1, 2. (a) Boasa ndang mura di natuatua mangajari ianakhonna marhaporseaon tu Jahowa, jala songon dia do angka natuatua boi mangulahon on? (b) Aha do opat cara na laho taulas?

NATUATUA di Prancis mandok, ”Nang pe porsea hami tu Jahowa, alai ndang pintor porsea ianakhonnami tu Jahowa. Haporseaon ndang warisan sian natuatua. Alani i, sabar ma natuatua mangajari ianakhonna.” Donganta di Australia manurat, ”Ndang mura mangurupi ianakhon asa marhaporseaon. Ra, nunga dibahen hamu na dumenggan laho mangalusi sungkunsungkun ni nasida. Alai, olo do disungkun muse sungkunsungkun na sarupa! Alus na dilehon hamu saonari, ndang sae laho mangurupi nasida dung magodang.” Dung magodang ianakhon, ingkon tangkas do patorangon ni natuatua muse tu ibana taringot tu sungkunsungkunna. Porlu do diantusi natuatua marragam cara mangurupi ianakhonna asa mangkaholongi Jahowa.

² Molo hamu sahalak natuatua, hea do dipingkirhon hamu cara mangajari ianakhonmuna asa mangkaholongi  Jahowa, jala tongtong manomba Ibana nang pe nunga magodang? Tutu, ndang boi holan sahalakta mangulahon on. (Jer. 10:23) Pangido ma pangurupion ni Jahowa. LehononNa do tudutudu. Songon dia do hamu mangurupi ianakhonmuna? (1) Tanda ma nasida. (2) Ajarhon ma na diparsiajari hamu taringot Jahowa. (3) Bahen ma tudosan. (4) Pangido ma tondi parbadia jala sabar maradophon nasida.

3. Songon dia do natuatua maniru cara ni Jesus tingki mangajari siseanna?

³ Jotjot do Jesus manungkun siseanna taringot tu na dihaporseai nasida. (Mat. 16:13-15) Tiru ma cara ni Jesus. Tingki mangkatai manang rap karejo hamu dohot ianakhonmu, sungkun ma aha do na dipingkiri nasida jala denggan ma tangihon. Ganggu do roha ni nasida saleleng on? Sahalak donganta di Australia na marumur 15 taon mandok, ”Jotjot disungkun bapakku taringot haporseaonku. Didok bapak, ’Aha do na nidok ni Bibel?’ ’Porsea do ho tu isi ni Bibel?’ ’Boasa dihaporseai ho i?’ Lomo rohana hulehon alus mamangke hatangku sandiri, jala ndang holan maniru hata ni bapak dohot omak. Dung lam magodang, ingkon mambahen alus na dumenggan do ahu.”

4. Boasa ringkot sabar jala mangalusi sungkunsungkun ni ianakhon? Lehon ma tudosan.

⁴ Molo ndang pintor porsea ianakhonmu tu ajaran ni Bibel, sabar ma hamu. Urupi ma nasida mandapot alus ni sungkunsungkunna. Sahalak ama mandok, ”Nang pe loja, godang ulaon, denggan ma tangihon jala parrohahon ma sungkunsungkun ni ianakhonmuna.” Sasintongna, denggan do molo olo ianakhonmuna manungkun, on patuduhon lomo do rohanasida laho mamboto. Tingki remaja, Jesus pe jotjot do manungkun. (Jaha Lukas 2:46.) Sahalak na poso di Denmark mandok, ”Tingki hudok ndang pos rohangku tu agamanami, lambok do natuatuangku mangalusi, nang pe sasintongna marsak nasida mangida ahu. Dialusi nasida do sungkunsungkunku marhite Bibel.”

5. Nang pe songon na togu haporseaon ni ianakhon tu Jahowa, aha do na ingkon diulahon natuatua?

⁵ Tanda ma ianakhonmuna. Nang pe ianakhonmu dohot marpungu jala marbarita, unang ma dirimpu hamu naung togu haporseaon ni nasida tu Jahowa. Songon dia do pangkilalaan ni nasida taringot tu Jahowa dohot tu Bibel? Molo adong na mambahen nasida maol porsea tu Jahowa, lului ma aha alana. Ganup ari, paboa ma taringot tu Jahowa tingki rap hamu mangulahon sada ulaon dohot ianakhonmuna. Tangiangkon ma nasida manang sadihari pe.

6. Tingki natuatua marsiajar taringot tu Jahowa dohot Bibel, songon dia do on mangurupi nasida mangajari ianakhonna?

⁶ Ala dihaholongi Jesus do Jahowa jala tangkas diboto isi ni Bibel, lomo ma roha ni halak manangihon Jesus. Dihaholongi ibana do nasida, gabe lomo roha ni nasida manangihon Jesus. (Luk. 24:32; Joh. 7:46) Molo diida ianakhonmuna dihaholongi hamu Jahowa, on mangurupi nasida mangkaholongi Jahowa. (Jaha 5 Musa 6:5-8; Lukas 6:45.) Alani i, tongtong ma marsiajar Bibel jala ringgas ma manjaha publikasinta. Parsiajari ma taringot tu angka tompaan ni Jahowa. (Mat. 6:26, 28) Lam godang na diantusi hamu taringot Jahowa, boi ma ajarhononmuna i tu ianakhonmu.​—Luk. 6:40.

7, 8. Tingki marsiajar hamu taringot tu Jahowa, aha do na boi diulahon hamu? Songon dia do angka natuatua mangulahon on?

⁷ Tingki marsiajar hamu taringot Jahowa, paboa ma i tu ianakhonmuna. Ulahon ma on ganup tingki, unang holan tingki paradehon parpunguan manang tingki panombaon na sasaripe. On ma na diulahon sada natuatua di Amerika Serikat. Tingki diida nasida tompaan ni Debata, manang tingki rap mangan, dipaboa nasida do tu ianakhonna taringot Jahowa. Didok nasida, ”Dipaingot hami do ianakhonnami taringot holong dohot pangkirimon na dilehon Jahowa tu hita.” Sada natuatua di Afrika Selatan, jotjot paboahon taringot tompaan tu dua boruna tingki rap karejo nasida di taman. Umpamana, olo do ra dipaboa nasida songon dia sada bibit boi gabe suansuanan. Nasida mandok, ”Diurupi hami do borunami asa lam mangargai hangoluan.”

⁸ Sahalak ama di Australia mamboan anakna na marumur sampulu taon tu museum. Lomo do rohana mangurupi ianakhonna asa marhaporseaon jala mandapot bukti na patuduhon Jahowa do Sipanompa. Didok ibana, ”Diida hami ma patung binatang laut na so adong be saonari, na didok ammonit dohot trilobit. Longang do rohanami mangida denggan dohot bagak ni binatang laut i, dos songon na boi taida saonari. Molo tutu do makhluk hidup na sederhana boi muba gabe makhluk hidup na rancanganna lengkap jala maol antusan, boasa rancangan ni binatang laut on nunga lengkap jala maol antusan? Parsiajaran on mambahen longang rohangku jala hupaboa do on tu anakku.”

9. Boasa denggan mambahen tudosan? Aha do tudosan na dibahen sahalak ina?

⁹ Jotjot do dibahen Jesus tudosan. Diajarhon do angka na ringkot marhite sada cerita manang mambahen tudosan. (Mat. 13:34, 35) Molo dibahen hamu tudosan, na mangurupi ianakhonmuna do hamu asa marpingkir. On  mangurupi nasida mamingkirhon, mangantusi, jala mangingot na niajarhonmuna. Gabe las ma rohanasida marsiajar. Umpamana, sahalak ina di Jepang mangurupi ianakhonna asa mangantusi cara ni Jahowa mambahen alogo di tano on, na patuduhon holongNa tu hita. Sada anakna marumur ualu taon, jala sada nai marumur sampulu taon. Dibahen ma tudosan na mura diantusi nasida. Dilehon ma susu, gula, dohot kopi tu nasida. Dung i, disuru ma nasida mambahen kopi di ibana. Ibana mandok, ”Manat do nasida mambahen kopi i. Tingki husungkun boasa dibahen nasida songon i, didok nasida asa lomo rohangku manginum kopi i. Hudok ma tu nasida, songon i ma cara ni Debata mambahen alogo. Disampur Debata do marragam gas di alogo jala manat do i dibahen asa denggan tu jolma.” Las do rohanasida mamparsiajari on jala ndang hea lupa nasida!

10, 11. (a) Aha do tudosan na boi dipangke hamu laho patuduhon tu ianakhonmuna na adong Panompa? (Ida gombar di mula ni parsiajaran.) (b) Aha do tudosan na hea dipangke hamu?

¹⁰ Aha do tudosan na boi dibahen hamu laho patuduhon tu ianakhonmuna adong Sipanompa? Rap ma hamu mambahen roti mamangke resep. Patorang ma tu ibana boasa porlu mangihuthon resep i. Lehon ma tu nasida apel manang buah na asing, jala sungkun ma, ”Diboto ho do adong resep laho mambahen apel on?” Bola dua ma apel i, jala lehon tu ibana batuna. Patorang ma molo batuna i dos songon resep. Di bagasan batuna i, adong do hatorangan songon dia laho mambahen apel. Alai, ummaol do antusan hatorangan na adong di batuna i sian resep laho mambahen kue. Dok ma, ”Molo adong do na mambahen resep ni kue, ise ma na mambahen resep ni apel?” Molo nunga magodang nasida, paboa ma molo hatorangan laho mambahen bona ni apel dohot godang apel adong di DNA di bagasan batuna. Patudu ma gombar dohot tudosan di halaman 10 sahat tu 20 sian brosur Asal Mula Kehidupan—Lima Pertanyaan yang Patut Direnungkan.

¹¹ Godang do natuatua raphon ianakhonna manjaha artikel ”Apakah Ini Dirancang?” di Sadarlah! Molo metmet dope ianakhonmuna, pangke ma cara na mura diantusi. Umpamana, sada natuatua di Denmark patudoshon kapal terbang tu pidong. Didok nasida,  ”Suman do kapal terbang tu pidong. Alai, boi do kapal terbang martolor jala mamorpori? Dihaporluhon pidong do bandara tingki naeng songgop? Songon dia do ho mambandingkon soara ni kapal terbang dohot soara ni pidong na marende? Ise do na ummalo, na mambahen kapal terbang manang na mambahen pidong?” Tingki mangkatahatai jala dibahen hamu sungkunsungkun tu ianakhon, hamu nunga mangurupi nasida marpangantusion jala patoguhon haporseaonna tu Jahowa.​—Poda 2:10-12.

12. Songon dia do bahenonmu asa diantusi ianakhonmuna na sintong do isi ni Bibel?

¹² Pangke ma tudosan mangajari ianakhonmuna asa diboto sintong do isi ni Bibel. Umpamana, jahahon ma Job 26:7. (Jaha.) Unang ma holan paboahon molo hatorangan di ayat i sian Jahowa. Urupi ma ibana marpingkir. Dok ma, di tingki ni si Job ndang adong na porsea molo tano on digantungkon di na so ada. Diboto nasida, ingkon adong do ojahan ni benda songon bola manang batu. Di tingki i, ndang adong dope bukti na patuduhon tano on digantungkon di na so ada, ala ndang adong dope teleskop manang pesawat luar angkasa. Parsiajaranna, nang pe Bibel i nunga leleng disurat, alai sintong do isina ala sian Jahowa.​—Neh. 9:6.

13, 14. Songon dia do natuatua mangajari ianakhonna asa mangihuthon poda sian Bibel?

¹³ Ringkot do muse mangajari ianakhonmuna asa diboto martua do nasida molo mangihuthon poda sian Bibel. (Jaha Psalmen 1:1-3.) Umpamana, suru ma ibana mambayangkon molo maringanan di sada pulo. Ingkon ditogihon nasida do angka halak disi asa rap dohot nasida. Dung i sungkun ma, ”Angka halak na songon dia do na ditogihon hamu asa boi dame sude?” Jahahon ma Galatia 5:19-23 asa diboto ibana halak na songon dia na boi mangolu di tano na imbaru.

¹⁴ Marhite cara on, adong dua parsiajaran na ringkot na diajarhon hamu. Na parjolo, diajari Jahowa do hita asa martua ngolunta saonari jala mardame tu sude halak. Na paduahon, diajari do hita asa boi mangolu di tano na imbaru. (Jes. 54:13; Joh. 17:3) Paboa ma tu ianakhonmuna songon dia poda ni Bibel mangurupi donganta. Umpamana, lului ma kisah hidup di publikasinta, songon artikel ”Bibel Mambahen Denggan Ngolungku” di Joujou Paboahon. Manang, sungkun ma sasahalak di huria asa dipaboa tu hamu dohot ianakhonmuna songon dia poda ni Bibel mambahen ibana mangulahon lomo ni roha ni Jahowa.​—Heb. 4:12.

15. Aha do na mangurupi hamu mangajari ianakhonmuna?

¹⁵ Pingkirhon ma cara asa lomo roha ni ianakhonmuna tu na niajarhonmuna. Pingkirhon ma cara laho mangurupi nasida marsiajar taringot Jahowa jala lam solhot tu Ibana. Ulahon ma on sahat tu na magodang nasida. Sahalak ama mandok, ”Unang marnaloja hamu mangajari ianakhonmu jala pangke ma cara na asing.”

16. Tingki mangajari ianakhon, boasa ringkot hasabaron? Songon dia do angka natuatua patuduhon hasabaron?

¹⁶ Marhite pangurupion sian tondi parbadia, boi ma togu haporseaon ni ianakhonmuna. (Gal. 5:22, 23) Alai, porlu do tingki asa boi togu haporseaon ni nasida. Alani i, sabar ma hamu jala tongtong ma mangajari nasida. Sahalak ama di Jepang mandok, ”Sai diparrohahon hami do ianakhonnami. Tingki dakdanak nasida, marsiajar do hami saleleng 15 minut ganup ari tingki ndang adong parpunguan. Las do rohanami mangulahon i.” Sahalak pengawas wilayah manurat, ”Tingki remaja, godang do sungkunsungkunku na mambahen ganggu rohangku. Alai, taralusi do sungkunsungkun i di parpunguan, panombaon na sasaripe, manang tingki marsiajar Bibel sahalakku. Alani i, mansai ringkot do natuatua tongtong mangajari ianakhonna.”

17. Boasa ringkot natuatua patoguhon haporseaon ni nasida? Songon dia do sada natuatua di Bermuda mangurupi boruna marhaporseaon tu Jahowa?

¹⁷ Tontu, molo marhaporseaon na togu hamu tu Jahowa, dapot ni ianakhonmuna ma parsiajaran sian i. Diparrohahon nasida do na diulahon hamu. Alani i, tongtong ma patogu haporseaon asa diboto nasida na porsea situtu do hamu tu Jahowa. Umpamana, tingki holsoan sada natuatua di Bermuda, martangiang do nasida tu Jahowa raphon boru ni nasida. Dijujui nasida do ianakhonna asa martangiang. Didok nasida, ”Dipaboa hami do tu borunami siangkangan, ’Marhaposan ma tu Jahowa, ringgas marbarita, jala unang paholsohu.’ Dung sae masalah i, diboto ibana ma na diurupi Jahowa do hami. On mambahen pos rohana tu Debata dohot tu Bibel.”

18. Aha do na ingkon diingot angka natuatua?

¹⁸ Ingot ma, ndang boi paksaonmuna ianakhonmu asa marhaporseaon tu Jahowa. Hamu do na manuan dohot maniram, alai Jahowa do na patubuhon. (1 Kor. 3:6) Marsitutu ma mangajari ianakhonmuna taringot tu Jahowa, jala pangido ma tondi parbadia mangurupi nasida marhaporseaon. Pos ma rohamu, pasupasuon ni Jahowa do sude na niulahonmuna.​—Eps. 6:4.