1-2. Aha do hubungan ni Parjamita 11:6 tu ulaon marbarita?

DI PIGA-PIGA negara lomo do roha ni halak manangihon barita na uli, ala i do na dipaima-ima nasida. Di negara na asing, dang pola lomo roha ni halak mamboto taringot tu Debata manang taringot tu Bibel. Alai molo di ingananmuna, songon dia do tanggapan ni halak? Dang soal songon dia tanggapan ni nasida, lomo do roha ni Jahowa asa toktong hita marbarita, sahat tu na didok Ibana nungnga sae be ulaon i.

² Nungnga ditottuhon Jahowa andigan sae ulaon marbarita, “dung pe i asa ro ujungna”. (Mat. 24:14, 36) Alai aha do na ikkon taulahon asa semangat hita marbarita na uli sahat tu na didok Jahowa nungnga sae be ulaon i?​—Jaha Parjamita 11:6.

3. Aha do na lao taulas di artikel on?

³ Di parsiajaran naung salpu nungnga taulas opat cara na boi mangurupi hita gabe “sijala jolma” na marhasil. (Mat. 4:19) Di artikel on, taulas ma tolu cara asa toktong hita semangat marbarita, dang soal songon dia situasitta. Taparsiajari ma boasa rikkot, (1) manjumolohon ulaon marbarita, (2) sabar, dohot (3) toktong togu haporseaotta.

4. Boasa ikkon toktong tajumolohon ulaon na dilehon Jahowa tu hita?

⁴ Dipaboa Jesus do songon dia pangalaho ni akka halak di ari parpudi jala aha na lao masa di tikki i. Boi do on mambahen akka siseanna dang be manjumolohon ulaon marbarita. Alani i, didok Jesus do tu akka siseanna, “Sai jaga ma hamu.” (Mat. 24:42) Di jaman ni si Noak, godang do ulaon ni halak na mambahen nasida dang olo be manangihon sipasingot na dipaboa ibana. Saonari pe, boi do  situasi na sarupa masa tu hita. (Mat. 24:37-39; 2 Ptr. 2:5) Alani i, ikkon toktong do tajumolohon ulaon na dilehon Jahowa on tu hita.

5. Songon na tarsurat di Ulaon ni Apostel 1:6-8, sahat tu dia do barita na uli on ikkon dipasahat?

⁵ Ikkon toktong do tajumolohon ulaon marbarita na uli saonari. Nungnga disurirangkon Jesus hian torus do akka siseanna marbarita nang pe nungnga mate ibana. Jala umbalga do na diulahon siseanna sian na diulahon Jesus tikki mangolu di tano on. (Joh. 14:12) Dung mate Jesus, adong do sian akka siseanna i na mulak muse manakkup dekke. Dung hehe Jesus, diurupi ibana do akka siseanna manakkup godang dekke marhite mukjizat. Dung dibahen Jesus mukjizat i, dipatakkas Jesus do muse tu akka siseanna, molo ulaon marbarita dohot mambahen sisean do na uppetting na ikkon diulahon nasida. (Joh. 21:15-17) Andorang so nakkok Jesus tu surgo, dipaboa ibana do tu akka siseanna molo ulaon marbarita on dang holan diulahon di Israel. (Jaha Ulaon ni Apostel 1:6-8.) Di pudian ni ari, dilehon Jesus ma sada parnidaan tu Apostel Johannes na patuduhon aha na lao masa saleleng “ari ni Tuan”. * Diida ibana ma sada suru-suruan na mamboan “barita na uli sisaleleng ni lelengna” na dibaritahon “tu angka jolma na di tano on, tu saluhut bangso, marga dohot bahasa”. (Pgk. 1:10; 14:6) Takkas ma, lomo do roha ni Jahowa asa toktong hita marbarita na uli di liat portibi on sahat tu na sae.

6. Songon dia do carana asa boi toktong tajumolohon Harajaon ni Debata di ngolutta?

⁶ Boi do toktong tajumolohon ulaon marbarita na uli molo tarimangi songon dia cara ni Jahowa mangurupi hita.  Misalna, diparade Ibana do publikasi tercetak dohot elektronik, rekaman audio dohot video, dohot sude video na asing na adong di jw.org na boi patoguhon parale-aleotta tu Ibana. Boi do tadapot informasi di situs webta di lobi sian 1.000 bahasa! (Mat. 24:45-47) Di portibi on dang boi marsada akka jolma alani politik, agama, dohot status ekonomi na so sarupa. Alai di organisasi ni Jahowa, lobi sian ualu juta halak di liat portibi on marsada manomba Jahowa. Misalna, di ari Jumat tanggal 19 April 2019, sude Sitindangi Ni Jahowa di liat portibi on manotton sada video na mangulas ayat harian di bagasan sadari i. Di botarina i, adong ma 20.919.041 halak na dohot memperingati Ari Hamamate ni Jesus. Ala mangida sude na masa on, taronjar ma rohatta manjumolohon Harajaon ni Debata di ngolutta.

7. Songon dia do contoh ni Jesus mangurupi hita asa toktong manjumolohon ulaon marbarita?

⁷ Cara na asing asa boi toktong tajumolohon ulaon marbarita di ngolutta, i ma mangihutton contoh ni Jesus. Dang adong na boi mangabbati ibana manjumolohon ulaon marbarita di ngoluna. (Joh. 18:37) Dang olo Jesus manjalo “sude harajaon ni portibi on dohot hasangaponna” na dilehon Sibolis tu ibana. Jala dang olo tong Jesus gabe raja di portibi on. (Mat. 4:8, 9; Joh. 6:15) Dang hea tarpikkir ibana naeng mamora, jala dang mabiar ibana nang pe adong paraloan. (Luk. 9:58; Joh. 8:59) Tikki diuji haporseaotta, boi do toktong tajumolohon ulaon marbarita molo taingot poda ni Apostel Paulus. Dijujui ibana do asa tatiru contoh ni Jesus, asa ‘unang loja jala unang mandele’ hita.​—Heb. 12:3.

8. Songon dia do halak na sabar i, jala boasa porlu hita sabar saonari?

⁸ Lomo do ra rohatta asa hatop ma nian sae situasi na maol na taadopi. Manang tarpaima do hita asa denggan situasitta. Alai halak na sabar tenang do paimahon sappe muba situasi. Sai tarpaima-ima do Panurirang Habakuk asa unang adong be hajahaton di Juda. (Hab. 1:2) Sai tarpaima-ima do tong akka sisean ni Jesus, asa pittor ro Harajaon ni Debata, jala boi ma nasida dipalua sian pamarettaon ni Rom. (Luk. 19:11) Tarpaima do hita muse tu Harajaon ni Debata na lao pasaehon hajahaton, jala mambahen tano on gabe inganan ni akka halak na mangulahon paretta ni Debata. (2 Ptr. 3:13) Alai ikkon sabar do hita paimahon sahat tu na ro tikki naung ditottuhon Jahowa. Taulas ma akka contoh na dibahen Jahowa lao mangajari hita asa boi sabar.

9. Akka contoh aha do na patuduhon na sabar do Jahowa?

⁹ Jahowa do contoh na dumenggan taringot patuduhon hasabaron. Dilehon Jahowa do tikki tu si Noak lao mambahen parau, jala gabe “sahalak parbarita hatigoran”. (2 Ptr. 2:5; 1 Ptr. 3:20) Sabar do Jahowa manangihon sukkun-sukkun ni si Abraham na marulak-ulak taringot keputusanna lao manghancurhon kota Sodom dohot Gomora. (1 Mus. 18:20-33) Saleleng marratus taon sai torus do sabar Jahowa tu halak Israel na so setia. (Neh. 9:30, 31) Saonari pe sabar do Jahowa mangalehon tikki tu akka halak asa “marhamubaon”. (2 Ptr. 3:9; Joh. 6:44; 1 Tim. 2:3, 4) Contoh na dibahen Jahowa mangurupi hita asa toktong sabar tikki marbarita dohot mangajari. Diajari Ibana  do hita muse asa sabar marhite tudosan na adong di Bibel.

10. Songon na disurat di Jakobus 5:7, 8, aha do na boi tatiru sian sahalak pangula?

¹⁰ Jaha Jakobus 5:7, 8. Diajari Jahowa do hita muse asa sabar sian contoh pangula na manuan suan-suanan. Adong do memang suan-suanan na hatop tubu. Alai, suan-suanan na marparbue ulleleng do biasana asa boi dipanen. Di Israel najolo, musim manuan lelengna hira-hira onom bulan. Mulai ma pangula manuan di ari udan na parjolo, na dimulai hira-hira parsitongaan ni bulan Oktober. Jala dipanen ma i di ari udan na parpudi na dimulai hira-hira parsitongaan ni bulan April. (Mrk. 4:28) Tatiru ma hasabaron ni pangula i, nang pe sipata dang sai mura mangulahon i.

11. Boasa porlu sabar hita di ulaon marbarita?

¹¹ Biasana jolma na so sempurna, sai naeng hatop do dapotna hasil ni karejona. Alai molo lomo rohatta asa tubu jala marparbue suan-suanatta porlu do tikki lao mangarawat i. Ikkon diombak do tanona, dung i disuan, dicabuti akka ramba, jala disirami suan-suanan i. Dos songon i ma, ikkon kerja keras do hita molo mambahen sisean. Porlu do ra tikki lao mangurupi parsiajar Bibelta asa patuduhon holong jala asa unang paimbar-imbarhon jolma. Molo sabar hita, dang gabe metmet rohatta tikki taadopi situasi na maol. Jala ikkon tong do sabar hita tikki adong halak na olo manangihon jala marsiajar. Alana, dang boi tapaksa asa pittor togu haporseaon ni parsiajar Bibelta. Sisean ni Jesus pe sipata dang sai mura mangattusi aha na diajarhon Jesus. (Joh. 14:9) Taingot ma, holan na manuan dohot na maniram do hita, alai Debata do na patubuhon.​—1 Kor. 3:6.

12. Songon dia do hita boi patuduhon hasabaron tikki marbarita tu keluarga na so Sitindangi?

¹² Maol do patuduhon hasabaron tikki marbarita na uli tu keluarga na so  Sitindangi. Alai, adong do prinsip na boi mangurupi hita di Parjamita 3:1, 7 Bibel siganup ari na mandok, “Adong do tingki hohom, adong do tingki mangkatai.” Molo denggan pangalahotta olo do ra keluargatta manangihon barita na tapaboa. Alai, ikkon sai rade do tong hita paboahon hasittongan tu nasida. (1 Ptr. 3:1, 2) Ikkon semangat do hita marbarita dohot mangajari. Alai ikkon toktong do sabar hita tu sude halak, termasuk ma i tu keluargatta na so Sitindangi.

13-14. Paboa ma contoh na boi tatiru taringot hasabaron.

¹³ Boi do tatiru hasabaron ni akka halak na setia na disurat di Bibel dohot di tikkinta saonari. Lomo do roha ni si Habakuk asa unang adong be hajahaton. Alai sabar do ibana paimahon alus ni Jahowa. (Hab. 2:1) Apostel Paulus pe lomo do rohana asa pittor sae ulaonna marbarita. Alai, toktong do ibana sabar “paboahon barita na uli”.​—Ul. 20:24.

¹⁴ Parrohahon ma pengalaman ni sapasang suami istri lulusan Gilead, na ditugashon tu sada negara. Otik do Sitindangi di negara i jala dang pola godang na maragama Kristen. Otik do muse halak na olo marsiajar Bibel disi. Hape dongan sakalas ni nasida na ditugashon tu negara na asing paboahon tu nasida, godang do halak na olo marsiajar jala ujungna gabe Sitindangi di negara i. Alai sabar do pasangan suami istri on marbarita, nang pe dang godang halak na olo manangihon barita na dipasahat nasida. Dung ualu taon nasida marbarita disi, ujungna las do roha ni nasida ala adong sahalak parsiajar Bibel ni nasida na tardidi. Aha do na boi taparsiajari sian contoh na disurat di Bibel dohot di tikkinta saonari? Toktong do nasida semangat marbarita, jala dipasu-pasu Jahowa do nasida ala toktong sabar. Tatiru ma “angka halak naung manjalo janji i, ala sabar nasida jala marhaporseaon”.​—Heb. 6:10-12.

15. Boasa gabe lam semangat hita marbarita molo togu haporseaotta?

¹⁵ Ala porsea hita tu barita na uli na tapasahat, lomo ma rohatta paboahon i tu godang halak sian nasa tolapta. Pos do rohatta tu janji na disurat di Bibel. (Ps. 119:42; Jes. 40:8) Taida do surirang na disurat di Bibel masa di tikkinta saonari. Taida do muse boi muba parngoluan ni sasahalak ala mangulahon prinsip ni Bibel. Sian akka bukti on, lam pos ma rohatta porlu do sude halak mambege barita Harajaon i.

16. Songon na disurat di Psalmen 46:2-4, songon dia do haporseaotta tu Jahowa dohot tu Jesus boi mambahen hita semangat marbarita?

¹⁶ Porsea do hita muse tu Jahowa na mangalehon barita na uli, dohot tu Jesus na dilantik Jahowa gabe Raja di Harajaonna. (Joh. 14:1) Dang soal songon dia situasi na taadopi, sai dilinggomi Jahowa do hita, jala dilehon Ibana do gogo tu hita. (Jaha Psalmen 46:2-4.) Asing ni i, pos do rohatta Jesus do na manguluhon ulaon on sian surgo. Jala dipakke ibana do huaso dohot gogo na dilehon Jahowa tu ibana.​—Mat. 28:18-20.

17. Boasa hita ikkon toktong marbarita na uli? Paboa ma sada contoh.

¹⁷ Haporseaotta na togu paposson rohatta pasu-pasuon ni Jahowa do ulaonta marbarita. Nang pe sipata di na so panagamanta do dipasu-pasu Jahowa i. (Pjm. 11:6) Misalna, adong maribu halak ganup ari mangida publikasitta di gerai  dohot di rak beroda. Adong do hasilna mamakke cara sisongon on? Adong. Parrohahon ma pengalaman na dipaboa di Pelayanan Kerajaan Kita bulan November 2014. Adong sahalak mahasiswa na naeng mambahen artikel taringot Sitindangi Ni Jahowa. Dang diboto ibana didia Bale Harajaon. Alai adong diida ibana gerai lektur di kampusna. Sian i, dapotna ma informasi na cocok tu artikelna i. Ujungna tardidi ma ibana jala nungnga gabe perintis biasa ibana saonari. Pengalaman on mambahen hita lam semangat marbarita na uli ala taboto godang dope halak na porlu manangihon barita na uli on.

18. Boasa boi pos rohatta na lao sae do ulaon marbarita pas di tikki naung ditottuhon Jahowa?

¹⁸ Pos ma rohatta pasti sae do ulaon marbarita on pas di tikkina. Sai tepat waktu do Jahowa tikki mangulahon lomo ni rohana. Parrohahon ma aha na masa di tikki ni si Noak. Nungnga ditottuhon Jahowa hian na lao masa ma Aek na Sumar hira-hira 120 taon andorang so ro i. Martaon-taon dukkon i, disuru Jahowa ma si Noak mambahen sada parau. Toktong do si Noak kerja keras, saleleng hira-hira 40 sahat tu 50 taon andorang so ro Aek na Sumar i. Jala dipasahat si Noak do barita panguhuman nang pe dang adong na manangihon. Toktong do diulahon ibana i sahat tu na disuru Jahowa pamasukkonna akka binatang tu bagasan parau i. Dung i “ditutup Jahowa ma pintu i”, pas di tikkina.​—1 Mus. 6:3; 7:1, 2, 16, Bibel siganup ari.

19. Aha do na tapaima molo toktong hita semangat marbarita?

¹⁹ Satokkin nai pasaehon ni Debata nama ulaon marbarita na uli. Dung i, hancurhononna ma portibi na dirajai Sibolis. Jala bahenonna ma portibi on gabe inganan ni akka halak na mangoloi Debata. Sahat tu na ro tikkina, toktong ma hita semangat marbarita, maniru si Noak, si Habakuk, dohot akka na asing na setia. Toktong ma tajumolohon ulaon marbarita, sabar, jala togu haporseaotta tu Jahowa dohot tu akka janjina.