-hira 50.000 godang ni halak na ro. Dipaboa do hasil ni kunjungan ni si Rutherford i di majalah The Watch Tower. Didok disi, “Dipatogu do roha ni akka dongan. Las do roha ni nasida ala boi marsaor jala rap karejo dohot akka dongan na asing.” Di Paris, dipasahat donganta si Rutherford do muse jamita na marjudul “Marjuta Halak na Mangolu Saonari Dang Makkilala Hamatean”. Tikki dipasahat jamita i, gok do halak na ro. Adong ma 300 halak disi na mangido gumodang hatorangan taringot jamita i.

Piga-piga minggu dukkon i lao ma nasida tu Atena, Kairo, dohot tu Jerusalem. Ala diida si Rutherford godang do akka halak na berminat disi, dibahen ibana ma inganan panippanan ni publikasi di Ramallah, di jonok ni Jerusalem. Dung i mulak ma muse ibana tu Eropa. Dibahen ibana ma kantor cabang ni Eropa Tengah, disi ma dicetak akka publikasi.

Di bulan September 1920, dirilis Parsiajar Bibel ma edisi khusus majalah The Golden Age No. 27. Di majalah i dipaboa do penganiayaan na diadopi Parsiajar Bibel saleleng taon 1918. Mesin cetak Battleship na  dipaboa nakkin mancetak lobi sian opat juta majalah on.

Dijaha akka halak ma di majalah i kasus ni donganta si Emma Martin. Sahalak perintis do donganta on di San Bernardino, California. Tanggal 17 Maret 1918, dohot ma ibana tu parpunguan ni Parsiajar Bibel dohot tolu donganta bawa na asing, i ma si E. Hamm, si E. J. Sonnenburg, dohot si E. A. Stevens.

Adong ma sahalak bawa na ro tusi, dang na naeng marsiajar Bibel. Diakkui ibana ma, “Na disuru pamaretta do au ro tu parpunguan i lao mangalului bukti.” Jala dapotna do bukti i, i ma salinan bukku The Finished Mystery. Piga-piga ari dukkon i, ditakkup ma si Emma Martin dohot tolu donganta bawa i. Ditudu do nasida melanggar hukum ala mambagihon bukku na dilarang.

Ditudu do nasida marsala jala ikkon dipenjarahon do nasida saleleng tolu taon. Nungnga adong piga-piga hali nasida naik banding lao manguba keputusan i. Alai di tanggal 17 Mei 1920, tong do dang olo pengadilan manguba keputusan i. Jadi dipenjarahon ma nasida. Alai muba ma situasi.

Tanggal 20 Juni 1920, dipaboa donganta si Rutherford ma taringot akka donganta i di kebaktian San Francisco. Songgot do roha ni akka na ro i mambege i. Setuju ma nasida mambahen pesan telegram tu presiden Amerika Serikat. Di suratna i, dipaboa nasida ma na massai kejam do dibahen pamaretta tu donganta si Martin on. Sengaja do nasida menjebak donganta i asa dipenjarahon, ala dihilala pamaretta marhak do nasida mangulahon i. 

Marsogotna i dung dikirim pesan i, pittor dicabut Presiden Woodrow Wilson ma hukuman ni donganta si Emma Martin, si Hamm, si Sonnenburg, dohot si Stevens. Jadi dipakaluar ma nasida sian penjara.

Di ujung ni taon 1920, las do roha ni Parsiajar Bibel mangingot aha na masa di taon i. Lam martamba do muse ulaon di kantor pusat. Lam semangat do Parsiajar Bibel paboahon holan Harajaon ni Debata do na boi pasaehon sude masalah ni jolma. (Mat. 24:14) Taon 1921, lam godang do na ikkon diulahon nasida lao paboahon barita Harajaon.