1, 2. Boasa adong aturan na denggan di Sitindangi Ni Jahowa taringot marpangkean? (Ida gombar di mula ni parsiajaran.)

SADA koran sian Belanda paboahon songon dia pemimpin ni gareja marpangkean tingki ro tu gareja. Didok, ”Jotjot do dipangke nasida angka pangkean na hurang tama idaon, tarlumobi tingki mohop ari.” Alai, didok muse di koran i, Sitindangi Ni Jahowa ndang songon i marpangkean tingki kebaktian. Didok di koran i, angka baoa mamangke jas dohot dasi, angka borua pe ndang mamangke rok na papendekhu jala ndang hatinggalan zaman. Jotjot do Sitindangi Ni Jahowa dipuji alani caranasida marpangkean. Didok apostel Paulus, pangkean ni halak Kristen ingkon patuduhon ”hahormaton dohot toruk ni roha”, na patut tu naposo ni Debata. (1 Tim. 2:9, 10) Nang pe hata ni si Paulus on tu borua, alai marlangku do on tu angka baoa.

² Ala Sitindangi Ni Jahowa do hita, mansai ringkot do marpangkean na denggan, alana ringkot do i  di adopan ni Debata. (1 Mus. 3:21) Tangkas do dipaboa di Bibel, dilehon Jahowa do aturan tu angka naposoNa taringot marpangkean. Alani i, aha na tapangke ndang holan laho pasonangkon rohanta, alai na rumingkot, laho mambahen las roha ni Jahowa.

3. Aha do na taparsiajari sian Patik ni si Musa taringot marpangkean?

³ Di Patik ni si Musa, adong do aturan na mangalinggomi bangso Israel sian angka na rorang na diulahon angka bangso di humaliang ni nasida. Dipaboa di Patik i, ndang lomo roha ni Jahowa mangida pangkean na so paimbarhon baoa dohot borua. Saonari, pangkean sisongon i didok pangkean na mambahen hita maol mananda na dia baoa, na dia borua. (Jaha 5 Musa 22:5.) Sian Patik i, taboto ma ndang lomo roha ni Jahowa mangida pangkean na mambahen baoa songon borua, manang mambahen borua songon baoa.

4. Aha do na mangurupi halak Kristen mamillit na denggan taringot marpangkean?

⁴ Prinsip sian Bibel mangurupi hita mamillit na denggan taringot marpangkean. Prinsip on marlangku tu hita ndang soal didia hita maringanan. Ndang tahaporluhon daftar na ganjang taringot pangkean na boi dipangke dohot na so boi dipangke. Taihuthon ma prinsip sian Bibel na paloashon hita mamillit na laho tapangke. Taulas ma pigapiga prinsip sian Bibel na mangurupi hita ”manimbangi lomo ni roha ni Debata, i ma na uli, na hinalashonna dohot na sun denggan” tingki mamillit na laho dipangke.​—Rom 12:1, 2.

5, 6. Aha do pangkorhonna molo caranta marpangkean hombar tu prinsip ni Bibel?

⁵ Dilehon Debata do tondi parbadia tu si Paulus laho manurat prinsip na ringkot di 2 Korint 6:4. (Jaha.) Sian caranta marpangkean, boi do diboto halak taringot dirinta. (1 Sam. 16:7) Ala naposo ni Debata hita, ndang tapangke angka pangkean holan alani lomo ni rohanta manang ala tabo dipangke. Tingki mangulahon prinsip ni Bibel, unang ma tapangke pangkean na paketathu jala ndang suman idaon. Tingki adong na mangida pangkeanta, unang ma gabe ganggu panggora ni rohana jala ndang tabo pangkilalaanna alani hita.

⁶ Molo rapi, ias, jala denggan  caranta marpangkean, lam diargai halak ma hita gabe Sitindangi Ni Jahowa. Jala olo do ra gabe lomo roha ni nasida mamboto taringot Debata, patuduhon pangargaion tu organisasinta, jala rade manangihon barita na tapasahat.

7, 8. Tingki sadihari do hita marpangkean na tama idaon?

⁷ Sian pangkeanta, ingkon tapatudu do tu Jahowa, tu dongan sahaporseaon, dohot tu halak di ingananta, na tapasangap do Jahowa dohot barita na tapasahat. (Rom 13:8-10) Mansai ringkot do mamingkiri caranta marpangkean tingki marpungu manang marbarita. Ingkon tapangke do pangkean na patut tu halak na manomba Debata. (1 Tim. 2:10) Tontu, di pigapiga inganan, ndang sai sarupa taringot cara marpangkean na denggan. Alani i, ndang soal didia hita maringanan, unang ma gabe sogo roha ni halak mangida caranta marpangkean.

⁸ Jaha 1 Korint 10:31. Tingki laho hita tu kebaktian, ingkon denggan do pangkeanta jala tama idaon.  Unang ma tatiru cara marpangkean ni halak di portibi on. Andorang so kebaktian manang dung kebaktian, jala tingki marborngin di hotel, unang ma tapangke pangkean na hurang tama idaon. Molo denggan caranta marpangkean, las ma rohanta patandahon tu halak molo hita Sitindangi Ni Jahowa, jala rade hita marbarita di tingki sadihari pe.

9, 10. Songon dia do Pilippi 2:4 mangkorhon tu caranta marpangkean?

⁹ Jaha Pilippi 2:4. Boasa ingkon tapingkirhon taringot pangkorhon ni pangkeanta tu dongan sahaporseaon? Alana, marsitutu do naposo ni Debata mangihuthon poda on, ”Antong, bunu hamu ma ruasmuna, angka na di tano on: parmainanon, hahodaron, riting ni roha, hisaphisap na roa.” (Kol. 3:2, 5) Pigapiga donganta nunga pasidingkon hasomalan na rorang, alai tongtong do nasida marsitutu mangalo giotgiot na sala. Molo ndang manat hita, caranta marpangkean boi mambahen nasida maol mangihuthon poda sian Bibel dohot mangalo giotgiot na sala. (1 Kor. 6:9, 10) Olo do hita mambahen nasida maol manundalhon giotgiot na sala?

¹⁰ Tingki rap hita dohot dongan sahaporseaon, tarlinggomi do hita sian pangkorhon ni harorangon. Alani i, di parpunguan manang tingki sadihari pe, ingkon tama do idaon pangkeanta. Nang pe dipaloas hita mamillit na laho tapangke, martanggung jawab do hita mamangke pangkean na mangurupi angka halak asa tongtong badia di pamingkirion, pangkataion, dohot parniulaon. (1 Ptr. 1:15, 16) ”Maradat situtu do haholongon i, ndang na ahut.”​—1 Kor. 13:4, 5.

11, 12. Songon dia do Parjamita 3:1, 17 mangurupi hita marbisuk mamillit pangkean?

¹¹ Tingki mamillit aha na laho tapangke, taboto martingki do sude ulaon. (Pjm. 3:1, 17) Mangkorhon do cuaca dohot situasi na marasingasing tingki mamillit na laho tapangke. Alai, ndang hea muba aturan ni Jahowa taringot marpangkean.​—Mal. 3:6.

¹² Di inganan na mohop, maol do mamillit pangkean na tama idaon. Las do roha ni angka donganta tingki tapangke pangkean na so paketathu manang hurang tabo idaon. (Job 31:1) Jala, tingki di pantai manang di kolam renang, pangkean renang na tapangke ingkon tongtong do tama idaon. (Poda 11:2, 20) Saonari, nang pe godang halak mamangke pangkean renang na hurang tama idaon,  ingkon pasangaphon Debata Jahowa ma caranta marpangkean.

13. Boasa poda di 1 Korint 10:32, 33 porlu taingot tingki mamillit pangkean?

¹³ Adong do muse prinsip na ringkot na mangkorhon tu hita tingki mamillit pangkean. Ingkon manat do hita asa unang ganggu panggora ni roha ni halak. (Jaha 1 Korint 10:32, 33.) Martanggung jawab do hita asa unang mamangke pangkean na mambahen ganggu panggora ni roha ni donganta sahaporseaon dohot halak na asing. Didok si Paulus, ”Ganup ma hita mambahen halomoan ni roha ni dongan, laho padengganhon jala pauliulihon.” Didok muse, ”Ai nang Kristus pe, ndang dihasiani dirina.” (Rom 15:2, 3) Songon Jesus, rumingkotan do di hita laho mangulahon lomo ni roha ni Debata dohot mangurupi na asing. Unang ma mangkaringkothon diri sandiri. Alani i, unang ma tapangke pangkean na mambahen halak ndang olo manangihon barita na tapasahat.

14. Songon dia do natuatua mangalatik ianakhonna pasangaphon Debata marhite cara marpangkean?

¹⁴ Martanggung jawab do natuatua mangajari ianakhonna mangihuthon prinsip ni Bibel. Nasida dohot ianakhonna ingkon mambahen las roha ni Debata marhite cara ni nasida marpangkean. (Poda 22:6; 27:11) Songon dia do natuatua mangalatik ianakhonna patuduhon pangargaion tu Debata dohot tu patikNa? Ingkon dilehon natuatua do sitiruon na denggan tu ianakhonna jala diajari mamillit pangkean na tama idaon. Angka ianakhon unang ma mamillit pangkean holan alani lomo ni rohana sandiri. Alai na rumingkot, ingkon dipillit nasida ma pangkean na pasangaphon Jahowa.

15. Aha do na mangurupi hita asa marbisuk mamillit na denggan?

¹⁵ Di Bibel, adong do tudutudu na mangurupi hita asa marbisuk mamillit na denggan. Aha na tapangke patuduhon ise hita. Ra, asing do gaya dohot pangkean na tapangke sian halak na asing. Alai, pangkeanta ingkon tongtong rapi, ias, jala tama diida angka halak.

16. Boasa ringkot marsitutu asa denggan caranta marpangkean?

¹⁶ Ndang mura mangalului pangkean na tama idaon. Godang do toko holan manggadis pangkean na godang dipangke halak saonari. Alani i, porlu do tingki jala ingkon marsitutu do mangalului rok, baju, kemeja, jas, dohot celana panjang na so paketathu. Las do roha ni angka donganta mamparrohahon hita tongtong marpangkean na denggan jala tama idaon. Mansai las do rohanta ala nunga mamangke pangkean na parohon sangap tu Debata.

17. Aha do na ingkon dipingkirhon sasahalak molo naeng marjanggut manang na ndang?

¹⁷ Denggan do molo donganta baoa marjanggut? Di Patik ni si Musa, ingkon marjanggut do angka baoa. Alai,  halak Kristen ndang be mangihuthon Patik ni si Musa. (3 Mus. 19:27; 21:5; Gal. 3:24, 25) Di pigapiga hasomalan, boi do baoa marjanggut asal ma rapi, jala on ndang mambahen halak marsogo ni roha tu barita na tapasahat. Sasintongna, adong do angka sintua dohot parhobas na marjanggut. Nang pe songon i, adong do donganta baoa na so olo marjanggut. (1 Kor. 8:9, 13; 10:32) Di inganan na asing, ndang boi baoa marjanggut jala ndang tama idaon molo sahalak parbarita na uli marjanggut. Di inganan sisongon i, gabe ”sisurahan” do sahalak baoa molo marjanggut.​—1 Tim. 3:2, 7; Rom 15:1-3.

18, 19. Songon dia do Mika 6:8 mangurupi hita?

¹⁸ Las do rohanta ala ndang dilehon Jahowa tu hita daftar na ganjang taringot pangkean na boi dohot na so boi dipangke. Dipaloas do hita mamillit hombar tu prinsip ni Bibel. Alani i, tingki mamillit pangkean na laho tapangke, tapatudu ma na olo hita marpangalaho na denggan di adopan ni Debata.​—Mik. 6:8.

¹⁹ Taboto, badia do Jahowa jala patikNa mambahen lam denggan ngolunta. Asa boi hita marserep ni roha, ingkon taulahon do patikNa. Serep ni roha mangurupi hita patuduhon pangargaion tu pangkilalaan dohot pandapot ni halak na asing.

20. Aha do pangkorhon ni pangkeanta tu halak na asing?

²⁰ Pangkeanta ingkon tangkas patuduhon molo hita Sitindangi Ni Jahowa. Mansai denggan do patik ni Jahowa jala las rohanta mangihuthon i. Dipuji do angka donganta sahaporseaon alani pangkean dohot parniulaon ni nasida. On mambahen halak na serep marroha manjalo barita na uli, jala parohon sangap dohot las ni roha tu Jahowa. Tingki mamillit pangkean, ingkon tongtong do hita pasangaphon Debata Jahowa na ”marpangkean hasangapon dohot hamuliaon”.​—Ps. 104:1, 2.