1. Di tikki sisongon dia do boi gabe maol manomba Jahowa?

DI TIKKI sisongon dia do hamu boi gabe maol manomba Jahowa? Tikki godang do masalahmuna manang tikki dang adong masalahmuna? Molo adong masalahta pittor hatop do hita marhaposan tu Jahowa. Alai boha do molo dang adong masalahta? Olo do gabe lupa hita rikkot ni manomba Jahowa? Dipasingot Jahowa do halak Israel na boi do on masa tu nasida.​—5 Mus. 6:10-12.

2. Aha do na diulahon Raja Asa?

² Sitiruon na denggan do Raja Asa ala marbisuk jala marhaposan tu Jahowa. Toktong do disomba ibana Jahowa di tikki susa nang di tikki na dame. Saleleng ngoluna ‘marsihohot do roha ni si Asa tu Jahowa’. (1 Raj. 15:14) Tarida do na disomba ibana Jahowa sian nasa rohana tikki dihancurhon ibana panombaon na so sittong di Juda. Didok di Bibel, “Dipadao ibana do angka langgatan na asing dohot angka pamelean ni sipelebegu, dipuntari do angka tugu pamelean jala dipangarumpakhon do angka tiang parsombaon.”(2 Kron. 14:3, 5, Bibel siganup ari) Jala barani do ibana mamecat si Maaka oppung boruna sian pangkatna na timbo di istana. Boasa diulahon ibana i? Ala dijujui oppungna i do akka halak manomba gana-ganaan.​—1 Raj. 15:11-13.

3. Aha do na lao taulas di artikel on?

³ Dang holan manghancurhon gana-ganaan Raja Asa. Alai diurupi ibana do muse halak Juda asa manomba Jahowa. Dipasu-pasu Jahowa do Raja Asa dohot halak  Juda, gabe dihilala nasida ma hadameon. Saleleng sappulu taon pamarettaon ni si Asa gabe dame ma luat i. (2 Kron. 13:23; 14: 3, 5) Di artikel on, taulas ma songon dia Raja Asa marbisuk di tikki masa hadameon i. Taulas ma muse songon dia halak Kristen di abad na parjolo marbisuk do tong saleleng masa hadameon, songon si Asa. Jala taulas ma sukkun-sukkun on, molo bebas do hamu manomba Jahowa di negaramuna, boha do hamu boi marbisuk di tikki masa hadameon i?

4. Songon na disurat di 2 Kronika 14:1, 5, 6, songon dia do Raja Asa marbisuk di tikki masa hadameon?

⁴ Jaha 2 Kronika 14:1, 5, 6. Dipaboa si Asa do tu halak Juda, Jahowa do na mambahen nasida “sonang” jala mambahen dame luat i. Alai, dang marsonang-sonang Raja Asa di tikki masa hadameon i. Gariada dibangun ibana do akka kota, akka tembok, akka menara, dohot akka gerbang ni kota. Didok ibana ma tu akka halak Juda, “Ai hita dope nampuna tano i.” Aha do maksud ni si Asa disi? Maksudna disi, ala dang adong be akka musu di luat i, dang adong be na boi mangabbati nasida mambangun akka kota i. Dijujui ibana do halak Juda asa marbisuk saleleng masa hadameon i.

5. Boasa ditambai si Asa tentarana?

⁵ Di tikki i, ditambai Raja Asa do muse akka tentarana. (2 Kron. 14:7) Dang ala so porsea ibana tu Jahowa umbahen na diulahon ibana songon i. Diboto si Asa do, tugas ni raja do mangurupi rakyatna asa boi mangadopi aha na lao masa. Diboto si Asa do dang sai torus dame situasi di luat i, jala tutu do i na masa.

6. Aha do na diulahon halak Kristen di abad na parjolo tikki masa hadameon?

⁶ Nang pe jotjot halak Kristen di abad na parjolo dianiaya, alai hea do tong dihilala nasida masa hadameon. Aha do na diulahon nasida saleleng masa hadameon i? Torus do marbarita akka halak na setia di tikki i. Didok do di Bibel, “dihabiari nasida do Jahowa di parngoluon ni nasida”. Torus do nasida marbarita na uli jala hasilna ‘lam tamba ma godang ni nasida’. Dipasu-pasu Jahowa do nasida ala semangat marbarita saleleng masa hadameon i.​—Ul. 9:26-31.

7-8. Songon dia do si Paulus dohot halak Kristen di abad na parjolo mamakke kesempatan lao marbarita na uli?

⁷ Manang sadihari pe, torus do halak Kristen di abad na parjolo pasahatton barita na uli. Uppamana, tikki diboto si Paulus godang nai dope halak Epesus na ikkon mambege barita na uli, dipakke ibana do kesempatan i lao marbarita tu nasida. Jala gabe disi ma ibana tinggal.​—1 Kor. 16:8, 9.

⁸ Tikki adong masalah sunat taon 49 M, di tikki i ma muse adong kesempatan ni si Paulus dohot halak Kristen marbarita na uli. (Ul. 15:23-29) Dung dipaboa keputusan taringot sunat i tu akka huria, gabe lam semangat ma halak Kristen di abad na parjolo paboahon “barita na uli taringot tu hata ni Jahowa”. (Ul.15:30-35) Aha do hasilna? Bibel mandok, “Gabe lam togu ma haporseaon ni angka huria i jala lam tamba ma bilangan ni nasida ganup ari.”​—Ul. 16:4, 5.

9. Songon dia do ulaon marbarita na uli di godangan negara saonari, jala aha do na porlu tasukkun tu diritta sandiri?

⁹ Di godangan negara, bebas do hita marbarita na uli. Boha molo di negaramuna? Molo bebas do hita marbarita tasukkun ma diritta, ‘Songon dia do au mamakke kebebasan on?’ Di ari parpudi on, lam semangat do naposo ni Debata marbarita dohot mangajari, ala on do ulaon na umbalga na hea diulahon di tano on. (Mrk. 13:10) Godang do na boi taulahon lao mendukung ulaon on.

10. Songon na didok di 2 Timoteus 4:2, aha do na ikkon taulahon?

¹⁰ Aha do na boi diulahon hamu di tikki masa hadameon on? (Jaha 2 Timoteus 4:2.) Boi do hamu dohot keluargamuna mangalehon gumodang tikki dohot gogo di ulaon marbarita? Misalna, boi do hamu merintis? Dang tikkina be saonari papunguhon arta, alana dang boi i paluahon hita tikki masa haporsuhon bolon.​—Poda 11:4; Mat. 6:31-33; 1 Joh. 2:15-17.

11. Aha do na diulahon parbarita asa boi mangurupi godang halak?

¹¹ Godang do parbarita na marsiajar bahasa na baru asa boi nasida mangurupi godang halak marsiajar taringot Jahowa. Diparade organisasi do publikasi di godang bahasa, lao mangurupi nasida marbarita. Uppamana di taon 2010, holan 500 bahasa dope publikasitta. Alai saonari nungnga adong lobi sian 1.000 bahasa!

12. Aha do labana molo dibege halak barita taringot Jahowa di bahasa ni nasida sandiri? Paboa ma sada pengalaman.

¹² Songon dia do pakkilalaan ni akka  halak tikki mambege taringot Jahowa di bahasa ni nasida? Parrohahon ma pengalaman ni sahalak donganta borua tikki ro ibana tu kebaktian regional di Memphis, Tennessee, Amerika Serikat. Dibahen do kebaktian on di bahasa Kinyarwanda, bahasa na dipakke godang halak di Rwanda, Kongo (Kinshasa), dohot Uganda. Dung sae kebaktian, didok donganta borua na marbahasa Kinyarwanda i ma, “On dope parjolo sahali takkas huattusi sude acara kebaktian. Hape nungnga 17 taon au tinggal di Amerika on.” Takkas ma, hona hian do tu rohana kebaktian i ala dibahen di bahasana sandiri. Molo cocok do situasimuna, boi do hamu marsiajar bahasa na baru lao mangurupi akka halak di luatmuna? Lomo do roha ni halak mambege barita na uli, molo dipasahat i di bahasa ni nasida sandiri? Nang pe ikkon dibahen hamu pengorbanan lao mangulahon i, pasti las do rohamuna.

13. Aha do na diulahon akka donganta di Rusia tikki masa hadameon?

¹³ Di piga-piga negara na asing, dang bebas akka donganta marbarita na uli ala diorai pamaretta. Misalna, parrohahon ma aha na masa tu akka donganta di Rusia. Saleleng martaon-taon, diorai pamaretta do nasida marbarita na uli. Alai di bulan Maret 1991, dang diorai pamaretta be nasida. Di tikki i, adong do 16.000 Sitindangi di Rusia. Alai 20 taon dukkon i, nungnga adong 160.000 Sitindangi di negara i! Takkas ma, marbisuk do akka donganta disi mamakke kebebasan ni nasida lao marbarita na uli. Memang dang sai torus nasida boi bebas marbarita. Alai nang pe muba situasina di negara i, diulahon nasida do sian nasa tolapna lao manomba Jahowa.

14-15. Songon dia do Jahowa mangurupi si Asa?

¹⁴ Di tikki ni si Asa ujungna salpu do masa hadameon i. Ro ma lobi sian sajuta tentara ni Etiopia. Pos hian do roha ni si Jara, i ma panglima tentara ni Etiopia, na lao taluhononna do halak Juda. Alai pos do roha ni Raja Asa tu Debata Jahowa. Di tangiangna didok si Asa, “Urupi ma hami ale Jahowa Debatanami. Ai Ho do na hupangasahon hami, jala ala ni goarMu do umbahen na ro hami mangalo musu na godang on.”​—2 Kron. 14:11, Bibel siganup ari.

¹⁵ Nang pe dua hali lipat unggodang tentara ni Etiopia sian tentara ni si Asa, alai porsea do ibana pasti diurupi Jahowa do nasida. Jala tutu do diurupi Jahowa nasida. Boi do ditaluhon nasida tentara ni Etiopia.​—2 Kron. 14:7-12.

16. Sian dia do taboto dang sai torus boi masa hadameon?

¹⁶ Memang dang taboto aha na lao masa tu hita di ari na naeng ro. Alai taboto, dang sai torus hita boi bebas manomba Jahowa. Nungnga didok Jesus tu akka siseanna, di akka ari parpudi “sogo ma roha ni sude jolma” tu nasida. (Mat. 24:9) Gariada, didok Apostel Paulus do, “Dibahen do na hansit tu sude halak na naeng manomba Debata jala na gabe sisean ni Kristus Jesus.” (2 Tim. 3:12) “Muruk situtu” do Sibolis, jadi pasti adong do dampakna tu hita saonari.​—Pgk. 12:12.

17. Songon dia do haporseaotta diuji haduan?

¹⁷ Satokkin nai, lao diuji ma haporseaotta. Ro nama “hasusaan bolon na so hea dope masa sian mulai adong portibi on sahat tu saonari”. (Mat. 24:21) Di tikki i, olo do ra dialo keluargatta hita jala diorai ulaotta marbarita. (Mat. 10:35, 36) Songon si Asa, pos do rohatta na lao urupan ni Jahowa do hita?

18. Songon na disurat di Heber 10:38, 39, songon dia do asa boi hita rade mangadopi aha na lao masa?

¹⁸ Diurupi Jahowa do hita saonari asa togu haporseaotta. Dipakke Jahowa do  “naposo haposan jala na marbisuk” lao mangalehon hita “mangan di tingkina”. (Mat. 24:45) Alai hita sandiri pe ikkon marsitutu do patoguhon haporseaotta tu Jahowa.​—Jaha Heber 10:38, 39.

19-20. Dung tajaha 1 Kronika 28:9, aha do na porlu tasukkun tu diritta, jala boasa ikkon tasukkun i?

¹⁹ Songon Raja Asa, hita pe ikkon “mangalului Jahowa”. (2 Kron. 14:3; 15:1, 2) Tikki taparsiajari taringot Jahowa jala ujungna tardidi, i ma buktina na talului do Jahowa. Marsitutu do hita asa lam togu holongta tu Jahowa. Tasukkun ma diritta, ‘Taratur do au ro tu parpunguan?’ Di parpunguan ni Sitindangi Ni Jahowa, dipatogu do hita asa toktong manomba Jahowa. Jala disi ma tong hita dipatogu akka donganta. (Mat. 11:28) Ikkon tasukkun do muse diritta, ‘Hujaha do Bibel ganup ari?ʼ Molo tinggal dohot keluarga do hamu, dibahen hamu do jadwal ibadat keluarga? Alai molo sahalakmuna do, taratur do hamu pelajaran pribadi? Jala diulahon hamu do na dumenggan tikki marbarita dohot mangajari?

²⁰ Boasa ikkon tasukkun diritta? Didok do di Bibel dipareso Jahowa do roha dohot pikkiranta, jadi hita pe ikkon tapareso do roha dohot pikkiranta. (Jaha 1 Kronika 28:9.) Molo adong na ikkon tapauba sian pikkiran dohot tujuanta, tapangido ma asa diurupi Jahowa hita. Saonari ma tikkina taparade diritta lao mangadopi aha na lao masa. Marbisuk ma hamu mamakke tikki saleleng masa hadameon on. Unang ma paloas manang aha pe mangabbati hamu mangulahon i!