1, 2. (a) Angka aha do ”silehonlehonna, na so tarhatahon”? (b) Sungkunsungkun aha do na laho taulas di parsiajaran on?

SILEHONLEHON na arga sian Jahowa tu hita i ma disuru anakNa ro tu tano on. (Joh. 3:16; 1 Joh. 4:9, 10) Apostel Paulus mandok silehonlehon on ”silehonlehonna, na so tarhatahon”. (2 Kor. 9:15) Boasa dipangke apostel Paulus hata on?

² Diboto apostel Paulus, holan marhite tobusan ni Jesus do saut sude bagabaga ni Debata. (Jaha 2 Korint 1:20.) Silehonlehon na so tarhatahon sian Debata, i ma tobusan ni Jesus dohot sude na denggan na dilehon Debata tu hita. Ndang tarpajojor hita sude lapatan ni silehonlehon na arga na sian Debata. Alani i, songon dia do pangkilalaanta tu silehonlehon na arga on? Jala, songon dia do on mangonjar rohanta asa mangarade tu ari Parningotan hamamate ni Jesus di ari Rabu 23 Maret 2016?

3, 4. (a) Songon dia do pangkilalaanta molo adong na mangalehon silehonlehon tu hita? (b) Songon dia silehonlehon na arga on boi mambahen ngolunta marhamubaon?

³ Las do rohanta molo adong na mangalehon silehonlehon tu hita. Alai, adong do silehonlehon na ummarga di hita. Umpamana, autsura hita diuhum mate ala parsidohot mangulahon hajahaton. Alai na so panagaman, adong sasahalak na olo diuhum mate laho manggantihon hita. Songon dia do pangkilalaanta tu silehonlehon na arga on?

⁴ Silehonlehon na arga dohot holong na dipatuduhon tu hita, mangurupi mamingkiri aha na laho taulahon di parngoluonta. Tontu, on boi paubahon hita gabe halak na burju, mangkaholongi halak na asing jala manalpuhon hasalaan ni dongan na marsala tu hita. Saleleng hita mangolu, taronjar ma rohanta patuduhon hamauliateon alani tobusan na dilehon humongkop hita.

5. Boasa tobusan silehonlehon ni Jahowa na ummarga sian silehonlehon na asing?

⁵ Tobusan ma silehonlehon ni Jahowa na ummarga sian silehonlehon na asing. (1 Ptr. 3:18) Pingkirhon ma on: Dung mardosa si Adam sude hita manean dosa dohot hamatean. (Rom 5:12) Alani holong ni Jahowa tu jolma, disuru Jesus ro tu tano on jala mate ”humongkop saluhut”. (Heb. 2:9) Alai, adong dope muse laba na tadapot sian tobusan ni Jesus, i ma ndang adong be hamatean. (Jes. 25:7, 8; 1 Kor. 15:22, 26) Sude na marhaporseaon tu Jesus, na mangkirim mangolu di surgo gabe Raja dohot na mangkirim mangolu di tano on boi mangkilala hadameon dohot hasonangan salelengna. (Rom 6:23; Pgk. 5:9, 10) Aha dope pasupasu na asing sian silehonlehon ni Jahowa?

6. (a) Pasupasu aha do na laho lehonon ni Jahowa tu hita di ari na naeng ro? (b) Paboa ma tolu na ingkon taulahon na mambahen taronjar rohanta alani silehonlehon ni Debata.

⁶ Pasupasu sian silehonlehon ni Debata muse, i ma mangolu di paradeiso, ndang adong be sahit jala na mate paheheonNa. (Jes. 33:24; 35:5, 6; Joh. 5:28, 29) Tahaholongi ma Jahowa dohot anakNa ala dilehon tu hita ”silehonlehonna na so tarhatahon”. Alani silehonlehon on, aha ma na ingkon taulahon? Taronjar ma rohanta (1) laho maniru Jesus, (2) laho mangkaholongi sude dongan jala (3) laho manalpuhon sude hasalaan ni dongan sian ias ni roha.

7, 8. Ala dihaholongi Jesus hita, taronjar ma rohanta laho mangulahon aha?

⁷ Na parjolo, tapangke ma ngolunta laho mangihuthon jala pasangaphon Jesus. Apostel Paulus mandok, ”Ditiop holong ni roha ni Kristus do hami.” (Jaha 2 Korint 5:14, 15.) Diboto apostel Paulus do, molo tajangkon holong ni roha ni Jesus, on boi mangonjar rohanta laho mangkaholongi jala pasangaphon ibana. Dung taboto aha naung binahen ni Jahowa tu hita, taronjar ma rohanta laho mangihuthon Jesus na patuduhon hita pasangaphon ibana. Songon dia hita mangulahon i?

⁸ Holongta tu Jahowa mangonjar rohanta laho mangihuthon sitiruon sian Jesus. (1 Ptr. 2:21; 1 Joh. 2:6) Tapatuduhon ma holongta tu Debata dohot Jesus marhite pangoloionta tu nasida. Jesus mandok, ”Manang ise na maniop angka patikki jala diradoti, i do na holong roha  di Ahu. Alai dihaholongi Damang i do na holong roha di Ahu; Ahu pe, holong do rohangku di ibana jala papataronku ma Ahu tu ibana.”​—Joh. 14:21; 1 Joh. 5:3.

9. Elaela aha do na jotjot taadopi?

⁹ Saleleng ari Parningotan hamamate ni Jesus, denggan ma tarimangrimangi aha sibahenonta di ngolunta. Tasungkun ma dirinta: Di ulaon na dia do ahu rade mangihuthon Jesus? Ulaon na dia do di ngolungku na porlu hupadenggan? Ringkot do sungkunsungkun on tasungkun tu dirinta. Boasa? Alana lomo do roha ni portibi on asa taihuthon ulaon ni nasida. (Rom 12:2) Molo ndang manat hita, boi do gabe tarelaela laho mangihuthon hata sipaotooto sian habisuhon ni jolma, bintang film, dohot bintang olahraga. (Kol. 2:8; 1 Joh. 2:15-17) Songon dia do asa unang tarelaela hita?

10. Aha do na boi tasungkun tu dirinta saleleng ari Parningotan on, jala aha ma na porlu taulahon? (Ida gombar di mula ni parsiajaran.)

¹⁰ Di ari Parningotan on ma muse tingki na denggan di hita laho mangarimangi taringot pahean, film, musik, jala aha na taida di komputer, handphone, manang tablet. Tasungkun ma dirinta: Maila do ahu molo diida Jesus aha na hupangke? (Jaha 1 Timoteus 2:9, 10.) Sian paheanku, tanda do ahu sahalak siihuthon Jesus? Lomo do roha ni Jesus mangida film na hutonton? Olo do ibana manangihon musik na hubege? Maila do ahu molo diida Jesus aha na adong di handphone manang di tablethu? Boi do alusanku molo disungkun Jesus boasa lomo rohangku mangida video game on? Holongta tu Jahowa mangonjar roha laho mambolongkon sude na so patut tu halak Kristen, ndang soal sadia arga ni i. (Ul. 19:19, 20) Tingki talehon dirinta laho mangulahon lomo ni roha ni Jahowa, nunga marjanji hita laho pasangaphon Jesus. Alani i, unang ma taulahon manang aha pe na mambahen maol hita mangihuthon Jesus.​—Mat. 5:29, 30; Plp. 4:8.

11. (a) Songon dia do holong tu Jahowa dohot Jesus mangonjar rohanta laho marbarita? (b) Songon dia do holong mangonjar rohanta laho mangurupi donganta di huria?

¹¹ Holongta tu Jesus mangonjar rohanta asa marlas ni roha laho marbarita na uli. (Mat. 28:19, 20; Luk. 4:43) Saleleng ari Parningotan on, boi do aturonmuna tingkimuna asa dohot merintis ekstra, 30 manang 50 jam? Adong sahalak donganta baoa na mabalu marumur 84 taon mandok, ndang na boi be ibana dohot merintis ala naung matua jala marsahit. Alai, las roha ni angka perintis di ingananna mangurupi ibana. Rade do nasida mangalap jala manaruhon donganta on tu inganan marbarita. Ujungna, boi ma donganta on marbarita saleleng 30 jam di bulan i. Adong do na boi urupanmu asa merintis ekstra di bulan Maret dohot April di huriamu? Tutu do, ndang sude boi merintis, alai boi do tapangke gumodang tingkinta dohot gogo laho marhobas tu Jahowa. Molo taulahon songon on, hita maniru si Paulus. Tapatudu ma na taronjar do rohanta alani holong ni Jesus. Alani holong ni Debata, aha dope muse na porlu taulahon?

12. Holong ni Debata mangonjar rohanta mangulahon aha?

¹² Na paduahon, holong ni Debata mangonjar rohanta mangkaholongi dongan. Apostel Johannes manurat, ”Hamu angka haholongan, masihaholongan ma hita, ai sian Debata do haholongon  i.” (1 Joh. 4:7-11) Alani i, molo tajangkon do holong ni Debata, ingkon tahaholongi do sude donganta. (1 Joh. 3:16) Songon dia do hita patuduhon holong tu nasida?

13. Sitiruon aha do na dilehon Jesus laho mangkaholongi dongan?

¹³ Dipatudu Jesus do sitiruon tu hita songon dia mangkaholongi sude donganta. Tingki di tano on, diurupi ibana do angka jolma, tarlumobi angka na serep marroha. Dipamalum ibana na marsahit, na pangpang, na mapitung, na nengel, dohot na ngungu. (Mat. 11:4, 5) Ndang songon pemimpin ni agama di tingki i, las do roha ni Jesus mangajari halak taringot Debata. (Joh. 7:49) Dihaholongi ibana do sude halak na serep marroha jala marsitutu mangurupi nasida.​—Mat. 20:28.

14. Aha do na boi ulahononmu patuduhon holong tu angka dongan?

¹⁴ Tingki na denggan do muse di hita di ari Parningotan on laho mamingkiri aha na boi taulahon laho mangurupi angka donganta di huria, tarlumobi angka naung matua. Olo do hamu manjumpangi angka donganta naung matua? Olo do hamu mamboan sipanganon, mangurupi nasida paiashon jabuna, mamboan nasida tu parpunguan manang mandongani nasida rap marbarita na uli? (Jaha Lukas 14:12-14.) Anggiat ma holong ni Debata mangonjar rohanta patuduhon holong tu angka dongan!

15. Aha do na ringkot taboto?

¹⁵ Na patoluhon, holong ni Jahowa mangonjar rohanta laho manalpuhon hasalaan ni angka dongan. Sude hita nunga manean dosa dohot hamatean sian si Adam. Alani i, ndang adong na boi mandok, ”Ndang huhaporluhon tobusan.” Angka naposo ni Debata na marsihohot pe tongtong do mangkaporluhon tobusan. Sude hita nunga dipalua sian utang na balga! Boasa ringkot taboto i? Tadapot ma alusna sian tudostudos na pinaboa ni Jesus.

16, 17. (a) Aha do na taparsiajari sian tudostudos ni Jesus taringot raja dohot naposona? (b) Dung tarimangi tudostudos ni Jesus on, taronjar ma rohanta mangulahon aha?

¹⁶ Dipaboa Jesus sada tudostudos taringot sahalak raja na manesa utang ni naposona, godangna 60.000.000 dinar.  Alai dungkon i, ndang olo naposona on manesa utang ni donganna, na holan 100 dinar. Ingkon taronjar do nian roha ni naposona on ala naung dipatudu raja i asi ni roha tu ibana. Gabe tarrimas ma raja i tingki dibege naposona i ndang olo manesa utang ni donganna. Didok ma, ”Ho naposo na jahat, sude utangmi husalesehon, ala dielehelek ho ahu. Nda ingkon songon i ma ho nian marasi ni roha di donganmu naposo, songon ahu na marasi ni roha di ho!” (Mat. 18:23-35) Songon raja i, nunga disesa Jahowa utangta. Ala naung dipatuduhon Jahowa do holong dohot asi ni rohaNa tu hita, aha do na ingkon taulahon?

¹⁷ Huhut taparade rohanta tu ari Parningotan hamamate ni Jesus, tasungkun ma dirinta: Hea do hansit rohangku dibahen dongan sahaporseaon? Maol do ahu manalpuhon hasalaanna i? Molo i do na masa tu hita, on ma tingki na denggan di hita laho maniru Jahowa na rade ”marpamuati”. (Neh. 9:17; Ps. 86:5) Molo taargai do asi ni roha ni Jahowa, ingkon tapatuduhon do asi ni roha tu angka dongan jala rade ma hita manalpuhon hasalaan ni nasida sian roha. Molo ndang tahaholongi jala ndang tasalpuhon hasalaan ni donganta, ndang tagamon haholongan ni Jahowa hita jala sesaonNa dosanta. (Mat. 6:14, 15) Molo tasalpuhon do hasalaan ni donganta, on mangurupi hita asa boi marlas ni roha.

18. Songon dia do holong ni Debata mangurupi sahalak donganta borua tingki mangadopi hagaleon ni dongan na asing?

¹⁸ Olo do maol dijalo rohanta hagaleon ni angka donganta. (Jaha Epesus 4:32; Kolosse 3:13, 14.) Adong ma sahalak donganta borua na margoar si Lili. ^[1] Diurupi ibana do sahalak donganta borua na mabalu na margoar si Karol. Umpamana, ditaruhon ibana do si Karol manang tudia pe ibana naeng laho, diurupi do belanja, jala godang na diulahon ibana mangurupi si Karol. Nang pe naung godang diulahon si Lili on, jotjot dope si Karol on marungutungut. Tontu, molo dung songon i ndang mura be mangalehon pangurupion. Alai, sai na denggan do na diingot si Lili sian si Karol, jala diurupi do ibana saleleng pigapiga taon sahat tu na posi sahitna jala mate. Nang pe maol di si Lili mangurupi si Karol, didok ibana do, ”Masihol do ahu laho pajumpang tu ibana di ari haheheon. Naeng do ahu muse laho mananda ibana dung dipahehe jala gabe halak na tipak (sempurna).” Tutu ma, ala taboto dihaholongi Debata do hita, taronjar ma rohanta asa mardame dohot dongan sahaporseaon jala mangkirim do hita ndang adong be na so tipak.

19. Songon dia do ”silehonlehonna, na so tarhatahon” sian Debata mangonjar rohanta?

¹⁹ Tutu, dilehon Jahowa do tu hita ”silehonlehonna, na so tarhatahon.” Anggiat ma sai taargai silehonlehon ni Debata on! Di ari Parningotan on ma tingki na denggan laho mangarimangi sude na diulahon ni Jahowa dohot Jesus tu hita. Holong ni roha ni nasida ma na mangonjar rohanta mangihuthon Jesus laho patuduhon holong ni roha tu donganta jala manalpuhon hasalaan ni angka dongan sian roha.