1. Aha do situasi na diadopi apostel Johannes hira-hira taon 95 M?

HIRA-HIRA taon 95 M, diadopi apostel Johannes do situasi na maol. Nunga lam matua ibana, dipenjarahon di pulo Patmos, jala ra holan ibana nama apostel ni Jesus na mangolu. (Pgk. 1:9) Diboto ibana do adong angka halak di huria na mangajarhon ajaran na sala jala mambahen huria ndang marsada. Ra, gabe hira na so adong be halak Kristen na sintong di tingki i.​—Jud. 4; Pgk. 2:15, 20; 3:1, 17.

2. Hombar tu Pangungkapon 7:9-14, parnidaan aha do na didapot si Johannes?

² Tingki diadopi si Johannes situasi sisongon i, dilehon Debata ma parnidaan tu ibana taringot ari na naeng ro. Di parnidaan i, adong sada suru-suruan mandok tu opat suru-suruan na asing asa maniop alogo ni hasusaan bolon sahat tu na dimeteraihon sada punguan naposo ni Debata. (Pgk. 7:1-3) Punguan on, i ma 144.000 halak na laho mamarenta rap dohot Jesus di surgo. (Luk. 12:32; Pgk. 7:4) Dung i, dipaboa si Johannes ma muse taringot punguan na asing. Mansai balga do punguan i umbahen didok ibana, “Huida ma sada punguan bolon na so habilangan ni jolma, na ro sian saluhut bangso, marga, dohot bahasa. Jongjong do nasida di jolo ni habangsa i dohot di jolo ni Anak ni Biru-biru i.” (Jaha Pangungkapon 7:9-14.) Mansai las do roha ni si Johannes, ala di ari na naeng ro godang do halak na manomba Debata marhite cara na sintong!

3. (a) Boasa parnidaan ni si Johannes boi patoguhon haporseaonta? (b) Aha do na laho taulas di parsiajaran on?

³ Dipatogu do haporseaon ni si Johannes alani parnidaan i. Tarlumobi ma hita, lam dipatogu do haporseaonta ala di tingkinta saonari do masa parnidaan i! Saonari, marjuta halak naung manomba Jahowa. Jala marpangkirimon do nasida  asa malua sian hasusaan bolon jala mangolu salelengna di tano on. Di parsiajaran on, laho taulas ma songon dia Jahowa papatarhon tu naposona taringot punguan bolon i lobi sian 80 taon naung salpu. Dung i, taulas ma muse dua tanda taringot punguan i, i ma: (1) mansai balga do punguan i jala (2) dipapungu sian saluhut portibi on. On boi patoguhon haporseaon ni sude na gabe bagian di punguan i.

4. Aha do hasintongan sian Bibel na so diajarhon angka gareja, jala aha do imbar ni nasida tu Parsiajar Bibel?

⁴ Angka gareja ndang mangajarhon hasintongan sian Bibel. Ndang diajarhon nasida na laho mangolu salelengna di tano on do angka halak na unduk tu Debata. (2 Kor. 4:3, 4) Jala diajarhon angka gareja do, sude halak na burju tu surgo do molo dung mate. Alai imbar do i dohot na diantusi Parsiajar Bibel, i ma na pabinsarhon Joujou Paboahon mulai taon 1879. Diboto nasida do, laho padengganon ni Debata do tano on gabe Paradeiso. Jala marjuta halak na unduk tu Ibana laho mangolu di tano on, ndang di surgo. Alai porlu do tingki di nasida asa boi tangkas mangantusi ise do angka halak na unduk i.​—Mat. 6:10.

5. Aha do na dihaporseai Parsiajar Bibel taringot 144.000?

⁵ Diboto Parsiajar Bibel do muse taringot sada punguan na “dituhor sian tano on” na laho mamarenta rap dohot Jesus di surgo. (Pgk. 14:3) Punguan on, i ma 144.000 halak Kristen na setia jala na ringgas marhobas tu Jahowa tingki mangolu dope di tano on. Alai songon dia taringot punguan bolon?

6. Aha do na dihaporseai Parsiajar Bibel taringot punguan bolon?

⁶ Di parnidaan i, diida si Johannes do punguan i jongjong “di jolo ni habangsa i dohot di jolo ni Anak ni Biru-biru i”. (Pgk. 7:9) Gabe didok roha ni Parsiajar Bibel ma, na laho mangolu tu surgo do punguan bolon i songon na 144.000 i. Alai molo rap mangolu di surgo do dua punguan i, songon dia ma mamboto na imbar do nasida? Didok roha ni Parsiajar Bibel molo punguan bolon i, i ma halak Kristen na hurang togu parale-aleonna tu Debata tingki di tano on. Nang pe denggan pangalaho ni nasida, alai tongtong do nasida laho tu gareja. Didok Parsiajar Bibel, ala hurang togu do parale-aleon ni punguan bolon tu Debata, ndang boi nasida mamarenta rap dohot Jesus. Alani i, nang pe laho tu surgo punguan bolon i, alai jongjong di jolo ni habangsa i do nasida, ndang hundul di habangsa i.

7. Hombar tu na dihaporseai Parsiajar Bibel, ise do na mangolu di tano on saleleng Pamarentaon ni Kristus, jala aha do na laho masa tu angka baoa na setia na mate andorang so ro Jesus?

⁷ Molo songon i, ise do na laho mangolu di tano on? Pos do roha ni Parsiajar Bibel, dung rap marpungu 144.000 dohot punguan bolon di surgo, adong do marjuta halak na asing na laho mangolu di tano on jala mandapot laba sian Pamarentaon ni Kristus Saleleng Saribu Taon. Didok Parsiajar Bibel, marjuta halak na laho mangolu di tano on, i ma angka halak na so manomba Jahowa dope andorang so mulai Pamarentaon ni Kristus i. Alai marsiajar do nasida taringot Jahowa saleleng Pamarentaon Saribu Taon i. Di ujung ni pamarentaon i, angka na unduk tu Jahowa, boi mangolu salelengna di tano on. Alai angka na so unduk tu Jahowa laho diripashon do. Didok roha ni Parsiajar Bibel muse, saleleng pamarentaon i, adong piga-piga na laho gabe “pangarajai” di tano on. Dohot ma i angka baoa na setia na mate andorang so ro Jesus. Jala di ujung ni pamarentaon i, laho mangolu do nasida di surgo.​—Ps. 45:17.

8. Hombar tu na dihaporseai Parsiajar Bibel, ise do tolu punguan na dihalomohon Debata?

 ⁸ Pos do roha ni Parsiajar Bibel adong tolu punguan: (1) i ma 144.000 halak na laho mamarenta rap dohot Jesus di surgo; (2) punguan bolon, i ma halak Kristen na so pola togu parale-aleonna tu Jahowa jala jongjong di jolo ni habangsa ni Jesus di surgo; jala (3) marjuta halak na laho diajari taringot Jahowa di Pamarentaon ni Kristus Saleleng Saribu Taon. * Alai dungkon i, diurupi Jahowa do nasida asa lam tangkas mangantusi taringot on.​—Poda 4:18.

9. (a) Songon dia do punguan bolon di tano on boi jongjong “di jolo ni habangsa i dohot di jolo ni Anak ni Biru-biru i”? (b) Boasa pangantusion taringot Pangungkapon 7:9 masuk akal?

⁹ Di taon 1935, tangkas ma diboto Sitindangi Ni Jahowa ise punguan bolon na dipaboa di parnidaan ni si Johannes. Diboto nasida ma, ndang ingkon tu surgo punguan bolon i asa boi jongjong “di jolo ni habangsa i dohot di jolo ni Anak ni Biru-biru i”. Holan gombaran do i. Nang pe mangolu di tano on, boi do nasida jongjong “di jolo ni habangsa i” molo dipasangap nasida Jahowa, i ma parhuaso natumimbul jala unduk tu Ibana. (Jes. 66:1) Nasida pe, boi do jongjong “di jolo ni Anak ni Biru-biru i” marhite patuduhon haporseaon tu tobusan ni Jesus. Adong do ayat na asing di Bibel na mangurupi hita mangantusi lapatan ni Pangungkapon 7:9. Didok di Mateus 25:31, 32, dipapungu Jesus do “sude bangso” tu jolo ni habangsana, dohot ma i na so mangoloi Jahowa. Tangkas ma, sude bangso i ndang di surgo, alai di tano on do. Masuk akal do pangantusion na dipatangkas taon 1935 on. I do alana, ndang adong didok di Bibel na laho tu surgo do punguan bolon i. Holan sada punguan do na laho mangolu di surgo, i ma 144.000 na laho ‘mamarenta tu saluhut tano on’ rap dohot Jesus.​—Pgk. 5:10.

10. Boasa punguan bolon ingkon marsiajar taringot Jahowa andorang so mulai dope Pamarentaon ni Kristus?

¹⁰ Sian taon 1935, diboto Sitindangi Ni Jahowa do molo punguan bolon na dipaboa di parnidaan ni si Johannes, i ma halak Kristen na setia na marpangkirimon laho mangolu salelengna di tano on. Asa boi malua sian hasusaan bolon, ingkon marsiajar do nasida taringot Jahowa jala manomba Ibana andorang so mulai dope Pamarentaon ni Kristus. Ingkon dipatudu nasida do haporseaon na togu ‘asa malua sian sude na laho masa’ andorang so mulai Pamarentaon ni Kristus Saleleng Saribu Taon.​—Luk. 21:34-36.

11. Boasa didok roha ni Parsiajar Bibel adong dope ra halak na diboan tu surgo di ujung ni Pamarentaon Saribu taon?

¹¹ Songon dia do pandapot taringot angka halak na setia di tingki najolo na laho diboan tu surgo di ujung ni Pamarentaon Saribu taon? Diulas do sungkun-sungkun i di Joujou Paboahon 15 Februari 1913. Adong na marpingkir, ‘Boasa angka halak na setia di tingki najolo dipahehe laho mangolu di tano on, hape angka halak na hurang togu parale-aleonna tu Jahowa mangolu di surgo?’ Didok roha ni nasida pe songon i, alana dirimpu nasida: (1) laho mangolu di surgo do punguan bolon i, jala (2) punguan bolon i, i ma angka halak Kristen na hurang togu parale-aleonna tu Jahowa.

12-13. Aha na diboto angka na miniahan dohot punguan bolon taringot pangkirimon ni nasida?

¹² Songon na dipaboa nangkin, sian taon 1935 diboto Sitindangi Ni Jahowa do molo punguan bolon na dipaboa di parnidaan ni si Johannes, i ma angka halak na malua sian  Armagedon. Laho malua do nasida sian “hasusaan bolon” jala tongtong di tano on. Jala sai didok nasida do gogo, “Sian Debatanta na hundul di habangsa i dohot sian Anak ni Biru-biru i do ro haluaon.” (Pgk. 7:10, 14) Asing ni i, diajarhon do di Bibel molo angka na dipahehe laho mangolu di surgo mandapot pangkirimon “na dumenggan” sian angka baoa na setia di tingki najolo. (Heb. 11:40) Gabe las ma roha ni angka donganta manogihon halak laho manomba Jahowa asa boi mangolu salelengna di tano on.

¹³ Las do roha ni punguan bolon di pangkirimon ni nasida. Diboto nasida do, Jahowa do na manontuhon didia pangkirimon ni angka naposona, di surgo manang di tano on. Manang didia pe pangkirimonta, alani asi ni roha ni Jahowa na mansai balga do umbahen tadapot pangkirimon i na dipatudu marhite tobusan ni Jesus Kristus.​—Rom 3:24.

14. Dungkon taon 1935, boasa godang na sungkun-sungkun dope rohana songon dia surirang taringot punguan bolon laho saut?

¹⁴ Dung dipatangkas pangantusion ni Sitindangi Ni Jahowa di taon 1935, godang do na sungkun-sungkun dope rohana taringot songon dia punguan na laho mangolu di tano on boi gabe “bolon”. Umpamana, si Ronald Parkin na marumur 12 taon tingki dipatangkas ise do punguan bolon i mandok, “Tingki i, adong hira-hira 56.000 penyiar di liat portibi on jala godangan sian nasida na miniahan. Alani i, hira na so pola godang do halak na gabe bagian sian punguan bolon i.”

15. Songon dia do punguan bolon lam martamba?

¹⁵ Marpulu taon dungkon i, laho do angka misionaris tu godang luat. Gabe lam tamba ma godang ni Sitindangi Ni Jahowa. Dung i, di taon 1968 mulai ma dipangke buku Kebenaran yang Membimbing kepada Kehidupan yang Kekal laho mambahen parsiajaran Bibel. On ma sada cara na sederhana laho patorangkon hasintongan sian Bibel jala mambahen lam godang halak mananda Jahowa. Hira-hira di bagasan opat taon, lobi sian satonga juta halak na tardidi. Tingki i, ndang godang be pengaruh ni Gareja Katolik di Amerika Latin dohot di negara na asing. Jala ndang diorai be ulaonta di Eropa Timur dohot di piga-piga luat di Afrika. Ujungna, marjuta ma halak na tardidi. (Jes. 60:22) Di piga- piga taon na parpudi on, diparade organisasi ni Jahowa do godang cara laho mangurupi angka halak marsiajar Bibel. Saonari nunga lobi sian ualu juta halak godang ni punguan bolon i. Tangkas ma, dipapungu Jahowa do nasida.

16. Sian dia do punguan bolon i dipapungu?

¹⁶ Tingki disurat si Johannes parnidaan i, didok ibana molo punguan bolon i dipapungu “sian saluhut bangso, marga, dohot bahasa”. Jala sarupa do tu na hea didok panurirang Sakaria. Didok ibana, “Di angka ari i, marroan ma sasampulu halak bangso na asing mandapothon sahalak Jahudi mandok: ‘Naeng ihuthononnami do ho, ai nunga hubege hami na didongani Debata do hamu.’”​—Sak. 8:23, Bibel siganup ari.

17. Aha do naung diulahon Sitindangi Ni Jahowa laho mangurupi angka halak sian sude bangso dohot bahasa?

¹⁷ Diboto Sitindangi Ni Jahowa do, asa boi angka halak sian sude bahasa dipapungu, ingkon dibaritahon do barita na uli di godang bahasa. Nunga diterjemahon Bibel dohot publikasi lobi sian 130 taon tu marratus bahasa. Ndang hea dope songon on godangna. Tangkas ma, dibahen Jahowa do mukjizat di tingkinta saonari, i ma papunguhon punguan bolon sian sude bangso. Ala nunga diterjemahon Bibel dohot publikasi di godang bahasa, gabe marsada ma punguan bolon i laho manomba Jahowa, nang pe nasida ro sian marragam bangso. Jala ditanda do Sitindangi Ni Jahowa ala ringgas marbarita jala marsihaholongan. On mambahen lam togu haporseaonta!​—Mat. 24:14; Joh. 13:35.

18. (a) Hombar tu Jesaya 46:10, 11, boasa ndang longang be rohanta ala nunga dipasaut Jahowa surirang taringot punguan bolon? (b) Boasa ndang marmetmet ni roha punguan bolon i?

¹⁸ Mansai las do rohanta tu surirang taringot punguan bolon! Tontu, ndang longang be rohanta ala nunga dipasaut Jahowa surirang i. (Jaha Jesaya 46:10, 11.) Mandok mauliate do punguan bolon alani pangkirimon na dilehon Jahowa tu nasida. Ndang marmetmet ni roha nasida nang pe ndang dimiahi tondi parbadia asa rap dohot Jesus di surgo. Di Bibel, tajaha do taringot angka baoa dohot borua na setia jala ditogu-togu tondi parbadia nang pe nasida ndang bagian sian 144.000. Umpamana, si Johannes Pandidi. (Mat. 11:11) Contoh na asing, i ma si Daud. (Ul. 2:34) Laho dipahehe do nasida dohot na asing jala mangolu di paradeiso di tano on. Nasida rap dohot punguan bolon boi patuduhon na unduk do nasida tu Jahowa dohot tu pamarentaonna.

19. Molo taboto lapatan ni parnidaan ni si Johannes taringot punguan bolon, aha do na ingkon taulahon?

¹⁹ On ma parjolo sahali dipapungu Jahowa marjuta halak sian sude bangso laho manomba Ibana. Manang didia pe pangkirimonta, ingkon taurupi do godang halak asa boi gabe bagian sian ‘biru-biru na asing’. (Joh. 10:16) Ndang sadia leleng nai, laho masa do hasusaan bolon. Jala ripashonon ni Jahowa ma sude pamarentaon dohot agama na mambahen susa angka jolma. Sada hak istimewa na mansai balga do di punguan bolon laho manomba Jahowa di tano on salelengna!​—Pgk. 7:14.