1. Sian dia do taboto ulaonta mambahen sisean boi paluahon ngolu ni sasahalak?

ULAONTA mambahen sisean boi do paluahon ngolu ni halak. Di Mateus 28:19, 20 dilehon Jesus do paretta, “Laho ma hamu, bahen ma saluhut halak . . . gabe siseanku, didi hamu ma nasida.” Boasa rikkot mangurupi sasahalak asa tardidi? Alana ikkon tardidi do ibana asa boi malua. Alai tikki naeng tardidi sasahalak, ikkon jolo porsea do ibana boi dapotna hangoluan salelengna ala nungnga mate Jesus jala dipahehe. I do alana didok Apostel Petrus tu halak Kristen, ‘Pandidion i do na paluahon hamu marhite haheheon ni Jesus Kristus.’ (1 Ptr. 3:21) Jadi tikki tardidi sasahalak, dapotna ma harapan lao mangolu saleleng ni lelengna.

2. Hombar tu 2 Timoteus 4:1, 2, ikkon gabe guru na songon dia do hita?

² Tikki mambahen sisean, ikkon gabe “sahalak guru na malo mangajari” do hita. (Jaha 2 Timoteus 4:1, 2.) Boasa? Alana Jesus mandok, “Laho ma hamu, bahen ma saluhut halak . . . gabe siseanku, . . . Ajari hamu ma nasida.” Didok Apostel Paulus do, “Marsitutu ma ho mangulahon i, ai molo diulahon ho i na paluahon dirim do ho dohot na manangihon ho.” Alani i didok Apostel Paulus, “Tongtong ma parrohahon dirim dohot na niajarhonmu.” (1 Tim. 4:16) Jadi asa boi taurupi halak gabe sisean, ikkon malo ma hita mangajari.

3. Aha do na lao taulas di artikel on?

³ Adong marjuta parsiajaran Bibel na diuluhon di liat portibi on. Alai songon naung taulas di artikel sebelumna, lomo do rohatta asa parsiajar Bibel i boi tardidi. Di artikel  on taulas ma lima cara na porlu diulahon sahalak guru, lao mangurupi parsiajar Bibelna asa boi tardidi.

4. Boasa sahalak guru ikkon boi mangorom dirina tikki manguluhon parsiajaran Bibel? (Ida surat na di toru.)

⁴ Ala lomo rohatta patorakkon hasittongan sian Bibel, olo do gabe terpancing hita patorakkon sude na taboto. Dang soal tikki manguluhon Joujou Paboahon, Parsiajaran Bibel di Huria, manang tikki manguluhon parsiajaran Bibel tu sasahalak, unang ma pagodangku patorakkon. Ikkon boi do sahalak guru mangorom dirina, ala ikkon denggan do ibana mamakke Bibel tikki patorakkon. Unang ma pittor dipatorang ibana sude na diboto ibana taringot ayat dohot topik na dibahas. * (Joh. 16:12) Bandingkon ma aha na diattusi hamu tikki baru tardidi dohot saonari. Tikki baru tardidi hamu, holan ajaran dasar ni Bibel do ra na diattusi hamu. (Heb. 6:1) Porlu do sappe martaon-taon asa songon saonari godang ni pangattusionmuna. Jadi unang ma dibahen hamu parsiajar Bibelmuna ikkon mamboto sude di bagasan sadari.

5. (a) Songon na didok di 1 Tessalonik 2:13, aha do na porlu diboto parsiajar Bibelta? (b) Songon dia do hita manjujui parsiajar Bibelta asa paboahon na diparsiajari ibana?

⁵ Porlu do diboto parsiajar Bibelta, sude na diparsiajarina i sian Hata ni Debata. (Jaha 1 Tessalonik 2:13.) Jadi jujui ma parsiajar Bibelmuna asa paboahon aha naung diparsiajari ibana. Unang holan hamu na patorakkon ayat ni Bibel tu parsiajar Bibelmuna, alai pangido ma asa dicoba nasida patorakkon ayat i tu hamu. Urupi ma ibana mamboto aha do pengaruh ni ayat i tu ibana. Bahen ma sukkun-sukkun asa boi taboto songon dia pakkilalaanna tikki manjaha ayat i. (Luk. 10:25-28) Uppamana sukkun ma ibana, “Aha do na diparsiajari hamu taringot parange ni Jahowa sian ayat on?” “Songon dia do ayat on boi mangurupi hamu?” “Boha do pakkilalaanmu tikki manjaha ayat on?” (Poda 20:5) Jadi na uppetting, dang sadia godang naung diboto ibana, alai sadia balga holongna tu parsiajaran i jala boha do carana mangulahon i.

6. Boasa denggan taboan donganta na marpengalaman mandongani hita tikki manguluhon parsiajaran Bibel?

⁶ Tikki manguluhon parsiajaran Bibel, hea do diboan hamu donganta naung marpengalaman? Sukkun ma songon dia pandapotna tikki dibereng ibana hita manguluhon parsiajar Bibelta. Jala  sukkun ma pandapotna songon dia hita mamakke Bibel tikki mangajari. Porlu do serep ni roha, asa lam malo hita mangajari. (Bandingkon Ulaon ni Apostel 18:24-26.) Dung i sukkun ma donganta i, menurutna boi do mangattusi parsiajar Bibelmuna i manang na dang. Jala molo naeng lao hamu lobi sian saminggu, pangido ma donganta i manggattihon hamu manguluhon parsiajaran Bibel. Molo diulahon hamu i, boi ma diboto parsiajar Bibelmuna massai rikkot do parsiajaran i jala ikkon taratur do i diulahon. Unang ma didok rohamuna ala parsiajar Bibelmuna i, holan hamu na boi mangajari ibana. Pikkirhon ma aha na dumenggan tu parsiajar Bibelmuna, asa boi ibana mambahen hamajuon.

7. Aha do na boi mambahen parsiajar Bibelmuna semangat marsiajar?

⁷ Ikkon boi do diida parsiajar Bibelmuna pos ni roha dohot semangatmuna tikki pasahatton hasittongan na sian Bibel. (1 Tes. 1:5) Tikki diida parsiajar Bibelmuna hamu semangat, gabe dohot ma ibana semangat marsiajar. Paboa hamu ma tu ibana songon dia do prinsip ni Bibel mangurupi hamu. Molo diulahon hamu i, gabe diida parsiajar Bibelmuna ma songon dia prinsip ni Bibel boi mangurupi ibana.

8. Aha do muse na ikkon diulahon hamu lao mangurupi parsiajar Bibelmuna, jala boasa porlu diulahon hamu i?

⁸ Tikki marsiajar Bibel, paboa ma pengalaman ni akka donganta naung marhasil mangadopi tantangan na sarupa songon na diadopi parsiajar Bibelmuna. Boi do ditogihon hamu sahalak donganta di huria na sarupa pengalamanna tu pengalaman ni parsiajar Bibelmuna i. Manang boi do diida hamu akka pengalaman na menarik di jw.org, di bagian “Bibel Mambahen Denggan Ngolukku”. * Artikel dohot video i, boi mangurupi parsiajar Bibelmuna mamboto songon dia cara mangulahon prinsip ni Bibel.

9. Songon dia do hamu manjujui parsiajar Bibelmuna asa paboahon na diparsiajari ibana tu keluarga dohot tu donganna?

⁹ Molo naung berkeluarga do parsiajar Bibelmuna, dohot do pasanganna i marsiajar? Molo dang dope, togihon ma asa rap nasida marsiajar. Jujui ma parsiajar Bibelmuna asa paboahon aha na diparsiajari  ibana tu keluarga dohot tu akka donganna. (Joh. 1:40-45) Boha carana? Boi ma disukkun hamu, “Songon dia ma caramu patorakkon hasittongan on tu keluargamuna?” Manang, “Ayat dia ma na lao jahaonmu lao patorakkon on tu donganmuna?” Molo diulahon hamu on, na mangalatik parsiajar Bibelmuna do hamu gabe sahalak guru. Molo nga rade ibana, boi ma ibana mulai marbarita rap dohot akka dongan di huria. Boi do disukkun hamu ibana atik adong halak na ditanda ibana na olo marsiajar Bibel. Molo adong, pittor hubungi hamu ma halak na olo marsiajar i jala togihon ma ibana asa olo marsiajar Bibel. Patudu ma tu ibana video Songon dia do Parsiajaran Bibel na Diulahon Hami? *

10. Songon na disurat di 1 Tessalonik 2:7, 8, songon dia do hita boi maniru si Paulus?

¹⁰ Ikkon parduli do sahalak guru tu parsiajar Bibelna. Anggap ma nasida songon dongan sahaporseaonmuna. (Jaha 1 Tessalonik 2:7, 8.) Taboto do pasti dang mura di nasida maninggalhon donganna hian, jala mambahen hamubaon asa boi manomba Jahowa. Jadi taurupi ma nasida asa boi mandapot dongan di huria. Alai hita pe ikkon gabe ale-alena. Unang ma holan tikki marsiajar Bibel talehon tikkinta tu ibana. Molo tatelepon, taSMS jala takunjungi ibana, i patuduhon na parduli do hita tu ibana.

11. Boasa porlu taurupi parsiajar Bibelta asa mananda akka dongan di huria?

¹¹ Adong do hata di Afrika na mandok, “Porlu do upaya ni sahuta lao pagodang-godangkon sada dakdanak.” Suang songon i ma, porIu do upaya ni sahuria mambahen sasahalak gabe sisean. I do alana porlu do taurupi parsiajar Bibelta mananda akka dongan di huria. Molo nga marsaor ibana tu akka dongan di huria, boi ma akka dongan mangurupi parsiajar Bibelta i lam jonok tu Jahowa, jala patoguhon ibana tikki adong masalah. Dung lomo rohana marsaor dohot akka dongan di huria, taronjar ma rohana gabe bagian sian huria i. Ujungna gabe lam mura ma ibana pasohon parale-aleonna tu akka halak na so sisomba Jahowa. (Poda 13:20) Molo dang olo be akka donganna hian marsaor dohot ibana, boi ma dapotna dongan na burju di organisasi ni Jahowa.​—Mrk. 10:29, 30; 1 Ptr. 4:4.

12. Boasa ikkon jotjot tapaboa tu parsiajar Bibelta rikkot ni mangalehon diri jala tardidi?

¹² Jotjot ma paboa tu parsiajar Bibelmuna rikkot ni mangalehon diri tu Jahowa jala tardidi. Alana tujuanta marsiajar dohot ibana, i ma asa mangurupi ibana tardidi jala gabe sisomba Jahowa. Jadi dung piga-piga bulan ibana marsiajar jala ro tu parpunguan, diattusi ibana ma tujuanna marsiajar, i ma asa boi gabe sahalak Sitindangi Ni Jahowa.

13. Aha do na porlu diulahon parsiajar Bibel asa boi tardidi?

¹³ Adong do piga-piga na ikkon diulahon parsiajar Bibel asa boi tardidi. Na parjolo ikkon ditanda, dihaholongi, jala ikkon porsea do ibana tu Jahowa. (Joh. 3:16; 17:3) Dung i marale-ale ma ibana tu Jahowa, dohot tu akka dongan di huria. (Heb. 10:24, 25; Jak. 4:8) Lam leleng dang diulahon ibana be akka ulaon na sala, jala dibahen ibana hamubaon. (Ul. 3:19) Dipaboa ibana do muse tu akka halak aha na dihaporseai ibana. (2 Kor. 4:13) Dung i dilehon ibana ma dirina tu Jahowa jala tardidi. (1 Ptr. 3:21; 4:2) Pasti las situtu do rohatta di tikki i! Jadi tikki dibahen parsiajar Bibelta hamajuon asa boi tardidi, denggan ma tapuji jala tajujui ibana asa torus mangulahon i.

14. Sian dia do taboto na dibahen parsiajar Bibelta do hamajuon?

¹⁴ Porlu do hita sabar mangurupi parsiajar Bibelta asa boi mangalehon diri jala tardidi. Alai porlu do tong taboto na olo do ibana manomba Jahowa manang na dang. Dibahen ibana do upaya lao mangihutton paretta ni Jesus? Manang na holan marsiajar Bibel sambing do ibana?

15. Sian dia do taboto nga rade be parsiajar Bibelta tardidi?

¹⁵ Porlu do torus taida hamajuon na dibahen parsiajar Bibelta. Misalna, dipaboa ibana do songon dia pakkilalaanna tu Jahowa? Martangiang do ibana tu Jahowa? (Ps. 116:1, 2) Lomo do rohana manjaha Bibel? (Ps. 119:97) Taratur do ibana ro tu parpunguan? (Ps. 22:23) Dibahen ibana do hamubaon di ngoluna? (Ps. 119:112) Dipaboa ibana do aha na diparsiajarina tu keluarga dohot tu akka donganna? (Ps. 9:2) Jala na uppetting, olo do ibana gabe sahalak Sitindangi Ni Jahowa? (Ps. 40:9) Molo dang dibahen parsiajar  Bibelmuna hamajuon sisongon i, porlu do diboto hamu alasanna, jala terus terang ma hamu makkatai tu ibana taringot i. *

16. Aha do na patuduhon molo parsiajaran Bibel i dang porlu be dilanjutton?

¹⁶ Torus ma taparrohahon, denggan do talanjutton parsiajaran Bibel i manang na dang. Sukkun ma dirimuna, ‘Dibahen parsiajar Bibelhu do persiapan tikki naeng marsiajar? Olo do ibana ro tu parpunguan? Tong dope ibana mangulahon na sala? Tong dope ibana margabung tu agama palsu?’ Molo torus hamu mangajari ibana alai dang olo ibana mambahen hamajuon, sarupa ma i songon mangajari sasahalak asa boi marlange alai dang olo ibana maraek. Molo dang dibahen ibana hamubaon jala dang diargai ibana aha na diparsiajarina i, dang porlu be dilanjutton hamu parsiajaran i.

17. Songon na disurat di 1 Timoteus 4:16, aha do na porlu diulahon sude na manguluhon parsiajaran Bibel?

¹⁷ Massai rikkot do tanggung jawabta mambahen sisean, jala mangurupi parsiajar Bibelta asa boi tardidi. Jadi pakke ma Bibel tikki mangajari. Patudu ma pos ni roha jala semangat tikki mangajari. Jujui ma parsiajar Bibelta asa marale-ale dohot akka dongan di huria. Torus ma tapaboa tu ibana rikkot ni mangalehon diri jala tardidi. Torus ma taparrohahon, mambahen hamajuon do ibana manang na dang. (Ida kotak “ Aha do na Porlu Diulahon Sahalak Guru Asa Boi Parsiajar Bibelna Tardidi”.) Las do rohatta ala boi parsidohot tu ulaon na boi paluahon ngolu ni halak! Taulahon ma nasa tolapta asa boi parsiajar Bibelta tardidi.