PARSIAJARAN 37
Boasa Rade Hita Unduk tu Jahowa, jala Songon dia Hita Mangulahon i?
“Alani i, nda tama do pasangaponta Amangta na di banua ginjang i?”—HEB. 12:9.
ENDE 9 Jahowa do Rajanta!
NA LAHO DIULAS *
1. Boasa ingkon unduk hita tu Jahowa?
INGKON unduk * do hita tu Jahowa ala Ibana do Sitompa hita. Alani i, marhak do Ibana mambahen aturan tu angka tompaanna. (Pgk. 4:11) Alai alasan na asing boasa ingkon unduk hita tu Jahowa, i ma ala dumenggan do carana mamarenta. Sian najolo, godang do jolma na mangarajai donganna jolma. Alai molo dibandingkon tu nasida, Jahowa do Parhuaso na umbisuk, parholong jala parasi roha.—2 Mus. 34:6; Rom 16:27; 1 Joh. 4:8.
2. Songon na dipaboa di Heber 12:9-11, boasa ingkon unduk hita tu Jahowa?
2 Lomo do roha ni Jahowa asa taoloi Ibana ndang ala na mabiar hita, alai ala tahaholongi do Ibana. Di suratna tu halak Heber didok si Paulus do, ingkon “pasangaponta Amangta na di banua ginjang i”, na mangalatik hita “laho mambahen na denggan tu hita”.—Jaha Heber 12:9-11.
3. (a) Songon dia hita patuduhon unduk tu Jahowa? (b) Sungkun-sungkun aha na laho taalusi?
3 Na unduk do hita tu Jahowa molo taoloi Ibana sian nasa tolapta. Jala unang ma taasahon pingkiranta sandiri. (Poda 3:5) Gabe lam mura do hita unduk tu Jahowa molo taboto angka parangena na denggan. Alana angka parangena i tarida sian na diulahon Ibana. (Ps. 145:9) Molo lam tatanda Jahowa, gabe lam holong ma rohanta tu Ibana. Molo tahaholongi Jahowa, ndang porlu di hita godang aturan taringot aha na boi dohot na so boi taulahon. Marsitutu ma hita maniru pingkiran dohot pangkilalaan ni Jahowa taringot aha na denggan dohot na so denggan. (Ps. 97:10) Alai boasa sipata maol tahilala laho mangoloi Jahowa? Jala songon dia angka sintua, ama, dohot ina boi maniru contoh sian Gubernur Nehemia, Raja Daud, dohot si Maria omak ni Jesus? Taalusi ma angka sungkun-sungkun i di parsiajaran on.
BOASA NDANG MURA LAHO UNDUK TU JAHOWA
4-5. Hombar tu Rom 7:21-23, boasa ndang sai mura laho unduk tu Jahowa?
4 Sada alasan boasa maol hita unduk tu Jahowa, i ma ala mardosa hita jala ndang sempurna. Alani i, ndang sai mura mangoloi Debata. Tingki dipangan si Adam dohot si Hawa parbue ni hau na diorai Debata, gabe dibahen nasida do aturan di nasida sandiri. (1 Mus. 3:22) Saonari, godang do halak na so mangoloi Jahowa jala gabe nasida sandiri na manontuhon dia na denggan dohot na roa.
5 Nang pe nunga tatanda jala tahaholongi Jahowa, alai maol dope tahilala unduk tu Ibana. Songon i ma na dihilala si Paulus. (Jaha Rom 7:21-23.) Songon si Paulus, lomo do rohanta mangulahon na hombar tu na dihalomohon Jahowa. Alai, ingkon marsitutu do hita mangalo sangkap na roa na adong di dirinta.
6-7. Aha do alasan na asing na mambahen hita maol unduk tu Jahowa?
6 Alasan na asing na mambahen hita maol unduk tu Jahowa, i ma ala adong pengaruh sian hasomalan dohot cara marpingkir ni godang halak di ingananta tading. Godang sian nasida na mandok angka na maralo tu lomo ni roha ni Jahowa. Alani i, ingkon marsitutu do hita asa unang marpingkir songon nasida. Parrohahon ma sada contoh.
7 Di piga-piga inganan, somal do angka na poso dipaksa asa mangalului godang hepeng. On ma na dihilala donganta na margoar si Mary. * Andorang so marsiajar taringot Jahowa, dohot do ibana tu singkola na jago di negarana. Sai dipaksa keluargana do ibana asa mandapot karejo na balga gajina. Jala lomo do rohana tusi. Alai dung marsiajar taringot Jahowa jala lam solhot tu Ibana, gabe muba ma cita-citana. Alai ndang mura dihilala ibana laho unduk tu Jahowa. Didok, “Sipata, olo do gabe tarpingkir ahu asa mangalului godang hepeng. Alana songon i do na diajari natua-tuakku. Alani i, maol do huhilala pasidingkon pingkiran sisongon i. Alai huboto ma, boi do i mangambati ahu manomba Jahowa. Hupangido ma tu Jahowa asa diurupi ahu asa unang manjalo karejo na boi mambahen ahu mandao sian Jahowa.”—Mat. 6:24.
8. Aha do na laho taulas saonari?
8 Songon naung taulas, godang do laba na tadapot molo unduk tu Jahowa. Alai angka halak na dilehon tanggung jawab, songon sintua, ama dohot ina porlu do patuduhon na unduk nasida tu Jahowa. Molo unduk nasida, na asing pe boi do mandapot laba. Taulas ma piga-piga contoh na adong di Bibel na boi mangurupi hita mandalanhon tanggung jawab hombar tu na dihalomohon roha ni Jahowa.
NA BOI DIPARSIAJARI SINTUA SIAN SI NEHEMIA
Angka sintua dohot tu ulaon mangurus Bale Harajaon, songon si Nehemia na dohot karejo rap dohot halak Israel padengganhon Jerusalem (Ida paragraf 9-11) *
9. Aha do ambat-ambat na diadopi si Nehemia?
9 Dilehon Jahowa do tanggung jawab tu angka sintua laho mamparmahani angka naposona. (1 Ptr. 5:2) Angka sintua boi marsiajar sian contoh ni si Nehemia tingki maradophon naposo ni Jahowa. Sahalak gubernur di Juda do si Nehemia jala balga do tanggung jawabna. (Neh. 1:11; 2:7, 8; 5:14) Alai bayangkon ma angka ambat-ambat na diadopi si Nehemia. Diboto ibana ma, dipangke halak Jahudi do bagas joro tu ulaon na so suman. Ndang dilehon nasida sumbangan tu halak Lepi songon na diparentahon Patik. Ndang diihuthon nasida patik taringot Sabbat, jala piga-piga baoa mangoli tu borua sian bangso na so manomba Jahowa. Ingkon diadopi Gubernur Nehemia ma situasi na susa i.—Neh. 13:4-30.
10. Aha do na diulahon si Nehemia tingki mangadopi ambat-ambat?
10 Nang pe sahalak na marpangkat, alai ndang hea dipaksa si Nehemia halak Israel asa mangoloi hatana. Gariada, dipangido ibana do tudu-tudu sian Jahowa marhite tangiang jala diajarhon ibana do Patik tu halak Israel tingki i. (Neh. 1:4-10; 13:1-3) Ala serep do roha ni si Nehemia, olo do ibana rap karejo dohot halak Israel padengganhon tembok ni Jerusalem.—Neh. 4:9.
11. Hombar tu 1 Tessalonik 2:7, 8, ingkon songon dia do sintua maradophon angka dongan di huria?
11 Nang pe ndang sarupa songon si Nehemia ambat-ambat na diadopi angka sintua, alai boi do ditiru nasida si Nehemia marhite piga-piga cara. Umpamana, marsitutu do angka sintua mangurupi angka dongan di huria. Jala ndang didok roha ni nasida, umsangap do nasida sian na asing alani tanggung jawab ni nasida. Lambok do nasida maradophon angka dongan. (Jaha 1 Tessalonik 2:7, 8.) Sian cara ni nasida mangkatai, tarida do holong dohot serep ni roha ni nasida. Si Andrew naung leleng gabe sintua mandok, “Gabe huboto ma las do roha ni angka dongan molo burju jala lambok angka sintua mangkatai tu nasida. On mambahen nasida gabe mura mangihuthon tudu-tudu na dibahen angka sintua.” Sintua na asing, i ma si Tony mandok, “Marsitutu do ahu mangulahon poda di Pilippi 2:3 jala sai tongtong didok rohangku dumenggan do dongan na asing sian ahu. On mangurupi ahu asa unang mamaksa nasida ingkon mangoloi na hudok.”
12. Boasa ingkon serep roha ni angka sintua?
12 Ingkon serep do roha ni angka sintua, ala Jahowa pe serep do rohana. Nang pe Ibana Parhuaso Natumimbul, olo do “dipaserep dirina” laho pahehehon “na metmet sian orbuk”. (Ps. 18:36; 113:6, 7) Jala didok Bibel, sogo do roha ni Jahowa tu angka halak na ginjang roha.—Poda 16:5.
13. Boasa ingkon dipingkirhon angka sintua aha na laho dihatahon jala carana pasahathon i?
13 Sada cara ni sintua patuduhon unduk tu Jahowa, i ma mamingkirhon aha na laho dihatahon jala carana pasahathon i. Molo ndang diulahon ibana i, olo do ra gabe kasar ibana mangkatai molo adong sasahalak na so mangargai ibana. (Jak. 1:26; Gal. 5:14, 15) Si Andrew na dipaboa nangkin mandok, “Sipata, olo do gabe naeng kasar ahu mangkatai tu dongan na hira na so mangargai ahu gabe sintua. Alai hurimangi ma angka contoh sian naposo ni Debata na adong di Bibel. On mangurupi ahu mamboto ringkot do patuduhon serep ni roha jala lambok.” Sintua pe boi do patuduhon unduk tu Jahowa marhite lambok mangkatai tu angka dongan di huria dohot tu sintua na asing.—Kol. 4:6.
NA BOI DIPARSIAJARI AMA SIAN RAJA DAUD
14. Aha do tugas na dilehon Jahowa tu angka ama, jala ingkon songon dia nasida mandalanhon tugas i?
14 Dilehon Jahowa do tugas tu ama gabe kepala keluarga. Dipangido Jahowa do ibana asa mangajari, manogu-nogu jala maminsang ianakhonna. (1 Kor. 11:3; Eps. 6:4) Alai ndang boi lomo-lomona mangulahon tanggung jawab i. Jahowa do na mambahen sude keluarga. Alani i, martanggung jawab do angka ama tu Jahowa asa denggan manarihon keluargana. (Eps. 3:14, 15) Patuduhon na unduk do angka ama tu Jahowa molo diulahon nasida tanggung jawabna hombar tu na dihalomohon Jahowa. Boi do nasida marsiajar sian pengalaman ni Raja Daud.
Cara ni sahalak ama martangiang boi patuduhon tu keluargana molo ibana marserep ni roha (Ida paragraf 15-16) *
15. Boasa Raja Daud gabe sitiruon na denggan tu angka ama?
15 Dipillit Jahowa do si Daud gabe pamimpin di keluargana dohot di saluhut bangso Israel. Ala raja si Daud, marhuaso do ibana. Sada tingki, dipangke ibana do huasona marhite cara na so denggan. Gabe mangulahon dosa ma ibana. (2 Sam. 11:14, 15) Alai unduk do ibana tu Jahowa jala olo do ibana dipinsang. Tingki martangiang, dipaboa ibana do sude na di rohana tu Jahowa. Jala marsitutu do ibana mangoloi poda sian Jahowa. (Ps. 51:3-6) Asing ni i, serep do rohana manjalo poda sian angka borua. (1 Sam. 19:11, 12; 25:32, 33) Ringkot do di si Daud laho manomba Jahowa jala marsiajar do ibana sian hasalaanna.
16. Aha do na boi diparsiajari angka ama sian contoh ni si Daud?
16 Aha do na boi diparsiajari angka ama sian contoh ni si Daud? Denggan ma ulahon hamu tanggung jawab na dilehon Jahowa. Angkui ma hasalaanmuna, jala tangihon ma poda na sian Bibel na dilehon halak na asing. Molo serep rohamuna, gabe diargai keluargamuna ma hamu. Tingki martangiang rap dohot keluarga, paboa ma tu Jahowa sude na adong di rohamuna asa diboto nasida na marhaposan do hamu tu Jahowa. Jala na rumingkot, sai haringkothon ma laho manomba Jahowa di ngolumuna. (5 Mus. 6:6-9) Molo dibahen hamu contoh na denggan tu keluargamuna, boi do i gabe pasu-pasu di nasida.
NA BOI DIPARSIAJARI INA SIAN SI MARIA
17. Aha do tugas na dilehon Jahowa tu angka ina?
17 Dilehon Jahowa do tugas na ringkot tu angka ina di keluarga ni nasida. Martanggung jawab do nasida tu ianakhonna. (Poda 6:20) Aha na diulahon dohot na dihatahon sahalak ina, adong do pengaruhna tu ianakhonna saleleng ngoluna. (Poda 22:6) Taulas ma aha na boi diparsiajari angka ina sian contoh ni si Maria, omak ni Jesus.
18-19. Aha do na boi diparsiajari angka ina sian contoh si Maria?
18 Tangkas do diboto si Maria Hata ni Debata. Unduk do ibana tu Jahowa jala togu do parale-aleonna tu Ibana. Rade do ibana mangulahon parenta ni Jahowa, nang pe gabe muba ngoluna alani i.—Luk. 1:35-38, 46-55.
Tingki loja dihilala sahalak ina, ingkon lam marsitutu do ibana laho patuduhon holong tu keluargana (Ida paragraf 19) *
19 Angka ina, aha do na boi diparsiajari hamu sian si Maria? Na parjolo, sai patogu ma parale-aleonmuna tu Jahowa marhite ringgas marsiajar Bibel sahalakmuna dohot martangiang. Na paduahon, rade ma mambahen las roha ni Jahowa, nang pe gabe adong na muba di ngolumuna. Umpamana, ra natua-tuamuna mura muruk jala kasar mangkatai tu ianakhonna. Alani i, gabe didok rohamu ma, on do cara na denggan laho pagodang-godangkon ianakhonmuna. Nang pe nunga diparsiajari hamu prinsip ni Jahowa, alai maol do dihilala hamu asa tongtong dame jala sabar tarlumobi tingki tangkang ianakhonmuna hape nunga loja hamu. (Eps. 4:31) Di tingki sisongon i, porlu do hamu martangiang tu Jahowa asa diurupi. Sahalak ina na margoar si Lydia mandok, “Sipata, leleng do ahu martangiang asa unang kasar ahu mangkatai tingki ndang dioloi anakku ahu. Olo do so ahu satongkin tingki mangkatai, dung i martangiang ma ahu di bagasan roha asa diurupi Jahowa. Tangiang i mambahen dame pangkilalaanku.”—Ps. 37:5.
20. Aha do ambat-ambat na diadopi angka ina, jala songon dia ibana boi marhasil mangadopi i?
Tit. 2:3, 4) Ra, piga-piga sian nasida magodang di keluarga na so solhot natua-tua tu ianakhonna. Molo hea do dihilala hamu songon i, unang ma bahen hamu muse songon i tu ianakhonmuna. Sahalak ina na unduk tu Jahowa lomo rohana marsiajar carana patuduhon holong tu ianakhonna. Ra maol do di ibana paubahon cara marpingkir, pangkilalaan, dohot parniulaonna. Alai boi do ibana marhasil mambahen hamubaon i. Jala boi do i parohon laba tu keluargana.
20 Adong do ambat-ambat na asing na diadopi angka ina. Olo do maol dihilala nasida patuduhon holong tu ianakhonna. (TONGTONG MA UNDUK TU JAHOWA
21-22. Hombar tu Jesaya 65:13, 14, pasu-pasu aha do na boi tadapot molo unduk tu Jahowa?
21 Diboto Raja Daud do laba ni unduk tu Jahowa. Didok ibana, “Tigor do patik ni Jahowa, angka sipalas roha; pita do patik ni Jahowa, dipatiur do parnidaan. Naposom pe dapotan sipaingot do hinorhon ni, godang do upa ni na mangaradoti angka i.” (Ps. 19:9, 12) Saonari, boi do taida imbar ni halak na unduk tu Jahowa dohot halak na so olo manangihon podana. Angka halak na unduk tu Jahowa boi tongtong marlas ni roha.—Jaha Jesaya 65:13, 14.
22 Tingki angka sintua, ama dohot ina unduk tu Jahowa, boi do lam denggan ngolu ni nasida, lam marlas ni roha keluarga, jala huria pe lam marsada. Alai na rumingkot, nasida boi mambahen las roha ni Jahowa. (Poda 27:11) On ma pasu-pasu na umbalga na boi tadapot!
ENDE 123 Marsihohot jala Unduk ma tu Jahowa
^ par. 5 Di parsiajaran on, laho taulas ma boasa ingkon unduk hita tu Jahowa. Laho taulas ma muse songon dia angka sintua, ama dohot ina boi maniru Gubernur Nehemia, Raja Daud, dohot si Maria omak ni Jesus taringot mangulahon tanggung jawab ni nasida.
^ par. 1 HATA NA DIPATORANG: Hata unduk boi do ndang denggan lapatanna di halak na dipaksa ingkon mangoloi halak na asing. Alai dipillit naposo ni Jahowa do asa mangoloi Ibana. Alani i, las do roha ni nasida unduk tu Ibana.
^ par. 7 Piga-piga goar di artikel on nunga diganti.
^ par. 62 HATORANGAN NI GAMBAR: Sahalak sintua rap mangarawat Bale Harajaon dohot anakna, songon si Nehemia na olo mangurupi ulaon padengganhon tembok Jerusalem.
^ par. 64 HATORANGAN NI GAMBAR: Sahalak ama na paboahon sude pangkilalaanna tu Jahowa tingki rap martangiang dohot keluargana.
^ par. 66 HATORANGAN NI GAMBAR: Sada dakdanak mar-game saleleng marjom-jom jala ndang dikarejohon ibana PR-na. Nang pe naung loja omakna mulak sian karejo, alai ndang muruk jala ndang kasar omakna i mangkatai tingki maminsang ibana.