1. Aha do gokkon na dilehon Jesus tu opat sijala dekke i, jala boha do reaksi ni nasida?

SIJALA dekke do si Petrus, si Andreas, si Jakobus, dohot si Johannes. Pasti songgot do roha ni nasida tikki dibege nasida gokkon ni Jesus, “Ihuthon hamu ma ahu, asa hubahen hamu gabe sijala jolma.” * Boha ma reaksi ni nasida tikki mambege i? Bibel mandok, “Dung i pintor ditadingkon nasida ma jala ni nasida i, laos diihuthon ma Jesus.” (Mat. 4:18-22) Keputusan on mambahen muba ngolu ni nasida salelengna. Dang be sijala dekke nasida, alai ‘gabe sijala jolma ma nasida’. (Luk. 5:10) Saonari pe digokkon Jesus do halak na tulus roha na makkaholongi hasittongan lao gabe sijala jolma. (Mat. 28:19, 20) Olo do hamu manjalo gokkon ni Jesus on?

2. Boasa ikkon jolo tapikkiri keputusanta naeng gabe sijala jolma, jala aha do na boi mangurupi hita mambahen keputusan i?

² Nungnga leleng ra hamu marsiajar Bibel jala nungnga dibahen hamu hamubaon di ngolumuna. Saonari, naeng dibahen hamu ma keputusan gabe sahalak parbarita. Alai molo dang pos dope rohamuna, unang ma metmet rohamuna. Alana diboto hamu keputusan na massai rikkot do on. Memang didok do di Bibel “pintor” ditadikkon si Petrus dohot akka donganna do jala ni nasida. Alai dibahen nasida pe keputusan i, ala naung jolo dipikkiri nasida hian do i. Nungnga lobi sian onom bulan naung salpu diboto nasida molo Jesus i Messias. (Joh. 1:35-42) Dos songon i ma, nungnga godang ra na diparsiajari hamu taringot Jahowa dohot Jesus. Jala lomo rohamuna asa lam jonok tu Jahowa. Alai, andorang so dibahen hamu keputusan gabe sahalak parbarita, ikkon manat do dipikkiri hamu i.  Aha do na mangurupi si Petrus, si Andreas, dohot na asing mambahen keputusan on?

3. Akka parange aha do na boi mangurupi hamu manjalo gokkon ni Jesus on?

³ Halak na semangat jala barani do sisean ni Jesus di abad na parjolo. Diboto nasida do cara asa marhasil jala boi do nasida mangarajai diri. Akka parange on ma na mangurupi nasida asa gabe sijala jolma na denggan. Artikel on lao mangulas songon dia asa lam denggan hamu marbarita na uli dohot mangajari na asing.

4. Boasa manakkup dekke karejo ni si Petrus?

⁴ Manakkup dekke do karejo ni si Petrus lao mangurupi keluargana. Alai dang holan karejo sambing i di ibana. Lomo do roha ni si Petrus manakkup dekke. (Joh. 21:3, 9-15) Marsiajar do ibana muse asa lomo rohana gabe sijala jolma. Ala diurupi Jahowa, gabe malo ma si Petrus mangulahon ulaonna i.​—Ul. 2:14, 41.

5. Hombar tu Lukas 5:8-11 aha do na mambahen si Petrus mabiar, jala aha do na boi mangurupi hita molo mabiar hita?

⁵ Holongta tu Jahowa mambahen hita semangat marbarita na uli jala paboahon taringot Ibana tu na asing, nang pe tahilala dang pola malo hita. Tikki digokkon Jesus si Petrus asa gabe sijala jolma, didok Jesus ma tu ibana, ‘Unang mabiar ho.’ (Jaha Lukas 5:8-11.) Dang na mabiar si Petrus taringot tu aha na lao masa molo ibana gabe sisean ni Jesus. Alai di tikki i, longang do ibana mangida godang ni dekke na dapot ni Jesus. Gabe dihilala si Petrus ma dang tama ibana saulaon dohot Jesus. Alai mabiar do ra hamu tu  akka na lao ulahononmuna molo gabe sisean ni Kristus. Molo songon i do pakkilalaanmuna, patogu ma holongmuna tu Jahowa, tu Jesus, dohot tu akka dongan. Ujungna, gabe rade ma hamu manjalo gokkon ni Jesus gabe sijala jolma.​—Mat. 22:37, 39; Joh. 14:15.

6. Aha do na mambahen hita semangat marbarita?

⁶ Rimangi ma muse alasan na asing boasa hita ikkon semangat marbarita. Lomo do rohatta mangoloi paretta ni Jesus na mandok, “Laho ma hamu, bahen ma saluhut halak . . . gabe siseanku.” (Mat. 28:19, 20) Jala taida do godang halak saonari na ‘disusai jala dang disarihon’. Las do roha ni nasida mamboto hasittongan taringot Harajaon ni Debata. (Mat. 9:36) Lomo do roha ni Jahowa asa saluhut jolma mandapot parbinotoan na bagas taringot tu hasittongan, jala asa boi nasida malua.​—1 Tim. 2:4.

7. Songon na didok di Rom 10:13-15, boasa massai rikkot ulaon marbarita di hita?

⁷ Ala taboto ulaon marbarita na uli boi paluahon ngolu ni halak, gabe taronjar ma rohatta lao mangulahon on. Molo sijala dekke biasana diallang manang digadis ibana do dekke na dapotna. Alai molo “manjala” jolma hita, taurupi do nasida asa boi malua.​—Jaha Rom 10:13-15; 1 Tim. 4:16.

8-9. Aha do na porlu diboto sijala dekke, jala boasa?

⁸ Di jaman ni Jesus, ikkon diboto sijala dekke do dekke na dia na lao sitakkuponna. (3 Mus. 11:9-12) Ikkon diboto ibana do muse didia inganan ni dekke i. Biasana dekke marpungu di inganan na aekna cocok tu dekke i, jala godang siallangonna disi. Porlu do tong diboto sijala dekke andigan tikki na pas manakkup dekke. Parrohahon ma na didok sahalak donganta di Kepulauan Pasifik taringot andigan tikki na pas lao manakkup dekke. Tikki naeng manjala dekke ibana dohot sahalak misionaris, didok misionaris i ma, “Jam sia pagi ma hita sogot pajuppang ate.” Alai dialusi donganta i ma, “Dang songon i brur, ikkon taboto do andigan tikki na pas lao manjala dekke. Dang tikki na pas di hita.”

⁹ Akka sijala jolma di abad na parjolo, lao do tu inganan ni godang halak. Jala diboto nasida do andigan tikki na pas lao manjuppangi akka jolma disi. Uppamana marbarita do nasida di bagas joro, di akka sinagoga, sian jabu tu jabu, dohot di pasar. (Ul. 5:42; 17:17; 18:4) Hita pe ikkon taboto do hasomalan ni akka halak na tinggal di luatta. Ikkon tasesuaihon do didia jala andigan tikki na pas lao manjuppangi nasida.​—1 Kor. 9:19-23.

10. Aha do akka alat na diparade organisasi ni Jahowa tu hita?

¹⁰ Adong do alat na dipakke sijala dekke, jala ikkon diboto ibana do cara mamakke i. Dos songon i ma, adong do alat na tapakke tikki marbarita. Jala ikkon taboto do cara mamakke i. Takkas do dipaboa Jesus tu akka siseanna songon dia carana marbarita na uli. Dipaboa ibana do aha na diboan, tu dia lao marbarita, jala aha na porlu sidohonon ni nasida. (Mat. 10:5-7; Luk. 10:1-11) Saonari diparade organisasi ni Jahowa do Angka Alat Laho Mangajari na mangurupi hita asa lam denggan marbarita. * Diajari do hita  carana mamakke akka alat on. Pelatihan on mangurupi hita asa lam malo marbarita dohot mangajari.​—2 Tim. 2:15.

11. Boasa ikkon barani sijala jolma?

¹¹ Ikkon barani do sijala dekke ala olo do muba-uba cuaca, jala toppu masa badai di laut. Jotjot do muse nasida karejo tikki borngin. Tikki marbarita na uli hita jala tapatandahon diritta sahalak Sitindangi Ni Jahowa, taadopi do tong na songon “badai”. Misalna, olo do ra hita ditentang keluarga, direhei akka dongan, manang olo do dang dijalo halak barita na tapasahat. Dang pola longang be rohatta disi. Nungnga dipasingot Jesus na lao suruonna do akka siseanna marbarita tu akka halak na marsogo ni roha tu nasida.​—Mat. 10:16.

12. Songon na disurat di Josua 1:7-9, aha do na boi mangurupi hita asa barani?

¹² Aha do na boi ulahononmuna asa lam barani hamu? Na parjolo, papos ma rohamuna Jesus do na manguluhon ulaon on sian surgo. (Joh. 16:33; Pgk. 14:14-16) Dung i, patogu ma haporseaonmuna tu janji ni Jahowa na lao jagaonna do hamu. (Mat. 6:32-34) Lam togu haporseaonmuna, lam barani ma hamu. Dipatudu si Petrus dohot akka donganna do haporseaon na togu, tikki ditadikkon nasida karejo ni nasida lao mangihutton Jesus. Hamu pe, dipatudu hamu do  haporseaon na togu molo dipaboa hamu tu keluarga dohot donganmuna, naung marsiajar Bibel hamu dohot Sitindangi Ni Jahowa jala ro tu parpunguan ni nasida. Pasti nungnga godang dibahen hamu hamubaon di ngolumuna asa boi mangolu hombar tu prinsip ni Jahowa. Diulahon hamu pe i, alana barani do hamu jala porsea. Molo lam barani hamu, lam pos ma rohamuna molo ‘Jahowa Debatam mandongani hamu, manang tu dia pe hamu mangalakka’.​—Jaha Josua 1:7-9.

13. Aha do na porlu tarimangi jala tatangiakkon asa boi hita barani?

¹³ Aha dope na boi mangurupi hamu asa barani? Martangiang ma hamu mangido habaranion. (Ul. 4:29, 31) Dialusi Jahowa do tangiangmuna, jala dang na lao tadikkononna hamu. Sai rade do Ibana mangurupi hamu. Rimangi ma songon dia cara ni Jahowa paluahon naposona di tikki naung salpu. Diurupi Jahowa do halak Israel menyeberangi Laut Merah. (2 Mus. 14:13) Jadi pasti urupan ni Jahowa do tong hamu asa boi gabe sisean ni Kristus. Rimangi ma muse songon dia Jahowa mangurupi hamu mangadopi masalahmuna. Jala dilehon do tu hamu gogo asa boi marhamubaon. Boi ma hamu marhaporseaon tu Jahowa songon haporseaon ni panurat Psalmen na mandok, “Jahowa do donganku, ndang mabiar ahu, tung aha ma tagamon bahenon ni jolma tu ahu?”​—Ps. 118:6.

14. Aha do na boi diparsiajari hamu sian pengalaman ni si Masae dohot si Tomoyo?

¹⁴ Cara na asing muse na boi mangurupi hita asa barani, i ma mamparsiajari songon dia Jahowa mangurupi akka halak na parila gabe barani. Parrohahon ma pengalaman ni sahalak donganta borua na margoar si Masae. Parila do ibana, jala dihilala ibana dang mungkin ibana boi marbarita na uli. Didok ibana massai maol do makkatai tu halak na so ditanda. Dos do i songon manjakkit tembok na massai timbo. Alai marsitutu do ibana pabagashon holongna tu Debata dohot tu akka dongan. Dirimangi ibana do rikkot ni pasahatton barita na uli. Jala martangiang do ibana tu Debata asa barani ibana marbarita. Jadi dang mabiar be ibana, jala nungnga gabe perintis biasa ibana saonari. Boi do muse Jahowa mangurupi halak na baru gabe parbarita na uli asa barani. Parrohahon ma pengalaman ni sahalak donganta borua na margoar si Tomoyo. Tikki baru marbarita dope ibana sian jabu tu jabu, pittor disonggak sahalak parjabu ma ibana, “Dang lomo rohakku makkatai dohot Sitindangi Ni Jahowa!” Jala gogo ma ditutuphon pintuna i. Alai dang mabiar si Tomoyo. Didok ibana ma tu donganna marbarita i, “Dibereng ho do. Dang hudok dope manang aha, nungnga ditanda ibana hita Sitindangi Ni Jahowa. Las hian do rohakku!” Saonari si Tomoyo nungnga gabe perintis biasa.

15. Songon dia do halak na mangarajai diri, jala boasa porlu taulahon i?

¹⁵ Ikkon boi do sijala dekke mangarajai dirina asa marhasil. Ikkon tibu do ibana dungo, ikkon pasaeonna do karejona, jala ikkon martahan do ibana nang pe dang denggan cuaca. Jadi halak na mangarajai diri ikkon boi do mambahen dirina mangulahon aha na ikkon siulahononna. Hita pe porlu do tarajai diritta asa boi martahan pasaehon ulaonta.​—Mat. 10:22.

16. Boha do carana asa boi takarejohon ulaon na maol?

 ¹⁶ Somalna lomo do rohatta makkarejohon ulaon na mura diulahon. Alai sipata ulaon na rikkot do na maol diulahon. Alani i porlu do tarajai diritta. Ikkon talatik do diritta mangulahon ulaon na maol di hita. Urupan ni Jahowa do hita marhite tondi parbadiana.​—Gal. 5:22, 23.

17. Di 1 Korint 9:25-27, aha do na diulahon si Paulus asa boi dirajai ibana dirina?

¹⁷ Boi do dirajai Apostel Paulus dirina. Alai didok ibana ikkon tong do ‘dilissingi’ ibana dirina asa boi mangulahon na sittong. (Jaha 1 Korint 9:25-27.) Jala dijujui ibana do na asing asa boi mangarajai diri. Didok ibana do, “ingkon denggan do sude mardalan jala taratur” tikki mangulahon ulaon ni nasida. (1 Kor. 14:40) Jadi, ikkon marsitutu do hita mangulahon ulaon panombaonta tu Jahowa, termasuk ma i taratur marbarita dohot mangajari.​—Ul. 2:46.

18. Aha do na ikkon taulahon asa boi hita marhasil di jolo ni Jahowa?

¹⁸ Didok do marhasil sijala dekke, molo godang dapotna dekke. Alai dang songon i molo di ulaon marbarita na uli. Boi do hita marhasil dang soal sadia godang na taurupi gabe Sitindangi Ni Jahowa. (Luk. 8:11-15) Marhasil do hita di jolo ni Jahowa molo toktong taulahon ulaonta marbarita dohot mangajari. Boasa? Ala toktong do taulahon aha na dipangido Jahowa dohot Jesus.​—Mrk. 13:10; Ul. 5:28, 29.

19-20. Boasa ikkon lam ringgas hita marbarita na uli saonari?

¹⁹ Di piga-piga negara, holan di bulan-bulan naung ditottuhon do boi manakkup dekke. Alani i, molo naeng sae nama musim ni manakkup dekke i, ikkon lam ringgas do sijala dekke manakkup dekke. Hita pe sijala jolma ikkon lam ringgas do mangulahon ulaon marbarita saonari, ala nungnga lam jonok be ujungna. Otik nai nama tikkinta lao marbarita na uli na boi paluahon ngolu ni halak. Jadi unang ma dipaima hamu jolo denggan situasimuna, baru pe diulahon hamu ulaon na rikkot on.​—Pjm. 11:4.

²⁰ Ikkon lam semangat jala barani ma hamu saonari. Pabagas ma parbinotoanmuna taringot Bibel jala marsitutu ma hamu mangarajai diri. Rap saulaon ma hamu dohot lobi sian ualu juta halak na marbarita na uli di liat portibi on. Molo diulahon hamu i, dapotmuna ma silas ni roha sian Jahowa. (Neh. 8:10) Toktong ma hamu marbarita sappe didok Jahowa nungnga sae be ulaon i. Di artikel na mangihut taulas ma tolu cara na boi mangurupi hita asa lam ringgas pasahatton barita na uli taringot Harajaon.