MOLO naeng mamboto jam piga saonari, aha do na laho ulahononmuna? Ra pintor diida hamu do jam dinding manang jam tanganmuna. Ra nunga sajom lewat 30 minut dungkon jam 12.00. Di tingki sisongon i, songon dia do caramuna mangalusi molo disungkun halak hamu, “Jam piga saonari?”

Marasing-asing do cara mangalusi i hombar didia hamu maringanan. Umpamana, adong do na mandok, “Jam 1.30” manang “Jam 13.30.” Di piga-piga inganan adong do na mangalusi, “satonga dua” lapatanna 30 minut nai asa jam dua.

Songon dia do halak di tingki ni Bibel laho paboahon jam? Godang do cara ni nasida paboahon. Di Angka Buku Heber adong do dipaboa taringot tingki, songon “sogot manogot i”, “hos ni ari”, dohot “bot ari”. (1 Mus. 8:11; 19:27; 43:15; 1 Raj. 18:26) Alai, adong do sipata di Bibel dipaboa taringot tingki na spesifik.

Najolo di Israel, tingki borngin somal do adong sahalak panjaga. Di halak Israel, saborngin i dibagi tolu do giliran jaga, umpamana adong do giliran “jaga parjolo”. (And. 2:19) Di Panguhum 7:19 dipaboa do taringot giliran jaga “tonga borngin”. Alai, di tingki tubu Jesus, dibagi halak Jahudi do saborngin i gabe opat giliran jaga, songon hasomalan ni halak Junani dohot halak Rom.

Dipaboa do di Buku Injil taringot giliran jaga. Umpamana, tingki giliran jaga paopathon manang “jam tolu manogot sahat tu parbinsar ni mata ni ari”, ro ma Jesus mardalan di ginjang ni aek mandapothon siseanna tu parau. (Mat. 14:25, ctk) Didok Jesus do sada tudosan, “Molo diboto parjabu do [giliran jaga na papigahon do] ro panangko, tontu dungo do ibana jala ndang pasombuonna jabuna dibongkar.”​—Mat 24:43.

Dipaboa Jesus ma muse taringot tu opat giliran jaga tu angka siseanna. Didok ibana tu nasida, “Alani i sai jaga ma hamu, ai ndang diboto hamu sadihari ro nampunasa jabu i, mandapothon borngin do, manang di tonga borngin, manang tingki tahuak manuk, manang tingki manogot.” (Mrk. 13:35) Giliran jaga na parjolo i ma “mandapothon borngin”, dimulai ma i sian parbonom ni mataniari sahat tu jam sia borngin. Giliran jaga na paduahon i ma “di tonga borngin”, dimulai jam sia borngin sahat tu jam 12 borngin. Giliran jaga patoluhon i ma “tingki tahuak manuk”, dimulai sian jam 12 borngin sahat tu jam tolu manogot. Hira-hira tingki tahuak manuk ma Jesus ditangkup borngin i. (Mrk. 14:72) Giliran jaga paopathon i ma “tingki manogot”, dimulai ma sian jam tolu manogot sahat tu parbinsar ni mataniari.

Jadi nang pe najolo ndang adong dope jam songon di tingkinta saonari, alai diboto nasida do patorangkon tingki manang jam.