1. Songon dia do Sitindangi Ni Jahowa patuduhon holong tu donganna?

ANGKA Sitindangi Ni Jahowa songon na marhaha maranggi do di liat portibi on. Dihaholongi nasida do angka donganna. (1 Joh. 4:16, 21) Sipata dibahen nasida do pengorbanan laho mangurupi donganna, marragam cara do dibahen nasida laho patuduhon i. Umpamana, dilului nasida do dalan laho mamuji dohot mandok mauliate tu angka donganna. Molo taulahon i, na maniru Jahowa do hita disi.​—Eps. 5:1.

2. Songon dia do Jesus maniru holong ni Amana?

² Denggan jala tangkas do Jesus maniru Amana. Sai burju do Jesus tu angka halak. Didok ibana do, “Ro ma hamu tu ahu, hamu angka na loja jala na mamboan boban na borat, asa hupargogoi hamu.” (Mat. 11:28, 29) Molo tatiru Jesus jala “mangalehon roha tu na pogos” on mambahen las roha ni Jahowa, jala hita pe marlas ni roha. (Ps. 41:2) Di parsiajaran on, taulas ma songon dia hita boi patuduhon  holong tu keluarga, dongan sahuria, jala tingki marbarita na uli.

3. Songon dia do suami patuduhon holong tu istrina? (Ida gombar di mula ni parsiajaran.)

³ Ingkon jumolo do suami patuduhon holong jala sai disarihon ma keluargana. (Eps. 5:25; 6:4) Didok di Bibel ingkon diantusi suami do na umgale istrina. (1 Ptr. 3:7) Tingki ndang sarupa pandapot suami dohot istri, suami na parholong ndang mandok ummalo ibana sian istrina. (1 Mus. 2:18) Diantusi ibana do pangkilalaan jala sai dihaholongi do istrina. Donganta borua na tading di Kanada mandok taringot suamina, “Ndang hea leas rohana tu pandapothu, jala ndang hea didok ibana, ‘Unang songon i ho.’ Alai, denggan do ahu ditangihon. Tingki adong pandapothu na sala, burju jala lambok do ibana laho mangurupi ahu.”

4. Songon dia do holong ni suami tarida sian cara ni ibana maradophon borua na asing?

⁴ Suami na mangkaholongi istrina, ndang main mata manang tubu holong di rohana tu borua na asing. (Job 31:1) Ndang olo ibana manggoda borua na asing, di media sosial manang internet jala nang pe ndang rap dohot istrina. Jala ndang diida ibana angka situs na so denggan. Setia do ibana ala dihaholongi istrina. Jala ala dihaholongi ibana Jahowa dihasogohon ibana do na so denggan.​—Jaha Psalmen 19:15; 97:10.

5. Songon dia do istri patuduhon holong tu suamina?

⁵ Molo angka suami maniru Jesus laho patuduhon holong tu keluargana, gabe mura ma istrina patuduhon “sangap” tu ibana. (Eps. 5:22-25, 33) Jala diantusi istrina do pangkilalaan ni suamina. Alana godang do ulaon di huria manang angka ulaon na asing na dikarejohon. Sahalak suami di Inggris mandok, “Sada tingki adong na sala na huulahon, alai marbisuk do istringku mangalului situasi na pas laho pasingothon ahu. Diulahon ibana do prinsip di Poda 20:5. Sabar do ibana paimahon tingki na pas jala mandodo rohangku. Alani i, gabe tabo ma hami mangkatai.”

6. Songon dia do hita mangurupi angka dakdanak asa burju tu na asing? Jala aha ma labana?

⁶ Tingki natua-tua mangargai jala burju tu dongan na asing, boi do i gabe ditiru ianakhonna. Porlu do angka natua-tua mangajari angka ianakhonna burju jala mangargai na asing. Umpamana, paboa ma tu ianakhonmuna asa unang ma marlojongi di Bale Harajaon. Tingki adong acara ramah tamah, paboa ma tu nasida asa manjumolohon natua-tua tingki mambuat sipanganon. Angka dongan di huria pe boi mangurupi angka natua-tua. Boi do tapuji angka dakdanak ala patuduhon asi ni roha. Tarlumobi, tingki dibungkahon pintu tu hita. On boi mambahen las roha ni nasida,  jala gabe diantusi nasida ma lapatan ni, “Umlas do roha ni halak na mangalehon sian na manjalo.”​—Ul. 20:35.

7. Songon dia do Jesus patuduhon asi ni roha tu sahalak baoa na ngungu? Jala aha do na boi taparsiajari sian i?

⁷ Tingki di Dekapolis Jesus, ro ma angka halak jala “diboan ma tu ibana sahalak na nengel jala na ngungu.” (Mrk. 7:31-35) Dipamalum Jesus do na marsahit i. Alai ndang di jolo ni na torop. Boasa? Diboto Jesus do olo do gabe maila halak na ngungu i di jolo ni torop halak. Alani i, diboan Jesus ma ibana “pulik sian natorop i” jala disi ma ibana dipamalum. Tontu ndang boi hita mambahen tanda halongangan. Alai, ingkon tapingkirhon do aha na porlu dohot songon dia pangkilalaan ni angka donganta jala burju ma tu nasida. Apostel Paulus mandok, “Taparrohahon ma angka donganta, asa boi hita . . . patuduhon holong ni roha dohot mangulahon na denggan.” (Heb. 10:24) Jadi tangkas do diantusi Jesus pangkilalaan ni na ngungu i jala asi do rohana tu na ngungu i. Sitiruon na denggan do on tu hita!

8, 9. Songon dia hita marasi ni roha tu donganta na matua dohot na cacat? (Paboa ma tudosan.)

⁸ Marasi ni roha tu naung matua dohot tu na cacat. Holong do na gabe tanda ni halak Kristen, ndang holan mangulahon na sintong. (Joh. 13:34, 35) Holong do na manjujui hita gabe olo mangurupi angka donganta na matua manang na cacat, asa boi ro tu parpunguan jala asa boi dohot marbarita na uli. Taurupi do nasida nang pe i maol taulahon manang gabe umgodang na tabahen. (Mat. 13:23) Las situtu roha ni donganta na margoar si Michael na mamangke kursi roda ala diurupi keluarga dohot angka dongan di huria ibana. Didok ibana, “Alani pangurupion ni nasida, gabe boi ma ahu taratur marpungu jala ringgas marbarita na uli. Tarlumobi marbarita di inganan na ribur.”

⁹ Di Betel, adong do angka donganta naung matua manang na cacat. Dibahen pengawas do cara asa nasida boi marbarita marhite manulis surat manang telepon. Songon donganta si Bill na marumur 86 taon, mambahen surat tu angka halak na dao sian inganan i. Didok ibana, “Diargai hami do ulaon marbarita manulis surat on.” Asing ni i, si Nancy na marumur 90 taon mandok, “Huboto marbarita na uli do on ndang holan manurat. Porlu do angka halak mamboto hasintongan!” Adong muse si Ethel na tubu taon 1921 mandok, “Sai marsahit-sahit do ahu, sipata gabe maol do ahu laho mamangke bajungku.” Nang pe songon i, las do rohana marbarita marhite telepon jala piga-piga adong na gabe kunjungan kembali. Donganta na margoar si Barbara na marumur 85 taon, paboahon,  “Ala marsahit ahu, ndang boi ahu jotjot marbarita sian jabu tu jabu. Alai marhite dinas telepon boi do ahu mangkatai tu na asing. Mauliate ma hudok tu Jahowa!” Hira-hira saleleng sataon, angka donganta na matua i, nunga marbarita saleleng 1.228 jom jala mambahen 6.265 surat dohot 2.000 hali marbarita marhite telepon. Jala adong 6.315 sijahaon na dilehon! Pos do rohanta naung diulahon nasida i mambahen las roha ni Jahowa!​—Poda 27:11.

10. Songon dia hita marasi ni roha tu angka donganta tingki di parpunguan?

¹⁰ Marasi ni roha tingki marpungu. Hita boi marasi ni roha jala mangurupi angka donganta asa godang laba na didapot nasida di parpunguan. Songon dia carana? Unang ma tarlambat ro tu parpunguan, alana boi do gabe targanggu na asing. Sipata ala adong na masa olo do hita tarlambat ro tu parpunguan. Alai, molo jotjot hita tarlambat ro tu parpunguan, boi do i gabe sitiruon na so denggan tu dongan na asing. Alani i, ingkon tabahen do hamubaon. Ingot ma, Jahowa dohot Anakna do na manggokkon hita tu parpunguan. (Mat. 18:20) Jadi ingkon taargai do Jahowa dohot Jesus, carana ro ma hita andorang so masuk dope parpunguan!

11. Boasa ingkon diihuthon angka donganta na mandapot bagian di parpunguan poda di 1 Korint 14:40?

¹¹ Molo marasi ni roha hita tu angka donganta, taihuthon ma Hata ni Bibel na mandok, “Ingkon denggan do sude mardalan jala taratur.” (1 Kor. 14:40) Denggan do molo dipasahat angka donganta na mandapot bagian di parpunguan, ndang lewat waktu. Unang holan mamingkirhon angka dongan na pasahathon bagian na mangihut alai pingkirhon ma muse angka dongan na asing. Pingkirhon ma aha do na masa molo palelenghu sae parpunguan. Ra, adong do donganta na dao jabuna. Na asing ingkon markareta api, marbus manang marangkot.  Piga-piga donganta ndang Sitindangi dongan saripena jala ndang lomo roha ni nasida molo leleng mulak sian parpunguan.

12. Boasa ingkon taargai jala tahaholongi angka sintua? (Ida ma kotak “ Antusi ma Pangkilalaan ni Angka na Manguluhon di Organisasi”.)

¹² Marsitutu do angka sintua manarihon angka dongan di huria jala marbarita na uli. Alani i, tama do nasida diargai jala dihaholongi. (Jaha 1 Tessalonik 5:12, 13.) Tontu mandok mauliate do hita tu angka naung diulahon nasida tu hita. Jala boi tapatudu holong marhite, unduk tu tudu-tudu na dipaboa nasida. Alana, “Ai dijaga nasida do hamu jala hombar tu parniulaon ni nasida do uhumon ni Debata nasida.”​—Heb. 13:7, 17.

13. Aha do na boi tatiru sian cara ni Jesus maradophon angka halak?

¹³ Taringot Jesus disurirangkon si Jesaya do, “Arung naung marosahi, ndang laos ponggolhononna, jala sumbu na marnehetnehet i ndang laos intopanna.” (Jes. 42:3) Sapangkilalaan do Jesus tu angka halak ala dihaholongi do nasida. Diantusi ibana do pangkilalaan na marmetmet ni roha jala na loja songon “arung naung marosahi” manang ‘sumbu na marnehet-nehet’. Alani i, burju jala sabar do ibana maradophon nasida. Gari dakdanak las do roha ni nasida jonok tu Jesus. (Mrk. 10:14) Tontu, hita ndang songon denggan ni Jesus mangajari angka halak jala mangantusi pangkilalaan ni nasida! Alai marbisuk ma hita mamingkirhon caranta mangkatai, andigan hita mangkatai jala sadia leleng hita mangkatai dohot nasida.

14. Boasa ingkon tapingkirhon caranta mangkatai tu angka halak?

¹⁴ Songon dia do hita mangkatai dohot angka halak? Saonari on, marjuta halak ‘disusai jala ndang disarihon’ angka pejabat na korupsi, angka pengusaha, parpolitik dohot angka pemimpin agama di portibi on. (Mat. 9:36) Alani i, godang do na so porsea tu manang ise pe jala ndang marpangkirimon. Molo songon i, ingkon burju jala taantusi ma pangkilalaan ni nasida marhite mamillit hata na denggan jala lambok ma mangkatai tu nasida! Godang halak na olo manangihon barita na tapasahat ndang ala ni malonta patorangkon isi ni Bibel. Alai, ala tapatudu holong jala taargai nasida.

15. Aha do piga-piga cara na denggan tingki marbarita di ingananta?

¹⁵ Marragam do cara na denggan na boi tapangke tingki marbarita di luatta. Unang ma tabahen sungkun-sungkun na mambahen nasida maila. Songon sahalak perintis paboahon, di ingananna marbarita godang do halak na parila na dijumpangi ibana. Ndang dibahen ibana sungkun-sungkun na boi pailahon nasida ala ndang diboto alusna. Ndang  disungkun ibana, “Diboto ho do goar ni Debata?” manang, “Diboto ho do aha Harajaon ni Debata i?” Alai didok ibana do, “Hea do huparsiajari taringot goar ni Debata sian Bibel. Boi do hupatuduhon ise ma goar ni Debata?” Ndang sai sarupa cara di ganup inganan. Alana marasing-asing do halak na tajumpangi dohot suku ni nasida. Alai ingkon sai burju jala taargai angka halak di ingananta marbarita. Alani i, porlu do tatanda jala taantusi nasida.

16, 17. Songon dia do hita patuduhon bisuk taringot (a) andigan hita boi manjumpangi angka halak? (b) sadia leleng hita mangkata-hatai dohot nasida?

¹⁶ Andigan do boi manjumpangi angka halak? Tingki marbarita hita sian jabu tu jabu, olo do gabe tarsonggot nasida ala ndang hea dope pajumpang dohot hita. Alani i, porlu do marbisuk hita mangalului tingki na pas asa boi mangkatai dohot nasida. (Mat. 7:12) Umpamana, molo diingananmuna marbarita umleleng halak dungo di ari Sabtu, jolo marbarita ma hamu di dalan, di inganan na ribur manang tu kunjungan na boi dijumpangi.

¹⁷ Sadia leleng do hita boi manghata-hatai dohot nasida? Molo gok do karejo ni nasida taida, unang ma palelenghu hamu mangkata-hatai dohot nasida, tarlumobi molo parjolo sahali dope hamu pajumpang dohot nasida. Unang ma tapaleleng-leleng mangkatai dohot nasida. (1 Kor. 9:20-23) Molo taantusi do situasi ni nasida ra gabe las do roha ni nasida tingki ro muse hita. Molo marbisuk hita, gabe “dongan saulaon ni Debata” ma hita. Ra marhite hita do Jahowa mangurupi nasida mananda hasintongan!​—1 Kor. 3:6, 7, 9.

18. Aha do pasu-pasu na tadapot molo burju jala marasi ni roha tu angka halak?

¹⁸ Jadi tahaholongi ma angka keluarganta, marasi ni roha ma tu angka donganta di huria jala marbisuk ma hita tingki marbarita. Molo taulahon i sude dapotta ma gok pasu-pasu sahat tu ari na naeng ro. Psalmen 41:2, 3 mandok, “Martua ma halak na manatap uhum tu na soro ni ari on, sai paluaon ni Jahowa do ibana di ari hinamago. Ramotan jala pangoluon ni Jahowa do ibana, martua do ibana bahenonna di tano on.”