PARSIAJARAN 38
“Ro ma Hamu tu Ahu, . . . Asa Hupargogoi Hamu”
“Ro ma hamu tu ahu, hamu angka na loja jala na mamboan boban na borat, asa hupargogoi hamu.”—MAT. 11:28.
ENDE 17 “Na Olo do Ahu”
NA LAHO DIULAS *
1. Songon na didok di Mateus 11:28-30, aha do janji na dibahen Jesus?
DIBAHEN Jesus do janji na mambahen las roha ni angka halak na manangihon ibana. Didok ibana, “Ro ma hamu tu ahu, asa hupargogoi hamu.” (Jaha Mateus 11:28-30.) Ndang holan hata janjina on. Pingkirhon ma contoh sian na diulahon Jesus tu sahalak borua naung leleng marsahit na posi.
2. Aha do na diulahon Jesus tu sahalak borua na marsahit?
2 Adong sahalak borua naung 12 taon marsahit na posi. Hirim do rohana asa boi malum. Alai gabe marsak do rohana ala ndang adong pangubati na boi pamalumhon sahitna i. Jala hombar tu Patik, ramun do ibana. (3 Mus. 15:25) Tingki dibege ibana na boi Jesus pamalumhon na marsahit, lomo rohana asa pajumpang dohot Jesus. Didapothon ibana ma Jesus jala dijama ma rambu ni abit luarna. Dung i, pintor malum ma sahitna i! Alai ndang holan sahitna i na dipamalum Jesus. Sian cara ni Jesus maradophon borua i, boi do dihilala na dihaholongi jala diargai Jesus do ibana. Umpamana tingki mangkatai, didok Jesus do tu borua i, “ale borungku”. Tontu mansai dipatogu do roha ni borua i alani i!—Luk. 8:43-48.
3. Aha do sungkun-sungkun na laho taulas?
3 Parrohahon ma na diulahon borua i. Marsitutu do ibana asa boi pajumpang dohot Jesus. Suang songon i ma, ingkon marsitutu do hita asa boi ro tu Jesus. Saonari, ndang dibahen Jesus be mukjizat laho pamalumhon sahit ni angka halak na ro tu ibana. Alai tongtong do dilehon ibana gokkon tu hita. Didok ibana, “Ro ma hamu tu ahu, . . . asa hupargogoi hamu.” Di parsiajaran on, laho taulas ma lima sungkun-sungkun on: Aha do na ingkon taulahon asa boi ro tu Jesus? Aha do lapatanna tingki didok Jesus, “Tuhuk ma augangku”? Aha do na boi taparsiajari sian Jesus? Boasa ulaon na dilehon Jesus boi patoguhon hita? Jala songon dia asa boi hita tongtong dipatogu ala manuhuk auga ni Jesus?
“RO MA HAMU TU AHU”
4-5. Songon dia do carana hita boi ro tu Jesus?
4 Sada cara hita ro tu Jesus, i ma mangulahon na dumenggan laho mamparsiajari sude na didok dohot na diulahon Jesus. (Luk. 1:1-4) Hita sandiri do na martanggung jawab laho mamparsiajari na didok Bibel taringot Jesus. Ndang boi halak na asing mangulahon i tu hita. Asing ni i, ro hita tu Jesus tingki tabahen keputusan laho tardidi jala gabe siseanna.
5 Cara na asing hita ro tu Jesus, i ma mangido angka sintua di huria asa mangurupi hita. Nasida do ‘silehon-lehon’ sian Jesus laho mangurus angka biru-biruna. (Eps. 4:7, 8, 11; Joh. 21:16; 1 Ptr. 5:1-3) Alai unang ma didok rohanta na boi do diboto angka sintua aha na tapingkirhon dohot aha na tahaporluhon. Ingkon hita do na mangido tu nasida asa diurupi hita. Pingkirhon ma contoh ni donganta baoa na margoar si Julian. Didok ibana, “Ala marsahit, ndang boi be ahu karejo di Betel. Didok donganku ma asa hupangido angka sintua laho patoguhon ahu. Mulana, didok rohangku ndang porlu i di ahu. Alai tingki huulahon i, gabe huhilala ma sada silehon-lehon na mansai arga do kunjungan penggembalaan sian nasida i.” Songon angka sintua na mangurupi si Julian, sude sintua boi do mangurupi hita asa mamboto “pingkiran ni Kristus”, i ma mangantusi jala maniru cara marpingkir dohot parange ni Jesus. (1 Kor. 2:16; 1 Ptr. 2:21) On ma silehon-lehon na mansai arga di hita.
“TUHUK MA AUGANGKU”
6. Aha do lapatanna tingki didok Jesus, “Tuhuk ma augangku”?
6 Tingki didok Jesus, “Tuhuk ma augangku”, ra lapatanna “Unduk ma tu ahu”. Manang boi do i lapatanna “Tuhuk ma augangku, jala rap saulaon ma hita marhobas tu Jahowa”. Sian on taboto ma, manuhuk auga lapatanna mangulahon tugas.
7. Hombar tu Mateus 28:18-20, tugas aha do na dilehon tu hita jala aha do na mambahen pos rohanta?
7 Tajalo do gokkon ni Jesus tingki marjanji hita mangalehon diri tu Jahowa jala tardidi. Digokkon Jesus do sude halak asa ro tu ibana, jala ndang hea dijua ibana manang ise pe na olo marhobas tu Jahowa. (Joh. 6:37, 38) Sude na mangihuthon Jesus mandapot hak istimewa laho mangulahon tugas na dilehon Jahowa tu Jesus. Alani i, pos ma rohanta sai didongani jala diurupi Jesus do hita laho mangulahon tugas i.—Jaha Mateus 28:18-20.
“MARSIAJAR MA HAMU SIAN AHU”
Patogu ma na asing songon na diulahon Jesus (Ida paragraf 8-11) *
8-9. Boasa halak na marserep ni roha olo marale-ale dohot Jesus, jala aha do na ingkon tasungkun tu dirinta?
8 Halak na marserep ni roha do na olo marale-ale dohot Jesus. (Mat. 19:13, 14; Luk. 7:37, 38) Boasa? Pingkirhon ma imbar ni Jesus dohot halak Parise. Ginjang do roha ni nasida jala ndang parduli tu na asing. (Mat. 12:9-14) Alai molo Jesus, parholong jala serep do rohana. Lomo do roha ni halak Parise asa ditanda halak nasida jala gabe umsangap sian na asing. Alai didok Jesus sala do i, jala diajari ibana do angka siseanna asa marserep ni roha jala manarihon na asing. (Mat. 23:2, 6-11) Adong pe angka halak na olo unduk tu halak Parise, ala mabiar do nasida dihukum. (Joh. 9:13, 22) Alai molo Jesus, dipatogu ibana do na asing marhite patuduhon holong dohot hata na lambok.
9 Adong do na boi ditiru hamu sian Jesus? Sungkun ma dirimuna: ‘Ditanda do ahu sahalak na lambok jala na marserep ni roha? Olo do ahu mangulahon ulaon na hurang sangap di halak na asing? Burju do ahu maradophon halak na asing?’
10. Aha do na dihilala angka halak na rap saulaon dohot Jesus?
10 Dibahen Jesus do las roha ni angka halak na rap saulaon dohot ibana, jala las do rohana mangalatik nasida. (Luk. 10:1, 19-21) Alani i, ndang mabiar angka siseanna manungkun tu ibana. Jala olo do Jesus manangihon pandapot ni nasida. (Mat. 16:13-16) Songon suan-suanan na tubu di tano na denggan, diparsiajari angka sisean ni Jesus do aha na diajarhon ibana jala marparbue do nasida marhite godang ulaon na denggan.
Burju jala olo marale-ale
Ringgas jala semangat
Marserep ni roha jala rade mangurupi *
11. Aha do na boi tasungkun tu dirinta?
11 Adong do tanggung jawabmuna? Molo songon i, sungkun ma dirimuna: ‘Songon dia do ahu maradophon na asing tingki di parkarejoan manang tingki di jabu? Las do roha ni nasida rap dohot ahu? Mabiar do nasida laho manungkun tu ahu? Jala lomo do rohangku manangihon pandapot ni nasida?’ Unang ma songon halak Parise hita. Muruk do nasida molo adong halak na so satolop tu na diajarhon nasida jala kejam do nasida tu halak na mangalehon pandapot na so dihalomohon roha ni nasida.—Mrk. 3:1-6; Joh. 9:29-34.
“ASA DAPOTMUNA HASONANGAN”
12-14. Boasa tugas na dilehon Jesus boi patoguhon hita? Paboa ma piga-piga alasanna.
12 Boasa tugas na dilehon Jesus boi patoguhon hita? Godang do alasanna, alai taulas ma piga-piga alasanna.
13 Tadapot pengawas na dumenggan. Jahowa, i ma Pengawas Natumimbul, ndang songon bos na kasar na so mangargai parkarejona. Diargai Jahowa do sude na taulahon. (Heb. 6:10) Jala dilehon Ibana do gogo tu hita asa boi mangulahon tugas na dilehon Ibana. (2 Kor. 4:7; Gal. 6:5) Rajanta, i ma Jesus mangalehon sitiruon na dumenggan taringot songon dia maradophon na asing. (Joh. 13:15) Jala marsitutu do angka sintua na mamparmahani hita laho maniru Jesus, “parmahan na bolon”. (Heb. 13:20; 1 Ptr. 5:2) Diulahon nasida do nasa tolapna laho patoguhon, patuduhon haburjuon dohot habaranion tingki mangajari jala mangondingi hita.
14 Tadapot dongan saulaon na dumenggan. Ndang adong manang ise pe na songon angka donganta na mangkaholongi hita jala mangargai tugas na taulahon. Pingkirhon ma on: Rap saulaon do hita dohot angka dongan na marpangalaho na denggan, alai ndang ginjang roha ni nasida. Nang pe godang ulaon na boi diulahon nasida, alai serep do roha ni nasida. Jala ndang didok roha ni nasida, na rumingkot do nasida sian dongan na asing. Ndang holan gabe dongan saulaon, alai gabe marale-ale do hita tu nasida. Mansai holong do roha ni nasida tu hita umbahen rade nasida mate humongkop hita!
15. Songon dia do pangkilalaanta taringot tugas na taulahon?
15 Tadapot tugas na dumenggan. Taajarhon do hasintongan tu angka halak taringot Jahowa. Jala tapaboa do angka gabus ni Sibolis. (Joh. 8:44) Dibahen Sibolis do gabus na mambahen angka jolma ndang marpangkirimon. Umpamana, lomo rohana asa porsea hita na so olo Jahowa manesa dosanta jala ndang tama hita dihaholongi. Gabus na mansai jahat do i! Alai tingki ro hita tu Jesus, disesa Jahowa do angka dosanta. Jala taboto ma, mansai holong do roha ni Jahowa tu hita sude. (Rom 8:32, 38, 39) Alani i, mansai las do rohanta mangurupi halak marsiajar asa marhaposan tu Jahowa jala lam denggan ngolu ni nasida!
TONGTONG DIPATOGU ALA MANUHUK AUGA NI JESUS
16. Aha do imbar ni tugas na dilehon Jesus tu hita sian tugas na asing?
16 Imbar do tugas na dilehon Jesus tu hita sian tugas na asing. Umpamana, godang do halak na loja jala ndang marlas ni roha dung mulak sian karejo. Alai molo hita, mansai las do rohanta ala nunga talehon tingkinta marhobas tu Jahowa dohot tu Jesus. Ra dung mulak karejo, loja do tahilala hape ingkon laho dope muse marpungu di borngin i. Alai dung mulak marpungu, gabe lam togu do tahilala. Songon i ma muse na tahilala molo marsitutu hita marbarita dohot belajar pribadi!
17. Aha do na ingkon taboto, jala aha do na ingkon manat tapingkirhon?
17 Ingkon taboto do, ndang sai sude boi taulahon. Alani i, ingkon manat do hita mamingkirhon aha na laho taulahon. Umpamana, molo ndang manat hita, boi do gabe suda gogonta ala mangalului godang arta. Parrohahon ma na didok Jesus tingki disungkun sahalak baoa na mora ibana. Didok baoa i, “Aha do na ingkon huulahon asa dapothu hangoluan na salelengna?” Halak na burju do baoa i jala diihuthon do sude na didok ni Patik. I do alana tangkas do disurat di Buku Markus na holong do roha ni Jesus tu ibana. Dilehon Jesus do gokkon tu baoa i. Didok, “Laho ma ho, gadis ma sude artam”. Didok Jesus muse, “Dung i, ihuthon ma ahu.” Lomo do roha ni baoa i mangihuthon Jesus, alai ndang olo ibana ala “godang do artana”. (Mrk. 10:17-22) Ujungna, ndang olo ibana manuhuk auga ni Jesus. Jala tongtong do ibana gabe hatoban “ni Hamoraon”. (Mat. 6:24) Molo hamu, aha do na laho pillitonmu?
18. Aha do na ingkon taulahon sian tingki tu tingki, jala boasa?
18 Sian tingki tu tingki, denggan do molo sai tarimangi aha na taharingkothon di ngolunta. Boasa? Asa boi taboto naung marbisuk do hita mamangke gogonta manang na ndang. Parrohahon ma donganta na poso na margoar si Mark na mandok, “Saleleng martaon-taon, didok rohangku nunga sederhana be ngolungku. Merintis do ahu, alai sai hupingkirhon do taringot hepeng jala songon dia asa lam denggan parngoluonku. Gabe sai hupingkiri do boasa susa ngolungkon. Alai gabe huboto ma, diringku sandiri do na huharingkothon. Jala ndang na dumenggan be tingki dohot gogo na hulehon tu Jahowa.” Dipauba si Mark do carana marpingkir dohot parngoluonna asa boi mangulahon na dumenggan tu Jahowa. Didok ibana muse, “Sipata holsoan dope ahu taringot hepeng, alai boi do ahu tongtong marhobas tu Jahowa ala diurupi Jahowa dohot Jesus.”
19. Boasa ingkon taulahon tugasta hombar tu na dihalomohon Jahowa?
19 Adong tolu cara asa boi tongtong dipatogu ala manuhuk auga ni Jesus. Na parjolo, ulahon ma tugasta hombar tu na dihalomohon Jahowa. Ala sian Jahowa do tugasta, ingkon hombar do caranta mangulahon i tu na dihalomohon rohana. Hatoban ni Jahowa do hita, jala Ibana do Tuanta. (Luk. 17:10) Molo taulahon tugasta hombar tu lomo ni rohanta sandiri, gabe susa do hita. Dos do i songon lombu na sai mangalo parmahanna jala ndang olo ditogu-togu. Ujungna gabe loja jala hansit do dihilala lombu i. Alai molo taihuthon tudu-tudu ni Jahowa, boi do hita marhasil mangulahon tugas na didok rohanta ndang boi taulahon. Jala boi do taadopi angka ambat-ambat na didok rohanta ndang boi taadopi. Ingot ma, ndang adong manang ise pe na boi mangambati saut sangkap ni Jahowa.—Rom 8:31; 1 Joh. 4:4.
20. Aha do na boi mambahen hita marlas ni roha manuhuk auga ni Jesus?
20 Na paduahon, ulahon ma tugasta di bagasan holong. Lomo do rohanta mamuji Jahowa, i ma Ama parholong. Di abad na parjolo, adong do angka halak na mangihuthon Jesus alai ndang alani holong. Ujungna, gabe ndang marlas ni roha nasida jala ndang be manuhuk auga ni Jesus. (Joh. 6:25-27, 51, 60, 66; Plp. 3:18, 19) Alai adong do angka na mangihuthon Jesus ala holong do roha ni nasida tu Jahowa dohot tu na asing. Tongtong do marlas ni roha nasida manuhuk auga ni Jesus saleleng mangolu di tano on huhut paimahon pangkirimon ni nasida rap dohot Jesus di surgo. Songon nasida, boi do hita tongtong marlas ni roha manuhuk auga ni Jesus molo taulahon i di bagasan holong.
21. Hombar tu Mateus 6:31-33, aha do na boi paposhon rohanta?
21 Na patoluhon, tongtong ma pos rohanta. Nunga tabahen pengorbanan di ngolunta laho marhobas tu Jahowa. Jala marsitutu do hita mangulahon i. Nunga dipaboa Jesus hian, ra olo do gabe dianiaya hita. Alai pos ma rohanta, sai lehonon ni Jahowa do gogo tu hita asa boi mangadopi angka hasusaan i. Molo boi hita mangadopi i, gabe lam margogo do hita. (Jak. 1:2-4) Pos ma rohanta sai lehonon ni Jahowa do angka na tahaporluhon, togu-toguon ni Jesus, jala urupan ni angka dongan do hita. (Jaha Mateus 6:31-33; Joh. 10:14; 1 Tes. 5:11) Tadapot do sude na tahaporluhon asa boi marhasil tingki mangadopi hasusaan!
22. Aha do na mambahen hita marlas ni roha?
22 Songon borua na marsahit na posi i, dipamalum Jesus do sahitna huhut dipatogu ibana. Alai boi do ibana tongtong dipatogu molo gabe sisean ni Jesus. Pingkirhon ma pasu-pasu na boi dapot ni borua i molo gabe sisean ni Jesus ibana. Boi do ibana rap dohot Jesus di surgo! Gumodang do pasu-pasu na boi dapot ni borua i marimbangkon pengorbanan na dibahen ibana. Alani i, manang didia pe pangkirimonta, mangolu salelengna di surgo manang di tano on, las do rohanta ala naung tajalo gokkon ni Jesus na mandok, “Ro ma hamu tu ahu!”
ENDE 13 Kristus, Sitiruon di Hita
^ par. 5 Ditogihon Jesus do hita asa ro tu ibana. Alani i, aha do na ingkon taulahon? Di parsiajaran on, laho taulas ma sungkun-sungkun on. Jala dipaingot do muse songon dia hita boi dipatogu ala rap saulaon dohot Jesus.
