1, 2. (a) Aha do na masa molo ndang mangorom diri sasahalak? (b) Boasa ringkot taulas taringot mangorom diri?

BOI do Jahowa mangurupi hita asa mangorom diri. (Gal. 5:22, 23) Tongtong do Jahowa boi mangorom diri. Alai ala jolma na mardosa do hita, ndang sai boi taorom dirinta. Godang do parsoalan na boi masa tu sasahalak molo ndang mangorom diri. Gabe sundat ma ibana mangulahon na ringkot manang gabe ndang ringgas be di parkarejoan manang di singkola. Gabe mangaleai donganna ma ibana, mabuk, mangulahon na jahat, marsirang, marutang, hatagian narkoba, masuk penjara, stres, marsahit ala mangulahon seks na so patut, jala mardenggan pamatang di na so dihalomohon.​—Ps. 34:12-15.

² Molo ndang mangorom diri sasahalak, boi do i parohon jea tu dirina manang tu donganna. Saonari on, godang do halak na so mangorom diri. Ndang longang rohanta disi. Alana nunga disurirangkon di Bibel na laho masa do i di ”angka tingki parpudi”.​—2 Tim. 3:1-3.

3. Boasa ingkon taorom dirinta?

 ³ Boasa ingkon taorom dirinta? Adong dua alana. Na parjolo, ala godang do labana. Halak na boi mangorom diri, ummotik do parsoalanna, mura mardongan tu na asing, jala mura pasidingkon rimas dohot holso ni roha. Na paduahon, asa boi tongtong maraleale tu Debata ingkon boi do taorom giotgiot na sala jala tatundalhon elaela. On ma na so diulahon si Adam dohot si Hawa. (1 Mus. 3:6) Songon nasida, godang do parsoalan ni halak na so boi mangorom diri.

4. Aha do na boi patoguhon roha ni halak na marsitutu mangorom diri?

⁴ Diboto Jahowa do hita jolma na mardosa jala maol do hita mangorom diri. Alai lomo do rohaNa mangurupi hita asa boi mangorom diri sian giotgiot na sala. (1 Raj. 8:46-50) Songon Aleale na parholong, sabar do Jahowa patoguhon halak na marsitutu mangorom diri. Di artikel on, taulas ma songon dia Jahowa gabe sitiruon laho mangorom diri. Jala taulas ma taringot angka halak na mangorom diri dohot na so mangorom diri na disurat di Bibel. Jala taida ma songon dia on boi mangurupi hita.

5, 6. Songon dia do Jahowa gabe sitiruon tu hita tingki mangorom diri?

⁵ Tongtong do Jahowa boi mangorom diriNa ala sun denggan do Ibana. (5 Mus. 32:4) Alai molo hita, jolma na mardosa do. Alani i, asa boi lam denggan tatiru Jahowa, taulas ma songon dia Ibana mangorom diriNa. On boi mangurupi hita tongtong marpangalaho na denggan nang pe adong na mambahen jut rohanta. Songon dia do Jahowa mangorom diri?

⁶ Rimangi ma songon dia pangkilalaan ni Jahowa tingki dialo Sibolis Ibana di porlak Eden. Ra, olo do tarsonggot manang muruk surusuruan ni Debata na marsihohot alani hata ni Sibolis. Ra, songon i do pangkilalaanta tingki tarimangi angka hasusaan na binahen ni Sibolis. Alai ndang songon i Jahowa, sintong do dibahen alusNa tu Sibolis. Lambat tarrimas do Jahowa jala tigor do Ibana maradophon Sibolis. (2 Mus. 34:6; Job 2:2-6) Sian dia taboto? Dilehon Jahowa do tingki, asa unang adong na mate. Ai lomo do rohaNa asa ”saluhutna [halak] sahat tu hamubaon ni roha”.​—2 Ptr. 3:9.

7. Aha do na boi tatiru sian Jahowa?

⁷ Sian cara ni Jahowa, taboto ma ingkon manat do tapingkiri aha na laho tahatahon manang taulahon. Alani i, manat ma pingkiri andorang so tabahen haputusan na ringkot. Pangido ma bisuk sian Debata asa boi mangkatahon manang mangulahon na sintong. (Ps. 141:3) Maol do hita mangorom diri tingki muruk manang jut rohanta.  I do alana, godang do halak na manolsoli hata dohot pambahenanna.​—Poda 14:29; 15:28; 19:2.

8. (a) Didia do tadapot sitiruon na denggan laho mangorom diri? (b) Aha do na mangurupi si Josep asa unang tarelaela? (Ida gombar di mula ni parsiajaran.)

⁸ Ise do sitiruon na disurat di Bibel taringot mangorom diri? Ra, diingot hamu do si Josep anak ni si Jakkob. Ndang tarelaela ibana tingki tading di jabu ni si Potifar, komandan pengawal ni si Firaun. Lomo do roha ni tungganeboru ni si Potifar tu ibana. Ala ’uli do rupa dohot bohi ni si Josep’. Jotjot do dielaela ibana. Aha do na mangurupi si Josep asa unang tarelaela? Ra, ala bagas do dirimangi ibana aha na masa molo olo ibana dielaela. Alani i, tingki ditarik tungganeboru ni si Potifar bajuna, pintor lari do ibana. Didok si Josep ma, ”Tung olo ma ahu mambahen jea na sai godang, asa mardosa ahu maradophon Debata?”​—1 Mus. 39:6, 9; jaha Poda 1:10.

9. Aha do na boi tarimangi asa manundalhon elaela?

⁹ Aha do na boi taparsiajari sian si Josep? Molo adong na mangelaela hita laho mangalaosi patik ni Debata, tundalhon ma i. Ra andorang so gabe Sitindangi Ni Jahowa adong do pigapiga sian hita na sipapangan mago manang hisap di sipanganon, parmabuk, parisap, marnarkoba, mangulahon seks na so patut, manang na asing. Nang pe naung tardidi, olo do sipata hita dielaela asa mangulahon sisongon i. Ingot ma, boi do gabe sega paralealeonta tu Jahowa molo olo hita dielaela. Rimangi ma di situasi songon dia do hamu boi tarelaela jala songon dia do hamu boi pasidingkon i. (Ps. 26:4, 5; Poda 22:3) Tingki masa sisongon i, pangido ma bisuk sian Jahowa asa boi hamu mangorom diri.

10, 11. (a) Aha do na masa tu angka na poso di singkola? (b) Aha do na boi mangurupi angka donganta na poso manundalhon elaela?

¹⁰ Godang do angka donganta na poso mangadopi elaela songon na masa tu si Josep. Umpamana, songon si Kim. Jotjot do dongan sakalasna mangkatahatai taringot na mangulahon seks. Alai ndang olo si Kim dohot disi. Ibana mandok, sipata olo do gabe lungun rohana ala asing sian angka donganna. Jala olo do didok donganna na oto do ibana ala ndang olo marhamlet. Alai sasintongna, na marbisuk do si Kim disi. Diboto ibana do na maol pasidingkon elaela laho mangulahon seks di haposoon. (2 Tim. 2:22) Jotjot do donganna manungkun, atik na hea do ibana mangulahon seks manang na ndang. Gabe dalan do on di ibana laho  patorangkon boasa ndang olo ibana mangulahon i. Las do rohanami tu hamu angka na poso, ala marsitutu do hamu manundalhon elaela. Jala las do roha ni Jahowa mangida hamu!

¹¹ Dipaboa do di Bibel angka halak na tarelaela mangulahon seks na so patut. Jala dipaboa do muse aha na masa tu halak na so mangorom diri. Molo dihilala hamu do songon na masa tu si Kim, pingkirhon ma taringot sahalak baoa na oto na disurat di Buku Poda bindu 7. Ingot ma muse si Amnon dohot na masa tu ibana alani pangalahona. (2 Sam. 13:1, 2, 10-15, 28-32) Ulas ma angka tudosan on di panombaon na sasaripe laho mangurupi ianakhonmuna asa mangorom diri jala marbisuk.

12. (a) Songon dia do si Josep mangorom diri tingki pajumpang dohot angka hahana? (b) Di tingki sisongon dia do hita ingkon mangorom diri?

¹² Dipatudu si Josep do muse sitiruon na denggan taringot na mangorom diri. Tingki i ro ma angka hahana tu Misir laho manuhor sipanganon. Asa mamboto naung muba do angka hahana i manang ndang, ndang dipaboa si Josep ise do dirina. Alai tingki ndang tartaon be sihol ni rohana, ditadingkon ibana ma angka hahana i jala tangis ma sahalakna. (1 Mus. 43:29, 30; 45:1) Tingki adong donganta na mambahen jut rohanta, tatiru ma si Josep na mangorom diri. Boi ma tapasiding hatanta manang pambahenanta na tasolsoli di pudian ni ari. (Poda 16:32; 17:27) Manang, adong do ra keluargamuna na dipabali sian huria. Taorom ma dirinta asa unang mamangkulingi ibana molo so porlu. Olo do sipata maol mangulahon on. Alai, ingot ma na maniru Jahowa jala na mangulahon parentaNa do hita molo taulahon on.

13. Aha do na boi taparsiajari sian si Daud?

¹³ Taida ma muse sitiruon sian Raja Daud. Hea do jut rohana dibahen si Saul dohot si Simei. Alai ndang tarrimas ibana jala ndang dipangke ibana huasona laho mangulahon na sala. (1 Sam. 26:9-11; 2 Sam. 16:5-10) Alai, hea do ibana ndang mangorom diri, i ma tingki mangalangkup dohot si Batseba. Jala tarrimas do ibana alani si Nabal. (1 Sam. 25:10-13; 2 Sam. 11:2-4) Aha do na boi taparsiajari sian si Daud? Na parjolo, ringkot do hita mangorom diri, tarlumobi di angka sintua. Unang ma ala adong tanggung jawabta, gabe lomo lomonta tu dongan na asing. Na paduahon, ingkon sai manat do hita asa unang tarelaela.​—1 Kor. 10:12.

14. Paboa ma pengalaman ni sahalak donganta, jala boasa hita ringkot mangorom diri?

¹⁴ Aha do na boi taulahon asa tongtong mangorom diri? Parrohahon na masa tu si Luigi. Adong na mangalanggar mobilna sian pudi. Nang pe na mangalanggar  i do na sala, alai gabe dimuruki jala naeng ditopar do si Luigi. Martangiang ma si Luigi asa boi tenang jala paposhon roha ni supir i. Alai sai murukmuruk dope supir i. Disurat si Luigi ma nomor asuransi ni supir i jala laho ma ibana ala sai muruk dope supir i. Di minggu na mangihut, laho ma si Luigi marbarita laho manjumpangi muse sahalak borua. Tungganedoli ni borua i do hape supir i! Maila ma tungganedolina i jala mangaku sala do ibana. Ditelepon ibana ma perusahaan asuransi mobil ni si Luigi asa hatop dipature mobilna i. Ujungna, marsiajar Bibel ma supir i. Aha ma na masa aut sugari muruk si Luigi di tingki i? Gabe diantusi ibana ma ringkot ni mangorom diri.​—Jaha 2 Korint 6:3, 4.

15, 16. Songon dia do marsiajar Bibel mangurupi hamu dohot keluargamuna mangorom diri?

¹⁵ Taratur jala denggan marsiajar Bibel boi mangurupi halak Kristen asa mangorom diri. Ingot ma na nidok ni Debata tu si Josua, ”Unang meret  buku ni patikon sian pamanganmu, sai pingkirpingkiri ma i arian dohot borngin, asa diradoti ho, jala dipatupa ho, hombar tu sude na tarsurat di bagasan i, asa maruntung ho di angka dalanmu, jala marmulia parulaonmu.” (Jos. 1:8) Alai songon dia do marsiajar Bibel mangurupi hamu asa boi mangorom diri?

¹⁶ Nunga taparsiajari sian Bibel taringot aha do laba ni mangorom diri jala aha do na masa molo ndang taorom dirinta. I do alana boasa disuru Jahowa disurat angka sitiruon i. (Rom 15:4) Denggan do molo tajaha, taparsiajari, jala tarimangi taringot nasida. Rimangi ma songon dia do hamu dohot keluargamuna boi maniru nasida. Pangido ma pangurupion ni Jahowa asa boi hamu mangulahon poda na sian Bibel. Tingki dihilala rohamuna maol mangorom diri, martangiang ma hamu jala marsitutu ma asa boi mangulahon i. (Jak. 1:5) Lului ma angka poda na boi mangurupi hamu di publikasinta.

17. Songon dia do natuatua boi mangurupi ianakhonna mangorom diri?

¹⁷ Songon dia do natuatua mangurupi ianakhonna mangorom diri? Diboto angka natuatua do ndang diboan tubu parange mangorom diri. Alani i, asa boi denggan pangalaho ni ianakhonna ingkon gabe sitiruon do angka natuatua. (Eps. 6:4) Molo diida hamu ianakhonmuna hurang mangorom diri, sungkun ma di rohamuna, ”Sitiruon na denggan do ahu tu ianakhonku?” Boi do hamu gabe sitiruon na denggan molo taratur marbarita na uli, marpungu, dohot manguluhon panombaon na sasaripe. Unang pola mabiar pasingothon ianakhonmuna! Dibahen Jahowa do aturan tu si Adam dohot tu si Hawa. On mangurupi nasida asa mangargai pamarentaon ni Jahowa. Suang songon i ma, tingki dipasingot natuatua ianakhonna jala gabe sitiruon na denggan, on boi mangurupi ianakhonna asa mangorom diri. Mansai ringkot do natuatua mangajari ianakhonna asa biar mida Jahowa jala unduk tu uhumNa.​—Jaha Poda 1:5, 7, 8.

18. Boasa ingkon marbisuk hita mamillit donganta?

¹⁸ Asing ni i, ingkon marbisuk do hita mamillit ise na gabe donganta. Molo tapillit dongan na mangkaholongi Jahowa, dijujui ma hita asa marcita-cita di ulaon partondion jala pasidingkon jea. (Poda 13:20) Alani sitiruon ni nasida, taronjar ma rohanta maniru nasida mangorom diri. Jala denggan ni pangalahonta pe boi do mangonjar roha ni na asing mangulahon na sarupa. Molo taorom dirinta, las ma roha ni Jahowa, las ma rohanta, jala las ma roha ni angka dongan.