1. Songon dia do Jahowa paboahon taringot diriNa tu si Musa, jala boasa i ringkot?

HEA do si Musa manungkun tu Jahowa, na urupan ni Jahowa do ibana manang na ndang. Dipaboa Jahowa ma tu ibana taringot goar dohot parangeNa. Dipaboa Jahowa do jumolo taringot asi ni rohaNa, sian bisuk manang huasoNa. (Jaha 2 Musa 34:5-7.) On boi paposhon roha ni si Musa, na urupan ni Jahowa do naposoNa. (2 Mus. 33:13) Songon dia molo hita saonari? Urupan ni Jahowa do hita? Di artikel on taulas ma taringot parange asi ni roha, i ma sapangkilalaan dohot halak na marsitaonon jala olo mangurupi nasida.

2, 3. (a) Boasa sude jolma boi patuduhon asi ni roha? (b) Boasa ingkon taparsiajari na nidok ni Bibel taringot asi ni roha?

² Debata parasiroha do Jahowa. Jala ditompa ibana do jolma suman tu Ibana. Alani i, sude do jolma boi patuduhon asi ni roha. Nang pe ndang mananda Jahowa, jotjot do halak patuduhon asi ni roha. (1 Mus. 1:27) Godang do dipaboa di Bibel taringot halak na  patuduhon asi ni roha. Umpamana, ro ma dua borua na marbadai alani posoposo tu si Salomo. Laho mamboto ise do ina ni posoposo i na sasintongna, didok si Salomo ma asa dibola dua posoposo i. Alani asi ni roha ni ina ni posoposo i, didok ma asa unang pola dibola dua posoposo i. Jala dilehon ma i tu borua na sada nai. (1 Raj. 3:23-27) Asing ni i muse, i ma boru ni si Firaun. Jumpangna ma si Musa tingki posoposo, gabe ”asi ma rohana”. Dibahen ma si Musa gabe anakna nang pe diboto ibana halak Heber do posoposo i jala ingkon dibunu.​—2 Mus. 2:5, 6.

³ Boasa ingkon taparsiajari taringot asi ni roha? Ala dipangido Jahowa do asa tatiru Ibana. (Eps. 5:1) Alai nang pe ditompa suman tu Debata, ndang sai mura patuduhon asi ni roha, ala jolma na mardosa do hita. Jotjot do hita mangkaringkothon diri jala maol mangurupi na asing. Jadi songon dia do hita asa manarihon na asing? Na parjolo, taulas ma songon dia Jahowa dohot naposoNa na patuduhon asi ni roha. Na paduahon, taulas ma songon dia hita maniru Debata na patuduhon asi ni roha, jala taulas ma aha do labana molo taulahon i?

4. (a) Boasa disuru Jahowa surusuruanNa tu Sodom? (b) Aha do na boi taparsiajari sian pengalaman ni si Lot?

⁴ Di Bibel godang do dipaboa taringot songon dia Jahowa marasi ni roha. Umpamana, songon na masa tu si Lot. Mansai jahat do pangalaho ni halak Sodom dohot Gumora. Ala halak na tigor do si Lot marsak do rohana mangida i. Didok Debata ma na laho ripashononNa huta i. (2 Ptr. 2:7, 8) Alani i, disuru Debata ma surusuruanNa paboahon tu si Lot asa lari manadingkon huta i. Bibel mandok, ”Lambat do si Lot. Alai asi do roha ni Jahowa di ibana; jadi ditogu surusuruan i ma tanganna, dohot tangan ni niolina dohot boruna sidua halak i, manadingkon huta i.” (1 Mus. 19:16, Bibel siganup ari) Tangkas ma diantusi Jahowa do aha na masa tu si Lot. Alani i, pos ma rohanta diboto Jahowa do aha na masa tu hita.​—Jes. 63:7-9; Jak. 5:11; 2 Ptr. 2:9.

5. Songon dia do Hata ni Debata mangajari hita asa marasi ni roha?

⁵ Diajari Jahowa do muse naposoNa asa marasi ni roha. Sian dia do i taboto? Dibahen do uhum tu halak Israel najolo, na mangurupi nasida asa marasi ni roha. Umpamana, diloas do sahalak parutangan mambuat ulos ni na marutang gabe borot. (Jaha 2 Musa 22:26, 27.) Alai andorang so bot mataniari ingkon dipaulak do ulos i, asa unang ngalingalian  na marutang i di tingki modom. Aha do na boi taparsiajari sian uhum on? Tongtong ma patudu asi ni roha. Tingki adong donganta sahaporseaon na marsitaonon, pintor rade ma hita mangurupi nasida.​—Kol. 3:12; Jak. 2:15, 16; jaha 1 Johannes 3:17.

6. Aha do na boi taparsiajari sian cara ni Jahowa na marasi ni roha tu halak Israel?

⁶ Nang pe sai mangalo halak Israel, tongtong do Jahowa marasi ni roha. Songon na tarsurat, ”Angkup ni i tibu hian jala jotjot disuru Jahowa, Debata ni ompunasida i palumba nasida marhite sian angka suruanna, ai dipalambas do rohana mangolani bangsona dohot joro ingananna i.” (2 Kron. 36:15) Suang songon i ma hita saonari. Boi do tapaboa taringot asi ni roha ni Debata tu halak na so mananda Jahowa dope. Olo do ra nasida muba jala maraleale tu Ibana. Alana ndang lomo rohana ni Jahowa mangaripashon manang ise pe. (2 Ptr. 3:9) Alani i, tabahen ma nasa gogonta mangurupi sude halak, asa boi mandapot asi ni roha ni Debata. Tabaritahon ma i andorang so ro dope ari rimas ni Debata.

7, 8. Songon dia do Jahowa marasi ni roha tu sada keluarga?

⁷ Saonari godang do naposo ni Debata na marasi ni roha. Umpamana songon na masa di Bosnia taon 1990an. Jotjot do halak di tingki i marbadai jala masibunuan ala marasing suku. Di sada tingki, adong ma sada keluarga na naeng laho tu kebaktian di Serbia. Diboan nasida do dua anakna. Sada sian i, digoari si Milan, umurna 12 taon. Laho tardidi do natuatua ni si Milan di kebaktian i. Marbus ma nasida dohot angka dongan Sitindangi. Hape dung sahat di perbatasan, disuru tentara ma keluarga ni si Milan turun sian bus i, ala asing sukuna. Alai molo donganta na asing diloas do laho. Dung dua ari keluarga i di perbatasan, disungkun tentara i ma tu komandanna, na laho hahuaon do nasida. Didok komandan i ma, ”Papulik jala tembak ma nasida!”

⁸ Tingki mangkatai dope tentara i, ro ma dua halak na so ditanda manjumpangi keluarga ni si Milan. Marhusip ma nasida mandok na Sitindangi Ni Jahowa do nasida. Nunga dipaboa angka dongan na di bus i na masa tu keluarga ni si Milan. Dung i disuru ma si Milan dohot anggina asa masuk tu mobil na di bariba ni perbatasan i. Alana ndang na laho paresoon ni tentara i suratsurat ni dakdanak. Dung i disuru ma natuatua ni si Milan asa masuk tu mobil i, sian pudi ni pos perbatasan i. Mabiar do nian nasida. Alai sahat do nasida di bariba ni perbatasan i, jala ndang diida tentara i nasida. Ndang tardok las ni roha ni nasida dung pajumpang dohot ianakhonna di bariba ni perbatasan. Ujungna boi ma nasida kebaktian. Pos do roha ni nasida na ditangihon Jahowa tangiang ni  nasida. Taboto do sian Bibel ndang sai songon on cara ni Jahowa paluahon naposoNa. (Ul. 7:58-60) Alai sian pengalaman on didok si Milan ma, ”Hira na dipapitung surusuruan do angka tentara i, jala Jahowa do na paluahon hami.”​—Ps. 97:10.

9. Songon dia do pangkilalaan ni Jesus mangida angka halak na mangihuthon ibana? (Ida gombar di mula ni parsiajaran.)

⁹ Sitiruon na denggan do Jesus laho patuduhon asi ni roha. Asi do rohana mida angka halak. ’Ai maheu jala marhinamago do nasida songon birubiru na so marparmahan.’ Aha do na diulahon Jesus na patuduhon asi ni rohana? ”Gabe godang ma dipodahon tu nasida.” (Mat. 9:36; jaha Markus 6:34.) Alai molo halak Parise ndang songon i. Ndang olo nasida mangurupi angka halak. (Mat. 12:9-14; 23:4; Joh. 7:49) Olo do hamu maniru Jesus jala mangurupi angka halak asa mananda Jahowa?

10, 11. (a) Boasa ndang sai ingkon tapatudu asi ni roha ganup tingki?

¹⁰ Alai ndang ingkon sai tapatudu asi ni roha ganup tingki. Umpamana songon na masa tu Raja Saul. Disuru Debata do si Saul asa mambunu sude halak Amalek, pahanpahananna, dohot rajana i ma si Agag. Alana musu ni bangso ni Debata do nasida. Alai ndang dibunu si Saul Raja Agag dohot angka pahanpahananna, ala asi rohana. Gabe sogo ma roha ni Jahowa mida ibana. (1 Sam. 15:3, 9, 15) Panguhum na tigor do Jahowa. Boi do diboto Ibana aha na di bagasan roha ni halak. Jadi Ibana do na umboto andigan ingkon patuduhon asi ni roha. (And. 2:17; Hes. 5:11) Satongkin nai, ripashonon ni Jahowa ma angka na so mangoloi Ibana. (2 Tes. 1:6-10) I ma tingkina ndang marasi ni roha be Ibana tu angka parjahat. Alai, patuduhononNa ma asi ni roha tu halak na tigor di tingki i.

¹¹ Tutu, ndang disuru hita gabe panguhum ni angka halak. Alai boi do taurupi nasida, asa boi mandapot hangoluan. Songon dia do carana? Taida ma pigapiga cara.

12. Songon dia do caranta marasi ni roha tu angka halak?

¹² Mangurupi di ulaon siganup ari. Dipangido Jahowa do asa marasi ni roha naposoNa tu sude halak. (Joh. 13:34, 35; 1 Ptr. 3:8) Sada sian lapatan ni marasi ni roha, i ma ”sapartinaonan”. Halak na marasi ni roha marsitutu laho mangurupi halak na mangadopi hasusaan. Alani i, sai taparrohahon ma angka halak jala rade ma hita mangurupi nasida. Boi do ra  taurupi nasida mangulahon ulaon di jabu manang manuhor na porlu di nasida.​—Mat. 7:12.

13. Aha do na diulahon angka donganta tingki adong mara?

¹³ Mangurupi na hona mara. Asi do rohanta tu halak na hona mara. Jala ditanda do Sitindangi Ni Jahowa ala rade mangurupi halak na hona mara. (1 Ptr. 2:17) Umpamana, songon na masa di Jepang taon 2011. Ro ma gempa bumi dohot tsunami disi. Gabe sega ma angka jabu dohot Bale Harajaon. Ro ma angka dongan sian kota dohot negara na asing, laho paulihon angka jabu dohot Bale Harajaon. Dipatogu do haporseaon ni donganta borua mangida i. Jala didok ibana ma, ”Gabe huboto ma na disarihon Jahowa do hami. Masiurupan do sude angka dongan. Jala ditangiangkon angka dongan di liat portibi on do hami.”

14. Songon dia do hita mangurupi na marsahit dohot na matua?

¹⁴ Mangurupi na marsahit dohot na matua. Asi do roha tu na marsahit dohot tu na matua. Jala tatangiangkon do asa ro Harajaon ni Debata jala ndang adong be angka na marsahit dohot na matua. Alai andorang so ro i, ingkon taurupi do nasida. Parohahon ma na masa tu sahalak pengarang buku. Ibana paboahon,  nunga matua omakna jala pikun. Sada tingki dikotori omakna ma bajuna sandiri. Tingki laho paiashon bajuna i, ro ma dua halak Sitindangi Ni Jahowa na jotjot manjumpangi omakna. Diurupi nasida ma omakna i paiashon bajuna i. Dung i, dibahen nasida ma tes jala rap hundul mangkatahatai dohot omakna i. Mandok mauliate do anakna i tu nasida. Jala didok ma, ”Diulahon nasida do angka na niajarhon ni nasida i.” Songon dia molo hita? Asi do rohanta mida halak na marsahit dohot na matua? Olo do hamu mangurupi nasida nasa tolapmuna?​—Plp. 2:3, 4.

15. Songon dia do ulaon marbarita boi mangurupi angka halak?

¹⁵ Mangurupi halak mananda Jahowa. Cara na dumenggan patuduhon asi ni roha i ma, marbarita na uli taringot Jahowa dohot HarajaonNa. Urupi ma halak mamboto laba ni na mangulahon parenta ni Jahowa. (Jes. 48:17, 18) Molo taulahon on las ma roha ni Jahowa. Olo do hamu mangalehon gumodang tingkimuna di ulaon marbarita?​—1 Tim. 2:3, 4.

16. Aha do labana molo marasi ni roha?

¹⁶ Sahalak ahli kesehatan paboahon, lam sehat jala lam burju do hita molo tapatuduh asi ni roha. Molo taurupi na marsitaonon, lam marlas ni roha ma hita, marpangkirimon, ndang lungunlungunan, jala lam dao ma pingkiran na roa sian hita. Molo tapatudu holong ni roha, ias ma panggora ni rohanta ala taboto on do na dihalomohon Jahowa. (Eps. 4:31, 32) Tangkas ma, halak na marasi ni roha boi gabe natuatua, dongan saripe, manang aleale na burju. Asing ni i, molo marasi ni roha hita sai dapotta do pangurupion di tingki na tahaporluhon.​—Jaha Mateus 5:7; Lukas 6:38.

17. Boasa olo hita marasi ni roha?

¹⁷ Tutu, godang do labana molo marasi ni roha hita. Alai na rumingkot, marasi ni roha pe hita ala lomo do rohanta pasangaphon jala maniru Debata Jahowa. Ibana do Mual ni holong dohot asi ni roha. (Poda 14:31) Molo tapatudu asi ni roha lam solhot ma paralealeonta tu dongan sahaporseaon dohot tu angka halak di humaliangta.​—Gal. 6:10; 1 Joh. 4:16.